৩. ততিযো পরিচ্ছেদো

ভেদসঙ্গহৰিভাগো

১২৩. এৰং ভেদসভাৰেসু, তেস্ৰেৰ পুন সঙ্গহং;

সভাৰত্থৰিসেসেহি, পৰক্খামি ইতো পরং.

১২৪. অসাধারণঞাণেহি, সত্থা ৰত্থুৰিৰেচকো;

সঙ্গহেত্ৰা সভাগেহি, ধম্মে দস্সেসি চক্খুমা.

১২৫. দিট্ঠিভিনিৰেসট্ঠেন, যথাভূতসভাৰতো;

পরমামসতিচ্চেকা, পরামাসোতি ভাসিতা.

১২৬. কিলেসাসুচিভাৰেন, ৰণস্সাৰরসো ৰিয;

আলিম্পন্তাৰ সন্তানং, সৰন্তীতি পকাসিতা.

১২৭. কামতণ্হা ভৰতণ্হা, দিট্ঠাৰিজ্জাতি আসৰা;

চত্তারো আসৰট্ঠেন, তযো ধম্মা সভাৰতো.

১২৮. এতেৰো ঘাতি ৰুত্তাৰ, দ্ৰারালম্বাভিৰাহিনো;

ওত্থরিত্ৰা পরাভূতে, হরন্তা পাণিনো ভৰে.

১২৯. যোগাতি চাহু তে এৰ, পাণিনো ভৰযন্তকে;

দ্ৰারালম্বাভিসম্বন্ধা, যন্তবন্ধাৰ যোজিতা.

১৩০. সন্তানমধিগণ্হন্তা, মালুৰাৰ মহাতরুং;

গণ্হন্তা দল়্হমালম্বং, মণ্ডূকমিৰ পন্নগো.

১৩১. কামতণ্হা চ দিট্ঠি চ, উপাদানা চতুব্বিধা;

দিট্ঠি দিট্ঠিসীলব্বত-মত্তৰাদোতি ভেদিতা.

১৩২. কাযেন কাযং গন্থেন্তা, দুপ্পমুঞ্চানুৰেঠিনো;

কথিতা কাযগন্থাতি, তণ্হাব্যাপাদদিট্ঠিযো.

১৩৩. সীলব্বতপরামাসো, ইতি দিট্ঠি ৰিভেদিতা;

ইদংসচ্চাভিনিৰেসো, ইতি চেৰং চতুব্বিধা.

১৩৪. নেক্খম্মং পলিবোধেন্তা, ভাৰনাপরিপন্থকা;

সন্তানমণ্ডকোসাৰ, পরিযোনন্ধকাতি চ.

১৩৫. কামচ্ছন্দো চ ব্যাপাদো, থিনমিদ্ধঞ্চ সংসযো;

অৰিজ্জুদ্ধচ্চকুক্কুচ্চমিতি নীৰরণা মতা.

১৩৬. আগাল়্হং পরিযাদায, ওগয্হনুপ্পৰত্তিনো;

যোপ্পরোগাৰ সন্তান-মনুসেন্তীতি ভাসিতা.

১৩৭. কামরাগো ভৰরাগো, পটিঘো মানদিট্ঠিযো;

কঙ্খাৰিজ্জাতি সত্তেৰ, ছ ধম্মানুসযা মতা.

১৩৮. দ্ৰারালম্বণবন্ধেন, পাণীনং ভৰমণ্ডলে;

সংযোজনানি ৰুত্তানি, পাসবন্ধাৰ পক্খিনং.

১৩৯. কামরূপারূপরাগা, পটিঘো মোহসংসযো;

দিট্ঠি সীলব্বতং মানো, উদ্ধচ্চেন দসা ভৰে.

১৪০. রূপারূপরাগুদ্ধচ্চং, অভিধম্মে ৰিনা পুন;

ভৰরাগিস্স মচ্ছেরং, গহেত্ৰা দসধা সিযুং.

১৪১. সংক্লেপযন্তি সন্তানং, উপঘাতেন্তি পাণিনো;

সহজাতেক্লেসেন্তীতি, কিলেসাতি পকাসিতা.

১৪২. লোভো দোসো চ মোহো চ,

দিট্ঠি মানো চ সংসযো;

থিনাহিরিকনোত্তপ্প-

মুদ্ধচ্চেন সিযুং দস.

১৪৩. নৰসঙ্গহিতা এত্থ, দিট্ঠিলোভা পকাসিতা;

সত্তসঙ্গহিতাৰিজ্জা, পটিঘো পঞ্চসঙ্গহো.

১৪৪. চতুসঙ্গহিতা কঙ্খা, মানুদ্ধচ্চা তিসঙ্গহা;

দুকসঙ্গহিতং থীনং, কুক্কুচ্চমেকসঙ্গহং.

১৪৫. দ্ৰিধাহিরিকনোত্তপ্প-মিস্সামচ্ছরিযং তথা;

ইচ্চেৰং দসধা ৰুত্তা, পাপকেস্ৰেৰ সঙ্গহা.

১৪৬. পরামাসাসৰোঘা চ, যোগুপাদানগন্থতো;

নীৰারণানুসযতো, সংযোজনকিলেসতো.

১৪৭. চুদ্দসেৰ তু সঙ্খেপা, সত্তপঞ্ঞাস ভেদতো;

যথাধম্মানুসারেন, চিত্তুপ্পাদেসু যোজযে.

১৪৮. ততোপরে নোপরামা-সাদিভেদিতসঙ্গহা;

চিত্তং চেতসিকং রূপং, নিব্বানমিতি দীপযে.

১৪৯. ইচ্চাকুসলধম্মানং, ঞত্ৰা সঙ্গহমুত্তরং;

মিস্সকা নাম ৰিঞ্ঞেয্যা, যথাসম্ভৰতো কথং;

১৫০. লোভো দোসো চ মোহো চ,

একন্তাকুসলা তযো;

অলোভাদোসামোহো চ,

কুসলাব্যাকতা তথা.

১৫১. পাদপস্সেৰ মূলানি, থিরভাৰায পচ্চযা;

মূলভাৰেন ধম্মানং, হেতূ ধম্মা ছ দীপিতা.

১৫২. ৰিতক্কো চ ৰিচারো চ, পীতি চেকগ্গতা তথা;

সোমনস্সং দোমনস্সং, উপেক্খাতি চ ৰেদনা.

১৫৩. আহচ্চুপনিজ্ঝাযন্তা, নিজ্ঝানট্ঠেন পচ্চযা;

ঝানধম্মাতি সত্থাহ, পঞ্চ ৰত্থুসভাৰতো.

১৫৪. সম্মাদিট্ঠি চ সঙ্কপ্পো, ৰাযামো ৰিরতিত্তযং;

সম্মাসতি সমাধী চ, মিচ্ছাদিট্ঠি চ সম্ভৰা.

১৫৫. সম্মামিচ্ছা চ নীযন্তা, নিয্যানট্ঠেন পচ্চযা;

মগ্গঙ্গা দ্ৰাদসক্খাতা, নৰ ধম্মা সভাৰতো.

১৫৬. অত্তভাৰং পৰত্তেন্তা, ওজট্ঠমকৰেদনং;

পটিসন্ধিনামরূপ-মাহরন্তা যথাক্কমং.

১৫৭. কবল়ীকারো আহারো,

ফস্সো সঞ্চেতনা তথা;

ৰিঞ্ঞাণমিতি চত্তারো,

আহারাতি পকাসিতা.

১৫৮. ধম্মানং সহজাতানং, ইন্দ্রিযট্ঠেন পচ্চযা;

অত্তানমিস্সরট্ঠেন, অনুৰত্তাপকা তথা.

১৫৯. সদ্ধা চ সতি পঞ্ঞা চ, ৰীরিযেকগ্গতাপি চ;

ৰেদনা জীৰিতং চিত্তং, অট্ঠ রূপিন্দ্রিযানি চ.

১৬০. কথং জীৰিতমেকং তু, সুখং দুক্খন্তি ৰেদনা;

সোমনস্সং দোমনস্সং, উপেক্খাতি চ ভেদিতা.

১৬১. পঞ্ঞাদিমগ্গেনঞ্ঞাত-ঞ্ঞস্সামীতিন্দ্রিযং ভৰে;

মজ্ঝে অঞ্ঞিন্দ্রিযমন্তে, অঞ্ঞাতাৰিন্দ্রিযং তথা.

১৬২. সোল়সেৰ সভাৰেন, ইন্দ্রিযট্ঠৰিভাগতো;

ইন্দ্রিযানীতি ৰুত্তানি, বাৰীসতি ৰিভাৰযে.

১৬৩. দল়্হাধিট্ঠিতসন্তানা, ৰিপক্খেহি অকম্পিযা;

বলৰন্তসভাৰেন, বলধম্মা পকাসিতা.

১৬৪. সদ্ধা সতি হিরোত্তপ্পং, ৰীরিযেকগ্গতা তথা;

পঞ্ঞাহিরিকানোত্তপ্প-মিচ্চেৰং নৰধা মতা.

১৬৫. জেট্ঠা পুব্বঙ্গমট্ঠেন, পুঞ্ঞাপুঞ্ঞপৰত্তিযং;

পচ্চযাধিপ্পতেয্যেন, সহজানং যথারহং.

১৬৬. চত্তারোধিপতী ৰুত্তা, আধিপ্পচ্চসভাৰতো;

ছন্দো চিত্তঞ্চ ৰীরিযং, ৰীমংসাতি চ তাদিনা.

১৬৭. পঞ্চসঙ্গহিতা পঞ্ঞা, ৰাযামেকগ্গতা পন;

চতুসঙ্গহিতা চিত্তং, সতি চেৰ তিসঙ্গহা.

১৬৮. সঙ্কপ্পো ৰেদনা সদ্ধা, দুকসঙ্গহিতা মতা;

একেকসঙ্গহা সেসা, অট্ঠৰীসতি ভাসিতা;

ইচ্চেৰং সত্তধা ভেদো, ৰুত্তো মিস্সকসঙ্গহো.

১৬৯. হেতুঝানঙ্গমগ্গঙ্গা, আহারিন্দ্রিযতো তথা;

বলাধিপ্পতিতো চেৰ, পুঞ্ঞাপুঞ্ঞাদিমিস্সতা;

ছত্তিংসেৰ সভাৰেন, চতুসট্ঠি পভেদতো.

১৭০. ইচ্চেৰং সঙ্গহেত্ৰান, ৰিভাৰেয্য ততো পরং;

চিত্তুপ্পাদপভেদেসু, যথাসম্ভৰতো কথং.

১৭১. সিতাৰজ্জনৰিঞ্ঞাণং, সম্পটিচ্ছনতীরণা;

অট্ঠারসাহেতুকাৰ, মোমূহা একহেতুকা.

১৭২. সেসা তু কুসলা ঞাণৰিযুত্তা চ দ্ৰিহেতুকা;

চিত্তুপ্পাদাপরে সত্ত-চত্তালীস তিহেতুকা.

১৭৩. পঞ্চৰিঞ্ঞাণমজ্ঝানং, দ্ৰিঝানঙ্গিকমীরিতং;

চতুত্থপঞ্চমজ্ঝানং, তিঝানং ততিযং মতা.

১৭৪. চতুঝানং তু দুতিযং, কামে চ সুখৰজ্জিতা;

পঞ্চঝানং তু পঠমং, কামে চ সুখিতা মতা.

১৭৫. পঠমানুত্তরং ঝানং, অট্ঠমগ্গঙ্গিকং মতং;

সত্তমগ্গঙ্গিকং নাম, সেসঝানমনুত্তরং.

১৭৬. লোকিযং পঠমং ঝানং, তথা কামে তিহেতুকা;

পঞ্চমগ্গঙ্গিকা নাম, চিত্তুপ্পাদা পকাসিতা.

১৭৭. সেসং মহগ্গতং ঝানং, সম্পযুত্তা চ দিট্ঠিযা;

ঞাণেন ৰিপ্পযুত্তা চ, চতুমগ্গঙ্গিকা মতা.

১৭৮. পটিঘুদ্ধচ্চযুত্তা চ, ৰিপ্পযুত্তা চ দিট্ঠিযা;

তিমগ্গঙ্গং দুমগ্গঙ্গং, কঙ্খিতং সমুদীরিতং.

১৭৯. ন হোন্তাহেতুকে মগ্গা, চিত্তট্ঠিতি চ কঙ্খিতে;

ৰিদিতা নিযততা চ, লোকিযেসু ন উদ্ধটা.

১৮০. কামেসু কবল়ীকারো, অনাহারো অসঞ্ঞিনো;

চিত্তুপ্পাদেসু সব্বত্থ, আহারত্তযমীরিতং.

১৮১. ইন্দ্রিযানি ৰিভাৰেয্য, নৰধানুত্তরে বুধো;

অট্ঠধা সমুদীরেয্য, লোকিযেসু তিহেতুকে.

১৮২. সত্তধা পন ঞাণেন, ৰিপ্পযুত্তে পকাসযে;

সিতৰোট্ঠব্বনাপুঞ্ঞে, পঞ্চধা কঙ্খিতে পন.

১৮৩. চতুধা তিৰিধা সেসে, চিত্তুপ্পাদে সমীরযে;

তিহেতুকা সত্তবলা, ছবলা তু দুহেতুকা.

১৮৪. চতুবলা অকুসলা, কঙ্খিতং তিবলং মতং;

দ্ৰিবলং সিতৰোট্ঠব্ব-মবলং সেসমীরিতং.

১৮৫. জৰনেধিপতীনং তু, যো কোচেকো তিহেতুকে;

দ্ৰিহেতুকে ৰা কুসলে, ৰীমংসা নোপলব্ভতি.

১৮৬. লোকিযেসু ৰিপাকেসু,

মোহমূলে অহেতুকে;

যথাসম্ভৰৰুত্তিত্তা,

নত্থাধিপতি কোচিপি.

১৮৭. সম্ভোতি কাযৰিঞ্ঞাণে, পুঞ্ঞপাকে সুখিন্দ্রিযং;

দুক্খিন্দ্রিযম্পি তত্থেৰ, পাপপাকম্হি ভাসিতং.

১৮৮. সন্তীরণঞ্চ হসনং, সোমনস্সানি সোল়স;

পঠমাদিচতুজ্ঝানং, সোমনস্সযুতং ভৰে.

১৮৯. দোমনস্সযুত্তা দ্ৰেৰ, চিত্তুপ্পাদা পকাসিতা;

তদঞ্ঞে পন সব্বেপি, পঞ্চপঞ্ঞাসুপেক্খকা.

১৯০. ৰেদনাসম্পযোগঞ্চ, ৰিনিব্ভুজ্জেৰমট্ঠধা;

হেতুযোগাদিভেদেহি, চিত্তুপ্পাদা পকাসিতা.

১৯১. তংতংৰিযোগভেদঞ্চ, পচ্চেকমথ মিস্সিতং;

যথাৰুত্তানুসারেন, যথাসম্ভৰতো নযে.