২. দুতিযো পরিচ্ছেদো

লক্খণরসুপট্ঠানৰিভাগো

৬৭. সভাৰো লক্খণং নাম, কিচ্চসম্পজ্জনা রসো;

গয্হাকারো উপট্ঠানং, পদট্ঠানং তু পচ্চযো.

৬৮. অত্তুপলদ্ধিসঙ্খাতা, সম্পত্তা চ পনত্থতো;

লক্খণরসুপট্ঠানা, ৰোহারাভোগভেদিতা.

৬৯. তেপঞ্ঞাসসভাৰেসু, তস্মা ভেদং যথারহং;

লক্খণাদিপ্পকারেহি, পৰক্খামি ইতো পরং.

৭০. চিন্তেতীতি ভৰে চিত্তং, চিন্তনমত্তমেৰ ৰা;

সম্পযুত্তাথ ৰা তেন, চিন্তেন্তীতি চ গোচরং.

৭১. ফুসতীতি ভৰে ফস্সো, ফুসনং ৰাথ কেৰলং;

সম্পযুত্তাথ ৰা তেন, ফুসন্তীতি চ গোচরং.

৭২. এৰং কত্তরি ভাৰে চ, করণে চ যথারহং;

তেপঞ্ঞাসসভাৰেসু, সদ্দনিব্বচনং নযে.

৭৩. আলম্বণমনং চিত্তং, তংৰিজাননলক্খণং;

সহজাধিট্ঠানরসং, চিন্তাকপ্পোতি গয্হতি.

৭৪. আলম্বণসমোধানো,

ফস্সো ফুসনলক্খণো;

সঙ্ঘট্টনরসো তত্থ,

সন্নিপাতোতি গয্হতি.

৭৫. ৰেদনালম্বণরসা, সা ৰেদযিতলক্খণা;

গোচরানুভৰরসা, অনুভুত্তীতি গয্হতি.

৭৬. আকারগহণং সঞ্ঞা, সা সঞ্জাননলক্খণা;

নিমিত্তুপ্পাদনরসা, উপলক্খাতি গয্হতি.

৭৭. চেতনা চিত্তৰিপ্ফারা, সাযং ব্যাপারলক্খণা;

কম্মন্তাযূহনরসা, সংৰিধানন্তি গয্হতি.

৭৮. একগ্গতা অৰিক্খেপো, সাৰিসাহারলক্খণা;

সম্পিণ্ডনরসা চিত্তং, সমোধানন্তি গয্হতি.

৭৯. যাপনং সহজাতান-মনুপালনলক্খণং;

জীৰিতং জীৰনরসং, আযুবন্ধোতি গয্হতি.

৮০. সারণা মনসীকারো, সমন্নাহারলক্খণো;

সংযোজনরসো চিত্ত-পটিপত্তীতি গয্হতি.

৮১. সঙ্কপ্পনলক্খণো তক্কো, সহজাভিনিরোপনো;

আলম্বাহননরসো, সন্নিরুজ্ঝোতি গয্হতি.

৮২. ৰিচারো অনুসন্ধানো, অনুমজ্জনলক্খণো;

চিত্তানুযোজনরসো, অনুপেক্খাতি গয্হতি.

৮৩. অধিমোক্খো অসংসপ্পো, সুসন্নিট্ঠানলক্খণো;

নিচ্চলাপাদনরসো, দল়্হৰুত্তীতি গয্হতি.

৮৪. ৰীরিযং পন ৰাযামো, মহুস্সাহনলক্খণো;

কিচ্চাসংসীদনরসো, উপত্থম্ভোতি গয্হতি.

৮৫. আলম্বত্থিকতা ছন্দো, কত্তুকামতলক্খণো;

আলম্বণেসনরসো, হত্থাদানন্তি গয্হতি.

৮৬. সহজাতানুফরণা, সম্পিযাযনলক্খণা;

সম্পীননরসা পীতি, পামোজ্জমিতি গয্হতি.

৮৭. চেতোসদ্দহনং সদ্ধা, ভূতোকপ্পনলক্খণা;

হিতপক্খন্দনরসা, অধিমুত্তীতি গয্হতি.

৮৮. অসম্মোসা সভাৰেসু, সতি ধারণলক্খণা;

ধম্মাপিলাপনরসা, অপ্পমাদোতি গয্হতি.

৮৯. হিরী জেগুচ্ছা পাপেসু, সা হরাযনলক্খণা;

হীল়সংকোচনরসা, পাপলজ্জাতি গয্হতি.

৯০. পাপসারজ্জমোত্তপ্পং, উব্বেগুত্তাসলক্খণং;

ভযসঙ্কোচনরসং, অৰিস্সাসোতি গয্হতি.

৯১. অলোভো অনভিসঙ্গো, অপরিগ্গহলক্খণো;

মুত্তপ্পৰত্তনরসো, অসংসগ্গোতি গয্হতি.

৯২. অদোসো চিত্তসাখল্যং, অব্যাপজ্জনলক্খণো;

সণ্হপ্পৰত্তনরসো, সোম্মভাৰোতি গয্হতি.

৯৩. অমোহো খলিতাভাৰো, পটিৰিজ্ঝনলক্খণো;

ৰিসযোভাসনরসো, পটিবোধোতি গয্হতি.

৯৪. তত্রমজ্ঝত্ততোপেক্খা, সমীকরণলক্খণা;

অপক্খপাতনরসা, সমৰাহোতি গয্হতি.

৯৫. পস্সদ্ধি কাযচিত্তানং, দরথাভাৰলক্খণা;

অপরিপ্ফন্দনরসা, সীতিভাৰোতি গয্হতি.

৯৬. লহুতা কাযচিত্তানং, অদন্ধাকারলক্খণা;

অৰিত্থাররসা সল্লহুকৰুত্তীতি গয্হতি.

৯৭. মুদুতা কাযচিত্তানং, কক্খল়াভাৰলক্খণা;

কিচ্চাৰিরোধনরসা, অনুকুল্যন্তি গয্হতি.

৯৮. কম্মঞ্ঞতা উভিন্নম্পি, অলংকিচ্চস্স লক্খণা;

পৰত্তিসম্পত্তিরসা, যোগভাৰোতি গয্হতি.

৯৯. তথা পাগুঞ্ঞতা দ্ৰিন্নং, ৰিসদাকারলক্খণা;

সুখপ্পৰত্তনরসা, সেরিভাৰোতি গয্হতি.

১০০. উজুতা কাযচিত্তানং, কুটিলাভাৰলক্খণা;

জিম্হনিম্মদনরসা, উজুৰুত্তীতি গয্হতি.

১০১. সম্মাৰাচা ৰচীসুদ্ধি, ৰাচাসংযমলক্খণা;

মিচ্ছাৰাচোরমরসা, ৰচীৰেলাতি গয্হতি.

১০২. সম্মাকম্মং ক্রিযাসুদ্ধং, সম্মাকরণলক্খণং;

মিচ্ছাকম্মোরমরসং, ক্রিযাৰেলাতি গয্হতি.

১০৩. সম্মাজীৰো ৰিসুদ্ধেট্ঠি, অল্লিট্ঠাজীৰলক্খণো;

মিচ্ছাজীৰোরমরসো, সম্মাৰুত্তীতি গয্হতি.

১০৪. করুণা দীনসত্তেসু, দুক্খাপনযলক্খণা;

সোত্থিতাপত্থনরসা, অনুকম্পাতি গয্হতি.

১০৫. সুখট্ঠিতেসু মুদিতা, অনুমোদনলক্খণা;

চেতোৰিকাসনরসা, অৰিরোধোতি গয্হতি.

১০৬. চেতোসারজ্জনা লোভো, অপরিচ্চাগলক্খণো;

আলম্বগিজ্ঝনরসো, অভিলগ্গোতি গয্হতি.

১০৭. চেতোব্যাপজ্জনং দোসো, সম্পদুস্সনলক্খণো;

আলম্বণঘাতরসো, চণ্ডিক্কমিতি গয্হতি.

১০৮. চেতোসম্মুয্হনং মোহো,

সো সম্মুয্হনলক্খণো;

সভাৰচ্ছাদনরসো,

অন্ধভাৰোতি গয্হতি.

১০৯. পাপাজিগুচ্ছাহিরিকং, নিল্লজ্জাকারলক্খণং;

পাপোপলাপনরসং, মলগ্গাহোতি গয্হতি.

১১০. অসারজ্জনমনোত্তপ্পমনুত্তাসনলক্খণং;

পাপপক্খন্দনরসং, পাগব্ভমিতি গয্হতি.

১১১. দিট্ঠি দল়্হৰিপল্লাসো, সা পরামাসলক্খণা;

তুচ্ছাভিনিৰেসনরসা, মিচ্ছাগাহোতি গয্হতি.

১১২. ‘‘অহস্মী’’তি মঞ্ঞমানো, সো সমুন্নতিলক্খণো;

কেতুসম্পগ্গহরসো, অহংকারোতি গয্হতি.

১১৩. পরসম্পত্তীসু ইস্সা, অক্খমাকারলক্খণা;

চেতোৰিকুচনরসা, ৰিমুখত্তন্তি গয্হতি.

১১৪. পরিগ্গহেসু মচ্ছেরং, সন্নিগূহনলক্খণং;

সামঞ্ঞাসহনরসং, ৰেৰিচ্ছমিতি গয্হতি.

১১৫. চেতোপহননং থীনং, তং সংসীদনলক্খণং;

উস্সাহভঞ্জনরসং, সংখিত্তত্তন্তি গয্হতি.

১১৬. ৰিঘাতো সহজাতানং, মিদ্ধং মোহনলক্খণং;

সত্তিসংভঞ্জনরসং, আতুরত্তন্তি গয্হতি.

১১৭. উদ্ধচ্চং চিত্তৰিক্খেপো, অৰূপসমলক্খণং;

চেতোনৰট্ঠানরসং, ভন্তত্তমিতি গয্হতি.

১১৮. ৰিপ্পটিসারো কুক্কুচ্চমনুসোচনলক্খণং;

অত্তানুসোচনরসং, পচ্ছাতাপোতি গয্হতি.

১১৯. কঙ্খাযনা ৰিচিকিচ্ছা, অসন্নিট্ঠানলক্খণা;

অনেকগাহনরসা, অপ্পতিট্ঠাতি গয্হতি.

১২০. ইচ্চেৰং লক্খণাদীহি, ৰিভাৰেয্য ৰিচক্খণো;

তেপঞ্ঞাসসভাৰেসু, সভাৰাকারলক্খণং.

১২১. লক্খণত্থকুসলা সলক্খণে,

লক্খণত্থপরমেপি কেৰলং;

লক্খণুগ্গহসুখায ৰণ্ণযুং,

লক্খণাদিমুখতো সলক্খণং.

১২২. অত্থং তমেৰমনুগম্ম মযেত্থ ৰুত্ত-

মত্থানমত্থনযনত্থমনেকধাপি;

পত্থেয্য মেত্থ ৰচনত্থনযেহি ঞাণ-

মত্থেসু বুদ্ধৰচনত্থনযত্থিকেহি.

ইতি নামরূপপরিচ্ছেদে লক্খণরসুপট্ঠানৰিভাগো নাম

দুতিযো পরিচ্ছেদো.