১. পঠমো পরিচ্ছেদো

নামত্তযৰিভাগো

৩. তত্থ চিত্তং চেতসিকং, নিব্বানন্তি মতং তিধা;

নামং রূপং তু দুৰিধং, ভূতোপাদাযভেদতো.

৪. কামভূমাদিভেদেন, তত্থ চিত্তং চতুব্বিধং;

চেতোযুত্তা দ্ৰিপঞ্ঞাস, ধম্মা চেতসিকা মতা.

৫. চক্খুসোতঘানজিৰ্হা-কাযৰিঞ্ঞাণধাতুযো;

সম্পটিচ্ছনচিত্তঞ্চ, তথা সন্তীরণদ্ৰযং.

৬. সোমনস্সসহগতং, উপেক্খাসহিতন্তি চ;

ইচ্চাহেতুকচিত্তানি, পুঞ্ঞপাকানি অট্ঠধা.

৭. সোমনস্সযুতং তত্থ, হিত্ৰা সন্তীরণং তথা;

সত্তাকুসলপাকানি, তানেৰাতি ৰিনিদ্দিসে.

৮. পঞ্চদ্ৰারমনোদ্ৰারাৰজ্জনং হসনন্তি চ;

ক্রিযচিত্তমুদীরিতং, তিৰিধম্পি অহেতুকং.

৯. এৰং অট্ঠারসৰিধং, মানসং হোতিহেতুকং;

মূলভেদেনাকুসলং, চিত্তং তু তিৰিধং মতং.

১০. সোমনস্সসহগতং, উপেক্খাসহিতং তথা;

দিট্ঠিগতসম্পযুত্তং, ৰিপ্পযুত্তন্তি ভেদিতং.

১১. অসঙ্খারং সসঙ্খারমিতি ভিন্নং পনট্ঠধা;

লোভমূলং পকাসেন্তি, তত্থাকুসলমানসং.

১২. দোমনস্সসহগতং, পটিঘেন সমাযুতং;

দোসমূলমসঙ্খারং, সসঙ্খারন্তিপি দ্ৰিধা.

১৩. ৰিচিকিচ্ছাসহগতং, উদ্ধচ্চসহিতন্তি চ;

মোহমূলঞ্চ দুৰিধং, উপেক্খায সমাযুতং.

১৪. দ্ৰাদসাকুসলানেৰং, চিত্তানীতি ৰিভাৰযে;

হিত্ৰাহেতুকপাপানি, সোভনানি ততো পরং.

১৫. সোমনস্সসহগতং, উপেক্খাসহিতং তথা;

দ্ৰিধা ঞাণেন সংযুত্তং, ৰিপ্পযুত্তন্তি ভেদিতং.

১৬. অসঙ্খারং সসঙ্খারমিতি ভিন্নং পনট্ঠধা;

সহেতুকামাৰচর-পুঞ্ঞপাকক্রিযা ভৰে.

১৭. কামে তেৰীস পাকানি, পুঞ্ঞাপুঞ্ঞানি ৰীসতি;

একাদস ক্রিযা চেতি, চতুপঞ্ঞাস সব্বথা.

১৮. তক্কচারপীতিসুখেকগ্গতাসহিতং পন;

পঠমজ্ঝানকুসলং, ৰিপাকঞ্চ ক্রিযা তথা.

১৯. দুতিযং তক্কতো হীনং, ততিযং তু ৰিচারতো;

চতুত্থং পীতিতো হীনং, উপেক্খেকগ্গতাযুতং.

২০. পঞ্চমং পঞ্চদসধা, রূপাৰচরমীরিতং;

পঞ্চমজ্ঝানমেৰেকমরূপাৰচরং পন.

২১. আকাসানঞ্চাযতনং, পুঞ্ঞপাকক্রিযা তথা;

ৰিঞ্ঞাণঞ্চাযতনঞ্চ, আকিঞ্চঞ্ঞাযতনকং;

নেৰসঞ্ঞানাসঞ্ঞাযতনং দ্ৰাদসধা ভৰে.

২২. সোতাপত্তিমগ্গচিত্তং, ফলচিত্তং তথাপরং;

সকদাগামানাগামি, অরহত্তন্তি অট্ঠধা.

২৩. ঝানঙ্গযোগভেদেন, কত্ৰেকেকং তু পঞ্চধা;

ৰিত্থারানুত্তরং চিত্তং, চত্তালীসৰিধং ভৰে.

২৪. রূপাৰচরচিত্তানি, গয্হন্তানুত্তরানি চ;

পঠমাদিজ্ঝানভেদে, আরুপ্পঞ্চাপি পঞ্চমে.

২৫. দ্ৰাদসাকুসলানেৰং, কুসলানেকৰীসতি;

ছত্তিংসেৰ ৰিপাকানি, ক্রিযচিত্তানি ৰীসতি.

২৬. একৰীসসতং ৰাথ, একূননৰুতীৰিধং;

চিত্তং তংসম্পযোগেন, ভিন্না চেতসিকা তথা.

২৭. ফস্সো চ ৰেদনা সঞ্ঞা, চেতনেকগ্গতা তথা;

জীৰিতং মনসীকারো, সব্বসাধারণা মতা.

২৮. তক্কচারাধিমোক্খা চ, ৰীরিযং ছন্দপীতিযো;

পকিণ্ণকা ছ অক্খাতা, তেরসঞ্ঞসমানতা.

২৯. পকিণ্ণকা ন ৰিঞ্ঞাণে, ৰিতক্কো দুতিযাদিসু;

ৰিচারো ততিযাদিম্হি, অধিমোক্খো তু কঙ্খিতে.

৩০. সন্তীরণমনোধাতুত্তিকেসু ৰীরিযং তথা;

চতুত্থসুখিতে পীতি, ছন্দোহেতুম্হি মোমুহে.

৩১. ছসট্ঠি পঞ্চপঞ্ঞাস, একাদস চ সোল়স;

সত্ততি ৰীসতি চেৰ, তানি চিত্তানি দীপযে.

৩২. মোহাহিরিকানোত্তপ্প-মুদ্ধচ্চং সব্বপাপজং;

ইস্সামচ্ছেরকুক্কুচ্চদোসা তু পটিঘে তথা.

৩৩. লোভো লোভে তু দিট্ঠি চ, দিট্ঠিযুত্তে ৰিযুত্তকে;

মানো চ থিনমিদ্ধং তু, সসঙ্খারেসু পঞ্চসু.

৩৪. কঙ্খিতে ৰিচিকিচ্ছাতি, চুদ্দসাকুসলানিমে;

দ্ৰাদসাকুসলেস্ৰেৰ, নিযমেন ৰৰত্থিতা.

৩৫. সদ্ধা সতি হিরোত্তপ্পং, অলোভাদোসমজ্ঝতা;

কাযচিত্তানং পস্সদ্ধি, লহুতা মুদুতা তথা.

৩৬. কম্মঞ্ঞতা চ পাগুঞ্ঞউজুতাতি যুগা ছ চ;

একূনৰীসতি ধম্মা, অঞ্ঞমঞ্ঞাৰিযোগিনো;

একূনসট্ঠিচিত্তেসু, সোভনেসু পৰত্তিতা.

৩৭. সম্মাৰাচা চ কম্মন্তাজীৰাতি ৰিরতী ইমা;

লোকুত্তরে সদা সব্বা, সহ কামসুভে ৰিসুং.

৩৮. করুণামুদিতা নানা, রূপে পঞ্চমৰজ্জিতে;

কদাচি কামে কুসলে, ক্রিযচিত্তে সহেতুকে.

৩৯. তিহেতুকেসু চিত্তেসু, পঞ্ঞা সব্বত্থ লব্ভতি;

এতে সদ্ধাদযো ধম্মা, পঞ্চৰীসতি সোভনা.

৪০. ইস্সামচ্ছেরকুক্কুচ্চৰিরতীকরুণাদযো;

নানা কদাচি মানো চ, থিনমিদ্ধং তথা সহ.

৪১. সত্ত সব্বত্থ জাযন্তি, ছ তু ধম্মা যথারহং;

চুদ্দসাকুসলেস্ৰেৰ, সোভনেস্ৰেৰ সোভনা.

৪২. দ্ৰেপঞ্ঞাস পনিচ্চেৰং, ধম্মে সঙ্গয্হ মানসে;

লব্ভমানে ৰিভাৰেয্য, পচ্চেকম্পি ৰিচক্খণো.

৪৩. সোভনঞ্ঞসমানা চ, পঠমে ৰিরতী ৰিনা;

দুতিযাদীসু তক্কঞ্চ, ৰিচারং ততিযাদিসু.

৪৪. চতুত্থাদীসু পীতিঞ্চ, করুণাদিঞ্চ পঞ্চমে;

হিত্ৰা নেৰ ৰিযোজেয্য, সঙ্খিপিত্ৰান পঞ্চধা.

৪৫. পঞ্চতিংস চতুত্তিংস, তেত্তিংস চ যথাক্কমং;

দ্ৰত্তিংস তিংস এৰাথ, জাযন্তীতি মহগ্গতে.

৪৬. গহেত্ৰা ৰিরতী সব্বা, হিত্ৰান করুণাদযো;

পঠমে দুতিযাদিম্হি, ৰিতক্কাদিং ৰিনা তথা.

৪৭. পঞ্চধাৰ গণেয্যেৰং, ছত্তিংসা চ যথাক্কমং;

পঞ্চতিংস চতুত্তিংস, তেত্তিংসদ্ৰযমুত্তরে.

৪৮. সোভনঞ্ঞসমানা চ, কামেসু কুসলে ক্রিযে;

হিত্ৰা ৰিরতিযো পাকে, ৰিরতীকরুণাদযো.

৪৯. ঞাণযুত্তে সোমনস্সে, ৰিযুত্তে ঞাণৰজ্জিতা;

উপেক্খকে পীতিহীনা, ৰিপ্পযুত্তে দ্ৰযং ৰিনা.

৫০. চতুধা তিৰিধেস্ৰেৰং, ৰিগণেয্য দ্ৰযং দ্ৰযং;

ন সন্তুপেক্খাসহিতে, করুণাদীতি কেচন.

৫১. অট্ঠতিংস সত্ততিংসদ্ৰযং ছত্তিংসকং সুভে;

পঞ্চতিংস চতুত্তিংসদ্ৰযং তেত্তিংসকং ক্রিযে.

৫২. তেত্তিংস পাকে দ্ৰত্তিংসদ্ৰযেকতিংসকং ভৰে;

সহেতুকামাৰচরপুঞ্ঞপাকক্রিযামনে.

৫৩. মোহাদযো সমানা চ, পঠমে লোভদিট্ঠিযা;

ততিযে লোভমানেন, জাযন্তেকূনৰীসতি.

৫৪. অট্ঠারস পীতিহীনা, পঞ্চমে সত্তমে তথা;

নৰমে দোসকুক্কুচ্চমচ্ছরিস্সাহি ৰীসতি.

৫৫. পঠমাদীসু ৰুত্তাৰ, দুতিযাদীসু জাযরে;

থিনমিদ্ধেনেকৰীস, ৰীস দ্ৰেৰীসতিক্কমা.

৫৬. ছন্দপীতিং ৰিনুদ্ধচ্চে, কঙ্খিতে নিচ্ছযং ৰিনা;

পঞ্চদসেৰ কঙ্খায, অসুভেসু ৰিভাৰযে.

৫৭. সিতে সমানা নিচ্ছন্দা, দ্ৰাদসেকাদসেৰ তু;

পীতিং হিত্ৰান ৰোট্ঠব্বে, ৰীরিযং সুখতীরণে.

৫৮. দ্ৰযং হিত্ৰা মনোধাতু, উপেক্খাতীরণে দস;

সত্ত সাধারণা এৰ, পঞ্চৰিঞ্ঞাণসম্ভৰা.

৫৯. ইতি চেতসি সম্ভূতা,

দ্ৰেপঞ্ঞাস যথারহং;

ঞেয্যা চেতসিকা ধম্মা,

চেতোভেদপ্পভেদিনো.

৬০. সুঞ্ঞতঞ্চানিমিত্তঞ্চ, তথাপণিহিতন্তি চ;

তিৰিধাকারমীরেন্তি, নিব্বানমমতং বুধা.

৬১. যং আরব্ভ পৰত্তন্তং, তত্থানুত্তরমানসং;

সুঞ্ঞতাদিৰিমোক্খোতি, নামমালম্বতো লভে.

৬২. সোপাদিসেসনিব্বানধাতু চেৰ তথাপরা;

অনুপাদিসেসা চাতি, দুৰিধা পরিযাযতো.

৬৩. তদেতং ৰাননিক্খন্তমচ্চন্তং সন্তিলক্খণং;

অস্সাসকরণরসং, খেমভাৰেন গয্হতি.

৬৪. তং নামেতীতি নিব্বানং, নমন্তীতি ততোপরে;

তেপঞ্ঞাসাতি নামানি, চতুপঞ্ঞাস সব্বথা.

৬৫. চিত্তচেতসিকযোজনানযং,

চিত্তমুত্তমমিদং পকাসিতং;

সাধু চেতসি নিধায পণ্ডিতা,

সাধু সাসনধরা ভৰন্তি তে.

৬৬. বুদ্ধপ্পৰত্তমৰগাহিতবোধিঞাণ-

মিচ্চাভিধম্মমৰগাহিতসব্বধম্মং;

ওগয্হ নামগতরাসিমসেসযিত্ৰা,

সঙ্গয্হ সব্বমিধ যোজিতমাদরেন.

ইতি নামরূপপরিচ্ছেদে নামত্তযৰিভাগো নাম

পঠমো পরিচ্ছেদো.