২০. ৰীসতিমো পরিচ্ছেদো

মগ্গামগ্গঞাণদস্সনৰিসুদ্ধিনিদ্দেসো

১২৬৩. কলাপসম্মসনেনেৰ,

যোগো করণিযো সিযা;

মগ্গামগ্গে তু ঞাণং ত-

মধিগন্তুং পনিচ্ছতা.

১২৬৪. পচ্চুপ্পন্নস্স ধম্মস্স, নিব্বত্তি উদযো মতো;

ৰযো ৰিপরিণামোতি, তস্সেৰ সমুদীরিতা.

১২৬৫. অনুপস্সনাপি ঞাণন্তি, ৰরঞাণেন দেসিতং;

সো পনেৰং পজানাতি, যোগাৰচরমাণৰো.

১২৬৬. ইমস্স নামরূপস্স, পুব্বে উপ্পত্তিতো পন;

নিচযো রাসি ৰা নত্থি, তথা উপ্পজ্জতোপি চ.

১২৬৭. রাসিতো নিচযা ৰাপি, নত্থি আগমনন্তি চ;

তথা নিরুজ্ঝমানস্স, ন দিসাগমনন্তি চ.

১২৬৮. নিরুদ্ধস্সাপি একস্মিং, ঠানে নত্থি চযোতি চ;

এত্থ ৰীণূপমা ৰুত্তা, এতস্সত্থস্স দীপনে.

১২৬৯. উদব্বযমনক্কারমেৰং সঙ্খেপতো পন;

কত্ৰা তস্সেৰ ঞাণস্স, ৰিভঙ্গস্স ৰসেন তু.

১২৭০. ‘‘অৰিজ্জাসমুদযা রূপসমুদযো’’তি হি আদিনা;

নযেনেকেকখন্ধস্স, উদযব্বযদস্সনে.

১২৭১. দস দসাতি কত্ৰান, ৰুত্তা পঞ্ঞাসলক্খণা;

তেসং পন ৰসেনাপি, ধম্মে সমনুপস্সতি.

১২৭২. এৰং রূপুদযো হোতি, এৰমস্স ৰযো ইতি;

উদেতি এৰং রূপম্পি, এৰং রূপং তু ৰেতি চ.

১২৭৩. এৰং পচ্চযতোপেত্থ, খণতো উদযব্বযং;

পস্সতো সব্বধম্মা চ, পাকটা হোন্তি তস্স তে.

১২৭৪. উদকে দণ্ডরাজীৰ, আরগ্গেরিৰ সাসপো;

ৰিজ্জুপ্পাদাৰ ধম্মা তে, পরিত্তট্ঠাযিনো সিযুং.

১২৭৫. কদলীসুপিনালাতচক্কমাযুপমা ইমে;

অসারা পন নিস্সারা, হুত্ৰা খাযন্তি যোগিনো.

১২৭৬. এৰমেত্তাৰতা তেন, উদযব্বযদস্সনং;

লক্খণানি চ পঞ্ঞাস, পটিৰিজ্ঝ ঠিতং পন.

১২৭৭. ঞাণং অধিগতং হোতি, তরুণং পঠমং পন;

যস্স চাধিগমা যোগী, হোতারদ্ধৰিপস্সকো.

১২৭৮. ৰিপস্সনায হেতায,

করুণাযাথ যোগিনো;

ৰিপস্সকস্স জাযন্তে,

উপক্লেসা দসেৰিমে.

১২৭৯. ওভাসো পীতি পস্সদ্ধি, ঞাণং সদ্ধা সতী সুখং;

উপেক্খা ৰীরিযং নিকন্তীতি, উপক্লেসা দসেৰিমে.

১২৮০. সম্পত্তপটিৰেধস্স, সোতাপন্নাদিনোপি চ;

তথা ৰিপ্পটিপন্নস্স, উপক্লেসা ন জাযরে.

১২৮১. সম্মাৰ পটিপন্নস্স, যুত্তযোগস্স ভিক্খুনো;

সদা ৰিপস্সকস্সেৰ, উপ্পজ্জন্তি কিরস্সু তে.

১২৮২. ৰিপস্সনায ওভাসো, ওভাসোতি পৰুচ্চতি;

তস্মিং পন সমুপ্পন্নে, যোগাৰচরভিক্খু সো.

১২৮৩. মগ্গপ্পত্তো ফলপ্পত্তো, অহমস্মীতি গণ্হতি;

অমগ্গংযেৰ মগ্গোতি, তস্সেৰং পন গণ্হতো.

১২৮৪. এৰং ৰিপস্সনাৰীথি,

ওক্কন্তা নাম হোতি সা;

ওভাসমেৰ সো ভিক্খু,

অস্সাদেন্তো নিসীদতি.

১২৮৫. পীতি ৰিপ্পস্সনাপীতি, তস্স তস্মিং খণে পন;

তদা পঞ্চৰিধা পীতি, জাযন্তে খুদ্দিকাদিকা.

১২৮৬. ৰিপস্সনায পস্সদ্ধি, পস্সদ্ধীতি পৰুচ্চতি;

যোগিনো কাযচিত্তানি, পস্সদ্ধানেৰ হোন্তি হি.

১২৮৭. লহূনি চ মুদূনেৰ, কম্মঞ্ঞানেৰ হোন্তি হি;

পস্সদ্ধাদীহি সো ভিক্খু, অনুগ্গহিতমানসো.

১২৮৮. অমানুসিং রতিং নাম,

অনুভোতি অনুত্তরং;

যং সন্ধায চ গাথাযো,

ভাসিতা হি মহেসিনা.

১২৮৯. ‘‘সুঞ্ঞাগারং পৰিট্ঠস্স, সন্তচিত্তস্স ভিক্খুনো;

অমানুসী রতি হোতি, সম্মা ধম্মং ৰিপস্সতো.

১২৯০. ‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি.

১২৯১. ঞাণাদযো উপক্লেসা, ঞেয্যা ৰুত্তনযেনিধ;

এতে দস উপক্লেসা, ৰজ্জনীযাৰ যোগিনা.

১২৯২. এত্থোভাসাদযো ধম্মা,

উপক্লেসস্স ৰত্থুতো;

উপক্লেসাতি নিদ্দিট্ঠা,

উপক্লেসনিকন্তি তু.

১২৯৩. তং তমাৰজ্জমানস্স, ভাৰনা পরিহাযতি;

অসত্তে সত্তসঞ্ঞী চ, হোতি অপ্পস্সুতো নরো.

১২৯৪. সব্বোভাসাদযো ধম্মে, ন মগ্গোতি ৰিচারযং;

মগ্গো ৰিপস্সনাঞাণং, ইচ্চেৰং পন পণ্ডিতো.

১২৯৫. ৰৰত্থপেতি মগ্গঞ্চ, অমগ্গঞ্চেৰ চেতসা;

তস্স চেৰং অযং মগ্গো, নাযং মগ্গোতি যোগিনো.

১২৯৬. মগ্গামগ্গঞ্চ ৰিঞ্ঞায, ঠিতঞাণমিদং পন;

মগ্গামগ্গেসুঞাণন্তি, ভূরিঞাণেন দেসিতং.

১২৯৭. মগ্গামগ্গঞাণদস্সনেসু কোৰিদা,

সারাসারৰেদিনো সমাহিতাহিতা;

মগ্গামগ্গঞাণদস্সনন্তি তং ইদং,

বুদ্ধা বুদ্ধসাৰকা ৰদন্তি ৰাদিনো.

ইতি অভিধম্মাৰতারে মগ্গামগ্গঞাণদস্সনৰিসুদ্ধিনিদ্দেসো

নাম ৰীসতিমো পরিচ্ছেদো.