২১. একৰীসতিমো পরিচ্ছেদো

১২৯৮. অট্ঠঞাণৰসেনেৰ, সিখাপক্কা ৰিপস্সনা;

নৰমং পটিপদাঞাণ-দস্সনন্তি পৰুচ্চতি.

১২৯৯. অট্ঠ ঞাণানি নামেত্থ, ৰেদিতব্বানি ৰিঞ্ঞুনা;

উপক্লেসৰিনিমুত্তং, ঞাণং সুৰিসদং পন.

১৩০০. উদযব্বযে চ ভঙ্গে চ, ভযে আদীনৰে তথা;

নিব্বিদাপস্সনাঞাণং, ঞাণং মুচ্চিতুকম্যতা.

১৩০১. পটিসঙ্খা চ সঙ্খারে, উপেক্খাঞাণমট্ঠমং;

ইমানি অট্ঠ ঞাণানি, নৰমং সচ্চানুলোমকং.

১৩০২. সচ্চানুলোমঞাণন্তি, অনুলোমং পৰুচ্চতি;

তং সম্পাদেতুকামেন, যোগাৰচরভিক্খুনা.

১৩০৩. উদযব্বযঞাণং তং, আদিং কত্ৰা পনট্ঠসু;

এতেসু পন ঞাণেসু, যোগো করণিযো পন.

১৩০৪. যথানুক্কমতো তস্স, তেসু ঞাণেসু অট্ঠসু;

অনিচ্চাদিৰসেনেৰ, যোগং কত্ৰা ঠিতস্স হি.

১৩০৫. অনিচ্চং দুক্খমনত্তাতি, সঙ্খারে অনুপস্সতো;

অট্ঠন্নং পন ঞাণানং, ৰসেন পন যোগিনো.

১৩০৬. ৰিপস্সনা সিখাপত্তা, হোতি ৰুট্ঠানগামিনী;

সচ্চানুলোমঞাণন্তি, অযমেৰ পৰুচ্চতি.

১৩০৭. সঙ্খারুপেক্খাঞাণং তং, আসেৰন্তস্স যোগিনো;

ইদানি তস্স মগ্গো চ, সমুপ্পজ্জিস্সতীতি হি.

১৩০৮. সঙ্খারুপেক্খা সঙ্খারে, অনিচ্চা দুক্খাতি ৰা তথা;

সম্মসিত্ৰা ভৰঙ্গং তু, পুন ৰোতরতেৰ সা.

১৩০৯. ভৰঙ্গানন্তরং সঙ্খারু-পেক্খাগতনযেন তু;

অনিচ্চাদিৰসেনেৰ, সঙ্খারে পন গোচরং.

১৩১০. কুরুমানং মনোদ্ৰারে, জাযতাৰজ্জনং ততো;

ভৰঙ্গাৰট্টনং কত্ৰা, জাতস্সানন্তরং পন.

১৩১১. সঙ্খারে গোচরং কত্ৰা, পঠমং জৰনমানসং;

উপ্পজ্জতীতি তং চিত্তং, পরিকম্মন্তি ৰুচ্চতি.

১৩১২. তদনন্তরমেৰঞ্ঞং, সঙ্খারারম্মণং পুন;

দুতিযং জৰনং হোতি, উপচারন্তি তং মতং.

১৩১৩. তদনন্তরং তং হোতি, তথা সঙ্খারগোচরং;

ততিযং জৰনচিত্তং, অনুলোমন্তি সঞ্ঞিতং.

১৩১৪. পুরিমানং পনট্ঠন্নং, ঞাণানং অনুলোমতো;

বোধিপক্খিযধম্মানং, উদ্ধঞ্চ অনুলোমতো.

১৩১৫. তেনেৰ তং হি সচ্চানুলোমঞাণং পৰুচ্চতি;

ইদং হি পন সচ্চানু-লোমঞাণং মহেসিনা.

১৩১৬. ‘‘ৰুট্ঠানগামিনীযা হি, পরিযোসান’’ন্তি ভাসিতং;

ঞেয্যং সব্বপকারেন, পরিযোসানন্তি গোত্রভু.

১৩১৭. ইতিনেকেহি নামেহি, কিত্তিতাযা মহেসিনা;

ৰুট্ঠানগামিনী সন্তা, পরিসুদ্ধা ৰিপস্সনা.

১৩১৮. ৰুট্ঠাতুকামো সংসারদুক্খপঙ্কা মহব্ভযা;

করেয্য সততং তত্থ, যোগং পণ্ডিতজাতিকো.

ইতি অভিধম্মাৰতারে পটিপদাঞাণদস্সনৰিসুদ্ধিনিদ্দেসো নাম

একৰীসতিমো পরিচ্ছেদো.