১৯. একূনৰীসতিমো পরিচ্ছেদো

কঙ্খাৰিতরণৰিসুদ্ধিনিদ্দেসো

১২২৭. এতস্স নামরূপস্স, জানিত্ৰা হেতুপচ্চযে;

কঙ্খা তীসু পনদ্ধাসু, ৰিতরিত্ৰা ঠিতং পন.

১২২৮. কঙ্খাৰিতরণং নাম, ঞাণং তং সমুদীরিতং;

তং সম্পাদেতুকামেন, অত্থকামেন ভিক্খুনা.

১২২৯. নামরূপস্স কো হেতু, কোনু ৰা পচ্চযো ভৰে;

আৰজ্জিত্ৰা তমিচ্চেৰং, রূপকাযস্স তাৰদে.

১২৩০. কেসা লোমা নখা দন্তা, তচো মংসং নহারু চ;

অট্ঠিমিঞ্জঞ্চ ৰক্কঞ্চ, হদযং যকনম্পি চ.

১২৩১. ইচ্চেৰমাদিবাত্তিংস-কোট্ঠাসপচ্চযস্স হি;

পরিগ্গণ্হতি কাযস্স, মনসা হেতুপচ্চযে.

১২৩২. অৰিজ্জা তণ্হুপাদানং, কম্মং হেতু চতুব্বিধো;

এতস্স রূপকাযস্স, আহারো পচ্চযো মতো.

১২৩৩. জনকো হেতু অক্খাতো,

পচ্চযো অনুপালকো;

হেত্ৰঙ্কুরস্স বীজং তু,

পচ্চযা পথৰাদযো.

১২৩৪. ইতিমে পঞ্চ ধম্মা হি, হেতুপচ্চযতং গতা;

অৰিজ্জাদযো তযো তত্থ, মাতাৰ উপনিস্সযা.

১২৩৫. জনকং পন কম্মং তু, পুত্তস্স হি পিতা ৰিয;

ধাতী ৰিয কুমারস্স, আহারো ধারকো ভৰে.

১২৩৬. ইচ্চেৰং রূপকাযস্স, সো পচ্চযপরিগ্গহং;

কত্ৰা পুনপি ‘‘চক্খুঞ্চ, রূপমালোকমেৰ চ.

১২৩৭. পটিচ্চ চক্খুৰিঞ্ঞাণং, হোতি’’ইচ্চেৰমাদিনা;

নযেন নামকাযস্স, পচ্চযং পরিগণ্হতি.

১২৩৮. সো এৰং নামরূপস্স, ৰুত্তিং দিস্ৰান পচ্চযা;

যথা এতরহিদং তু, অতীতেপি তথেৰিদং.

১২৩৯. পচ্চযা চ পৰত্তিত্থ, তথেৰানাগতেপি চ;

পৰত্তিস্সতি অদ্ধাসু, তীস্ৰেৰং অনুপস্সতি.

১২৪০. তস্সেৰং পস্সতো যা সা, পুব্বন্তে পঞ্চধা তথা;

অপরন্তে সিযা কঙ্খা, পঞ্চধা সমুদীরিতা.

১২৪১. পচ্চুপ্পন্নেপি অদ্ধানে, ছব্বিধা পরিকিত্তিতা;

সব্বা চানৰসেসাৰ, যোগিনো সা পহিয্যতি.

১২৪২. একো কম্মৰিপাকানং, ৰসেনাপি চ পণ্ডিতো;

এতস্স নামরূপস্স, পচ্চযং পরিগণ্হতি.

১২৪৩. কম্মং চতুব্বিধং দিট্ঠ-ধম্মৰেদনিযং তথা;

উপপজ্জাপরাপরিযা-হোসিকম্মৰসা পন.

তত্থ একজৰনৰীথিযং সত্তসু চিত্তেসু কুসলা ৰা অকুসলা ৰা পঠমজৰনচেতনা দিট্ঠধম্মৰেদনীযকম্মং নাম. তং ইমস্মিংযেৰ অত্তভাৰে ৰিপাকং দেতি, তথা অসক্কোন্তং পন ‘‘অহোসিকম্মং নাহোসি কম্মৰিপাকো, ন ভৰিস্সতি কম্মৰিপাকো, নত্থি কম্মৰিপাকো’’তি ইমস্স তিকস্স ৰসেন অহোসিকম্মং নাম হোতি. অত্থসাধিকা পন সত্তমজৰনচেতনা উপপজ্জৰেদনীযকম্মং নাম. তমনন্তরে অত্তভাৰে ৰিপাকং দেতি, তথা অসক্কোন্তং ৰুত্তনযেন অহোসিকম্মং নাম হোতি. উভিন্নমন্তরে পঞ্চজৰনচেতনা অপরাপরিযৰেদনীযকম্মং নাম. তমনাগতে যদা ওকাসং লভতি, তদা ৰিপাকং দেতি, সতি সংসারপ্পৰত্তিযা অহোসিকম্মং নাম ন হোতি.

১২৪৪. অপরং চতুব্বিধং কম্মং, গরুকং বহুলম্পি চ;

আসন্নঞ্চ কটত্তা চ, কম্মন্তি সমুদীরিতং.

১২৪৫. অঞ্ঞং চতুব্বিধং কম্মং, জনকং উপথম্ভকং;

তথূপপীল়কং কম্ম-মুপঘাতকমেৰ চ.

তত্থ জনকং নাম কুসলং ৰা অকুসলং ৰা কম্মং পটিসন্ধিযম্পি পৰত্তেপি রূপারূপৰিপাকক্খন্ধে জনেতি. উপত্থম্ভকং পন ৰিপাকং জনেতুং ন সক্কোতি, অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জনকসুখদুক্খং উপত্থম্ভেতি, অদ্ধানং পৰত্তেতি. উপপীল়কং পন অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জনকসুখদুক্খং পীল়েতি বাধতি, অদ্ধানং পৰত্তিতুং ন দেতি. উপঘাতকং পন সযং কুসলম্পি অকুসলম্পি সমানং অঞ্ঞং দুব্বলকম্মং ঘাতেত্ৰা তস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি. এৰং পন কম্মেন ওকাসে কতে তংৰিপাকমুপ্পন্নং নাম হোতি. ইতি ইমং দ্ৰাদসৰিধং কম্মং কম্মৰট্টে পক্খিপিত্ৰা এৰমেকো কম্মৰিপাকৰসেন নামরূপস্স পচ্চযপরিগ্গহং করোতি.

ইতি এৰং কম্মৰিপাকৰট্টৰসেন নামরূপস্স পৰত্তিং দিস্ৰা ‘‘যথা ইদং এতরহি, এৰমতীতেপি অদ্ধানে কম্মৰিপাকৰসেন পচ্চযতো পৰত্তিত্থ, অনাগতেপি পৰত্তিস্সতী’’তি ইতি কম্মঞ্চেৰ ৰিপাকো চাতি কম্মৰিপাকৰসেন লোকো পৰত্ততীতি তং সমনুপস্সতি. তস্সেৰং সমনুপস্সতো সব্বা সোল়সৰিধা কঙ্খা পহিয্যতি.

১২৪৬. হেতুফলস্স সম্বন্ধৰসেনেৰ পৰত্ততি;

কেৰলং নামরূপন্তি, সম্মা সমনুপস্সতি.

১২৪৭. এৰং কারণতো উদ্ধং, কারণং ন চ পস্সতি;

পাকপৰত্তিতো উদ্ধং, ন পাকপটিৰেদকং.

তেনাহু পোরাণা –

১২৪৮. ‘‘কম্মস্স কারকো নত্থি, ৰিপাকস্স চ ৰেদকো;

সুদ্ধধম্মা পৰত্তন্তি, এৰেতং সম্মদস্সনং.

১২৪৯. এৰং কম্মে ৰিপাকে চ, ৰত্তমানে সহেতুকে;

বীজরুক্খাদিকানংৰ, পুব্বা কোটি ন নাযতি.

১২৫০. অনাগতেপি সংসারে, অপ্পৰত্তি ন দিস্সতি;

এতমত্থমনঞ্ঞায, তিত্থিযা অসযংৰসী.

১২৫১. সত্তসঞ্ঞং গহেত্ৰান, সস্সতুচ্ছেদদস্সিনো;

দ্ৰাসট্ঠিদিট্ঠিং গণ্হন্তি, অঞ্ঞমঞ্ঞৰিরোধিনো.

১২৫২. দিট্ঠিবন্ধনবদ্ধা তে, তণ্হাসোতেন ৰুয্হরে;

তণ্হাসোতেন ৰুয্হন্তা, ন তে দুক্খা পমুচ্চরে.

১২৫৩. এৰমেতং অভিঞ্ঞায, ভিক্খু বুদ্ধস্স সাৰকো;

গম্ভীরং নিপুণং সুঞ্ঞং, পচ্চযং পটিৰিজ্ঝতি.

১২৫৪. কম্মং নত্থি ৰিপাকম্হি, পাকো কম্মে ন ৰিজ্জতি;

অঞ্ঞমঞ্ঞং উভো সুঞ্ঞা, ন চ কম্মং ৰিনা ফলং.

১২৫৫. যথা ন সূরিযে অগ্গি, ন মণিম্হি ন গোমযে;

ন তেসং বহি সো অত্থি, সম্ভারেহি চ জাযতি.

১২৫৬. তথা ন অন্তো কম্মস্স, ৰিপাকো উপলব্ভতি;

বহিদ্ধাপি ন কম্মস্স, ন কম্মং তত্থ ৰিজ্জতি.

১২৫৭. ফলেন সুঞ্ঞং তং কম্মং, ফলং কম্মে ন ৰিজ্জতি;

কম্মঞ্চ খো উপাদায, ততো নিব্বত্ততে ফলং.

১২৫৮. ন হেত্থ দেৰো ব্রহ্মা ৰা,

সংসারস্সত্থি কারকো;

সুদ্ধধম্মা পৰত্তন্তি,

হেতুসম্ভারপচ্চযা’’তি.

১২৫৯. এৰং নানপ্পকারেহি, নামরূপস্স পচ্চযং;

পরিগ্গহেত্ৰা অদ্ধাসু, তরিত্ৰা কঙ্খমুট্ঠিতং.

১২৬০. কঙ্খাৰিতরণং নাম, ঞাণং তং সমুদীরিতং;

ধম্মট্ঠিতি যথাভূতং, তং সম্মাদস্সনন্তিপি.

১২৬১. ইমিনা পন ঞাণেন,

সংযুত্তো বুদ্ধসাসনে;

হোতি লদ্ধপতিট্ঠোৰ,

সোতাপন্নো হি চূল়কো.

১২৬২. তস্মা সপঞ্ঞো পন অত্থকামো,

যো নামরূপস্স হেতুপচ্চযানি;

পরিগ্গহং সাধু করোতি ধীরো,

খিপ্পং স নিব্বানপুরং উপেতি.

ইতি অভিধম্মাৰতারে কঙ্খাৰিতরণৰিসুদ্ধিনিদ্দেসো নাম

একূনৰীসতিমো পরিচ্ছেদো.