চতুভূমককুসলৰণ্ণনা

২৮. এৰং চতুভূমককুসলচিত্তং সরূপতো নিদ্দিসিত্ৰা ইদানি তং নিগমেন্তো আহ ‘‘কামে অট্ঠেৰা’’তিআদি. তত্থ কামেতি কামভৰে. তথা ‘‘রূপে’’তিআদীসু.

২৯. কুসলাকুসলাপগতেনাতি কুসলাকুসলকম্মতো অপগতেন. অগ্গমগ্গস্স হি উপ্পন্নকালতো পট্ঠায অরহতো সব্বানি কুসলাকুসলকম্মানি পহীনানি নাম হোন্তি পচ্চযৰেকল্লেন পটিসন্ধিদানে অসমত্থভাৰতো. যতো চ অরিযমগ্গঞাণং ‘‘কম্মক্খযকর’’ন্তি ৰুচ্চতি. অথ ৰা অহেতুঅপচ্চযৰিসুজ্ঝনস্স অভাৰতো কিলেসসমুচ্ছেদকেন মগ্গকুসলেন অকুসলেহি অপগতেন. কুসলে কুসলেনাতি কুচ্ছিতানং সলনাদীহি কুসলসঙ্খাতায পটিপত্তিযং দেসনুপ্পাদনাদীসু ছেকেন. মুনিনাতি উভযলোকমুননকেন অগ্গফলঞাণেন, সব্বঞ্ঞুতঞ্ঞাণেন ৰা সমন্নাগতত্তা মুনিনা. তেনাহ –

‘‘যো মুনাতি উভো লোকে, মুনি তেন পৰুচ্চতী’’তি.

ৰসিনাতি ছল়ভিঞ্ঞতায পরমেন চিত্তৰসিভাৰেন সমন্নাগতত্তা, ঝানাদীসু পঞ্চৰিধৰসিসব্ভাৰতো চ ৰসিভূতেন ৰসিভাৰূপগতিন্দ্রিযেন.

চতুভূমককুসলৰণ্ণনা নিট্ঠিতা.