সম্মপ্পধানৰিভঙ্গমাতিকত্থৰণ্ণনা

সম্মপ্পধানৰিভঙ্গমাতিকায পন অত্থতো তাৰ – সম্মপ্পধানাতি কারণপ্পধানা উপাযপ্পধানা. যোনিসো পদহনতো পরমং ধানং পধানং, পধানৰীরিযানীতি অত্থো. ইধ ভিক্খূতি ইমস্মিং সাসনে পটিপন্নকো ভিক্খু. অনুপ্পন্নানন্তি অনিব্বত্তানং. পাপকানন্তি লামকানং. অকুসলানং ধম্মানন্তি অকোসল্লসম্ভূতানং ধম্মানং. অনুপ্পাদাযাতি ন উপ্পাদনত্থায. ছন্দং জনেতীতি কত্তুকম্যতাসঙ্খাতং কুসলচ্ছন্দং জনেতি উপ্পাদেতি. ৰাযমতীতি পযোগং পরক্কমং করোতি. ৰীরিযং আরভতীতি কাযিকচেতসিকৰীরিযং করোতি. চিত্তং পগ্গণ্হাতীতি তেনেৰ সহজাতৰীরিযেন চিত্তং উক্খিপতি. পদহতীতি পধানৰীরিযং করোতি. পটিপাটিযা পনেতানি চত্তারিপি পদানি ৰীরিযস্সেৰ আসেৰনাভাৰনাবহুলীকম্মসাতচ্চকিরিযাহি যোজেতব্বানি.

উপ্পন্নানন্তি অনুপ্পন্নাতি অৰত্তব্বতং আপন্নানং. পহানাযাতি পজহনত্থায. অনুপ্পন্নানং কুসলানং ধম্মানন্তি অনিব্বত্তানং কোসল্লসম্ভূতানং ধম্মানং. উপ্পাদাযাতি উপ্পাদনত্থায. উপ্পন্নানন্তি নিব্বত্তানং. ঠিতিযাতি ঠিতত্থায. অসম্মোসাযাতি অনস্সনত্থং. ভিয্যোভাৰাযাতি পুনপ্পুনং ভৰনায. ৰেপুল্লাযাতি ৰিপুলভাৰায. ভাৰনাযাতি ৰড্ঢিযা. পারিপূরিযাতি পরিপূরণত্থায. সেসং পদতো উত্তানমেৰ.

অত্থতো পনেত্থ ‘‘অনুপ্পন্নানং পাপকান’’ন্তিআদীসু অসমুদাচারৰসেন ৰা অননুভূতারম্মণৰসেন ৰা কিলেসানং অনুপ্পত্তি ৰেদিতব্বা. অঞ্ঞথা হি অনমতগ্গে সংসারে অনুপ্পন্না অকুসলধম্মা নাম নত্থি. কুসলধম্মেসু পন রতনত্তযপ্পসাদৰিপস্সনাদিৰিৰট্টূপনিস্সযকুসলাদিৰসেন অনুপ্পন্নাপি অত্থি. তেসম্পি উপ্পন্নপুব্বত্তে সতি সব্বসত্তানং ইতো পুব্বে চ আসৰক্খযপ্পসঙ্গতো. একন্তপ্পৰত্তসাধকা তেসং. তত্থ একচ্চস্স ৰত্তগন্থধুতঙ্গসমাধিৰিপস্সনানৰকম্মেসু অঞ্ঞতরস্মিং নিচ্চপ্পযুত্তস্স, ঘটতো, ৰাযমতো চ ব্রহ্মলোকা আগতত্তা ভৰৰসেন কিলেসেসু অলদ্ধাসেৰনস্স সত্তস্স কিলেসা ন সমুদাচরন্তি, অপরভাগে পনস্স ৰত্তাদীনি ৰিস্সজ্জেত্ৰা কুসীতস্স চরতো চেৰ অকল্যাণমিত্তাদিতো কিলেসেসু লদ্ধাসেৰনস্স চ অযোনিসোমনসিকারং, সতিৰোস্সগ্গঞ্চ আগম্ম উপ্পজ্জন্তি. এৰং তাৰ অসমুদাচারৰসেন কিলেসানং অনুপ্পত্তি ৰেদিতব্বা.

একচ্চস্স পন তস্মিং অত্তভাৰে অননুভূতপুব্বং দিব্বাদিভেদং মনাপিযং আরম্মণং লভিত্ৰা তত্থ অযোনিসোমনসিকারসতিৰোস্সগ্গে আগম্ম কিলেসা উপ্পজ্জন্তি, অলভিত্ৰা এৰং অননুভূতারম্মণৰসেন কিলেসানং অনুপ্পত্তি ৰেদিতব্বা.

‘‘উপ্পন্নানং পাপকান’’ন্তি এত্থ পন চতুব্বিধং উপ্পন্নং ৰত্তমানভূতাপগতওকাসকতভূমিলদ্ধৰসেন, তেসং ৰিভাগো উপ্পন্নত্তিকে ৰুত্তোৰ. অপরম্পি চতুব্বিধং উপ্পন্নং সমুদাচারআরম্মণাধিগ্গহিতঅৰিক্খম্ভিতঅসমুগ্ঘাতিতৰসেন. তত্থ সম্পতি ৰত্তমানংযেৰ সমুদাচারুপ্পন্নং নাম. সেসং পাকটমেৰ. যস্মা পনেত্থ ইমেসু উপ্পন্নেসু ৰত্তমানভূতাপগতওকাসকতসমুদাচারসঙ্খাতং চতুব্বিধং উপ্পন্নং ন মগ্গাদিৰজ্ঝং, তস্মা ভূমিলদ্ধআরম্মণাধিগ্গহিতঅসমুগ্ঘাতিতসঙ্খাতং চতুব্বিধং উপ্পন্নং সন্ধাযেত্থ ‘‘উপ্পন্নানং পাপকানং পহানাযা’’তি ৰুত্তং.

কথং পন মগ্গক্খণে অনুপ্পন্নানং কুসলানং উপ্পাদায ৰাযামো হোতি, কথঞ্চ উপ্পন্নানং ঠিতিযাতি? মগ্গপ্পৰত্তিযা এৰ. মগ্গো হি পৰত্তমানো পুব্বে অনুপ্পন্নপুব্বত্তা অনুপ্পন্নো নাম ৰুচ্চতি. যা চস্স পৰত্তি, অযমেৰ ঠিতি নামাতি অযং তাৰেত্থ পদত্থো.

ধম্মভেদো পনেত্থাপি একস্সেৰ ৰীরিযস্স কিচ্চভেদতো চতুধা ৰুত্তাতি অযমেত্থ পাল়িমুত্তৰিনিচ্ছযো.

ৰিভঙ্গনযতো পন সুত্তন্তভাজনীযে তাৰ চত্তারো সম্মপ্পধানা লোকিযলোকুত্তরকুসলচিত্তসম্পযুত্তৰীরিযৰসেন অকুসলাদিপদেহি সদ্ধিং ৰিত্থারতো ৰিভত্তা. অভিধম্মভাজনীযপঞ্হাপুচ্ছকেসু পনেতে লোকুত্তরকুসলচিত্তসম্পযুত্তৰসেনেৰ ৰিভত্তা, ফলচিত্তসম্পযুত্তা পন ন গহিতা. তেনেৰ পঞ্হাপুচ্ছকে ‘‘কুসলা এৰ, ৰিপাকধম্মধম্মা এৰ, অপচযগামিনোৰ, সেখাৰা’’তিআদিনা ৰুত্তা. সেসো পনেত্থ ৰিনিচ্ছযো সতিপট্ঠানে ৰুত্তনযানুসারেন ৰেদিতব্বো.

সম্মপ্পধানৰিভঙ্গমাতিকত্থৰণ্ণনা নিট্ঠিতা.