সিক্খাপদৰিভঙ্গমাতিকত্থৰণ্ণনা

সিক্খাপদৰিভঙ্গমাতিকায পন অত্থতো তাৰ – সিক্খাপদানীতি সিক্খিতব্বপদানি, সিক্খাকোট্ঠাসাতি অত্থো. অপিচ সব্বেপি কুসলা ধম্মা সিক্খিতব্বতো সিক্খা, তাসং পতিট্ঠানট্ঠেন পদং, পঞ্চসু পন সীলঙ্গেসু যং কিঞ্চি অঙ্গং. পাণাতিপাতাদীসু পাণস্স অতীৰ পাতো পাণাতিপাতো, পাণৰধোতি অত্থো. পাণোতি চেত্থ ৰোহারতো সত্তো, পরমত্থতো জীৰিতিন্দ্রিযং, তস্মিং পন পাণে পাণসঞ্ঞিনো জীৰিতিন্দ্রিযুপচ্ছেদকউপক্কমসমুট্ঠাপিকা কাযৰচীদ্ৰারানং অঞ্ঞতরদ্ৰারপ্পৰত্তা ৰধকচেতনা পাণাতিপাতো, তস্মা পাণাতিপাতা. ৰেরমণীতি ৰিরতি, সা এৰ ৰুত্তনযেন সিক্খাপদন্তি ৰেরমণিসিক্খাপদং. অদিন্নন্তি ন দিন্নং, পরপরিগ্গহিতং, পরপরিগ্গহিতস্স অদিন্নস্স আদানং অদিন্নাদানং. পরস্স হরণং থেয্যং চোরিকাতি ৰুত্তং হোতি. অত্থতো পন পরপরিগ্গহিতে তথাসঞ্ঞিনো তদাদাযকউপক্কমসমুট্ঠাপিকা থেয্যচেতনা অদিন্নাদানং. কামেসূতি ৰত্থুকামেসু. মিচ্ছাচারাতি কিলেসকামৰসেন লামকাচারা, পুরিসস্স মাতুরক্খিতাদিসঙ্খাতাসু, ইত্থিযা অত্তনো নিযমিতপুরিসতো পরপুরিসসঙ্খাতেসু চ অগমনীযট্ঠানেসু ৰীতিক্কমাচারাতি ৰুত্তং হোতি. অত্থতো পন অগমনীযৰত্থূসু মগ্গেনমগ্গপ্পটিপাদনোপক্কমসমুট্ঠাপিকা, অধিৰাসনাকারপ্পৰত্তা ৰা মেথুনচেতনা কামেসুমিচ্ছাচারো. মুসাতি অভূতং অতচ্ছং ৰত্থু, ৰাদোতি তস্স অভূততং ঞত্ৰাৰ ভূততো তচ্ছতো ৰিঞ্ঞাপনং. লক্খণতো পন অতথং ৰত্থুং ঞত্ৰা তথতো পরং ৰিঞ্ঞাপেতুকামস্স অত্থভঞ্জককাযৰচীপযোগসমুট্ঠাপিকা চেতনা মুসাৰাদো. সুরাতি পিট্ঠসুরা পূৰসুরা ওদনসুরা কিণ্ণপক্খিত্তা সম্ভারসংযুত্তাতি পঞ্চ সুরা. মেরযন্তি পুপ্ফাসৰো ফলাসৰো গুল়াসৰো মধ্ৰাসৰো সম্ভারসংযুত্তোতি পঞ্চ আসৰা. তদুভযম্পি মদনীযট্ঠেন মজ্জং, যায চেতনায তং মজ্জং পিৰতি, সা পমাদকারণত্তা পমাদট্ঠানং, তস্মা সুরামেরযমজ্জপমাদট্ঠানা. সেসং সুৰিঞ্ঞেয্যমেৰাতি অযং তাৰেত্থ পদত্থো.

ধম্মভেদো পন ৰিভঙ্গনযে পাকটো ভৰিস্সতি. এৰং উপরিপি. ৰিভঙ্গনযেসু চেত্থ সুত্তন্তভাজনীযং নত্থি, অভিধম্মভাজনীযে পনেতানি পঞ্চ সিক্খাপদানি কামাৰচরকুসলচিত্তসম্পযুত্তানং ৰিরতীনং ৰসেন নানপ্পকারতো পঠমৰারে ৰিভত্তানি, তথা দুতিযৰারে চেতনাৰসেন, ৰিরতিচেতনাসম্পযুত্তা পনেত্থ ধম্মা ন সিক্খাপদানি, সিক্খাপদসম্পযুত্তা পন হোন্তি, তথা ততিযনযে ফস্সাদীনং সব্বেসং ধম্মানং ৰসেন নানপ্পকারতো ৰিভত্তাতি.

পঞ্হাপুচ্ছকে পন চেতনায, ফস্সাদীনঞ্চ পরিযাযসিক্খাপদত্তা নিপ্পরিযাযসিক্খাপদভূতানং ৰিরতীনং ৰসেনেৰ ৰিভত্তানি. তত্থ হি পঞ্চ সিক্খাপদানি কুসলা এৰ, সিযা সুখায, সিযা অদুক্খমসুখায সম্পযুত্তা…পে… পরিত্তারম্মণাৰ, পচ্চুপ্পন্নারম্মণাৰ, বহিদ্ধারম্মণাৰ, অনিদস্সনঅপ্পটিঘাৰ, ন হেতূ, সহেতুকা, নো চিত্তা, চেতসিকা, কামাৰচরা, সউত্তরাৰ, অরণাৰাতি. এত্থ চ যানি সিক্খাপদানি সত্তারম্মণানি ৰুত্তানি, তানি চ ৰিরতিসভাৰত্তা যস্মা ‘‘সত্তো’’তি সঙ্খং গতে পরিত্তধম্মে এৰ পচ্চুপ্পন্নে এৰ ধম্মে আরম্মণং করোন্তি, তস্মা পরিত্তারম্মণাতি চ ৰুত্তাতি ৰেদিতব্বা. ইদানি ৰিরমিতব্বপাণাতিপাতাদীনং –

ধম্মকম্মপথালম্ব-ৰেদনামূলকম্মতো;

সাৰজ্জঙ্গাদিতো ঞেয্যো, পাল়িমুত্তৰিনিচ্ছযো.

তত্থ ধম্মতো তাৰ – পঞ্চপেতে পাণাতিপাতাদযো চেতনাসভাৰাৰ হোন্তি. কম্মপথতো পঞ্চ কম্মপথাৰ. আরম্মণতো পন পাণাতিপাতো জীৰিতিন্দ্রিযারম্মণো, অদিন্নাদানং সত্তারম্মণং, সঙ্খারারম্মণং ৰা, তথা মুসাৰাদো, মিচ্ছাচারো ইত্থিপুরিসারম্মণো, সুরাপানং সঙ্খারারম্মণং. ৰেদনাতো পন পাণাতিপাতো দুক্খৰেদনো, অদিন্নাদানং তিৰেদনং, তথা মুসাৰাদো, মিচ্ছাচারো পন সুখমজ্ঝত্তৰসেন দ্ৰিৰেদনো, তথা সুরাপানং. মূলতো পন পঠমো দোসমোহমূলো, দুতিযং সিযা লোভমোহমূলং, সিযা দোসমোহমূলং, তথা মুসাৰাদো, মিচ্ছাচারো পন লোভমোহমূলোৰ, তথা সুরাপানং. কম্মতো পনেত্থ মুসাৰাদো ৰচীকম্মং, সেসা কাযকম্মমেৰ.

সাৰজ্জতো পন পাণাতিপাতো তাৰ অমনুস্সকে পাণে অপ্পসাৰজ্জো, মনুস্সকে মহাসাৰজ্জো. তেসু চ খুদ্দকসরীরে অপ্পসাৰজ্জো, মহাসরীরে মহাসাৰজ্জো. কস্মা? পযোগমহন্ততায. পযোগসমত্তেপি অপ্পগুণে অপ্পসাৰজ্জো, মহাগুণে মহাসাৰজ্জো. সরীরগুণানং সমভাৰে সতি কিলেসানং, উপক্কমানঞ্চ মুদুতিব্বতায অপ্পমহাসাৰজ্জো হোতি, খীণাসৰে পন মহাসাৰজ্জতরোতি. অদিন্নাদানং ৰত্থুনো হীনপ্পণীততায চেৰ গুণৰিরহিততব্বন্তসন্তকতায চ. তত্থাপি তং তং উপাদাযুপাদায চ অপ্পমহাসাৰজ্জং, খীণাসৰসন্তকে মহাসাৰজ্জতরন্তি ৰেদিতব্বং. মিচ্ছাচারো দুস্সীলসীলৰন্তৰত্থুৰীতিক্কমনেন. তত্থাপি তং তং উপাদাযুপাদায চ অপ্পমহাসাৰজ্জো, খীণাসৰৰত্থুৰীতিক্কমনে মহাসাৰজ্জতরোতি চ ৰেদিতব্বো. মুসাৰাদো যমত্থং ভঞ্জতি, তস্স অপ্পমহন্ততং, ৰত্থুসামিনো গুণৰিরহিততং, তব্বন্ততঞ্চ উপাদাযুপাদায অপ্পমহাসাৰজ্জো হোতি. অপিচ অত্তনো সন্তকং অদাতুকামতায, হসাধিপ্পাযেন ৰা ‘‘নত্থেত’’ন্তিআদিনযপ্পৰত্তো অপ্পসাৰজ্জো, অদিট্ঠং ‘‘দিট্ঠ’’ন্তিআদিনা কূটসক্খিআদিভাৰেন ৰা পৰত্তো মহাসাৰজ্জো, মুসা ৰত্ৰা পন সঙ্ঘভেদনে মহাসাৰজ্জতরো. সুরাপানং বিন্দুমত্ততো পট্ঠায তং তং উপাদাযুপাদায অপ্পসাৰজ্জং, বহুকে মহাসাৰজ্জং, কাযৰিকারজননপহোনকপানে পন মহাসাৰজ্জতরমেৰ.

অঙ্গাদিতো পন পাণাতিপাতস্স পাণো পাণসঞ্ঞিতা ৰধকচিত্তং উপক্কমো তেন মরণন্তি পঞ্চ অঙ্গানি. সাহত্থিকো আণত্তিকো নিস্সগ্গিকো থাৰরো ৰিজ্জামযো ইদ্ধিমযোতি ছ পযোগা. অদিন্নাদানস্স পরপরিগ্গহিততা তথাসঞ্ঞিতা থেয্যচিত্তং উপক্কমো তেন হরণন্তি পঞ্চ অঙ্গানি. সাহত্থিকাদযো ছ এৰ পযোগা. তে চ খো যথানুরূপং থেয্যাৰহারাদীনং ৰসেন পৰত্তা. মিচ্ছাচারস্স অগমনীযৰত্থুতা সেৰনচিত্তং মগ্গেন মগ্গপ্পটিপত্তীতি তীণি অঙ্গানি. সাহত্থিকো একোৰ পযোগো. এৰং সেসানম্পি পযোগো ৰেদিতব্বো. মুসাৰাদস্স অতথং ৰত্থু, ৰিসংৰাদনচিত্তং, তজ্জো ৰাযামো, পরস্স তদত্থৰিজাননন্তি চত্তারি অঙ্গানি. সুরাপানস্স সুরাদীনং অঞ্ঞতরতা অজ্ঝোহরণন্তি দ্ৰে অঙ্গানীতি.

এৰং পাণাতিপাতাদীনং ধম্মাদিতো ৰিনিচ্ছযং ঞত্ৰা ইদানি পাণাতিপাতাৰেরমণিআদীনং পঞ্চন্নম্পি –

ধম্মকম্মপথালম্ব-সমাদানপযোগতো;

খণ্ডতো চ ৰিজানীযো, পাল়িমুত্তৰিনিচ্ছযো.

তত্থ ধম্মকম্মপথতো ৰিনিচ্ছযো ৰুত্তনযোৰ. আরম্মণতো পনেতানি জীৰিতিন্দ্রিযাদিতংতংৰীতিক্কমিতব্বৰত্থারম্মণানি. সমাদানতো একস্স সন্তিকে ৰা সযমেৰ ৰা ‘‘পঞ্চ সীলানি অধিট্ঠহামী’’তি একতো ৰা পাটিএক্কং ৰা সমাদিযন্তেন এতানি সমাদিন্নানেৰ হোন্তি. পযোগতো পন সব্বানিপি সাহত্থিকপযোগানেৰ. খণ্ডতো গহট্ঠা যং যং ৰীতিক্কমন্তি, তং তদেৰ খণ্ডং হোতি, নেতরে. গহট্ঠা অনিবদ্ধসীলা হোন্তি, যং যং সক্কোন্তি, তং তদেৰ গোপেন্তি. সামণেরানং পন একস্মিং ৰীতিক্কমিতে সব্বানিপি ভিজ্জন্তীতি এৰং ৰিজানীযো পাল়িমুত্তৰিনিচ্ছযো.

সিক্খাপদৰিভঙ্গমাতিকত্থৰণ্ণনা নিট্ঠিতা.