অপ্পমঞ্ঞাৰিভঙ্গমাতিকত্থৰণ্ণনা

অপ্পমঞ্ঞাৰিভঙ্গমাতিকায পন অত্থতো তাৰ – চতস্সো অপ্পমঞ্ঞাযোতিআদীসু ফরণঅপ্পমাণৰসেন অপ্পমঞ্ঞাযো. এতা হি আরম্মণৰসেন অপ্পমাণে ৰা সত্তে ফরন্তি, একসত্তম্হি ৰা অনৰসেসফরণৰসেন অপ্পমাণতো ফরন্তীতি এৰং ফরণঅপ্পমাণৰসেন ‘‘অপ্পমঞ্ঞাযো’’তি ৰুচ্চন্তি, সত্ত অপ্পমাণৰসেনাপি ৰত্তুং ৰট্টতি. মেত্তাসহগতেনাতি মেত্তায সমন্নাগতেন. একং দিসন্তি পুরত্থিমাদীসু চতূসু দিসাসু যং কিঞ্চি একং দিসং, তংদিসাপরিযাপন্নসত্তফরণৰসেন চেতং ৰুত্তং. ফরিত্ৰাতি ফুসিত্ৰা আরম্মণং কত্ৰা. ৰিহরতীতি পৰত্তেতি. তথা দুতিযন্তিআদীসু. যথা একং দিসং ফরিত্ৰা, তথেৰ তদনন্তরং দুতিযং, ততিযং, চতুত্থঞ্চাতি অত্থো. ইতি উদ্ধমধো তিরিযন্তি এতেনেৰ নযেন উপরিমং দিসং, হেট্ঠিমং দিসং, অনুদিসঞ্চ অনুক্কমেন মেত্তাসহগতেন চেতসা ফরিত্ৰা ৰিহরতীতি অত্থো. এত্তাৰতা একমেকং দিসং পরিগ্গহেত্ৰা ওধিসো মেত্তাফরণতং দস্সিতং.

সব্বধীতিআদি পন অনোধিসো দস্সনত্থং ৰুত্তং. তত্থ সব্বধীতি সব্বত্থ. সব্বত্ততাযাতি সব্বেসু হীনমজ্ঝিমুক্কট্ঠমিত্তসপত্তমজ্ঝত্তাদিপ্পভেদেসু অত্ততায, তেসু ৰিভাগং অকত্ৰা অত্তসমতাযাতি ৰুত্তং হোতি. অথ ৰা সব্বত্ততাযাতি সব্বেন চিত্তভাৰেন, ঈসকম্পি বহি অৰিক্খেপমানোতি অত্থো. সব্বাৰন্তন্তি সব্বসত্তৰন্তং, সব্বসত্তযুত্তন্তি অত্থো. লোকন্তি সত্তলোকং. পুন ‘‘মেত্তাসহগতেনা’’তি ইদং ‘‘ৰিপুলেনা’’তিআদীহি ৰিসেসনেহি সম্বন্ধদস্সনৰসেন ৰা ৰুত্তং, নিগমনৰসেন ৰা. তত্থ ফরণৰসেন ৰিপুলতা ৰেদিতব্বা. ভূমিৰসেন পন মহগ্গততা. পগুণৰসেন, অপ্পমাণসত্তারম্মণৰসেন চ অপ্পমাণতা. ব্যাপাদপচ্চত্থিকপ্পহানেন অৰেরতা. দোমনস্সপ্পহানেন নিদ্দুক্খতা, সঙ্খততা, অব্যাপজ্জতা চ দট্ঠব্বা. এৰং করুণাসহগতেনাতিআদীসুপি অত্থো ৰেদিতব্বোতি অযং তাৰেত্থ পদত্থো.

ধম্মভেদো পনেত্থ সুৰিঞ্ঞেয্যোৰ. ৰিভঙ্গনযেন পন তীসু রূপাৰচরকুসলৰিপাককিরিযাচিত্তেসু সম্পযুত্তা সত্তেসু মেত্তাদিব্রহ্মৰিহারভূতা অদোসো করুণা মুদিতা তত্রমজ্ঝত্ততাতি চত্তারো ধম্মা নানানযেহি ৰিভত্তা, তংসম্পযুত্তা পন কামাৰচরভূতা চ এতা ইধ ন গহিতা. অরূপাৰচরলোকুত্তরেসু পনেতা অপ্পমঞ্ঞা নত্থেৰাতি. পঞ্হাপুচ্ছকে পনেতা তাৰ সিযা কুসলা, সিযা অব্যাকতা. তিস্সো সুখায, চতুত্থা অদুক্খমসুখায ৰেদনায সম্পযুত্তা. ৰিপাকত্তিকে তিধাপি, উপেক্খা অৰিতক্কঅৰিচারা, সেসা তিধাপি, মহগ্গতাৰ, পরিত্তারম্মণঅতীতারম্মণত্তিকেসু ন ৰত্তব্বাৰ, বহিদ্ধারম্মণাৰ, অনিদস্সনঅপ্পটিঘাৰ, মেত্তা হেতু, সেসা ন হেতূ, নো চিত্তা, চেতসিকা, রূপাৰচরা, সউত্তরাৰ. সেসং সুৰিঞ্ঞেয্যমেৰাতি.

অপ্পমঞ্ঞাৰিভঙ্গমাতিকত্থৰণ্ণনা নিট্ঠিতা.