৫. ওঘৰগ্গো

১-১০. ওঘাদিসুত্তং

৯৬৭-৯৭৬. ‘‘পঞ্চিমানি, ভিক্খৰে, উদ্ধম্ভাগিযানি সংযোজনানি. কতমানি পঞ্চ? রূপরাগো, অরূপরাগো, মানো, উদ্ধচ্চং, অৰিজ্জা – ইমানি খো, ভিক্খৰে, পঞ্চুদ্ধম্ভাগিযানি সংযোজনানি. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায চত্তারো ঝানা ভাৰেতব্বা. কতমে চত্তারো? ইধ, ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং…পে… ততিযং ঝানং…পে… চতুত্থং ঝানং উপসম্পজ্জ ৰিহরতি. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায ইমে চত্তারো ঝানা ভাৰেতব্বা’’তি ৰিত্থারেতব্বং. দসমং. (যথা মগ্গসংযুত্তং তথা ৰিত্থারেতব্বং).

ওঘৰগ্গো পঞ্চমো.

তস্সুদ্দানং –

ওঘো যোগো উপাদানং, গন্থা অনুসযেন চ;

কামগুণা নীৰরণা, খন্ধা ওরুদ্ধম্ভাগিযাতি.

ঝানসংযুত্তং নৰমং.