৬. সমত্তসুত্তং

৮১৮. ‘‘যে হি কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেসুং, সব্বে তে চতুন্নং ইদ্ধিপাদানং ভাৰিতত্তা বহুলীকতত্তা. যে হি কেচি, ভিক্খৰে, অনাগতমদ্ধানং সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেস্সন্তি, সব্বে তে চতুন্নং ইদ্ধিপাদানং ভাৰিতত্তা বহুলীকতত্তা. যে হি কেচি, ভিক্খৰে, এতরহি সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেন্তি, সব্বে তে চতুন্নং ইদ্ধিপাদানং ভাৰিতত্তা বহুলীকতত্তা.

‘‘কতমেসং চতুন্নং? ইধ, ভিক্খৰে, ভিক্খু ছন্দসমাধিপ্পধানসঙ্খারসমন্নাগতং ইদ্ধিপাদং ভাৰেতি, ৰীরিযসমাধি…পে… চিত্তসমাধি…পে… ৰীমংসাসমাধিপ্পধানসঙ্খারসমন্নাগতং ইদ্ধিপাদং ভাৰেতি. যে হি কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেসুং, সব্বে তে ইমেসংযেৰ চতুন্নং ইদ্ধিপাদানং ভাৰিতত্তা বহুলীকতত্তা. যে হি কেচি, ভিক্খৰে, অনাগতমদ্ধানং সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেস্সন্তি, সব্বে তে ইমেসংযেৰ চতুন্নং ইদ্ধিপাদানং ভাৰিতত্তা বহুলীকতত্তা. যে হি কেচি, ভিক্খৰে, এতরহি সমণা ৰা ব্রাহ্মণা ৰা সমত্তং ইদ্ধিং অভিনিপ্ফাদেন্তি, সব্বে তে ইমেসংযেৰ চতুন্নং ইদ্ধিপাদানং ভাৰিতত্তা বহুলীকতত্তা’’তি. ছট্ঠং.