৬. সাকচ্ছৰগ্গো
১. আহারসুত্তং
২৩২. সাৰত্থিনিদানং. ‘‘পঞ্চন্নঞ্চ, ভিক্খৰে, নীৰরণানং সত্তন্নঞ্চ বোজ্ঝঙ্গানং আহারঞ্চ অনাহারঞ্চ দেসেস্সামি; তং সুণাথ. কো চ, ভিক্খৰে, আহারো অনুপ্পন্নস্স ৰা কামচ্ছন্দস্স উপ্পাদায, উপ্পন্নস্স ৰা কামচ্ছন্দস্স ভিয্যোভাৰায ৰেপুল্লায? অত্থি, ভিক্খৰে, সুভনিমিত্তং. তত্থ অযোনিসোমনসিকারবহুলীকারো – অযমাহারো অনুপ্পন্নস্স ৰা কামচ্ছন্দস্স উপ্পাদায, উপ্পন্নস্স ৰা কামচ্ছন্দস্স ভিয্যোভাৰায ৰেপুল্লায.
‘‘কো চ, ভিক্খৰে, আহারো অনুপ্পন্নস্স ৰা ব্যাপাদস্স উপ্পাদায, উপ্পন্নস্স ৰা ব্যাপাদস্স ভিয্যোভাৰায ৰেপুল্লায? অত্থি, ভিক্খৰে, পটিঘনিমিত্তং. তত্থ অযোনিসোমনসিকারবহুলীকারো – অযমাহারো অনুপ্পন্নস্স ৰা ব্যাপাদস্স উপ্পাদায, উপ্পন্নস্স ৰা ব্যাপাদস্স ভিয্যোভাৰায ৰেপুল্লায.
‘‘কো চ, ভিক্খৰে, আহারো অনুপ্পন্নস্স ৰা থিনমিদ্ধস্স উপ্পাদায, উপ্পন্নস্স ৰা থিনমিদ্ধস্স ভিয্যোভাৰায ৰেপুল্লায? অত্থি, ভিক্খৰে, অরতি তন্দি ৰিজম্ভিতা ভত্তসম্মদো চেতসো চ লীনত্তং. তত্থ অযোনিসোমনসিকারবহুলীকারো – অযমাহারো অনুপ্পন্নস্স ৰা থিনমিদ্ধস্স উপ্পাদায, উপ্পন্নস্স ৰা থিনমিদ্ধস্স ভিয্যোভাৰায ৰেপুল্লায.
‘‘কো চ, ভিক্খৰে, আহারো অনুপ্পন্নস্স ৰা উদ্ধচ্চকুক্কুচ্চস্স উপ্পাদায, উপ্পন্নস্স ৰা উদ্ধচ্চকুক্কুচ্চস্স ভিয্যোভাৰায ৰেপুল্লায? অত্থি, ভিক্খৰে, চেতসো অৰূপসমো. তত্থ অযোনিসোমনসিকারবহুলীকারো – অযমাহারো অনুপ্পন্নস্স ৰা উদ্ধচ্চকুক্কুচ্চস্স উপ্পাদায, উপ্পন্নস্স ৰা উদ্ধচ্চকুক্কুচ্চস্স ভিয্যোভাৰায ৰেপুল্লায.
‘‘কো চ, ভিক্খৰে, আহারো অনুপ্পন্নায ৰা ৰিচিকিচ্ছায উপ্পাদায, উপ্পন্নায ৰা ৰিচিকিচ্ছায ভিয্যোভাৰায ৰেপুল্লায? অত্থি, ভিক্খৰে, ৰিচিকিচ্ছাট্ঠানীযা ধম্মা. তত্থ অযোনিসোমনসিকারবহুলীকারো – অযমাহারো অনুপ্পন্নায ৰা ৰিচিকিচ্ছায উপ্পাদায, উপ্পন্নায ৰা ৰিচিকিচ্ছায ভিয্যোভাৰায ৰেপুল্লায.
‘‘কো চ, ভিক্খৰে, আহারো অনুপ্পন্নস্স ৰা সতিসম্বোজ্ঝঙ্গস্স উপ্পাদায, উপ্পন্নস্স ৰা সতিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, সতিসম্বোজ্ঝঙ্গট্ঠানীযা ধম্মা. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা সতিসম্বোজ্ঝঙ্গস্স উপ্পাদায, উপ্পন্নস্স ৰা সতিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা ধম্মৰিচযসম্বোজ্ঝঙ্গস্স উপ্পাদায, উপ্পন্নস্স ৰা ধম্মৰিচযসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, কুসলাকুসলা ধম্মা সাৰজ্জানৰজ্জা ধম্মা হীনপণীতা ধম্মা কণ্হসুক্কসপ্পটিভাগা ধম্মা. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা ধম্মৰিচযসম্বোজ্ঝঙ্গস্স উপ্পাদায, উপ্পন্নস্স ৰা ধম্মৰিচযসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা ৰীরিযসম্বোজ্ঝঙ্গস্স উপ্পাদায, উপ্পন্নস্স ৰা ৰীরিযসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, আরম্ভধাতু নিক্কমধাতু পরক্কমধাতু. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা ৰীরিযসম্বোজ্ঝঙ্গস্স উপ্পাদায, উপ্পন্নস্স ৰা ৰীরিযসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা পীতিসম্বোজ্ঝঙ্গস্স উপ্পাদায, উপ্পন্নস্স ৰা পীতিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, পীতিসম্বোজ্ঝঙ্গট্ঠানীযা ধম্মা. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা পীতিসম্বোজ্ঝঙ্গস্স উপ্পাদায, উপ্পন্নস্স ৰা পীতিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা পস্সদ্ধিসম্বোজ্ঝঙ্গস্স উপ্পাদায, উপ্পন্নস্স ৰা পস্সদ্ধিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, কাযপ্পস্সদ্ধি চিত্তপ্পস্সদ্ধি. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা পস্সদ্ধিসম্বোজ্ঝঙ্গস্স উপ্পাদায, উপ্পন্নস্স ৰা পস্সদ্ধিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা সমাধিসম্বোজ্ঝঙ্গস্স উপ্পাদায, উপ্পন্নস্স ৰা সমাধিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, সমথনিমিত্তং অব্যগ্গনিমিত্তং. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা সমাধিসম্বোজ্ঝঙ্গস্স উপ্পাদায, উপ্পন্নস্স ৰা সমাধিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, আহারো অনুপ্পন্নস্স ৰা উপেক্খাসম্বোজ্ঝঙ্গস্স উপ্পাদায, উপ্পন্নস্স ৰা উপেক্খাসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, উপেক্খাসম্বোজ্ঝঙ্গট্ঠানীযা ধম্মা. তত্থ যোনিসোমনসিকারবহুলীকারো – অযমাহারো অনুপ্পন্নস্স ৰা উপেক্খাসম্বোজ্ঝঙ্গস্স উপ্পাদায, উপ্পন্নস্স ৰা উপেক্খাসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা কামচ্ছন্দস্স উপ্পাদায, উপ্পন্নস্স ৰা কামচ্ছন্দস্স ভিয্যোভাৰায ৰেপুল্লায? অত্থি, ভিক্খৰে, অসুভনিমিত্তং. তত্থ যোনিসোমনসিকারবহুলীকারো – অযমনাহারো অনুপ্পন্নস্স ৰা কামচ্ছন্দস্স উপ্পাদায, উপ্পন্নস্স ৰা কামচ্ছন্দস্স ভিয্যোভাৰায ৰেপুল্লায.
‘‘কো চ, ভিক্খৰে, অনাহারো অনুপ্পন্নস্স ৰা ব্যাপাদস্স উপ্পাদায, উপ্পন্নস্স ৰা ব্যাপাদস্স ভিয্যোভাৰায ৰেপুল্লায? অত্থি, ভিক্খৰে, মেত্তাচেতোৰিমুত্তি. তত্থ যোনিসোমনসিকারবহুলীকারো – অযমনাহারো অনুপ্পন্নস্স ৰা ব্যাপাদস্স উপ্পাদায, উপ্পন্নস্স ৰা ব্যাপাদস্স ভিয্যোভাৰায ৰেপুল্লায.
‘‘কো চ, ভিক্খৰে, অনাহারো অনুপ্পন্নস্স ৰা থিনমিদ্ধস্স উপ্পাদায, উপ্পন্নস্স ৰা থিনমিদ্ধস্স ভিয্যোভাৰায ৰেপুল্লায? অত্থি, ভিক্খৰে, আরম্ভধাতু নিক্কমধাতু পরক্কমধাতু. তত্থ যোনিসোমনসিকারবহুলীকারো – অযমনাহারো অনুপ্পন্নস্স ৰা থিনমিদ্ধস্স উপ্পাদায, উপ্পন্নস্স ৰা থিনমিদ্ধস্স ভিয্যোভাৰায ৰেপুল্লায.
‘‘কো চ, ভিক্খৰে, অনাহারো অনুপ্পন্নস্স ৰা উদ্ধচ্চকুক্কুচ্চস্স উপ্পাদায, উপ্পন্নস্স ৰা উদ্ধচ্চকুক্কুচ্চস্স ভিয্যোভাৰায ৰেপুল্লায? অত্থি, ভিক্খৰে, চেতসো ৰূপসমো. তত্থ যোনিসোমনসিকারবহুলীকারো – অযমনাহারো অনুপ্পন্নস্স ৰা উদ্ধচ্চকুক্কুচ্চস্স উপ্পাদায, উপ্পন্নস্স ৰা উদ্ধচ্চকুক্কুচ্চস্স ভিয্যোভাৰায ৰেপুল্লায.
‘‘কো চ, ভিক্খৰে, অনাহারো অনুপ্পন্নায ৰা ৰিচিকিচ্ছায উপ্পাদায, উপ্পন্নায ৰা ৰিচিকিচ্ছায ভিয্যোভাৰায ৰেপুল্লায? অত্থি, ভিক্খৰে, কুসলাকুসলা ধম্মা সাৰজ্জানৰজ্জা ধম্মা হীনপণীতা ধম্মা কণ্হসুক্কসপ্পটিভাগা ধম্মা. তত্থ যোনিসোমনসিকারবহুলীকারো – অযমনাহারো অনুপ্পন্নায ৰা ৰিচিকিচ্ছায উপ্পাদায, উপ্পন্নায ৰা ৰিচিকিচ্ছায ভিয্যোভাৰায ৰেপুল্লায.
‘‘কো চ, ভিক্খৰে, অনাহারো অনুপ্পন্নস্স ৰা সতিসম্বোজ্ঝঙ্গস্স উপ্পাদায, উপ্পন্নস্স ৰা সতিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, সতিসম্বোজ্ঝঙ্গট্ঠানীযা ধম্মা. তত্থ অমনসিকারবহুলীকারো – অযমনাহারো অনুপ্পন্নস্স ৰা সতিসম্বোজ্ঝঙ্গস্স উপ্পাদায, উপ্পন্নস্স ৰা সতিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা ধম্মৰিচযসম্বোজ্ঝঙ্গস্স উপ্পাদায, উপ্পন্নস্স ৰা ধম্মৰিচযসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, কুসলাকুসলা ধম্মা সাৰজ্জানৰজ্জা ধম্মা হীনপণীতা ধম্মা কণ্হসুক্কসপ্পটিভাগা ধম্মা. তত্থ অমনসিকারবহুলীকারো – অযমনাহারো অনুপ্পন্নস্স ৰা ধম্মৰিচযসম্বোজ্ঝঙ্গস্স উপ্পাদায, উপ্পন্নস্স ৰা ধম্মৰিচযসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা ৰীরিযসম্বোজ্ঝঙ্গস্স উপ্পাদায, উপ্পন্নস্স ৰা ৰীরিযসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, আরম্ভধাতু নিক্কমধাতু পরক্কমধাতু. তত্থ অমনসিকারবহুলীকারো – অযমনাহারো অনুপ্পন্নস্স ৰা ৰীরিযসম্বোজ্ঝঙ্গস্স উপ্পাদায, উপ্পন্নস্স ৰা ৰীরিযসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা পীতিসম্বোজ্ঝঙ্গস্স উপ্পাদায, উপ্পন্নস্স ৰা পীতিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, পীতিসম্বোজ্ঝঙ্গট্ঠানীযা ধম্মা. তত্থ অমনসিকারবহুলীকারো – অযমনাহারো অনুপ্পন্নস্স ৰা পীতিসম্বোজ্ঝঙ্গস্স উপ্পাদায, উপ্পন্নস্স ৰা পীতিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা পস্সদ্ধিসম্বোজ্ঝঙ্গস্স উপ্পাদায, উপ্পন্নস্স ৰা পস্সদ্ধিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, কাযপ্পস্সদ্ধি চিত্তপ্পস্সদ্ধি. তত্থ অমনসিকারবহুলীকারো – অযমনাহারো অনুপ্পন্নস্স ৰা পস্সদ্ধিসম্বোজ্ঝঙ্গস্স উপ্পাদায, উপ্পন্নস্স ৰা পস্সদ্ধিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা সমাধিসম্বোজ্ঝঙ্গস্স উপ্পাদায, উপ্পন্নস্স ৰা সমাধিসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, সমথনিমিত্তং অব্যগ্গনিমিত্তং. তত্থ অমনসিকারবহুলীকারো – অযমনাহারো অনুপ্পন্নস্স ৰা সমাধিসম্বোজ্ঝঙ্গস্স উপ্পাদায, উপ্পন্নস্স ৰা সমাধিসম্বোজ্ঝঙ্গস্স ভাৰনায পারিপূরিযা.
‘‘কো চ, ভিক্খৰে, অনাহারো অনুপ্পন্নস্স ৰা উপেক্খাসম্বোজ্ঝঙ্গস্স উপ্পাদায, উপ্পন্নস্স ৰা উপেক্খাসম্বোজ্ঝঙ্গস্স ভাৰনায পারিপূরিযা? অত্থি, ভিক্খৰে, উপেক্খাসম্বোজ্ঝঙ্গট্ঠানীযা ধম্মা. তত্থ অমনসিকারবহুলীকারো – অযমনাহারো অনুপ্পন্নস্স ৰা উপেক্খাসম্বোজ্ঝঙ্গস্স উপ্পাদায, উপ্পন্নস্স ৰা উপেক্খাসম্বোজ্ঝঙ্গস্স ভাৰনায পারিপূরিযা’’তি. পঠমং.
২. পরিযাযসুত্তং
২৩৩. অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিংসু. অথ খো তেসং ভিক্খূনং এতদহোসি – ‘‘অতিপ্পগো খো তাৰ সাৰত্থিযং পিণ্ডায চরিতুং. যংনূন মযং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্যামা’’তি.
অথ খো তে ভিক্খূ যেন অঞ্ঞতিত্থিযানং পরিব্বাজকানং আরামো তেনুপসঙ্কমিংসু; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্নে খো তে ভিক্খূ অঞ্ঞতিত্থিযা পরিব্বাজকা এতদৰোচুং –
‘‘সমণো, আৰুসো, গোতমো সাৰকানং এৰং ধম্মং দেসেতি – ‘এথ তুম্হে, ভিক্খৰে, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে সত্ত বোজ্ঝঙ্গে যথাভূতং ভাৰেথা’তি. মযম্পি খো, আৰুসো, সাৰকানং এৰং ধম্মং দেসেম – ‘এথ তুম্হে, আৰুসো, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে সত্ত বোজ্ঝঙ্গে যথাভূতং ভাৰেথা’তি. ইধ নো, আৰুসো, কো ৰিসেসো, কো অধিপ্পযাসো, কিং নানাকরণং সমণস্স ৰা গোতমস্স অম্হাকং ৰা, যদিদং – ধম্মদেসনায ৰা ধম্মদেসনং, অনুসাসনিযা ৰা অনুসাসনি’’ন্তি?
অথ খো তে ভিক্খূ তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিংসু নপ্পটিক্কোসিংসু; অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিংসু – ‘‘ভগৰতো সন্তিকে এতস্স ভাসিতস্স অত্থং আজানিস্সামা’’তি. অথ খো তে ভিক্খূ সাৰত্থিং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –
‘‘ইধ মযং, ভন্তে, পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিম্হ. তেসং নো, ভন্তে, অম্হাকং এতদহোসি – ‘অতিপ্পগো খো তাৰ সাৰত্থিযং পিণ্ডায চরিতুং, যংনূন মযং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্যামা’তি. অথ খো মযং, ভন্তে, যেন অঞ্ঞতিত্থিযানং পরিব্বাজকানং আরামো তেনুপসঙ্কমিম্হ; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিম্হ. সম্মোদনীযং কথং সারণীযং ৰীতিসারেত্ৰা একমন্তং নিসীদিম্হ. একমন্তং নিসিন্নে খো অম্হে, ভন্তে, অঞ্ঞতিত্থিযা পরিব্বাজকা এতদৰোচুং –
‘‘সমণো, আৰুসো, গোতমো সাৰকানং এৰং ধম্মং দেসেতি ‘এথ তুম্হে, ভিক্খৰে, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে সত্ত বোজ্ঝঙ্গে যথাভূতং ভাৰেথা’তি. মযম্পি খো, আৰুসো, সাৰকানং এৰং ধম্মং দেসেম – ‘এথ তুম্হে, আৰুসো, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে সত্ত বোজ্ঝঙ্গে যথাভূতং ভাৰেথা’তি. ইধ নো, আৰুসো, কো ৰিসেসো, কো অধিপ্পযাসো, কিং নানাকরণং সমণস্স ৰা গোতমস্স অম্হাকং ৰা, যদিদং – ধম্মদেসনায ৰা ধম্মদেসনং, অনুসাসনিযা ৰা অনুসাসনি’’ন্তি?
‘‘অথ খো মযং, ভন্তে, তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিম্হ নপ্পটিক্কোসিম্হ, অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিম্হ – ‘ভগৰতো সন্তিকে এতস্স ভাসিতস্স অত্থং আজানিস্সামা’’’তি.
‘‘এৰংৰাদিনো, ভিক্খৰে, অঞ্ঞতিত্থিযা পরিব্বাজকা এৰমস্সু ৰচনীযা – ‘অত্থি পনাৰুসো, পরিযাযো, যং পরিযাযং আগম্ম পঞ্চ নীৰরণা দস হোন্তি, সত্ত বোজ্ঝঙ্গা চতুদ্দসা’তি. এৰং পুট্ঠা, ভিক্খৰে, অঞ্ঞতিত্থিযা পরিব্বাজকা ন চেৰ সম্পাযিস্সন্তি, উত্তরিঞ্চ ৰিঘাতং আপজ্জিস্সন্তি. তং কিস্স হেতু? যথা তং, ভিক্খৰে, অৰিসযস্মিং. ‘‘নাহং তং, ভিক্খৰে, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যো ইমেসং পঞ্হানং ৰেয্যাকরণেন চিত্তং আরাধেয্য, অঞ্ঞত্র তথাগতেন ৰা তথাগতসাৰকেন ৰা ইতো ৰা পন সুত্ৰা’’.
‘‘কতমো চ, ভিক্খৰে, পরিযাযো, যং পরিযাযং আগম্ম পঞ্চ নীৰরণা দস হোন্তি? যদপি, ভিক্খৰে, অজ্ঝত্তং কামচ্ছন্দো তদপি নীৰরণং, যদপি বহিদ্ধা কামচ্ছন্দো তদপি নীৰরণং. ‘কামচ্ছন্দনীৰরণ’ন্তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. যদপি, ভিক্খৰে, অজ্ঝত্তং ব্যাপাদো তদপি নীৰরণং, যদপি বহিদ্ধা ব্যাপাদো তদপি নীৰরণং. ‘ব্যাপাদনীৰরণ’ন্তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. যদপি, ভিক্খৰে, থিনং তদপি নীৰরণং, যদপি মিদ্ধং তদপি নীৰরণং. ‘থিনমিদ্ধনীৰরণ’ন্তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. যদপি, ভিক্খৰে, উদ্ধচ্চং তদপি নীৰরণং, যদপি কুক্কুচ্চং তদপি নীৰরণং. ‘উদ্ধচ্চকুক্কুচ্চনীৰরণ’ন্তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. যদপি, ভিক্খৰে, অজ্ঝত্তং ধম্মেসু ৰিচিকিচ্ছা তদপি নীৰরণং, যদপি বহিদ্ধা ধম্মেসু ৰিচিকিচ্ছা তদপি নীৰরণং. ‘ৰিচিকিচ্ছানীৰরণ’ন্তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. অযং খো, ভিক্খৰে, পরিযাযো, যং পরিযাযং আগম্ম পঞ্চ নীৰরণা দস হোন্তি.
‘‘কতমো চ, ভিক্খৰে, পরিযাযো, যং পরিযাযং আগম্ম সত্ত বোজ্ঝঙ্গা চতুদ্দস হোন্তি? যদপি, ভিক্খৰে, অজ্ঝত্তং ধম্মেসু সতি তদপি সতিসম্বোজ্ঝঙ্গো, যদপি বহিদ্ধা ধম্মেসু সতি তদপি সতিসম্বোজ্ঝঙ্গো. ‘সতিসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, অজ্ঝত্তং ধম্মেসু পঞ্ঞায পৰিচিনতি [পৰিচিনাতি (ক.)] পৰিচরতি পরিৰীমংসমাপজ্জতি তদপি ধম্মৰিচযসম্বোজ্ঝঙ্গো, যদপি বহিদ্ধা ধম্মেসু পঞ্ঞায পৰিচিনতি পৰিচরতি পরিৰীমংসমাপজ্জতি তদপি ধম্মৰিচযসম্বোজ্ঝঙ্গো. ‘ধম্মৰিচযসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, কাযিকং ৰীরিযং তদপি ৰীরিযসম্বোজ্ঝঙ্গো, যদপি চেতসিকং ৰীরিযং তদপি ৰীরিযসম্বোজ্ঝঙ্গো. ‘ৰীরিযসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, সৰিতক্কসৰিচারা পীতি তদপি পীতিসম্বোজ্ঝঙ্গো, যদপি অৰিতক্কঅৰিচারা পীতি তদপি পীতিসম্বোজ্ঝঙ্গো. ‘পীতিসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, কাযপ্পস্সদ্ধি তদপি পস্সদ্ধিসম্বোজ্ঝঙ্গো, যদপি চিত্তপ্পস্সদ্ধি তদপি পস্সদ্ধিসম্বোজ্ঝঙ্গো. ‘পস্সদ্ধিসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, সৰিতক্কো সৰিচারো সমাধি তদপি সমাধিসম্বোজ্ঝঙ্গো, যদপি অৰিতক্কঅৰিচারো সমাধি তদপি সমাধিসম্বোজ্ঝঙ্গো. ‘সমাধিসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি.
‘‘যদপি, ভিক্খৰে, অজ্ঝত্তং ধম্মেসু উপেক্খা তদপি উপেক্খাসম্বোজ্ঝঙ্গো, যদপি বহিদ্ধা ধম্মেসু উপেক্খা তদপি উপেক্খাসম্বোজ্ঝঙ্গো. ‘উপেক্খাসম্বোজ্ঝঙ্গো’তি ইতি হিদং উদ্দেসং গচ্ছতি. তদমিনাপেতং পরিযাযেন দ্ৰযং হোতি. অযং খো, ভিক্খৰে, পরিযাযো, যং পরিযাযং আগম্ম সত্ত বোজ্ঝঙ্গা চতুদ্দসা’’তি. দুতিযং.
৩. অগ্গিসুত্তং
২৩৪. অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিযং পিণ্ডায পৰিসিংসু. (পরিযাযসুত্তসদিসং).
‘‘এৰংৰাদিনো, ভিক্খৰে, অঞ্ঞতিত্থিযা পরিব্বাজকা এৰমস্সু ৰচনীযা – ‘যস্মিং, আৰুসো, সমযে লীনং চিত্তং হোতি, কতমেসং তস্মিং সমযে বোজ্ঝঙ্গানং অকালো ভাৰনায, কতমেসং তস্মিং সমযে বোজ্ঝঙ্গানং কালো ভাৰনায? যস্মিং পনাৰুসো, সমযে উদ্ধতং চিত্তং হোতি, কতমেসং তস্মিং সমযে বোজ্ঝঙ্গানং অকালো ভাৰনায, কতমেসং তস্মিং সমযে বোজ্ঝঙ্গানং কালো ভাৰনাযা’তি? এৰং পুট্ঠা, ভিক্খৰে, অঞ্ঞতিত্থিযা পরিব্বাজকা ন চেৰ সম্পাযিস্সন্তি, উত্তরিঞ্চ ৰিঘাতং আপজ্জিস্সন্তি. তং কিস্স হেতু? যথা তং, ভিক্খৰে, অৰিসযস্মিং.
‘‘নাহং তং, ভিক্খৰে, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যো ইমেসং পঞ্হানং ৰেয্যাকরণেন চিত্তং আরাধেয্য, অঞ্ঞত্র তথাগতেন ৰা তথাগতসাৰকেন ৰা ইতো ৰা পন সুত্ৰা.
‘‘যস্মিং, ভিক্খৰে, সমযে লীনং চিত্তং হোতি, অকালো তস্মিং সমযে পস্সদ্ধিসম্বোজ্ঝঙ্গস্স ভাৰনায, অকালো সমাধিসম্বোজ্ঝঙ্গস্স ভাৰনায, অকালো উপেক্খাসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং তং এতেহি ধম্মেহি দুস্সমুট্ঠাপযং হোতি.
‘‘সেয্যথাপি, ভিক্খৰে, পুরিসো পরিত্তং অগ্গিং উজ্জালেতুকামো অস্স. সো তত্থ অল্লানি চেৰ তিণানি পক্খিপেয্য, অল্লানি চ গোমযানি পক্খিপেয্য, অল্লানি চ কট্ঠানি পক্খিপেয্য, উদকৰাতঞ্চ দদেয্য, পংসুকেন চ ওকিরেয্য; ভব্বো নু খো সো পুরিসো পরিত্তং অগ্গিং উজ্জালিতু’’ন্তি? ‘‘নো হেতং, ভন্তে’’.
‘‘এৰমেৰ খো, ভিক্খৰে, যস্মিং সমযে লীনং চিত্তং হোতি, অকালো তস্মিং সমযে পস্সদ্ধিসম্বোজ্ঝঙ্গস্স ভাৰনায, অকালো সমাধিসম্বোজ্ঝঙ্গস্স ভাৰনায, অকালো উপেক্খাসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং তং এতেহি ধম্মেহি দুস্সমুট্ঠাপযং হোতি.
‘‘যস্মিঞ্চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ৰীরিযসম্বোজ্ঝঙ্গস্স ভাৰনায, কালো পীতিসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং তং এতেহি ধম্মেহি সুসমুট্ঠাপযং হোতি.
‘‘সেয্যথাপি, ভিক্খৰে, পুরিসো পরিত্তং অগ্গিং উজ্জালেতুকামো অস্স. সো তত্থ সুক্খানি চেৰ তিণানি পক্খিপেয্য, সুক্খানি গোমযানি পক্খিপেয্য, সুক্খানি কট্ঠানি পক্খিপেয্য, মুখৰাতঞ্চ দদেয্য, ন চ পংসুকেন ওকিরেয্য; ভব্বো নু খো সো পুরিসো পরিত্তং অগ্গিং উজ্জালিতু’’ন্তি? ‘‘এৰং, ভন্তে’’.
‘‘এৰমেৰ খো, ভিক্খৰে, যস্মিং সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ৰীরিযসম্বোজ্ঝঙ্গস্স ভাৰনায, কালো পীতিসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং তং এতেহি ধম্মেহি সুসমুট্ঠাপযং হোতি.
‘‘যস্মিং, ভিক্খৰে, সমযে উদ্ধত্তং চিত্তং হোতি, অকালো তস্মিং সমযে ধম্মৰিচযসম্বোজ্ঝঙ্গস্স ভাৰনায, অকালো ৰীরিযসম্বোজ্ঝঙ্গস্স ভাৰনায, অকালো পীতিসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং তং এতেহি ধম্মেহি দুৰূপসমযং হোতি.
‘‘সেয্যথাপি, ভিক্খৰে, পুরিসো মহন্তং অগ্গিক্খন্ধং নিব্বাপেতুকামো অস্স. সো তত্থ সুক্খানি চেৰ তিণানি পক্খিপেয্য, সুক্খানি চ গোমযানি পক্খিপেয্য, সুক্খানি চ কট্ঠানি পক্খিপেয্য, মুখৰাতঞ্চ দদেয্য, ন চ পংসুকেন ওকিরেয্য; ভব্বো নু খো সো পুরিসো মহন্তং অগ্গিক্খন্ধং নিব্বাপেতু’’ন্তি? ‘‘নো হেতং, ভন্তে’’.
‘‘এৰমেৰ খো, ভিক্খৰে, যস্মিং সমযে উদ্ধতং চিত্তং হোতি, অকালো তস্মিং সমযে ধম্মৰিচযসম্বোজ্ঝঙ্গস্স ভাৰনায, অকালো ৰীরিযসম্বোজ্ঝঙ্গস্স ভাৰনায, অকালো পীতিসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং তং এতেহি ধম্মেহি দুৰূপসমযং হোতি.
‘‘যস্মিঞ্চ খো, ভিক্খৰে, সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধিসম্বোজ্ঝঙ্গস্স ভাৰনায, কালো উপেক্খাসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং তং এতেহি ধম্মেহি সুৰূপসমযং হোতি.
‘‘সেয্যথাপি, ভিক্খৰে, পুরিসো মহন্তং অগ্গিক্খন্ধং নিব্বাপেতুকামো অস্স. সো তত্থ অল্লানি চেৰ তিণানি পক্খিপেয্য, অল্লানি চ গোমযানি পক্খিপেয্য, অল্লানি চ কট্ঠানি পক্খিপেয্য, উদকৰাতঞ্চ দদেয্য, পংসুকেন চ ওকিরেয্য; ভব্বো নু খো সো পুরিসো মহন্তং অগ্গিক্খন্ধং নিব্বাপেতু’’ন্তি? ‘‘এৰং, ভন্তে’’.
‘‘এৰমেৰ খো, ভিক্খৰে, যস্মিং সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধিসম্বোজ্ঝঙ্গস্স ভাৰনায, কালো উপেক্খাসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং তং এতেহি ধম্মেহি সুৰূপসমযং হোতি. সতিঞ্চ খ্ৰাহং, ভিক্খৰে, সব্বত্থিকং ৰদামী’’তি. ততিযং.
৪. মেত্তাসহগতসুত্তং
২৩৫. একং সমযং ভগৰা কোলিযেসু ৰিহরতি হলিদ্দৰসনং নাম কোলিযানং নিগমো. অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায হলিদ্দৰসনং পিণ্ডায পৰিসিংসু. অথ খো তেসং ভিক্খূনং এতদহোসি – ‘‘অতিপ্পগো খো তাৰ হলিদ্দৰসনে পিণ্ডায চরিতুং. যংনূন মযং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্যামা’’তি.
অথ খো তে ভিক্খূ যেন অঞ্ঞতিত্থিযানং পরিব্বাজকানং আরামো তেনুপসঙ্কমিংসু; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্নে খো তে ভিক্খূ অঞ্ঞতিত্থিযা পরিব্বাজকা এতদৰোচুং –
‘‘সমণো, আৰুসো, গোতমো সাৰকানং এৰং ধম্মং দেসেতি – ‘এথ তুম্হে, ভিক্খৰে, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথ. করুণাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং করুণাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথ. মুদিতাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মুদিতাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথ. উপেক্খাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথা’’’তি.
‘‘মযম্পি খো, আৰুসো, সাৰকানং এৰং ধম্মং দেসেম – ‘এথ তুম্হে, আৰুসো, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা একং দিসং ফরিত্ৰা ৰিহরথ…পে… করুণাসহগতেন চেতসা… মুদিতাসহগতেন চেতসা… উপেক্খাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথা’তি. ইধ নো, আৰুসো, কো ৰিসেসো, কো অধিপ্পযাসো, কিং নানাকরণং সমণস্স ৰা গোতমস্স অম্হাকং ৰা, যদিদং – ধম্মদেসনায ৰা ধম্মদেসনং, অনুসাসনিযা ৰা অনুসাসনি’’ন্তি?
অথ খো তে ভিক্খূ তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিংসু নপ্পটিক্কোসিংসু. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিংসু – ‘‘ভগৰতো সন্তিকে এতস্স ভাসিতস্স অত্থং আজানিস্সামা’’তি. অথ খো তে ভিক্খূ হলিদ্দৰসনে পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –
‘‘ইধ মযং, ভন্তে, পুব্বণ্হসমযং নিৰাসেত্ৰা পত্তচীৰরমাদায হলিদ্দৰসনে পিণ্ডায পৰিসিম্হ. তেসং নো, ভন্তে, অম্হাকং এতদহোসি – ‘অতিপ্পগো খো তাৰ হলিদ্দৰসনে পিণ্ডায চরিতুং. যংনূন মযং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্যামা’’’তি.
‘‘অথ খো মযং, ভন্তে, যেন অঞ্ঞতিত্থিযানং পরিব্বাজকানং আরামো তেনুপসঙ্কমিম্হ, উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিম্হ. সম্মোদনীযং কথং সারণীযং ৰীতিসারেত্ৰা একমন্তং নিসীদিম্হ. একমন্তং নিসিন্নে খো অম্হে, ভন্তে, তে অঞ্ঞতিত্থিযা পরিব্বাজকা এতদৰোচুং –
‘‘সমণো, আৰুসো, গোতমো সাৰকানং এৰং ধম্মং দেসেতি – ‘এথ তুম্হে, ভিক্খৰে, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা একং দিসং ফরিত্ৰা ৰিহরথ…পে… করুণাসহগতেন চেতসা … মুদিতাসহগতেন চেতসা… উপেক্খাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথা’’’তি.
‘‘মযম্পি খো, আৰুসো, সাৰকানং এৰং ধম্মং দেসেম – ‘এথ তুম্হে, আৰুসো, পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা একং দিসং ফরিত্ৰা ৰিহরথ…পে… করুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরথা’তি. ইধ নো, আৰুসো, কো ৰিসেসো, কো অধিপ্পযাসো, কিং নানাকরণং সমণস্স ৰা গোতমস্স অম্হাকং ৰা, যদিদং, ধম্মদেসনায ৰা ধম্মদেসনং, অনুসাসনিযা ৰা অনুসাসনি’’ন্তি?
অথ খো মযং, ভন্তে, তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিম্হ নপ্পটিক্কোসিম্হ, অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিম্হ – ‘ভগৰতো সন্তিকে এতস্স ভাসিতস্স অত্থং আজানিস্সামা’তি.
‘‘এৰংৰাদিনো, ভিক্খৰে, অঞ্ঞতিত্থিযা পরিব্বাজকা এৰমস্সু ৰচনীযা – ‘কথং ভাৰিতা পনাৰুসো, মেত্তাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? কথং ভাৰিতা পনাৰুসো, করুণাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? কথং ভাৰিতা পনাৰুসো, মুদিতাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? কথং ভাৰিতা পনাৰুসো, উপেক্খাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা’’’তি? এৰং পুট্ঠা, ভিক্খৰে, অঞ্ঞতিত্থিযা পরিব্বাজকা ন চেৰ সম্পাযিস্সন্তি, উত্তরিঞ্চ ৰিঘাতং আপজ্জিস্সন্তি. তং কিস্স হেতু? যথা তং, ভিক্খৰে, অৰিসযস্মিং. ‘‘নাহং তং, ভিক্খৰে, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যো ইমেসং পঞ্হানং ৰেয্যাকরণেন চিত্তং আরাধেয্য, অঞ্ঞত্র তথাগতেন ৰা তথাগতসাৰকেন ৰা ইতো ৰা পন সুত্ৰা’’.
‘‘কথং ভাৰিতা চ, ভিক্খৰে, মেত্তাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? ইধ, ভিক্খৰে, ভিক্খু মেত্তাসহগতং সতিসম্বোজ্ঝঙ্গং ভাৰেতি…পে… মেত্তাসহগতং উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো সচে আকঙ্খতি ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি ‘পটিকূলে অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি ‘অপ্পটিকূলে চ পটিকূলে চ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি ‘পটিকূলে চ অপ্পটিকূলে চ অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি ‘অপ্পটিকূলঞ্চ পটিকূলঞ্চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো চ তত্থ ৰিহরতি সতো সম্পজানো, সুভং ৰা খো পন ৰিমোক্খং উপসম্পজ্জ ৰিহরতি. সুভপরমাহং, ভিক্খৰে, মেত্তাচেতোৰিমুত্তিং ৰদামি, ইধপঞ্ঞস্স ভিক্খুনো উত্তরিৰিমুত্তিং অপ্পটিৰিজ্ঝতো.
‘‘কথং ভাৰিতা চ, ভিক্খৰে, করুণাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? ইধ, ভিক্খৰে, ভিক্খু করুণাসহগতং সতিসম্বোজ্ঝঙ্গং ভাৰেতি…পে… করুণাসহগতং উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো সচে আকঙ্খতি ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি…পে… সচে আকঙ্খতি ‘অপ্পটিকূলঞ্চ পটিকূলঞ্চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো. সব্বসো ৰা পন রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. আকাসানঞ্চাযতনপরমাহং, ভিক্খৰে, করুণাচেতোৰিমুত্তিং ৰদামি, ইধপঞ্ঞস্স ভিক্খুনো উত্তরিৰিমুত্তিং অপ্পটিৰিজ্ঝতো.
‘‘কথং ভাৰিতা চ, ভিক্খৰে, মুদিতাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? ইধ, ভিক্খৰে, ভিক্খু মুদিতাসহগতং সতিসম্বোজ্ঝঙ্গং ভাৰেতি…পে… মুদিতাসহগতং উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো সচে আকঙ্খতি ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি …পে… সচে আকঙ্খতি ‘অপ্পটিকূলঞ্চ পটিকূলঞ্চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো. সব্বসো ৰা পন আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি. ৰিঞ্ঞাণঞ্চাযতনপরমাহং, ভিক্খৰে, মুদিতাচেতোৰিমুত্তিং ৰদামি, ইধপঞ্ঞস্স ভিক্খুনো উত্তরিৰিমুত্তিং অপ্পটিৰিজ্ঝতো.
‘‘কথং ভাৰিতা চ, ভিক্খৰে, উপেক্খাচেতোৰিমুত্তি, কিংগতিকা হোতি, কিংপরমা, কিংফলা, কিংপরিযোসানা? ইধ, ভিক্খৰে, ভিক্খু উপেক্খাসহগতং সতিসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং…পে… উপেক্খাসহগতং উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো সচে আকঙ্খতি ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি ‘পটিকূলে অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি ‘অপ্পটিকূলে চ পটিকূলে চ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি ‘পটিকূলে চ অপ্পটিকূলে চ অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি ‘অপ্পটিকূলঞ্চ পটিকূলঞ্চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো. সব্বসো ৰা পন ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. আকিঞ্চঞ্ঞাযতনপরমাহং, ভিক্খৰে, উপেক্খাচেতোৰিমুত্তিং ৰদামি, ইধপঞ্ঞস্স ভিক্খুনো উত্তরিৰিমুত্তিং অপ্পটিৰিজ্ঝতো’’তি. চতুত্থং.
৫. সঙ্গারৰসুত্তং
২৩৬. সাৰত্থিনিদানং. অথ খো সঙ্গারৰো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সঙ্গারৰো ব্রাহ্মণো ভগৰন্তং এতদৰোচ –
‘‘কো নু খো, ভো গোতম, হেতু, কো পচ্চযো যেনেকদা দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা? কো পন, ভো গোতম, হেতু, কো পচ্চযো যেনেকদা দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা’’তি?
‘‘যস্মিং খো, ব্রাহ্মণ, সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে যথাভূতং ন জানাতি ন পস্সতি, উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘সেয্যথাপি, ব্রাহ্মণ, উদপত্তো সংসট্ঠো লাখায ৰা হলিদ্দিযা ৰা নীলিযা ৰা মঞ্জিট্ঠায ৰা. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য. এৰমেৰ খো, ব্রাহ্মণ, যস্মিং সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘পুন চপরং, ব্রাহ্মণ, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘সেয্যথাপি, ব্রাহ্মণ, উদপত্তো অগ্গিনা সন্তত্তো পক্কুথিতো [পক্কুধিতো (ক.), উক্কট্ঠিতো (সী.), উক্কুট্ঠিতো (স্যা.)] উস্মুদকজাতো [উস্সদকজাতো (সী.), উস্মাদকজাতো (স্যা.)]. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য. এৰমেৰ খো, ব্রাহ্মণ, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘পুন চপরং, ব্রাহ্মণ, যস্মিং সমযে থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘সেয্যথাপি, ব্রাহ্মণ, উদপত্তো সেৰালপণকপরিযোনদ্ধো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য. এৰমেৰ খো, ব্রাহ্মণ, যস্মিং সমযে থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘পুন চপরং, ব্রাহ্মণ, যস্মিং সমযে উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘সেয্যথাপি, ব্রাহ্মণ, উদপত্তো ৰাতেরিতো চলিতো ভন্তো ঊমিজাতো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য. এৰমেৰ খো, ব্রাহ্মণ, যস্মিং সমযে উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘পুন চপরং, ব্রাহ্মণ, যস্মিং সমযে ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি…পে… উভযত্থম্পি… দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘সেয্যথাপি, ব্রাহ্মণ, উদপত্তো আৰিলো লুল়িতো কললীভূতো অন্ধকারে নিক্খিত্তো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং ন জানেয্য ন পস্সেয্য. এৰমেৰ খো, ব্রাহ্মণ, যস্মিং সমযে ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি, অত্তত্থম্পি তস্মিং সমযে যথাভূতং ন জানাতি ন পস্সতি, পরত্থম্পি তস্মিং সমযে যথাভূতং ন জানাতি ন পস্সতি, উভযত্থম্পি তস্মিং সমযে যথাভূতং ন জানাতি ন পস্সতি; দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা. অযং খো, ব্রাহ্মণ, হেতু অযং পচ্চযো যেনেকদা দীঘরত্তং সজ্ঝাযকতাপি মন্তা নপ্পটিভন্তি, পগেৰ অসজ্ঝাযকতা.
‘‘যস্মিঞ্চ খো, ব্রাহ্মণ, সমযে ন কামরাগপরিযুট্ঠিতেন চেতসা ৰিহরতি ন কামরাগপরেতেন, উপ্পন্নস্স চ কামরাগস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি, উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সেয্যথাপি, ব্রাহ্মণ, উদপত্তো অসংসট্ঠো লাখায ৰা হলিদ্দিযা ৰা নীলিযা ৰা মঞ্জিট্ঠায ৰা. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য. এৰমেৰ খো, ব্রাহ্মণ, যস্মিং সমযে ন কামরাগপরিযুট্ঠিতেন চেতসা ৰিহরতি ন কামরাগপরেতেন, উপ্পন্নস্স চ কামরাগস্স নিস্সরণং যথাভূতং পজানাতি…পে….
‘‘পুন চপরং, ব্রাহ্মণ, যস্মিং সমযে ন ব্যাপাদপরিযুট্ঠিতেন চেতসা ৰিহরতি ন ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সেয্যথাপি, ব্রাহ্মণ, উদপত্তো ন অগ্গিনা সন্তত্তো ন পক্কুথিতো ন উস্মুদকজাতো, তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য. এৰমেৰ খো, ব্রাহ্মণ, যস্মিং সমযে ন ব্যাপাদপরিযুট্ঠিতেন চেতসা ৰিহরতি ন ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘পুন চপরং, ব্রাহ্মণ, যস্মিং সমযে ন থিনমিদ্ধপরিযুট্ঠিতেন চেতসা ৰিহরতি ন থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি … দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সেয্যথাপি, ব্রাহ্মণ, উদপত্তো ন সেৰালপণকপরিযোনদ্ধো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য. এৰমেৰ খো, ব্রাহ্মণ, যস্মিং সমযে ন থিনমিদ্ধপরিযুট্ঠিতেন চেতসা ৰিহরতি ন থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘পুন চপরং, ব্রাহ্মণ, যস্মিং সমযে ন উদ্ধচ্চকুক্কুচ্চপরিযুট্ঠিতেন চেতসা ৰিহরতি ন উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সেয্যথাপি, ব্রাহ্মণ, উদপত্তো ন ৰাতেরিতো ন চলিতো ন ভন্তো ন ঊমিজাতো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য. এৰমেৰ খো, ব্রাহ্মণ, যস্মিং সমযে ন উদ্ধচ্চকুক্কুচ্চপরিযুট্ঠিতেন চেতসা ৰিহরতি ন উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি…পে… উভযত্থম্পি… দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘পুন চপরং, ব্রাহ্মণ, যস্মিং সমযে ন ৰিচিকিচ্ছাপরিযুট্ঠিতেন চেতসা ৰিহরতি ন ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং পজানাতি [পজানাতি পস্সতি (স্যা.)], অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি; উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সেয্যথাপি, ব্রাহ্মণ, উদপত্তো অচ্ছো ৰিপ্পসন্নো অনাৰিলো আলোকে নিক্খিত্তো. তত্থ চক্খুমা পুরিসো সকং মুখনিমিত্তং পচ্চৰেক্খমানো যথাভূতং জানেয্য পস্সেয্য. এৰমেৰ খো, ব্রাহ্মণ, যস্মিং সমযে ন ৰিচিকিচ্ছাপরিযুট্ঠিতেন চেতসা ৰিহরতি ন ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং পজানাতি, অত্তত্থম্পি তস্মিং সমযে যথাভূতং জানাতি পস্সতি, পরত্থম্পি তস্মিং সমযে যথাভূতং জানাতি পস্সতি, উভযত্থম্পি তস্মিং সমযে যথাভূতং জানাতি পস্সতি; দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা. অযং খো, ব্রাহ্মণ, হেতু অযং পচ্চযো যেনেকদা দীঘরত্তং অসজ্ঝাযকতাপি মন্তা পটিভন্তি, পগেৰ সজ্ঝাযকতা.
‘‘সত্তিমে, ব্রাহ্মণ, বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তি. কতমে সত্ত? সতিসম্বোজ্ঝঙ্গো খো, ব্রাহ্মণ, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি…পে… উপেক্খাসম্বোজ্ঝঙ্গো খো, ব্রাহ্মণ, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি. ইমে খো, ব্রাহ্মণ, সত্ত বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তী’’তি. এৰং ৰুত্তে সঙ্গারৰো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. পঞ্চমং.
৬. অভযসুত্তং
২৩৭. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো অভযো রাজকুমারো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো অভযো রাজকুমারো ভগৰন্তং এতদৰোচ – ‘‘পূরণো, ভন্তে, কস্সপো এৰমাহ – ‘নত্থি হেতু, নত্থি পচ্চযো অঞ্ঞাণায অদস্সনায. অহেতু, অপ্পচ্চযো [অপ্পচ্চযা (সী.), অপ্পচ্চযং (?)] অঞ্ঞাণং অদস্সনং হোতি. নত্থি হেতু, নত্থি পচ্চযো ঞাণায দস্সনায. অহেতু, অপ্পচ্চযো ঞাণং দস্সনং হোতী’তি. ইধ ভগৰা কিমাহা’’তি? ‘‘অত্থি, রাজকুমার, হেতু, অত্থি পচ্চযো অঞ্ঞাণায অদস্সনায. সহেতু, সপ্পচ্চযো [সপ্পচ্চযা (সী.), সপ্পচ্চযং (?)] অঞ্ঞাণং অদস্সনং হোতি. অত্থি, রাজকুমার, হেতু, অত্থি পচ্চযো ঞাণায দস্সনায. সহেতু, সপ্পচ্চযো ঞাণং দস্সনং হোতী’’তি.
‘‘কতমো পন, ভন্তে, হেতু, কতমো পচ্চযো অঞ্ঞাণায অদস্সনায? কথং সহেতু, সপ্পচ্চযো অঞ্ঞাণং অদস্সনং হোতী’’তি? ‘‘যস্মিং খো, রাজকুমার, সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং ন জানাতি ন পস্সতি – অযম্পি খো, রাজকুমার, হেতু, অযং পচ্চযো অঞ্ঞাণায অদস্সনায. এৰম্পি সহেতু সপ্পচ্চযো অঞ্ঞাণং অদস্সনং হোতি.
‘‘পুন চপরং, রাজকুমার, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন…পে… থিনমিদ্ধপরিযুট্ঠিতেন… উদ্ধচ্চকুক্কুচ্চপরিযুট্ঠিতেন… ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং ন জানাতি ন পস্সতি – অযম্পি খো, রাজকুমার, হেতু, অযং পচ্চযো অঞ্ঞাণায অদস্সনায. এৰম্পি সহেতু সপ্পচ্চযো অঞ্ঞাণং অদস্সনং হোতী’’তি.
‘‘কো নামাযং, ভন্তে, ধম্মপরিযাযো’’তি? ‘‘নীৰরণা নামেতে, রাজকুমারা’’তি. ‘‘তগ্ঘ, ভগৰা, নীৰরণা; তগ্ঘ, সুগত, নীৰরণা! একমেকেনপি খো, ভন্তে, নীৰরণেন অভিভূতো যথাভূতং ন জানেয্য ন পস্সেয্য, কো পন ৰাদো পঞ্চহি নীৰরণেহি?
‘‘কতমো পন, ভন্তে, হেতু, কতমো পচ্চযো ঞাণায দস্সনায? কথং সহেতু, সপ্পচ্চযো ঞাণং দস্সনং হোতী’’তি? ‘‘ইধ, রাজকুমার, ভিক্খু সতিসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো সতিসম্বোজ্ঝঙ্গং ভাৰিতেন চিত্তেন যথাভূতং জানাতি পস্সতি – অযম্পি খো, রাজকুমার, হেতু, অযং পচ্চযো ঞাণায দস্সনায. এৰম্পি সহেতু, সপ্পচ্চযো ঞাণং দস্সনং হোতি.
‘‘পুন চপরং, রাজকুমার, ভিক্খু…পে… উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. সো উপেক্খাসম্বোজ্ঝঙ্গং ভাৰিতেন চিত্তেন যথাভূতং জানাতি পস্সতি – অযম্পি খো, রাজকুমার, হেতু, অযং পচ্চযো ঞাণায দস্সনায. এৰং সহেতু, সপ্পচ্চযো ঞাণং দস্সনং হোতী’’তি.
‘‘কো নামাযং, ভন্তে, ধম্মপরিযাযো’’তি? ‘‘বোজ্ঝঙ্গা নামেতে, রাজকুমারা’’তি. ‘‘তগ্ঘ, ভগৰা, বোজ্ঝঙ্গা; তগ্ঘ, সুগত, বোজ্ঝঙ্গা! একমেকেনপি খো, ভন্তে, বোজ্ঝঙ্গেন সমন্নাগতো যথাভূতং জানেয্য পস্সেয্য, কো পন ৰাদো সত্তহি বোজ্ঝঙ্গেহি? যোপি মে, ভন্তে, গিজ্ঝকূটং পব্বতং আরোহন্তস্স কাযকিলমথো চিত্তকিলমথো, সোপি মে পটিপ্পস্সদ্ধো, ধম্মো চ মে অভিসমিতো’’তি. ছট্ঠং.
সাকচ্ছৰগ্গো ছট্ঠো.
তস্সুদ্দানং –
আহারা পরিযাযমগ্গি, মেত্তং সঙ্গারৰেন চ;
অভযো পুচ্ছিতো পঞ্হং, গিজ্ঝকূটম্হি পব্বতেতি.