১. পঠমৰিহারসুত্তং

১১. সাৰত্থিনিদানং. ‘‘ইচ্ছামহং, ভিক্খৰে, অড্ঢমাসং পটিসল্লিযিতুং. নম্হি কেনচি উপসঙ্কমিতব্বো, অঞ্ঞত্র একেন পিণ্ডপাতনীহারকেনা’’তি. ‘‘এৰং, ভন্তে’’তি খো তে ভিক্খূ ভগৰতো পটিস্সুত্ৰা নাস্সুধ কোচি ভগৰন্তং উপসঙ্কমতি, অঞ্ঞত্র একেন পিণ্ডপাতনীহারকেন.

অথ খো ভগৰা তস্স অড্ঢমাসস্স অচ্চযেন পটিসল্লানা ৰুট্ঠিতো ভিক্খূ আমন্তেসি – ‘‘যেন স্ৰাহং, ভিক্খৰে, ৰিহারেন পঠমাভিসম্বুদ্ধো ৰিহরামি, তস্স পদেসেন ৰিহাসিং. সো এৰং পজানামি – ‘মিচ্ছাদিট্ঠিপচ্চযাপি ৰেদযিতং; সম্মাদিট্ঠিপচ্চযাপি ৰেদযিতং…পে… মিচ্ছাসমাধিপচ্চযাপি ৰেদযিতং; সম্মাসমাধিপচ্চযাপি ৰেদযিতং; ছন্দপচ্চযাপি ৰেদযিতং; ৰিতক্কপচ্চযাপি ৰেদযিতং; সঞ্ঞাপচ্চযাপি ৰেদযিতং; ছন্দো চ অৰূপসন্তো হোতি, ৰিতক্কো চ অৰূপসন্তো হোতি, সঞ্ঞা চ অৰূপসন্তা হোতি, তপ্পচ্চযাপি ৰেদযিতং; ছন্দো চ ৰূপসন্তো হোতি, ৰিতক্কো চ ৰূপসন্তো হোতি, সঞ্ঞা চ ৰূপসন্তা হোতি, তপ্পচ্চযাপি ৰেদযিতং; অপ্পত্তস্স পত্তিযা অত্থি আযামং [ৰাযামং (সী. স্যা.)], তস্মিম্পি ঠানে অনুপ্পত্তে তপ্পচ্চযাপি ৰেদযিত’’’ন্তি. পঠমং.