৮. ওঘৰগ্গো

১. ওঘসুত্তং

১৭২. সাৰত্থিনিদানং. ‘‘চত্তারোমে, ভিক্খৰে, ওঘা. কতমে চত্তারো? কামোঘো, ভৰোঘো, দিট্ঠোঘো, অৰিজ্জোঘো – ইমে খো, ভিক্খৰে, চত্তারো ওঘা. ইমেসং খো, ভিক্খৰে, চতুন্নং ওঘানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. (যথা এসনা, এৰং সব্বং ৰিত্থারেতব্বং.) পঠমং.

২. যোগসুত্তং

১৭৩. ‘‘চত্তারোমে, ভিক্খৰে, যোগা. কতমে চত্তারো? কামযোগো, ভৰযোগো, দিট্ঠিযোগো অৰিজ্জাযোগো – ইমে খো, ভিক্খৰে, চত্তারো যোগা. ইমেসং খো, ভিক্খৰে, চতুন্নং যোগানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. দুতিযং.

৩. উপাদানসুত্তং

১৭৪. ‘‘চত্তারিমানি, ভিক্খৰে, উপাদানানি. কতমানি চত্তারি? কামুপাদানং, দিট্ঠুপাদানং, সীলব্বতুপাদানং, অত্তৰাদুপাদানং – ইমানি খো, ভিক্খৰে, চত্তারি উপাদানানি. ইমেসং খো, ভিক্খৰে, চতুন্নং উপাদানানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. ততিযং.

৪. গন্থসুত্তং

১৭৫. ‘‘চত্তারোমে, ভিক্খৰে, গন্থা. কতমে চত্তারো? অভিজ্ঝা কাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো – ইমে খো, ভিক্খৰে, চত্তারো গন্থা. ইমেসং খো, ভিক্খৰে, চতুন্নং গন্থানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. চতুত্থং.

৫. অনুসযসুত্তং

১৭৬. ‘‘সত্তিমে, ভিক্খৰে, অনুসযা. কতমে সত্ত? কামরাগানুসযো, পটিঘানুসযো, দিট্ঠানুসযো, ৰিচিকিচ্ছানুসযো, মানানুসযো, ভৰরাগানুসযো, অৰিজ্জানুসযো – ইমে খো, ভিক্খৰে, সত্তানুসযা. ইমেসং খো, ভিক্খৰে, সত্তন্নং অনুসযানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. পঞ্চমং.

৬. কামগুণসুত্তং

১৭৭. ‘‘পঞ্চিমে, ভিক্খৰে, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা…পে… জিৰ্হাৰিঞ্ঞেয্যা রসা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, ভিক্খৰে, পঞ্চ কামগুণা. ইমেসং খো, ভিক্খৰে, পঞ্চন্নং কামগুণানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. ছট্ঠং.

৭. নীৰরণসুত্তং

১৭৮. ‘‘পঞ্চিমানি, ভিক্খৰে, নীৰরণানি. কতমানি পঞ্চ? কামচ্ছন্দনীৰরণং, ব্যাপাদনীৰরণং, থিনমিদ্ধনীৰরণং, উদ্ধচ্চকুক্কুচ্চনীৰরণং, ৰিচিকিচ্ছানীৰরণং – ইমানি খো, ভিক্খৰে, পঞ্চ নীৰরণানি. ইমেসং খো, ভিক্খৰে, পঞ্চন্নং নীৰরণানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. সত্তমং.

৮. উপাদানক্খন্ধসুত্তং

১৭৯. ‘‘পঞ্চিমে, ভিক্খৰে, উপাদানক্খন্ধা. কতমে পঞ্চ? সেয্যথিদং – রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো. ইমে খো, ভিক্খৰে, পঞ্চুপাদানক্খন্ধা. ইমেসং খো, ভিক্খৰে, পঞ্চন্নং উপাদানক্খন্ধানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. অট্ঠমং.

৯. ওরম্ভাগিযসুত্তং

১৮০. ‘‘পঞ্চিমানি, ভিক্খৰে, ওরম্ভাগিযানি সংযোজনানি. কতমানি পঞ্চ? সক্কাযদিট্ঠি, ৰিচিকিচ্ছা, সীলব্বতপরামাসো, কামচ্ছন্দো, ব্যাপাদো – ইমানি খো, ভিক্খৰে, পঞ্চোরম্ভাগিযানি সংযোজনানি. ইমেসং খো ভিক্খৰে, পঞ্চন্নং ওরম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায…পে… অযং অরিযো অট্ঠঙ্গিকো মগ্গো ভাৰেতব্বো’’তি. নৰমং.

১০. উদ্ধম্ভাগিযসুত্তং

১৮১. ‘‘পঞ্চিমানি, ভিক্খৰে, উদ্ধম্ভাগিযানি সংযোজনানি. কতমানি পঞ্চ? রূপরাগো, অরূপরাগো, মানো, উদ্ধচ্চং, অৰিজ্জা – ইমানি খো, ভিক্খৰে, পঞ্চুদ্ধম্ভাগিযানি সংযোজনানি. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি ৰিৰেকনিস্সিতং…পে… সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায অযং অরিযো অট্ঠঙ্গিকো মগ্গো ভাৰেতব্বো’’তি.

‘‘পঞ্চিমানি, ভিক্খৰে, উদ্ধম্ভাগিযানি সংযোজনানি. কতমানি পঞ্চ? রূপরাগো, অরূপরাগো, মানো, উদ্ধচ্চং, অৰিজ্জা – ইমানি খো, ভিক্খৰে, পঞ্চুদ্ধম্ভাগিযানি সংযোজনানি. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি রাগৰিনযপরিযোসানং দোসৰিনযপরিযোসানং মোহৰিনযপরিযোসানং… অমতোগধং অমতপরাযনং অমতপরিযোসানং… নিব্বাননিন্নং নিব্বানপোণং নিব্বানপব্ভারং. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায অযং অরিযো অট্ঠঙ্গিকো মগ্গো ভাৰেতব্বো’’তি. দসমং.

ওঘৰগ্গো অট্ঠমো.

তস্সুদ্দানং –

ওঘো যোগো উপাদানং, গন্থং অনুসযেন চ;

কামগুণা নীৰরণং, খন্ধা ওরুদ্ধম্ভাগিযাতি.

ৰগ্গুদ্দানং –

অৰিজ্জাৰগ্গো পঠমো, দুতিযং ৰিহারং ৰুচ্চতি;

মিচ্ছত্তং ততিযো ৰগ্গো, চতুত্থং পটিপন্নেনেৰ.

তিত্থিযং পঞ্চমো ৰগ্গো, ছট্ঠো সূরিযেন চ;

বহুকতে সত্তমো ৰগ্গো, উপ্পাদো অট্ঠমেন চ.

দিৰসৰগ্গো নৰমো, দসমো অপ্পমাদেন চ;

একাদসবলৰগ্গো, দ্ৰাদস এসনা পাল়িযং;

ওঘৰগ্গো ভৰতি তেরসাতি.

মগ্গসংযুত্তং পঠমং.