১. এসনাসুত্তং

১৬১. সাৰত্থিনিদানং. ‘‘তিস্সো ইমা, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং অভিঞ্ঞায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি ৰিৰেকনিস্সিতং…পে… সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. ইমাসং খো, ভিক্খৰে, তিস্সন্নং এসনানং অভিঞ্ঞায অযং অরিযো অট্ঠঙ্গিকো মগ্গো ভাৰেতব্বো’’তি.

‘‘তিস্সো ইমা খো, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং অভিঞ্ঞায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি রাগৰিনযপরিযোসানং দোসৰিনযপরিযোসানং মোহৰিনযপরিযোসানং. ইমাসং খো, ভিক্খৰে, তিস্সন্নং এসনানং অভিঞ্ঞায অযং অরিযো অট্ঠঙ্গিকো মগ্গো ভাৰেতব্বো’’তি.

‘‘তিস্সো ইমা খো, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং অভিঞ্ঞায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি অমতোগধং অমতপরাযনং অমতপরিযোসানং. ইমাসং খো, ভিক্খৰে, তিস্সন্নং এসনানং অভিঞ্ঞায অযং অরিযো অট্ঠঙ্গিকো মগ্গো ভাৰেতব্বো’’তি.

‘‘তিস্সো ইমা খো, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং অভিঞ্ঞায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি নিব্বাননিন্নং নিব্বানপোণং নিব্বানপব্ভারং. ইমাসং খো, ভিক্খৰে, তিস্সন্নং এসনানং অভিঞ্ঞায অযং অরিযো অট্ঠঙ্গিকো মগ্গো ভাৰেতব্বো’’তি.

‘‘তিস্সো ইমা, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং পরিঞ্ঞায…পে… অযং অরিযো অট্ঠঙ্গিকো মগ্গো ভাৰেতব্বো’’তি. (যদপি অভিঞ্ঞা, তদপি পরিঞ্ঞায ৰিত্থারেতব্বং.)

‘‘তিস্সো ইমা, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং পরিক্খযায…পে… অযং অরিযো অট্ঠঙ্গিকো মগ্গো ভাৰেতব্বো’’তি. (যদপি অভিঞ্ঞা, তদপি পরিক্খযায ৰিত্থারেতব্বং.)

‘‘তিস্সো ইমা, ভিক্খৰে, এসনা. কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা. ইমাসং খো, ভিক্খৰে, তিস্সন্নং এসনানং পহানায অরিযো অট্ঠঙ্গিকো মগ্গো ভাৰেতব্বো. কতমো অরিযো অট্ঠঙ্গিকো মগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং…পে… ইমাসং খো, ভিক্খৰে, তিস্সন্নং এসনানং পহানায অযং অরিযো অট্ঠঙ্গিকো মগ্গো ভাৰেতব্বো’’তি. (যদপি অভিঞ্ঞা, তদপি পহানায ৰিত্থারেতব্বং.) পঠমং.