১০. নাৰাসুত্তং

১৫৮. ‘‘সেয্যথাপি, ভিক্খৰে, সামুদ্দিকায নাৰায ৰেত্তবন্ধনবন্ধায ছ মাসানি উদকে পরিযাদায [পরিযাতায (ক.), পরিযাহতায (?)] হেমন্তিকেন থলং উক্খিত্তায ৰাতাতপপরেতানি বন্ধনানি তানি পাৰুস্সকেন মেঘেন অভিপ্পৰুট্ঠানি অপ্পকসিরেনেৰ পটিপ্পস্সম্ভন্তি, পূতিকানি ভৰন্তি; এৰমেৰ খো, ভিক্খৰে, ভিক্খুনো অরিযং অট্ঠঙ্গিকং মগ্গং ভাৰযতো অরিযং অট্ঠঙ্গিকং মগ্গং বহুলীকরোতো অপ্পকসিরেনেৰ সংযোজনানি পটিপ্পস্সম্ভন্তি, পূতিকানি ভৰন্তি. কথঞ্চ, ভিক্খৰে, ভিক্খুনো অরিযং অট্ঠঙ্গিকং মগ্গং ভাৰযতো অরিযং অট্ঠঙ্গিকং মগ্গং বহুলীকরোতো অপ্পকসিরেনেৰ সংযোজনানি পটিপ্পস্সম্ভন্তি, পূতিকানি ভৰন্তি? ইধ, ভিক্খৰে, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং…পে… এৰং খো, ভিক্খৰে, ভিক্খুনো অরিযং অট্ঠঙ্গিকং মগ্গং ভাৰযতো অরিযং অট্ঠঙ্গিকং মগ্গং বহুলীকরোতো অপ্পকসিরেনেৰ সংযোজনানি পটিপ্পস্সম্ভন্তি, পূতিকানি ভৰন্তী’’তি. দসমং.