৬. ৰিঞ্ঞাণঞ্চাযতনপঞ্হাসুত্তং

৩৩৭. ‘‘‘ৰিঞ্ঞাণঞ্চাযতনং, ৰিঞ্ঞাণঞ্চাযতন’ন্তি ৰুচ্চতি. কতমং নু খো ৰিঞ্ঞাণঞ্চাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি. ইদং ৰুচ্চতি ৰিঞ্ঞাণঞ্চাযতন’ন্তি. সো খ্ৰাহং, আৰুসো, সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো আকাসানঞ্চাযতনসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, ৰিঞ্ঞাণঞ্চাযতনং পমাদো, ৰিঞ্ঞাণঞ্চাযতনে চিত্তং সণ্ঠপেহি, ৰিঞ্ঞাণঞ্চাযতনে চিত্তং একোদিং করোহি, ৰিঞ্ঞাণঞ্চাযতনে চিত্তং সমাদহা’তি. সো খ্ৰাহং, আৰুসো, অপরেন সমযেন সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. ছট্ঠং.