৬. মোগ্গল্লানসংযুত্তং

১. পঠমঝানপঞ্হাসুত্তং

৩৩২. একং সমযং আযস্মা মহামোগ্গল্লানো সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো, ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ –

‘‘ইধ ময্হং, আৰুসো, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘পঠমং ঝানং, পঠমং ঝান’ন্তি ৰুচ্চতি. কতমং নু খো পঠমং ঝানন্তি? তস্স ময্হং, আৰুসো, এতদহোসি – ‘ইধ ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ইদং ৰুচ্চতি পঠমং ঝান’ন্তি. সো খ্ৰাহং, আৰুসো, ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো কামসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, পঠমং ঝানং পমাদো, পঠমে ঝানে চিত্তং সণ্ঠপেহি, পঠমে ঝানে চিত্তং একোদিং করোহি [একোদিকরোহি (পী.)], পঠমে ঝানে চিত্তং সমাদহা’তি. সো খ্ৰাহং, আৰুসো, অপরেন সমযেন ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’তি, মমং তং সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’’’তি. পঠমং.

২. দুতিযঝানপঞ্হাসুত্তং

৩৩৩. ‘‘‘দুতিযং ঝানং, দুতিযং ঝান’ন্তি ৰুচ্চতি. কতমং নু খো দুতিযং ঝানন্তি? তস্স ময্হং, আৰুসো, এতদহোসি – ‘ইধ ভিক্খু ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. ইদং ৰুচ্চতি দুতিযং ঝান’ন্তি. সো খ্ৰাহং, আৰুসো, ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো ৰিতক্কসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, দুতিযং ঝানং পমাদো, দুতিযে ঝানে চিত্তং সণ্ঠপেহি, দুতিযে ঝানে চিত্তং একোদিং করোহি, দুতিযে ঝানে চিত্তং সমাদহা’তি. সো খ্ৰাহং, আৰুসো, অপরেন সমযেন ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’তি, মমং তং সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’’’তি. দুতিযং.

৩. ততিযঝানপঞ্হাসুত্তং

৩৩৪. ‘‘‘ততিযং ঝানং, ততিযং ঝান’ন্তি ৰুচ্চতি. কতমং নু খো ততিযং ঝানন্তি? তস্স ময্হং, আৰুসো, এতদহোসি – ইধ ভিক্খু পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. ইদং ৰুচ্চতি ততিযং ঝানন্তি. সো খ্ৰাহং, আৰুসো, পীতিযা চ ৰিরাগা উপেক্খকো চ ৰিহরামি সতো চ সম্পজানো সুখঞ্চ কাযেন পটিসংৰেদেমি. যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো পীতিসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, ততিযং ঝানং পমাদো, ততিযে ঝানে চিত্তং সণ্ঠপেহি, ততিযে ঝানে চিত্তং একোদিং করোহি, ততিযে ঝানে চিত্তং সমাদহা’তি. সো খ্ৰাহং, আৰুসো, অপরেন সমযেন পীতিযা চ ৰিরাগা উপেক্খকো চ ৰিহরামি সতো চ সম্পজানো সুখঞ্চ কাযেন পটিসংৰেদেমি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহাসিং. যঞ্হি তং আৰুসো সম্মা ৰদমানো ৰদেয্য…পে… মহাভিঞ্ঞতং পত্তো’’তি. ততিযং.

৪. চতুত্থঝানপঞ্হাসুত্তং

৩৩৫. ‘‘‘চতুত্থং ঝানং, চতুত্থং ঝান’ন্তি ৰুচ্চতি. কতমং নু খো চতুত্থং ঝানন্তি? তস্স ময্হং, আৰুসো, এতদহোসি – ‘ইধ ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. ইদং ৰুচ্চতি চতুত্থং ঝান’ন্তি. সো খ্ৰাহং, আৰুসো, সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো সুখসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, চতুত্থং ঝানং পমাদো, চতুত্থে ঝানে চিত্তং সণ্ঠপেহি, চতুত্থে ঝানে চিত্তং একোদিং করোহি, চতুত্থে ঝানে চিত্তং সমাদহা’তি. সো খ্ৰাহং, আৰুসো, অপরেন সমযেন সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. চতুত্থং.

৫. আকাসানঞ্চাযতনপঞ্হাসুত্তং

৩৩৬. ‘‘‘আকাসানঞ্চাযতনং, আকাসানঞ্চাযতন’ন্তি ৰুচ্চতি. কতমং নু খো আকাসানঞ্চাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরতি. ইদং ৰুচ্চতি আকাসানঞ্চাযতন’ন্তি. সো খ্ৰাহং, আৰুসো, সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো রূপসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, আকাসানঞ্চাযতনং পমাদো, আকাসানঞ্চাযতনে চিত্তং সণ্ঠপেহি, আকাসানঞ্চাযতনে চিত্তং একোদিং করোহি, আকাসানঞ্চাযতনে চিত্তং সমাদহা’তি. সো খ্ৰাহং, আৰুসো, অপরেন সমযেন সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. পঞ্চমং.

৬. ৰিঞ্ঞাণঞ্চাযতনপঞ্হাসুত্তং

৩৩৭. ‘‘‘ৰিঞ্ঞাণঞ্চাযতনং, ৰিঞ্ঞাণঞ্চাযতন’ন্তি ৰুচ্চতি. কতমং নু খো ৰিঞ্ঞাণঞ্চাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি. ইদং ৰুচ্চতি ৰিঞ্ঞাণঞ্চাযতন’ন্তি. সো খ্ৰাহং, আৰুসো, সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো আকাসানঞ্চাযতনসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, ৰিঞ্ঞাণঞ্চাযতনং পমাদো, ৰিঞ্ঞাণঞ্চাযতনে চিত্তং সণ্ঠপেহি, ৰিঞ্ঞাণঞ্চাযতনে চিত্তং একোদিং করোহি, ৰিঞ্ঞাণঞ্চাযতনে চিত্তং সমাদহা’তি. সো খ্ৰাহং, আৰুসো, অপরেন সমযেন সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. ছট্ঠং.

৭. আকিঞ্চঞ্ঞাযতনপঞ্হাসুত্তং

৩৩৮. ‘‘‘আকিঞ্চঞ্ঞাযতনং, আকিঞ্চঞ্ঞাযতন’ন্তি ৰুচ্চতি. কতমং নু খো আকিঞ্চঞ্ঞাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরতি. ইদং ৰুচ্চতি আকিঞ্চঞ্ঞাযতন’ন্তি. সো খ্ৰাহং, আৰুসো, সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, আকিঞ্চঞ্ঞাযতনং পমাদো, আকিঞ্চঞ্ঞাযতনে চিত্তং সণ্ঠপেহি, আকিঞ্চঞ্ঞাযতনে চিত্তং একোদিং করোহি, আকিঞ্চঞ্ঞাযতনে চিত্তং সমাদহা’তি. সো খ্ৰাহং, আৰুসো, অপরেন সমযেন সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. সত্তমং.

৮. নেৰসঞ্ঞানাসঞ্ঞাযতনপঞ্হাসুত্তং

৩৩৯. ‘‘‘নেৰসঞ্ঞানাসঞ্ঞাযতনং, নেৰসঞ্ঞানাসঞ্ঞাযতন’ন্তি ৰুচ্চতি. কতমং নু খো নেৰসঞ্ঞানাসঞ্ঞাযতনন্তি? তস্স ময্হং, আৰুসো, এতদহোসি – ‘ইধ ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. ইদং ৰুচ্চতি নেৰসঞ্ঞানাসঞ্ঞাযতন’ন্তি. সো খ্ৰাহং, আৰুসো, সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, নেৰসঞ্ঞানাসঞ্ঞাযতনং পমাদো, নেৰসঞ্ঞানাসঞ্ঞাযতনে চিত্তং সণ্ঠপেহি, নেৰসঞ্ঞানাসঞ্ঞাযতনে চিত্তং একোদিং করোহি, নেৰসঞ্ঞানাসঞ্ঞাযতনে চিত্তং সমাদহা’তি. সো খ্ৰাহং, আৰুসো, অপরেন সমযেন সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য…পে… মহাভিঞ্ঞতং পত্তো’’তি. অট্ঠমং.

৯. অনিমিত্তপঞ্হাসুত্তং

৩৪০. ‘‘‘অনিমিত্তো চেতোসমাধি, অনিমিত্তো চেতোসমাধী’তি ৰুচ্চতি. কতমো নু খো অনিমিত্তো চেতোসমাধীতি? তস্স ময্হং, আৰুসো, এতদহোসি – ‘ইধ ভিক্খু সব্বনিমিত্তানং অমনসিকারা অনিমিত্তং চেতোসমাধিং উপসম্পজ্জ ৰিহরতি. অযং ৰুচ্চতি অনিমিত্তো চেতোসমাধী’তি. সো খ্ৰাহং, আৰুসো, সব্বনিমিত্তানং অমনসিকারা অনিমিত্তং চেতোসমাধিং উপসম্পজ্জ ৰিহরামি. তস্স ময্হং, আৰুসো, ইমিনা ৰিহারেন ৰিহরতো নিমিত্তানুসারি ৰিঞ্ঞাণং হোতি.

‘‘অথ খো মং, আৰুসো, ভগৰা ইদ্ধিযা উপসঙ্কমিত্ৰা এতদৰোচ – ‘মোগ্গল্লান, মোগ্গল্লান! মা, ব্রাহ্মণ, অনিমিত্তং চেতোসমাধিং পমাদো, অনিমিত্তে চেতোসমাধিস্মিং চিত্তং সণ্ঠপেহি, অনিমিত্তে চেতোসমাধিস্মিং চিত্তং একোদিং করোহি, অনিমিত্তে চেতোসমাধিস্মিং চিত্তং সমাদহা’তি. সো খ্ৰাহং, আৰুসো, অপরেন সমযেন সব্বনিমিত্তানং অমনসিকারা অনিমিত্তং চেতোসমাধিং উপসম্পজ্জ ৰিহাসিং. যঞ্হি তং, আৰুসো, সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’তি, মমং তং সম্মা ৰদমানো ৰদেয্য – ‘সত্থারানুগ্গহিতো সাৰকো মহাভিঞ্ঞতং পত্তো’’’তি. নৰমং.

১০. সক্কসুত্তং

৩৪১. অথ খো আযস্মা মহামোগ্গল্লানো – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য; এৰমেৰ – জেতৰনে অন্তরহিতো দেৰেসু তাৰতিংসেসু পাতুরহোসি. অথ খো সক্কো দেৰানমিন্দো পঞ্চহি দেৰতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মন্তং মহামোগ্গল্লানং অভিৰাদেত্ৰা একমন্তং অট্ঠাসি. একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ –

‘‘সাধু খো, দেৰানমিন্দ, বুদ্ধসরণগমনং [বুদ্ধং সরণগমনং (সী.)] হোতি. বুদ্ধসরণগমনহেতু [বুদ্ধং সরণগমনহেতু (সী.)] খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, দেৰানমিন্দ, ধম্মসরণগমনং হোতি. ধম্মসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, দেৰানমিন্দ, সঙ্ঘসরণগমনং হোতি. সঙ্ঘসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি.

‘‘সাধু খো, মারিস মোগ্গল্লান, বুদ্ধসরণগমনং হোতি. বুদ্ধসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, মারিস মোগ্গল্লান, ধম্মসরণগমনং হোতি. ধম্মসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, মারিস মোগ্গল্লান, সঙ্ঘ…পে… সুগতিং সগ্গং লোকং উপপজ্জন্তী’’তি.

অথ খো সক্কো দেৰানমিন্দো ছহি দেৰতাসতেহি সদ্ধিং…পে… অথ খো সক্কো দেৰানমিন্দো সত্তহি দেৰতাসতেহি সদ্ধিং…পে… অথ খো সক্কো দেৰানমিন্দো অট্ঠহি দেৰতাসতেহি সদ্ধিং…পে… অথ খো সক্কো দেৰানমিন্দো অসীতিযা দেৰতাসহস্সেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মন্তং মহামোগ্গল্লানং অভিৰাদেত্ৰা একমন্তং অট্ঠাসি. একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ –

‘‘সাধু খো, দেৰানমিন্দ, বুদ্ধসরণগমনং হোতি. বুদ্ধসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, দেৰানমিন্দ, ধম্মসরণগমনং হোতি. ধম্মসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, দেৰানমিন্দ, সঙ্ঘসরণগমনং হোতি. সঙ্ঘসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি.

‘‘সাধু খো, মারিস মোগ্গল্লান, বুদ্ধসরণগমনং হোতি. বুদ্ধসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. সাধু খো, মারিস মোগ্গল্লান, ধম্মসরণগমনং হোতি…পে… সাধু খো, মারিস মোগ্গল্লান, সঙ্ঘসরণগমনং হোতি. সঙ্ঘসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি.

অথ খো সক্কো দেৰানমিন্দো পঞ্চহি দেৰতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মন্তং মহামোগ্গল্লানং অভিৰাদেত্ৰা একমন্তং অট্ঠাসি. একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ –

‘‘সাধু খো, দেৰানমিন্দ, ধম্মে অৰেচ্চপ্পসাদেন সমন্নাগমনং হোতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি. ধম্মে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, দেৰানমিন্দ, সঙ্ঘে অৰেচ্চপ্পসাদেন সমন্নাগমনং হোতি – ‘সুপ্পটিপন্নো ভগৰতো সাৰকসঙ্ঘো, উজুপ্পটিপন্নো ভগৰতো সাৰকসঙ্ঘো, ঞাযপ্পটিপন্নো ভগৰতো সাৰকসঙ্ঘো, সামীচিপ্পটিপন্নো ভগৰতো সাৰকসঙ্ঘো, যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’তি. সঙ্ঘে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, মারিস মোগ্গল্লান, বুদ্ধে অৰেচ্চপ্পসাদেন সমন্নাগমনং হোতি – ‘ইতিপি সো…পে… সত্থা দেৰমনুস্সানং বুদ্ধো ভগৰা’তি. বুদ্ধে অৰেচ্চপ্পসাদেন সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, মারিস মোগ্গল্লান, ধম্মে অৰেচ্চপ্পসাদেন সমন্নাগমনং হোতি – ‘স্ৰাক্খাতো ভগৰতা ধম্মো…পে… পচ্চত্তং ৰেদিতব্বো ৰিঞ্ঞূহী’তি. ধম্মে অৰেচ্চপ্পসাদেন সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, মারিস মোগ্গল্লান, সঙ্ঘে অৰেচ্চপ্পসাদেন সমন্নাগমনং হোতি – ‘সুপ্পটিপন্নো ভগৰতো সাৰকসঙ্ঘো…পে… অনুত্তরং পুঞ্ঞক্খেত্তং লোকস্সা’তি. সঙ্ঘে অৰেচ্চপ্পসাদেন সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

অথ খো সক্কো দেৰানমিন্দো ছহি দেৰতাসতেহি সদ্ধিং…পে…. অথ খো সক্কো দেৰানমিন্দো সত্তহি দেৰতাসতেহি সদ্ধিং…পে…. অথ খো সক্কো দেৰানমিন্দো অট্ঠহি দেৰতাসতেহি সদ্ধিং…পে…. অথ খো সক্কো দেৰানমিন্দো অসীতিযা দেৰতাসহস্সেহি সদ্ধিং যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মন্তং মহামোগ্গল্লানং অভিৰাদেত্ৰা একমন্তং অট্ঠাসি. একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ –

‘‘সাধু খো, দেৰানমিন্দ, বুদ্ধে অৰেচ্চপ্পসাদেন সমন্নাগমনং হোতি – ‘ইতিপি সো ভগৰা…পে… সত্থা দেৰমনুস্সানং বুদ্ধো ভগৰা’তি. বুদ্ধে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, দেৰানমিন্দ, ধম্মে অৰেচ্চপ্পসাদেন সমন্নাগমনং হোতি – ‘স্ৰাক্খাতো ভগৰতা ধম্মো…পে… পচ্চত্তং ৰেদিতব্বো ৰিঞ্ঞূহী’তি. ধম্মে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, দেৰানমিন্দ, সঙ্ঘে অৰেচ্চপ্পসাদেন সমন্নাগমনং হোতি – ‘সুপ্পটিপন্নো ভগৰতো সাৰকসঙ্ঘো…পে… অনুত্তরং পুঞ্ঞক্খেত্তং লোকস্সা’তি. সঙ্ঘে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

‘‘সাধু খো, দেৰানমিন্দ, অরিযকন্তেহি সীলেহি সমন্নাগমনং হোতি অখণ্ডেহি…পে… সমাধিসংৰত্তনিকেহি. অরিযকন্তেহি সীলেহি সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি.

‘‘সাধু খো, মারিস মোগ্গল্লান, বুদ্ধে অৰেচ্চপ্পসাদেন সমন্নাগমনং হোতি – ‘ইতিপি সো ভগৰা…পে… সত্থা দেৰমনুস্সানং বুদ্ধো ভগৰা’তি. বুদ্ধে অৰেচ্চপ্পসাদেন সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি.

অথ খো সক্কো দেৰানমিন্দো পঞ্চহি দেৰতাসতেহি সদ্ধিং যেনাযস্মা মহামোগ্গল্লানো তেনুপসঙ্কমি …পে… একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ –

‘‘সাধু খো, দেৰানমিন্দ, বুদ্ধসরণগমনং হোতি. বুদ্ধসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহি.

‘‘সাধু খো, দেৰানমিন্দ, ধম্মসরণগমনং হোতি. ধম্মসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহি.

‘‘সাধু খো, দেৰানমিন্দ, সঙ্ঘসরণগমনং হোতি. সঙ্ঘসরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহী’’তি.

‘‘সাধু খো, মারিস মোগ্গল্লান, বুদ্ধসরণগমনং হোতি. বুদ্ধসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা…পে… দিব্বেহি ফোট্ঠব্বেহি.

‘‘সাধু খো, মারিস মোগ্গল্লান, ধম্মসরণগমনং হোতি…পে….

‘‘সাধু খো, মারিস মোগ্গল্লান, সঙ্ঘসরণগমনং হোতি. সঙ্ঘসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহী’’তি.

‘‘সাধু খো, দেৰানমিন্দ, ধম্মসরণগমনং হোতি…পে….

‘‘সাধু খো, মারিস মোগ্গল্লান, বুদ্ধসরণগমনং হোতি…পে… সাধু খো, মারিস মোগ্গল্লান, ধম্মসরণগমনং হোতি…পে… সাধু খো মারিস মোগ্গল্লান, সঙ্ঘসরণগমনং হোতি. সঙ্ঘসরণগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহী’’তি.

‘‘সাধু খো, দেৰানমিন্দ, সঙ্ঘে অৰেচ্চপ্পসাদেন সমন্নাগমনং হোতি – ‘সুপ্পটিপন্নো ভগৰতো সাৰকসঙ্ঘো…পে… লোকস্সা’তি. সঙ্ঘে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি…পে….

‘‘সাধু খো, মারিস মোগ্গল্লান, সঙ্ঘে অৰেচ্চপ্পসাদেন সমন্নাগমনং হোতি – ‘সুপ্পটিপন্নো ভগৰতো সাৰকসঙ্ঘো…পে… লোকস্সা’তি. সঙ্ঘে অৰেচ্চপ্পসাদেন সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি…পে….

‘‘সাধু খো, দেৰানমিন্দ, বুদ্ধে অৰেচ্চপ্পসাদেন সমন্নাগমনং হোতি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. বুদ্ধে অৰেচ্চপ্পসাদেন সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহি.

‘‘সাধু খো, দেৰানমিন্দ, অরিযকন্তেহি সীলেহি সমন্নাগমনং হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসত্থেহি অপরামট্ঠেহি সমাধিসংৰত্তনিকেহি. অরিযকন্তেহি সীলেহি সমন্নাগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহী’’তি.

‘‘সাধু খো, মারিস মোগ্গল্লান, অরিযকন্তেহি সীলেহি সমন্নাগমনং হোতি অখণ্ডেহি…পে… সমাধিসংৰত্তনিকেহি. অরিযকন্তেহি সীলেহি সমন্নাগমনহেতু খো, মারিস মোগ্গল্লান, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি. তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহী’’তি. দসমং.

১১. চন্দনসুত্তং

৩৪২. অথ খো চন্দনো [নন্দনো (সী.)] দেৰপুত্তো…পে….

অথ খো সুযামো দেৰপুত্তো…পে….

অথ খো সন্তুসিতো দেৰপুত্তো…পে….

অথ খো সুনিম্মিতো দেৰপুত্তো…পে….

অথ খো ৰসৰত্তি দেৰপুত্তো…পে….

(যথা সক্কসুত্তং তথা ইমে পঞ্চ পেয্যালা ৰিত্থারেতব্বা). একাদসমং.

মোগ্গল্লানসংযুত্তং সমত্তং.