১১. সভিযকচ্চানসুত্তং

৪২০. একং সমযং আযস্মা সভিযো কচ্চানো ঞাতিকে ৰিহরতি গিঞ্জকাৰসথে. অথ খো ৰচ্ছগোত্তো পরিব্বাজকো যেনাযস্মা সভিযো কচ্চানো তেনুপসঙ্কমি; উপসঙ্কমিত্ৰা আযস্মতা সভিযেন কচ্চানেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো আযস্মন্তং সভিযং কচ্চানং এতদৰোচ – ‘‘কিং নু খো ভো, কচ্চান, হোতি তথাগতো পরং মরণা’’তি? ‘‘অব্যাকতং খো এতং, ৰচ্ছ, ভগৰতা – ‘হোতি তথাগতো পরং মরণা’’’তি. ‘‘কিং পন, ভো কচ্চান, ন হোতি তথাগতো পরং মরণা’’তি? ‘‘এতম্পি খো, ৰচ্ছ, অব্যাকতং ভগৰতা – ‘ন হোতি তথাগতো পরং মরণা’’’তি.

‘‘কিং নু খো, ভো কচ্চান, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, ৰচ্ছ, ভগৰতা – ‘হোতি চ ন চ হোতি তথাগতো পরং মরণা’’’তি. ‘‘কিং পন, ভো কচ্চান, নেৰ হোতি ন ন হোতি তথাগতো পরং মরণা’’তি? ‘‘এতম্পি খো, ৰচ্ছ, অব্যাকতং ভগৰতা – ‘নেৰ হোতি ন ন হোতি তথাগতো পরং মরণা’’’তি.

‘‘‘কিং নু খো, ভো কচ্চান, হোতি তথাগতো পরং মরণা’তি, ইতি পুট্ঠো সমানো – ‘অব্যাকতং খো এতং, ৰচ্ছ, ভগৰতা – হোতি তথাগতো পরং মরণা’তি ৰদেসি. ‘কিং পন, ভো কচ্চান, ন হোতি তথাগতো পরং মরণা’তি, ইতি পুট্ঠো সমানো – ‘অব্যাকতং খো এতং, ৰচ্ছ, ভগৰতা – ন হোতি তথাগতো পরং মরণা’তি ৰদেসি. ‘কিং নু খো, ভো কচ্চান, হোতি চ ন চ হোতি তথাগতো পরং মরণা’তি, ইতি পুট্ঠো সমানো – ‘অব্যাকতং খো এতং, ৰচ্ছ, ভগৰতা – হোতি চ ন চ হোতি তথাগতো পরং মরণা’তি ৰদেসি. ‘কিং পন, ভো কচ্চান, নেৰ হোতি ন ন হোতি তথাগতো পরং মরণা’তি, ইতি পুট্ঠো সমানো – ‘এতম্পি খো, ৰচ্ছ, অব্যাকতং ভগৰতা – নেৰ হোতি ন ন হোতি তথাগতো পরং মরণা’তি ৰদেসি. কো নু খো, ভো কচ্চান, হেতু, কো পচ্চযো, যেনেতং অব্যাকতং সমণেন গোতমেনা’’তি? ‘‘যো চ, ৰচ্ছ, হেতু, যো চ পচ্চযো পঞ্ঞাপনায রূপীতি ৰা অরূপীতি ৰা সঞ্ঞীতি ৰা অসঞ্ঞীতি ৰা নেৰসঞ্ঞীনাসঞ্ঞীতি ৰা, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য. কেন নং পঞ্ঞাপযমানো পঞ্ঞাপেয্য রূপীতি ৰা অরূপীতি ৰা সঞ্ঞীতি ৰা অসঞ্ঞীতি ৰা নেৰসঞ্ঞীনাসঞ্ঞীতি ৰা’’তি. ‘‘কীৰচিরং পব্বজিতোসি, ভো কচ্চানা’’তি? ‘‘নচিরং, আৰুসো, তীণি ৰস্সানী’’তি. ‘‘যস্সপ’স্স, আৰুসো, এতমেত্তকেন এত্তকমেৰ তংপ’স্স বহু, কো পন ৰাদো এৰং [কো পন ৰাদো এৰ (সী. পী.)] অভিক্কন্তে’’তি! একাদসমং.

অব্যাকতসংযুত্তং সমত্তং.