১০. আনন্দসুত্তং

৪১৯. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কিং নু খো, ভো গোতম, অত্থত্তা’’তি? এৰং ৰুত্তে, ভগৰা তুণ্হী অহোসি. ‘‘কিং পন, ভো গোতম, নত্থত্তা’’তি? দুতিযম্পি খো ভগৰা তুণ্হী অহোসি. অথ খো ৰচ্ছগোত্তো পরিব্বাজকো উট্ঠাযাসনা পক্কামি.

অথ খো আযস্মা আনন্দো অচিরপক্কন্তে ৰচ্ছগোত্তে পরিব্বাজকে ভগৰন্তং এতদৰোচ – ‘‘কিং নু খো, ভন্তে, ভগৰা ৰচ্ছগোত্তস্স পরিব্বাজকস্স পঞ্হং পুট্ঠো ন ব্যাকাসী’’তি? ‘‘অহঞ্চানন্দ, ৰচ্ছগোত্তস্স পরিব্বাজকস্স ‘অত্থত্তা’তি পুট্ঠো সমানো ‘অত্থত্তা’তি ব্যাকরেয্যং, যে তে, আনন্দ, সমণব্রাহ্মণা সস্সতৰাদা তেসমেতং সদ্ধিং [তেসমেতং লদ্ধি (সী.)] অভৰিস্স. অহঞ্চানন্দ, ৰচ্ছগোত্তস্স পরিব্বাজকস্স ‘নত্থত্তা’তি পুট্ঠো সমানো ‘নত্থত্তা’তি ব্যাকরেয্যং, যে তে, আনন্দ, সমণব্রাহ্মণা উচ্ছেদৰাদা তেসমেতং সদ্ধিং অভৰিস্স. অহঞ্চানন্দ, ৰচ্ছগোত্তস্স পরিব্বাজকস্স ‘অত্থত্তা’তি পুট্ঠো সমানো ‘অত্থত্তা’তি ব্যাকরেয্যং, অপি নু মে তং, আনন্দ, অনুলোমং অভৰিস্স ঞাণস্স উপ্পাদায – ‘সব্বে ধম্মা অনত্তা’’’তি? ‘‘নো হেতং, ভন্তে’’. ‘‘অহঞ্চানন্দ, ৰচ্ছগোত্তস্স পরিব্বাজকস্স ‘নত্থত্তা’তি পুট্ঠো সমানো ‘নত্থত্তা’তি ব্যাকরেয্যং, সম্মূল়্হস্স, আনন্দ, ৰচ্ছগোত্তস্স পরিব্বাজকস্স ভিয্যো সম্মোহায অভৰিস্স – ‘অহুৰা মে নূন পুব্বে অত্তা, সো এতরহি নত্থী’’’তি. দসমং.