১. খেমাসুত্তং

৪১০. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন খেমা ভিক্খুনী কোসলেসু চারিকং চরমানা অন্তরা চ সাৰত্থিং অন্তরা চ সাকেতং তোরণৰত্থুস্মিং ৰাসং উপগতা হোতি. অথ খো রাজা পসেনদি কোসলো সাকেতা সাৰত্থিং গচ্ছন্তো, অন্তরা চ সাকেতং অন্তরা চ সাৰত্থিং তোরণৰত্থুস্মিং একরত্তিৰাসং উপগচ্ছি. অথ খো রাজা পসেনদি কোসলো অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, তোরণৰত্থুস্মিং তথারূপং সমণং ৰা ব্রাহ্মণং ৰা জান যমহং অজ্জ পযিরুপাসেয্য’’ন্তি.

‘‘এৰং, দেৰা’’তি খো সো পুরিসো রঞ্ঞো পসেনদিস্স কোসলস্স পটিস্সুত্ৰা কেৰলকপ্পং তোরণৰত্থুং আহিণ্ডন্তো [অন্ৰাহিণ্ডন্তো (সী.)] নাদ্দস তথারূপং সমণং ৰা ব্রাহ্মণং ৰা যং রাজা পসেনদি কোসলো পযিরুপাসেয্য. অদ্দসা খো সো পুরিসো খেমং ভিক্খুনিং তোরণৰত্থুস্মিং ৰাসং উপগতং. দিস্ৰান যেন রাজা পসেনদি কোসলো তেনুপসঙ্কমি; উপসঙ্কমিত্ৰা রাজানং পসেনদিং কোসলং এতদৰোচ –

‘‘নত্থি খো, দেৰ, তোরণৰত্থুস্মিং তথারূপো সমণো ৰা ব্রাহ্মণো ৰা যং দেৰো পযিরুপাসেয্য. অত্থি চ খো, দেৰ, খেমা নাম ভিক্খুনী, তস্স ভগৰতো সাৰিকা অরহতো সম্মাসম্বুদ্ধস্স. তস্সা খো পন অয্যায এৰং কল্যাণো কিত্তিসদ্দো অব্ভুগ্গতো – ‘পণ্ডিতা, ৰিযত্তা মেধাৰিনী বহুস্সুতা চিত্তকথা কল্যাণপটিভানা’তি. তং দেৰো পযিরুপাসতূ’’তি.

অথ খো রাজা পসেনদি কোসলো যেন খেমা ভিক্খুনী তেনুপসঙ্কমি; উপসঙ্কমিত্ৰা খেমং ভিক্খুনিং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো খেমং ভিক্খুনিং এতদৰোচ – ‘‘কিং নু খো, অয্যে, হোতি তথাগতো পরং মরণা’’তি? ‘‘অব্যাকতং খো এতং, মহারাজ, ভগৰতা – ‘হোতি তথাগতো পরং মরণা’’’তি. ‘‘কিং পনয্যে, ন হোতি তথাগতো পরং মরণা’’তি? ‘‘এতম্পি খো, মহারাজ, অব্যাকতং ভগৰতা – ‘ন হোতি তথাগতো পরং মরণা’’’তি. ‘‘কিং নু খো, অয্যে, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, মহারাজ, ভগৰতা – ‘হোতি চ ন চ হোতি তথাগতো পরং মরণা’’’তি. ‘‘কিং পনয্যে, নেৰ হোতি ন ন হোতি তথাগতো পরং মরণা’’তি. ‘‘এতম্পি খো, মহারাজ, অব্যাকতং ভগৰতা – ‘নেৰ হোতি ন ন হোতি তথাগতো পরং মরণা’’’তি.

‘‘‘কিং নু খো, অয্যে, হোতি তথাগতো পরং মরণা’তি, ইতি পুট্ঠা সমানা – ‘অব্যাকতং খো এতং, মহারাজ, ভগৰতা – হোতি তথাগতো পরং মরণা’তি ৰদেসি. ‘কিং পনয্যে, ন হোতি তথাগতো পরং মরণা’তি ইতি পুট্ঠা সমানা – ‘এতম্পি খো, মহারাজ, অব্যাকতং ভগৰতা – ন হোতি তথাগতো পরং মরণা’তি ৰদেসি. ‘কিং নু খো, অয্যে, হোতি চ ন চ হোতি তথাগতো পরং মরণা’তি ইতি পুট্ঠা সমানা – ‘অব্যাকতং খো এতং, মহারাজ, ভগৰতা – হোতি চ ন চ হোতি তথাগতো পরং মরণা’তি ৰদেসি. ‘কিং পনয্যে, নেৰ হোতি ন ন হোতি তথাগতো পরং মরণা’তি ইতি পুট্ঠা সমানা – ‘এতম্পি খো, মহারাজ, অব্যাকতং ভগৰতা – নেৰ হোতি ন ন হোতি তথাগতো পরং মরণা’তি ৰদেসি. ‘কো নু খো, অয্যে, হেতু, কো পচ্চযো যেনেতং অব্যাকতং ভগৰতা’’’তি?

‘‘তেন হি, মহারাজ, তঞ্ঞেৰেত্থ পটিপুচ্ছিস্সামি. যথা তে খমেয্য তথা নং ব্যাকরেয্যাসি. তং কিং মঞ্ঞসি, মহারাজ, অত্থি তে কোচি গণকো ৰা মুদ্দিকো ৰা সঙ্খাযকো ৰা যো পহোতি গঙ্গায ৰালুকং [ৰালিকং (সী. স্যা. কং.)] গণেতুং – এত্তকা [এত্তিকা (সী.)] ৰালুকা ইতি ৰা, এত্তকানি ৰালুকসতানি ইতি ৰা, এত্তকানি ৰালুকসহস্সানি ইতি ৰা, এত্তকানি ৰালুকসতসহস্সানি ইতি ৰা’’তি? ‘‘নো হেতং, অয্যে’’. ‘‘অত্থি পন তে কোচি গণকো ৰা মুদ্দিকো ৰা সঙ্খাযকো ৰা যো পহোতি মহাসমুদ্দে উদকং গণেতুং – এত্তকানি উদকাল়্হকানি ইতি ৰা, এত্তকানি উদকাল়্হকসতানি ইতি ৰা, এত্তকানি উদকাল়্হকসহস্সানি ইতি ৰা, এত্তকানি উদকাল়্হকসতসহস্সানি ইতি ৰা’’তি? ‘‘নো হেতং, অয্যে’’. ‘‘তং কিস্স হেতু’’? ‘‘মহায্যে, সমুদ্দো গম্ভীরো অপ্পমেয্যো দুপ্পরিযোগাহো’’তি. ‘‘এৰমেৰ খো, মহারাজ, যেন রূপে তথাগতং পঞ্ঞাপযমানো পঞ্ঞাপেয্য তং রূপং তথাগতস্স পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং. রূপসঙ্খাযৰিমুত্তো খো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি, ‘ন হোতি তথাগতো পরং মরণা’তিপি ন উপেতি, ‘হোতি চ ন চ হোতি তথাগতো পরং মরণা’তিপি ন উপেতি, ‘নেৰ হোতি ন ন হোতি তথাগতো পরং মরণা’তিপি ন উপেতি.

‘‘যায ৰেদনায তথাগতং পঞ্ঞাপযমানো পঞ্ঞাপেয্য, সা ৰেদনা তথাগতস্স পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. ৰেদনাসঙ্খাযৰিমুত্তো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি, ‘ন হোতি তথাগতো পরং মরণা’তিপি ন উপেতি, ‘হোতি চ ন চ হোতি তথাগতো পরং মরণা’তিপি ন উপেতি, ‘নেৰ হোতি ন ন হোতি তথাগতো পরং মরণা’তিপি ন উপেতি.

‘‘যায সঞ্ঞা তথাগতং…পে… যেহি সঙ্খারেহি তথাগতং পঞ্ঞাপযমানো পঞ্ঞাপেয্য, তে সঙ্খারা তথাগতস্স পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. সঙ্খারসঙ্খাযৰিমুত্তো খো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি, ‘ন হোতি তথাগতো পরং মরণা’তিপি ন উপেতি, ‘হোতি চ ন চ হোতি তথাগতো পরং মরণা’তিপি ন উপেতি, ‘নেৰ হোতি ন ন হোতি তথাগতো পরং মরণা’তিপি ন উপেতি.

‘‘যেন ৰিঞ্ঞাণে তথাগতং পঞ্ঞাপযমানো পঞ্ঞাপেয্য তং ৰিঞ্ঞাণং তথাগতস্স পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং. ৰিঞ্ঞাণসঙ্খাযৰিমুত্তো খো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি, ‘ন হোতি তথাগতো পরং মরণা’তিপি ন উপেতি, ‘হোতি চ ন চ হোতি তথাগতো পরং মরণা’তিপি ন উপেতি, ‘নেৰ হোতি ন ন হোতি তথাগতো পরং মরণা’তিপি ন উপেতী’’তি. অথ খো রাজা পসেনদি কোসলো খেমায ভিক্খুনিযা ভাসিতং অভিনন্দিত্ৰা অনুমোদিত্ৰা উট্ঠাযাসনা খেমং ভিক্খুনিং অভিৰাদেত্ৰা পদক্খিণং কত্ৰা পক্কামি.

অথ খো রাজা পসেনদি কোসলো অপরেন সমযেন যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘কিং নু খো, ভন্তে, হোতি তথাগতো পরং মরণা’’তি? ‘‘অব্যাকতং খো এতং, মহারাজ, মযা – ‘হোতি তথাগতো পরং মরণা’’’তি. ‘‘কিং পন, ভন্তে, ন হোতি তথাগতো পরং মরণা’’তি? ‘‘এতম্পি খো, মহারাজ, অব্যাকতং মযা – ‘ন হোতি তথাগতো পরং মরণা’’’তি. ‘‘কিং নু খো, ভন্তে, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, মহারাজ, মযা – ‘হোতি চ ন চ হোতি তথাগতো পরং মরণা’’’তি. ‘‘কিং পন, ভন্তে, নেৰ হোতি ন ন হোতি তথাগতো পরং মরণা’’তি? ‘‘এতম্পি খো, মহারাজ, অব্যাকতং মযা – ‘নেৰ হোতি ন ন হোতি তথাগতো পরং মরণা’’’তি. ‘‘কিং নু খো, ভন্তে, হোতি তথাগতো পরং মরণা’’তি ইতি পুট্ঠো সমানো – ‘অব্যাকতং খো এতং, মহারাজ, মযা – হোতি তথাগতো পরং মরণা’তি ৰদেসি…পে…. ‘‘‘কিং পন, ভন্তে, নেৰ হোতি ন ন হোতি তথাগতো পরং মরণা’তি ইতি পুট্ঠো সমানো – ‘‘‘এতম্পি খো, মহারাজ, অব্যাকতং মযা – নেৰ হোতি ন ন হোতি তথাগতো পরং মরণা’তি ৰদেসি. কো নু খো, ভন্তে, হেতু, কো পচ্চযো, যেনেতং অব্যাকতং ভগৰতা’’তি?

‘‘তেন হি, মহারাজ, তঞ্ঞেৰেত্থ পটিপুচ্ছিস্সামি. যথা তে খমেয্য তথা নং ব্যাকরেয্যাসি. তং কিং মঞ্ঞসি, মহারাজ, অত্থি তে কোচি গণকো ৰা মুদ্দিকো ৰা সঙ্খাযকো ৰা যো পহোতি গঙ্গায ৰালুকং গণেতুং – এত্তকা ৰালুকা ইতি ৰা…পে… এত্তকানি ৰালুকসতসহস্সানি ইতি ৰা’’তি? ‘‘নো হেতং, ভন্তে’’. ‘‘অত্থি পন তে কোচি গণকো ৰা মুদ্দিকো ৰা সঙ্খাযকো ৰা যো পহোতি মহাসমুদ্দে উদকং গণেতুং – এত্তকানি উদকাল়্হকানি ইতি ৰা…পে… এত্তকানি উদকাল়্হকসতসহস্সানি ইতি ৰা’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘মহা, ভন্তে, সমুদ্দো গম্ভীরো অপ্পমেয্যো দুপ্পরিযোগাহো. এৰমেৰ খো, মহারাজ, যেন রূপেন তথাগতং পঞ্ঞাপযমানো পঞ্ঞাপেয্য, তং রূপং তথাগতস্স পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং. রূপসঙ্খাযৰিমুত্তো খো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি…পে… ‘নেৰ হোতি ন ন হোতি তথাগতো পরং মরণা’তিপি ন উপেতি. যায ৰেদনায…পে… যায সঞ্ঞায…পে… যেহি সঙ্খারেহি…পে…’’.

‘‘যেন ৰিঞ্ঞাণেন তথাগতং পঞ্ঞাপযমানো পঞ্ঞাপেয্য, তং ৰিঞ্ঞাণং তথাগতস্স পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং. ৰিঞ্ঞাণসঙ্খাযৰিমুত্তো খো, মহারাজ, তথাগতো গম্ভীরো অপ্পমেয্যো দুপ্পরিযোগাহো – সেয্যথাপি মহাসমুদ্দো. ‘হোতি তথাগতো পরং মরণা’তিপি ন উপেতি, ‘ন হোতি তথাগতো পরং মরণা’তিপি ন উপেতি, ‘হোতি চ ন চ হোতি তথাগতো পরং মরণা’তিপি ন উপেতি, ‘নেৰ হোতি ন ন হোতি তথাগতো পরং মরণা’তিপি ন উপেতী’’তি.

‘‘অচ্ছরিযং, ভন্তে, অব্ভুতং, ভন্তে! যত্র হি নাম সত্থু চেৰ [সত্থুনো চেৰ (সী.)] সাৰিকায চ অত্থেন অত্থো ব্যঞ্জনেন ব্যঞ্জনং সংসন্দিস্সতি, সমেস্সতি, ন ৰিরোধযিস্সতি [ৰিহাযিস্সতি (সী. স্যা. কং.), ৰিগাযিস্সতি (ক.)] যদিদং অগ্গপদস্মিং. একমিদাহং, ভন্তে, সমযং খেমং ভিক্খুনিং উপসঙ্কমিত্ৰা এতমত্থং অপুচ্ছিং. সাপি মে অয্যা এতেহি পদেহি এতেহি ব্যঞ্জনেহি এতমত্থং ব্যাকাসি, সেয্যথাপি ভগৰা. অচ্ছরিযং, ভন্তে, অব্ভুতং, ভন্তে! যত্র হি নাম সত্থু চেৰ সাৰিকায চ অত্থেন অত্থো ব্যঞ্জনেন ব্যঞ্জনং সংসন্দিস্সতি, সমেস্সতি, ন ৰিরোধযিস্সতি যদিদং অগ্গপদস্মিং. হন্দ দানি মযং, ভন্তে, গচ্ছাম. বহুকিচ্চা মযং বহুকরণীযা’’তি. ‘‘যস্স দানি ত্ৰং, মহারাজ, কালং মঞ্ঞসী’’তি. অথ খো রাজা পসেনদি কোসলো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামীতি. পঠমং.