৭. মিগজালৰগ্গো

১. পঠমমিগজালসুত্তং

৬৩. সাৰত্থিনিদানং. অথ খো আযস্মা মিগজালো যেন ভগৰা…পে… একমন্তং নিসিন্নো খো আযস্মা মিগজালো ভগৰন্তং এতদৰোচ – ‘‘‘একৰিহারী, একৰিহারী’তি, ভন্তে, ৰুচ্চতি. কিত্তাৰতা নু খো, ভন্তে, একৰিহারী হোতি, কিত্তাৰতা চ পন সদুতিযৰিহারী হোতী’’তি?

‘‘সন্তি খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী [নন্দি (সী. স্যা. কং. পী.)]. নন্দিযা সতি সারাগো হোতি; সারাগে সতি সংযোগো হোতি. নন্দিসংযোজনসংযুত্তো খো, মিগজাল, ভিক্খু সদুতিযৰিহারীতি ৰুচ্চতি. সন্তি…পে… সন্তি খো, মিগজাল, জিৰ্হাৰিঞ্ঞেয্যা রসা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. নন্দিযা সতি সারাগো হোতি; সারাগে সতি সংযোগো হোতি. নন্দিসংযোজনসংযুত্তো খো, মিগজাল, ভিক্খু সদুতিযৰিহারীতি ৰুচ্চতি. এৰংৰিহারী চ, মিগজাল, ভিক্খু কিঞ্চাপি অরঞ্ঞৰনপত্থানি পন্তানি সেনাসনানি পটিসেৰতি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি [মনুস্সরাহসেয্যকানি (সী. স্যা. কং. পী.)] পটিসল্লানসারুপ্পানি; অথ খো সদুতিযৰিহারীতি ৰুচ্চতি. তং কিস্স হেতু? তণ্হা হিস্স দুতিযা, সাস্স অপ্পহীনা. তস্মা সদুতিযৰিহারী’’তি ৰুচ্চতি.

‘‘সন্তি চ খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিযা অসতি সারাগো ন হোতি; সারাগে অসতি সংযোগো ন হোতি. নন্দিসংযোজনৰিসংযুত্তো খো, মিগজাল, ভিক্খু একৰিহারীতি ৰুচ্চতি…পে… সন্তি চ খো, মিগজাল, জিৰ্হাৰিঞ্ঞেয্যা রসা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিযা অসতি সারাগো ন হোতি; সারাগে অসতি সংযোগো ন হোতি. নন্দিসংযোজনৰিপ্পযুত্তো খো, মিগজাল, ভিক্খু একৰিহারীতি ৰুচ্চতি. এৰংৰিহারী চ, মিগজাল, ভিক্খু কিঞ্চাপি গামন্তে ৰিহরতি আকিণ্ণো ভিক্খূহি ভিক্খুনীহি উপাসকেহি উপাসিকাহি রাজূহি রাজমহামত্তেহি তিত্থিযেহি তিত্থিযসাৰকেহি. অথ খো একৰিহারীতি ৰুচ্চতি. তং কিস্স হেতু? তণ্হা হিস্স দুতিযা, সাস্স পহীনা. তস্মা একৰিহারীতি ৰুচ্চতী’’তি. পঠমং.

২. দুতিযমিগজালসুত্তং

৬৪. অথ খো আযস্মা মিগজালো যেন ভগৰা তেনুপসঙ্কমি…পে… একমন্তং নিসিন্নো খো আযস্মা মিগজালো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘সন্তি খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. নন্দিসমুদযা দুক্খসমুদযো, মিগজালাতি ৰদামি…পে… সন্তি চ খো, মিগজাল, জিৰ্হাৰিঞ্ঞেয্যা রসা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. নন্দিসমুদযা দুক্খসমুদযো, মিগজালাতি ৰদামি.

‘‘সন্তি চ খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিনিরোধা দুক্খনিরোধো, মিগজালাতি ৰদামি…পে… সন্তি চ খো, মিগজাল, জিৰ্হাৰিঞ্ঞেয্যা রসা ইট্ঠা কন্তা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিনিরোধা দুক্খনিরোধো, মিগজালাতি ৰদামী’’তি.

অথ খো আযস্মা মিগজালো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো আযস্মা মিগজালো একো ৰূপকট্ঠো অপ্পমত্তো আতাপী পহিতত্তো ৰিহরতো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি. অঞ্ঞতরো চ পনাযস্মা মিগজালো অরহতং অহোসীতি. দুতিযং.

৩. পঠমসমিদ্ধিমারপঞ্হাসুত্তং

৬৫. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা সমিদ্ধি যেন ভগৰা…পে… ভগৰন্তং এতদৰোচ – ‘‘‘মারো, মারো’তি, ভন্তে, ৰুচ্চতি. কিত্তাৰতা নু খো, ভন্তে, মারো ৰা অস্স মারপঞ্ঞত্তি ৰা’’তি?

‘‘যত্থ খো, সমিদ্ধি, অত্থি চক্খু, অত্থি রূপা, অত্থি চক্খুৰিঞ্ঞাণং, অত্থি চক্খুৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি সোতং, অত্থি সদ্দা, অত্থি সোতৰিঞ্ঞাণং, অত্থি সোতৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি ঘানং, অত্থি গন্ধা, অত্থি ঘানৰিঞ্ঞাণং, অত্থি ঘানৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি জিৰ্হা, অত্থি রসা, অত্থি জিৰ্হাৰিঞ্ঞাণং, অত্থি জিৰ্হাৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি কাযো, অত্থি ফোট্ঠব্বা, অত্থি কাযৰিঞ্ঞাণং, অত্থি কাযৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি মনো, অত্থি ধম্মা, অত্থি মনোৰিঞ্ঞাণং, অত্থি মনোৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা.

‘‘যত্থ চ খো, সমিদ্ধি, নত্থি চক্খু, নত্থি রূপা, নত্থি চক্খুৰিঞ্ঞাণং, নত্থি চক্খুৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা. নত্থি সোতং…পে… নত্থি ঘানং…পে… নত্থি জিৰ্হা, নত্থি রসা, নত্থি জিৰ্হাৰিঞ্ঞাণং, নত্থি জিৰ্হাৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা. নত্থি কাযো…পে…. নত্থি মনো, নত্থি ধম্মা, নত্থি মনোৰিঞ্ঞাণং, নত্থি মনোৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা’’তি. ততিযং.

৪. সমিদ্ধিসত্তপঞ্হাসুত্তং

৬৬. ‘‘‘সত্তো, সত্তো’তি, ভন্তে, ৰুচ্চতি. কিত্তাৰতা নু খো, ভন্তে, সত্তো ৰা অস্স সত্তপঞ্ঞত্তি ৰা’’তি…পে…. চতুত্থং.

৫. সমিদ্ধিদুক্খপঞ্হাসুত্তং

৬৭. ‘‘‘দুক্খং, দুক্খ’ন্তি, ভন্তে, ৰুচ্চতি. কিত্তাৰতা নু খো, ভন্তে, দুক্খং ৰা অস্স দুক্খপঞ্ঞত্তি ৰা’’তি…পে…. পঞ্চমং.

৬. সমিদ্ধিলোকপঞ্হাসুত্তং

৬৮. ‘‘‘লোকো, লোকো’তি, ভন্তে, ৰুচ্চতি. কিত্তাৰতা নু খো, ভন্তে, লোকো ৰা অস্স লোকপঞ্ঞত্তি ৰা’’তি? যত্থ খো, সমিদ্ধি, অত্থি চক্খু, অত্থি রূপা, অত্থি চক্খুৰিঞ্ঞাণং, অত্থি চক্খুৰিঞ্ঞাণৰিঞ্ঞাতব্বা ধম্মা, অত্থি তত্থ লোকো ৰা লোকপঞ্ঞত্তি ৰাতি…পে… অত্থি জিৰ্হা…পে… অত্থি মনো, অত্থি ধম্মা, অত্থি মনোৰিঞ্ঞাণং, অত্থি মনোৰিঞ্ঞাণৰিঞ্ঞাতব্বা ধম্মা, অত্থি তত্থ লোকো ৰা লোকপঞ্ঞত্তি ৰা.

‘‘যত্থ চ খো, সমিদ্ধি, নত্থি চক্খু, নত্থি রূপা, নত্থি চক্খুৰিঞ্ঞাণং, নত্থি চক্খুৰিঞ্ঞাণৰিঞ্ঞাতব্বা ধম্মা, নত্থি তত্থ লোকো ৰা লোকপঞ্ঞত্তি ৰা…পে… নত্থি জিৰ্হা…পে… নত্থি মনো, নত্থি ধম্মা, নত্থি মনোৰিঞ্ঞাণং, নত্থি মনোৰিঞ্ঞাণৰিঞ্ঞাতব্বা ধম্মা, নত্থি তত্থ লোকো ৰা লোকপঞ্ঞত্তি ৰা’’তি. ছট্ঠং.

৭. উপসেনআসীৰিসসুত্তং

৬৯. একং সমযং আযস্মা চ সারিপুত্তো আযস্মা চ উপসেনো রাজগহে ৰিহরন্তি সীতৰনে সপ্পসোণ্ডিকপব্ভারে. তেন খো পন সমযেন আযস্মতো উপসেনস্স কাযে আসীৰিসো পতিতো হোতি. অথ খো আযস্মা উপসেনো ভিক্খূ আমন্তেসি – ‘‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ. পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’তি.

এৰং ৰুত্তে, আযস্মা সারিপুত্তো আযস্মন্তং উপসেনং এতদৰোচ – ‘‘ন খো পন মযং পস্সাম আযস্মতো উপসেনস্স কাযস্স ৰা অঞ্ঞথত্তং ইন্দ্রিযানং ৰা ৰিপরিণামং. অথ চ পনাযস্মা উপসেনো এৰমাহ – ‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ. পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’’তি. ‘‘যস্স নূন, আৰুসো সারিপুত্ত, এৰমস্স – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম জিৰ্হাতি ৰা… অহং মনোতি ৰা মম মনোতি ৰা’. তস্স, আৰুসো সারিপুত্ত, সিযা কাযস্স ৰা অঞ্ঞথত্তং ইন্দ্রিযানং ৰা ৰিপরিণামো. ময্হঞ্চ খো, আৰুসো সারিপুত্ত, ন এৰং হোতি – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম জিৰ্হাতি ৰা…পে… অহং মনোতি ৰা মম মনোতি ৰা’. তস্স ময্হঞ্চ খো, আৰুসো সারিপুত্ত, কিং কাযস্স ৰা অঞ্ঞথত্তং ভৰিস্সতি, ইন্দ্রিযানং ৰা ৰিপরিণামো’’তি!

‘‘তথা হি পনাযস্মতো উপসেনস্স দীঘরত্তং অহঙ্কারমমঙ্কারমানানুসযো সুসমূহতো. তস্মা আযস্মতো উপসেনস্স ন এৰং হোতি – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম জিৰ্হাতি ৰা…পে… অহং মনোতি ৰা মম মনোতি ৰা’’’তি. অথ খো তে ভিক্খূ আযস্মতো উপসেনস্স কাযং মঞ্চকং আরোপেত্ৰা বহিদ্ধা নীহরিংসু. অথ খো আযস্মতো উপসেনস্স কাযো তত্থেৰ ৰিকিরি; সেয্যথাপি ভুসমুট্ঠীতি. সত্তমং.

৮. উপৰাণসন্দিট্ঠিকসুত্তং

৭০. অথ খো আযস্মা উপৰাণো যেন ভগৰা তেনুপসঙ্কমি…পে… একমন্তং নিসিন্নো খো আযস্মা উপৰাণো ভগৰন্তং এতদৰোচ – ‘‘‘সন্দিট্ঠিকো ধম্মো, সন্দিট্ঠিকো ধম্মো’তি, ভন্তে, ৰুচ্চতি. কিত্তাৰতা নু খো, ভন্তে, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি?

‘‘ইধ পন, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি রূপরাগপ্পটিসংৰেদী চ. সন্তঞ্চ অজ্ঝত্তং রূপেসু রাগং ‘অত্থি মে অজ্ঝত্তং রূপেসু রাগো’তি পজানাতি. যং তং, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি রূপরাগপ্পটিসংৰেদী চ. সন্তঞ্চ অজ্ঝত্তং রূপেসু রাগং ‘অত্থি মে অজ্ঝত্তং রূপেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন চপরং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদী চ হোতি রসরাগপ্পটিসংৰেদী চ. সন্তঞ্চ অজ্ঝত্তং রসেসু রাগং ‘অত্থি মে অজ্ঝত্তং রসেসু রাগো’তি পজানাতি. যং তং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদী চ হোতি রসরাগপ্পটিসংৰেদী চ. সন্তঞ্চ অজ্ঝত্তং রসেসু রাগং ‘অত্থি মে অজ্ঝত্তং রসেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন চপরং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদী চ হোতি ধম্মরাগপ্পটিসংৰেদী চ. সন্তঞ্চ অজ্ঝত্তং ধম্মেসু রাগং ‘অত্থি মে অজ্ঝত্তং ধম্মেসু রাগো’তি পজানাতি. যং তং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদী চ হোতি ধম্মরাগপ্পটিসংৰেদী চ. সন্তঞ্চ অজ্ঝত্তং ধম্মেসু রাগং ‘অত্থি মে অজ্ঝত্তং ধম্মেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি…পে… পচ্চত্তং ৰেদিতব্বো ৰিঞ্ঞূহী’’তি…পে….

‘‘ইধ পন, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি, নো চ রূপরাগপ্পটিসংৰেদী. অসন্তঞ্চ অজ্ঝত্তং রূপেসু রাগং ‘নত্থি মে অজ্ঝত্তং রূপেসু রাগো’তি পজানাতি. যং তং, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদীহি খো হোতি, নো চ রূপরাগপ্পটিসংৰেদী. অসন্তঞ্চ অজ্ঝত্তং রূপেসু রাগং ‘নত্থি মে অজ্ঝত্তং রূপেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন চপরং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদীহি খো হোতি, নো চ রসরাগপ্পটিসংৰেদী. অসন্তঞ্চ অজ্ঝত্তং রসেসু রাগং ‘নত্থি মে অজ্ঝত্তং রসেসু রাগো’তি পজানাতি…পে….

‘‘পুন চপরং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদীহি খো হোতি, নো চ ধম্মরাগপ্পটিসংৰেদী. অসন্তঞ্চ অজ্ঝত্তং ধম্মেসু রাগং ‘নত্থি মে অজ্ঝত্তং ধম্মেসু রাগো’তি পজানাতি. যং তং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদীহি খো হোতি, নো চ ধম্মরাগপ্পটিসংৰেদী. অসন্তঞ্চ অজ্ঝত্তং ধম্মেসু রাগং ‘নত্থি মে অজ্ঝত্তং ধম্মেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি. অট্ঠমং.

৯. পঠমছফস্সাযতনসুত্তং

৭১. ‘‘যো হি কোচি, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং তেন ব্রহ্মচরিযং, আরকা সো ইমস্মা ধম্মৰিনযা’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘এত্থাহং, ভন্তে, অনস্সসং [অনস্সসিং (সী.), অনস্সাসং (স্যা. কং.), অনস্সাসিং (পী.)]. অহঞ্হি, ভন্তে, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানামী’’তি.

‘‘তং কিং মঞ্ঞসি, ভিক্খু, চক্খুং ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, চক্খু ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্স…পে… জিৰ্হং ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, জিৰ্হা ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্স…পে… মনং ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, মনো ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্সা’’তি. নৰমং.

১০. দুতিযছফস্সাযতনসুত্তং

৭২. ‘‘যো হি কোচি, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং তেন ব্রহ্মচরিযং, আরকা সো ইমস্মা ধম্মৰিনযা’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘এত্থাহং, ভন্তে, অনস্সসং পনস্সসং. অহঞ্হি, ভন্তে, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানামী’’তি.

‘‘তং কিং মঞ্ঞসি, ভিক্খু, চক্খুং ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু, ভিক্খু, এত্থ চ তে, ভিক্খু, চক্খু ‘নেতং মম, নেসোহমস্মি ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং পঠমং ফস্সাযতনং পহীনং ভৰিস্সতি আযতিং অপুনব্ভৰায…পে….

‘‘জিৰ্হং ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু, ভিক্খু, এত্থ চ তে, ভিক্খু, জিৰ্হা ‘নেতং মম, নেসোহমস্মি ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং চতুত্থং ফস্সাযতনং পহীনং ভৰিস্সতি আযতিং অপুনব্ভৰায…পে….

‘‘মনং ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু, ভিক্খু, এত্থ চ তে, ভিক্খু, মনো ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং ছট্ঠং ফস্সাযতনং পহীনং ভৰিস্সতি আযতিং অপুনব্ভৰাযা’’তি. দসমং.

১১. ততিযছফস্সাযতনসুত্তং

৭৩. ‘‘যো হি কোচি, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং তেন ব্রহ্মচরিযং, আরকা সো ইমস্মা ধম্মৰিনযা’’তি.

‘‘তং কিং মঞ্ঞসি, ভিক্খু, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘সোতং… ঘানং… জিৰ্হা… কাযো… মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘নো হেতং, ভন্তে’’.

‘‘এৰং পস্সং, ভিক্খু, সুতৰা অরিযসাৰকো চক্খুস্মিম্পি নিব্বিন্দতি, সোতস্মিম্পি নিব্বিন্দতি, ঘানস্মিম্পি নিব্বিন্দতি, জিৰ্হাযপি নিব্বিন্দতি, কাযস্মিম্পি নিব্বিন্দতি, মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. একাদসমং.

মিগজালৰগ্গো সত্তমো.

তস্সুদ্দানং –

মিগজালেন দ্ৰে ৰুত্তা, চত্তারো চ সমিদ্ধিনা;

উপসেনো উপৰাণো, ছফস্সাযতনিকা তযোতি.