৭. অজ্ঝত্তানিচ্চহেতুসুত্তং

১৪০. ‘‘চক্খুং, ভিক্খৰে, অনিচ্চং. যোপি হেতু, যোপি পচ্চযো চক্খুস্স উপ্পাদায, সোপি অনিচ্চো. অনিচ্চসম্ভূতং, ভিক্খৰে, চক্খু কুতো নিচ্চং ভৰিস্সতি…পে… জিৰ্হা অনিচ্চা. যোপি হেতু, যোপি পচ্চযো জিৰ্হায উপ্পাদায সোপি অনিচ্চো. অনিচ্চসম্ভূতা, ভিক্খৰে, জিৰ্হা কুতো নিচ্চা ভৰিস্সতি…পে… মনো অনিচ্চো. যোপি, ভিক্খৰে, হেতু যোপি পচ্চযো মনস্স উপ্পাদায, সোপি অনিচ্চো. অনিচ্চসম্ভূতো, ভিক্খৰে, মনো কুতো নিচ্চো ভৰিস্সতি! এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি…পে… জিৰ্হাযপি নিব্বিন্দতি…পে… নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. সত্তমং.