৫. পঠমনতুম্হাকংসুত্তং

১৩৮. ‘‘যং, ভিক্খৰে, ন তুম্হাকং তং পজহথ. তং ৰো পহীনং হিতায সুখায ভৰিস্সতি. কিঞ্চ, ভিক্খৰে, ন তুম্হাকং? চক্খু, ভিক্খৰে, ন তুম্হাকং; তং পজহথ. তং ৰো পহীনং হিতায সুখায ভৰিস্সতি…পে… জিৰ্হা ন তুম্হাকং; তং পজহথ. সা ৰো পহীনা হিতায সুখায ভৰিস্সতি…পে… মনো ন তুম্হাকং; তং পজহথ. সো ৰো পহীনো হিতায সুখায ভৰিস্সতি. সেয্যথাপি, ভিক্খৰে, যং ইমস্মিং জেতৰনে তিণকট্ঠসাখাপলাসং তং জনো হরেয্য ৰা ডহেয্য ৰা যথাপচ্চযং ৰা করেয্য, অপি নু তুম্হাকং এৰমস্স – ‘অম্হে জনো হরতি ৰা ডহতি ৰা যথাপচ্চযং ৰা করোতী’’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘ন হি নো এতং, ভন্তে, অত্তা ৰা অত্তনিযং ৰা’’তি. ‘‘এৰমেৰ খো, ভিক্খৰে, চক্খু ন তুম্হাকং; তং পজহথ. তং ৰো পহীনং হিতায সুখায ভৰিস্সতি…পে… জিৰ্হা ন তুম্হাকং; তং পজহথ. সা ৰো পহীনা হিতায সুখায ভৰিস্সতি…পে… মনো ন তুম্হাকং; তং পজহথ. সো ৰো পহীনো হিতায সুখায ভৰিস্সতী’’তি. পঞ্চমং.