১০. ৰেরহচ্চানিসুত্তং

১৩৩. একং সমযং আযস্মা উদাযী কামণ্ডাযং ৰিহরতি তোদেয্যস্স ব্রাহ্মণস্স অম্বৰনে. অথ খো ৰেরহচ্চানিগোত্তায ব্রাহ্মণিযা অন্তেৰাসী মাণৰকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মতা উদাযিনা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো তং মাণৰকং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো সো মাণৰকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা যেন ৰেরহচ্চানিগোত্তা ব্রাহ্মণী তেনুপসঙ্কমি; উপসঙ্কমিত্ৰা ৰেরহচ্চানিগোত্তং ব্রাহ্মণিং এতদৰোচ – ‘‘যগ্ঘে, ভোতি, জানেয্যাসি [ভোতি জানেয্য (সী. পী. ক.), ভোতী জানেয্য (স্যা. কং.)]! সমণো উদাযী ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং, সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতী’’তি.

‘‘তেন হি ত্ৰং, মাণৰক, মম ৰচনেন সমণং উদাযিং নিমন্তেহি স্ৰাতনায ভত্তেনা’’তি. ‘‘এৰং ভোতী’’তি খো সো মাণৰকো ৰেরহচ্চানিগোত্তায ব্রাহ্মণিযা পটিস্সুত্ৰা যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘অধিৰাসেতু কির, ভৰং, উদাযি, অম্হাকং আচরিযভরিযায ৰেরহচ্চানিগোত্তায ব্রাহ্মণিযা স্ৰাতনায ভত্ত’’ন্তি. অধিৰাসেসি খো আযস্মা উদাযী তুণ্হীভাৰেন. অথ খো আযস্মা উদাযী তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন ৰেরহচ্চানিগোত্তায ব্রাহ্মণিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং ভুত্তাৰিং ওনীতপত্তপাণিং পাদুকা আরোহিত্ৰা উচ্চে আসনে নিসীদিত্ৰা সীসং ওগুণ্ঠিত্ৰা আযস্মন্তং উদাযিং এতদৰোচ – ‘‘ভণ, সমণ, ধম্ম’’ন্তি. ‘‘ভৰিস্সতি, ভগিনি, সমযো’’তি ৰত্ৰা উট্ঠাযাসনা পক্কমি [পক্কামি (স্যা. কং. পী.)].

দুতিযম্পি খো সো মাণৰকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মতা উদাযিনা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো তং মাণৰকং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. দুতিযম্পি খো সো মাণৰকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা যেন ৰেরহচ্চানিগোত্তা ব্রাহ্মণী তেনুপসঙ্কমি; উপসঙ্কমিত্ৰা ৰেরহচ্চানিগোত্তং ব্রাহ্মণিং এতদৰোচ – ‘‘যগ্ঘে, ভোতি, জানেয্যাসি! সমণো উদাযী ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং, সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতী’’তি.

‘‘এৰমেৰং পন ত্ৰং, মাণৰক, সমণস্স উদাযিস্স ৰণ্ণং ভাসসি. সমণো পনুদাযী ‘ভণ, সমণ, ধম্ম’ন্তি ৰুত্তো সমানো ‘ভৰিস্সতি, ভগিনি, সমযো’তি ৰত্ৰা উট্ঠাযাসনা পক্কন্তো’’তি. ‘‘তথা হি পন ত্ৰং, ভোতি, পাদুকা আরোহিত্ৰা উচ্চে আসনে নিসীদিত্ৰা সীসং ওগুণ্ঠিত্ৰা এতদৰোচ – ‘ভণ, সমণ, ধম্ম’ন্তি. ধম্মগরুনো হি তে ভৰন্তো ধম্মগারৰা’’তি. ‘‘তেন হি ত্ৰং, মাণৰক, মম ৰচনেন সমণং উদাযিং নিমন্তেহি স্ৰাতনায ভত্তেনা’’তি. ‘‘এৰং, ভোতী’’তি খো সো মাণৰকো ৰেরহচ্চানিগোত্তায ব্রাহ্মণিযা পটিস্সুত্ৰা যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘অধিৰাসেতু কির ভৰং উদাযী অম্হাকং আচরিযভরিযায ৰেরহচ্চানিগোত্তায ব্রাহ্মণিযা স্ৰাতনায ভত্ত’’ন্তি. অধিৰাসেসি খো আযস্মা উদাযী তুণ্হীভাৰেন.

অথ খো আযস্মা উদাযী তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন ৰেরহচ্চানিগোত্তায ব্রাহ্মণিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং ভুত্তাৰিং ওনীতপত্তপাণিং পাদুকা ওরোহিত্ৰা নীচে আসনে নিসীদিত্ৰা সীসং ৰিৰরিত্ৰা আযস্মন্তং উদাযিং এতদৰোচ – ‘‘কিস্মিং নু খো, ভন্তে, সতি অরহন্তো সুখদুক্খং পঞ্ঞপেন্তি, কিস্মিং অসতি অরহন্তো সুখদুক্খং ন পঞ্ঞপেন্তী’’তি?

‘‘চক্খুস্মিং খো, ভগিনি, সতি অরহন্তো সুখদুক্খং পঞ্ঞপেন্তি, চক্খুস্মিং অসতি অরহন্তো সুখদুক্খং ন পঞ্ঞপেন্তি…পে… জিৰ্হায সতি অরহন্তো সুখদুক্খং পঞ্ঞপেন্তি, জিৰ্হায অসতি অরহন্তো সুখদুক্খং ন পঞ্ঞপেন্তি…পে…. মনস্মিং সতি অরহন্তো সুখদুক্খং পঞ্ঞপেন্তি, মনস্মিং অসতি অরহন্তো সুখদুক্খং ন পঞ্ঞপেন্তী’’তি.

এৰং ৰুত্তে, ৰেরহচ্চানিগোত্তা ব্রাহ্মণী আযস্মন্তং উদাযিং এতদৰোচ – ‘‘অভিক্কন্তং, ভন্তে; অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, চক্খুমন্তো রূপানি দক্খন্তীতি; এৰমেৰং অয্যেন উদাযিনা অনেকপরিযাযেন ধম্মো পকাসিতো. এসাহং, অয্য উদাযি, তং ভগৰন্তং সরণং গচ্ছামি, ধম্মঞ্চ, ভিক্খুসঙ্ঘঞ্চ. উপাসিকং মং অয্যো উদাযী ধারেতু অজ্জতগ্গে পাণুপেতং সরণং গত’’ন্তি. দসমং.

গহপতিৰগ্গো তেরসমো.

তস্সুদ্দানং –

ৰেসালী ৰজ্জি নাল়ন্দা, ভারদ্ৰাজ সোণো চ ঘোসিতো;

হালিদ্দিকো নকুলপিতা, লোহিচ্চো ৰেরহচ্চানীতি.