৩. পরিহানধম্মসুত্তং

৯৬. ‘‘পরিহানধম্মঞ্চ ৰো, ভিক্খৰে, দেসেস্সামি অপরিহানধম্মঞ্চ ছ চ অভিভাযতনানি. তং সুণাথ. কথঞ্চ, ভিক্খৰে, পরিহানধম্মো হোতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা সরসঙ্কপ্পা [অকুসলা ধম্মা সরসঙ্কপ্পা (স্যা. কং. পী. ক.) উপরি আসীৰিসৰগ্গে সত্তমসুত্তে পন ‘‘আকুসলা সরসঙ্কপ্পা’’ ত্ৰেৰ সব্বত্থ দিস্সতি] সংযোজনিযা. তঞ্চে ভিক্খু অধিৰাসেতি নপ্পজহতি ন ৰিনোদেতি ন ব্যন্তীকরোতি [ব্যন্তিকরোতি (পী.) ব্যন্তিং করোতি (ক.)] ন অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ধম্মেহি’. পরিহানঞ্হেতং ৰুত্তং ভগৰতাতি…পে….

‘‘পুন চপরং, ভিক্খৰে, ভিক্খুনো জিৰ্হায রসং সাযিত্ৰা উপ্পজ্জন্তি…পে… পুন চপরং, ভিক্খৰে, ভিক্খুনো মনসা ধম্মং ৰিঞ্ঞায উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু অধিৰাসেতি নপ্পজহতি ন ৰিনোদেতি ন ব্যন্তীকরোতি ন অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ধম্মেহি’. পরিহানঞ্হেতং ৰুত্তং ভগৰতাতি. এৰং খো, ভিক্খৰে, পরিহানধম্মো হোতি.

‘‘কথঞ্চ, ভিক্খৰে, অপরিহানধম্মো হোতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘ন পরিহাযামি কুসলেহি ধম্মেহি’. অপরিহানঞ্হেতং ৰুত্তং ভগৰতাতি…পে….

‘‘পুন চপরং, ভিক্খৰে, ভিক্খুনো জিৰ্হায রসং সাযিত্ৰা উপ্পজ্জন্তি…পে… পুন চপরং, ভিক্খৰে, ভিক্খুনো মনসা ধম্মং ৰিঞ্ঞায উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘ন পরিহাযামি কুসলেহি ধম্মেহি’. অপরিহানঞ্হেতং ৰুত্তং ভগৰতাতি. এৰং খো, ভিক্খৰে, অপরিহানধম্মো হোতি.

‘‘কতমানি চ, ভিক্খৰে, ছ অভিভাযতনানি? ইধ, ভিক্খৰে, ভিক্খুনো চক্খুনা রূপং দিস্ৰা নুপ্পজ্জন্তি পাপকা অকুসলা সরসঙ্কপ্পা সংযোজনিযা. ৰেদিতব্বমেতং, ভিক্খৰে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৰুত্তং ভগৰতাতি…পে… পুন চপরং, ভিক্খৰে, ভিক্খুনো মনসা ধম্মং ৰিঞ্ঞায নুপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ৰেদিতব্বমেতং, ভিক্খৰে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৰুত্তং ভগৰতাতি. ইমানি ৰুচ্চন্তি, ভিক্খৰে, ছ অভিভাযতনানী’’তি. ততিযং.