১০. খন্ধসুত্তং

৩১১. সাৰত্থিনিদানং. ‘‘রূপং, ভিক্খৰে, অনিচ্চং ৰিপরিণামি অঞ্ঞথাভাৰি; ৰেদনা অনিচ্চা ৰিপরিণামী অঞ্ঞথাভাৰী; সঞ্ঞা… সঙ্খারা অনিচ্চা ৰিপরিণামিনো অঞ্ঞথাভাৰিনো; ৰিঞ্ঞাণং অনিচ্চং ৰিপরিণামি অঞ্ঞথাভাৰি. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি সদ্ধানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’’.

‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’. যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি. দসমং.

ওক্কন্তসংযুত্তং [ওক্কন্তিকসংযুত্তং (পী. ক.)] সমত্তং.