৪. ওক্কন্তসংযুত্তং

১. চক্খুসুত্তং

৩০২. সাৰত্থিনিদানং. ‘‘চক্খুং, ভিক্খৰে, অনিচ্চং ৰিপরিণামি অঞ্ঞথাভাৰি; সোতং অনিচ্চং ৰিপরিণামি অঞ্ঞথাভাৰি; ঘানং অনিচ্চং ৰিপরিণামি অঞ্ঞথাভাৰি; জিৰ্হা অনিচ্চা ৰিপরিণামী অঞ্ঞথাভাৰী [ৰিপরিণামিনী অঞ্ঞথাভাৰিনী (?)]; কাযো অনিচ্চো ৰিপরিণামী অঞ্ঞথাভাৰী; মনো অনিচ্চো ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি – অযং ৰুচ্চতি সদ্ধানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ [অভব্বোৰ (সী. স্যা. কং.)] তাৰ কালং কাতুং যাৰ ন সোতাপত্তিফলং সচ্ছিকরোতি’’.

‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’. যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি. পঠমং.

২. রূপসুত্তং

৩০৩. সাৰত্থিনিদানং. ‘‘রূপা, ভিক্খৰে, অনিচ্চা ৰিপরিণামিনো অঞ্ঞথাভাৰিনো; সদ্দা অনিচ্চা ৰিপরিণামিনো অঞ্ঞথাভাৰিনো; গন্ধা অনিচ্চা ৰিপরিণামিনো অঞ্ঞথাভাৰিনো; রসা অনিচ্চা ৰিপরিণামিনো অঞ্ঞথাভাৰিনো; ফোট্ঠব্বা অনিচ্চা ৰিপরিণামিনো অঞ্ঞথাভাৰিনো; ধম্মা অনিচ্চা ৰিপরিণামিনো অঞ্ঞথাভাৰিনো. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি সদ্ধানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’’.

‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’. যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি. দুতিযং.

৩. ৰিঞ্ঞাণসুত্তং

৩০৪. সাৰত্থিনিদানং. ‘‘চক্খুৰিঞ্ঞাণং, ভিক্খৰে, অনিচ্চং ৰিপরিণামি অঞ্ঞথাভাৰি; সোতৰিঞ্ঞাণং… ঘানৰিঞ্ঞাণং… জিৰ্হাৰিঞ্ঞাণং… কাযৰিঞ্ঞাণং… মনোৰিঞ্ঞাণং অনিচ্চং ৰিপরিণামি অঞ্ঞথাভাৰি. যো ভিক্খৰে…পে… সম্বোধিপরাযনো’’তি. ততিযং.

৪. সম্ফস্সসুত্তং

৩০৫. সাৰত্থিনিদানং. ‘‘চক্খুসম্ফস্সো, ভিক্খৰে, অনিচ্চো ৰিপরিণামী অঞ্ঞথাভাৰী; সোতসম্ফস্সো… ঘানসম্ফস্সো… জিৰ্হাসম্ফস্সো… কাযসম্ফস্সো… মনোসম্ফস্সো অনিচ্চো ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. চতুত্থং.

৫. সম্ফস্সজাসুত্তং

৩০৬. সাৰত্থিনিদানং. ‘‘চক্খুসম্ফস্সজা, ভিক্খৰে, ৰেদনা অনিচ্চা ৰিপরিণামী অঞ্ঞথাভাৰী; সোতসম্ফস্সজা ৰেদনা…পে… ঘানসম্ফস্সজা ৰেদনা…পে… জিৰ্হাসম্ফস্সজা ৰেদনা…পে… কাযসম্ফস্সজা ৰেদনা…পে… মনোসম্ফস্সজা ৰেদনা অনিচ্চা ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. পঞ্চমং.

৬. রূপসঞ্ঞাসুত্তং

৩০৭. সাৰত্থিনিদানং. ‘‘রূপসঞ্ঞা, ভিক্খৰে, অনিচ্চা ৰিপরিণামী অঞ্ঞথাভাৰী; সদ্দসঞ্ঞা… গন্ধসঞ্ঞা… রসসঞ্ঞা… ফোট্ঠব্বসঞ্ঞা… ধম্মসঞ্ঞা অনিচ্চা ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. ছট্ঠং.

৭. রূপসঞ্চেতনাসুত্তং

৩০৮. সাৰত্থিনিদানং. ‘‘রূপসঞ্চেতনা, ভিক্খৰে, অনিচ্চা ৰিপরিণামী অঞ্ঞথাভাৰী; সদ্দসঞ্চেতনা… গন্ধসঞ্চেতনা… রসসঞ্চেতনা… ফোট্ঠব্বসঞ্চেতনা… ধম্মসঞ্চেতনা অনিচ্চা ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. সত্তমং.

৮. রূপতণ্হাসুত্তং

৩০৯. সাৰত্থিনিদানং. ‘‘রূপতণ্হা, ভিক্খৰে, অনিচ্চা ৰিপরিণামী অঞ্ঞথাভাৰী; সদ্দতণ্হা… গন্ধতণ্হা… রসতণ্হা… ফোট্ঠব্বতণ্হা… ধম্মতণ্হা অনিচ্চা ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. অট্ঠমং.

৯. পথৰীধাতুসুত্তং

৩১০. সাৰত্থিনিদানং. ‘‘পথৰীধাতু, ভিক্খৰে, অনিচ্চা ৰিপরিণামী অঞ্ঞথাভাৰী; আপোধাতু… তেজোধাতু… ৰাযোধাতু… আকাসধাতু… ৰিঞ্ঞাণধাতু অনিচ্চা ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি ‘সদ্ধানুসারী…পে… সম্বোধিপরাযনো’’’তি. নৰমং.

১০. খন্ধসুত্তং

৩১১. সাৰত্থিনিদানং. ‘‘রূপং, ভিক্খৰে, অনিচ্চং ৰিপরিণামি অঞ্ঞথাভাৰি; ৰেদনা অনিচ্চা ৰিপরিণামী অঞ্ঞথাভাৰী; সঞ্ঞা… সঙ্খারা অনিচ্চা ৰিপরিণামিনো অঞ্ঞথাভাৰিনো; ৰিঞ্ঞাণং অনিচ্চং ৰিপরিণামি অঞ্ঞথাভাৰি. যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি সদ্ধানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’’.

‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’. যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি. দসমং.

ওক্কন্তসংযুত্তং [ওক্কন্তিকসংযুত্তং (পী. ক.)] সমত্তং.