৬. খন্ধসুত্তং

৪৮. সাৰত্থিনিদানং. ‘‘পঞ্চ, ভিক্খৰে, খন্ধে দেসেস্সামি, পঞ্চুপাদানক্খন্ধে চ. তং সুণাথ. কতমে চ, ভিক্খৰে, পঞ্চক্খন্ধা? যং কিঞ্চি, ভিক্খৰে, রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, অযং ৰুচ্চতি রূপক্খন্ধো. যা কাচি ৰেদনা…পে… যা কাচি সঞ্ঞা… যে কেচি সঙ্খারা অতীতানাগতপচ্চুপ্পন্না অজ্ঝত্তং ৰা বহিদ্ধা ৰা ওল়ারিকা ৰা সুখুমা ৰা…পে… অযং ৰুচ্চতি সঙ্খারক্খন্ধো. যং কিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, অযং ৰুচ্চতি ৰিঞ্ঞাণক্খন্ধো. ইমে ৰুচ্চন্তি, ভিক্খৰে, পঞ্চক্খন্ধা’’.

‘‘কতমে চ, ভিক্খৰে, পঞ্চুপাদানক্খন্ধা? যং কিঞ্চি, ভিক্খৰে, রূপং অতীতানাগতপচ্চুপ্পন্নং…পে… যং দূরে সন্তিকে ৰা সাসৰং উপাদানিযং, অযং ৰুচ্চতি রূপুপাদানক্খন্ধো. যা কাচি ৰেদনা…পে… যা দূরে সন্তিকে ৰা সাসৰা উপাদানিযা, অযং ৰুচ্চতি ৰেদনুপাদানক্খন্ধো. যা কাচি সঞ্ঞা…পে… যা দূরে সন্তিকে ৰা সাসৰা উপাদানিযা, অযং ৰুচ্চতি সঞ্ঞুপাদানক্খন্ধো. যে কেচি সঙ্খারা…পে… সাসৰা উপাদানিযা, অযং ৰুচ্চতি সঙ্খারুপাদানক্খন্ধো. যং কিঞ্চি ৰিঞ্ঞাণং অতীতানাগতপচ্চুপ্পন্নং…পে… যং দূরে সন্তিকে ৰা সাসৰং উপাদানিযং, অযং ৰুচ্চতি ৰিঞ্ঞাণুপাদানক্খন্ধো. ইমে ৰুচ্চন্তি, ভিক্খৰে, পঞ্চুপাদানক্খন্ধা’’তি. ছট্ঠং.