১০. আনন্দসুত্তং

২১. সাৰত্থিযং … আরামে. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘‘নিরোধো নিরোধো’তি, ভন্তে, ৰুচ্চতি. কতমেসানং খো, ভন্তে, ধম্মানং নিরোধো [নিরোধা (সী. পী.)] ‘নিরোধো’তি ৰুচ্চতী’’তি? ‘‘রূপং খো, আনন্দ, অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং. তস্স নিরোধো [নিরোধা (সী. পী.)] ‘নিরোধো’তি ৰুচ্চতি. ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা. তস্সা নিরোধো ‘নিরোধো’তি ৰুচ্চতি. সঞ্ঞা… সঙ্খারা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা. তেসং নিরোধো ‘নিরোধো’তি ৰুচ্চতি. ৰিঞ্ঞাণং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং. তস্স নিরোধো ‘নিরোধো’তি ৰুচ্চতি. ইমেসং খো, আনন্দ, ধম্মানং নিরোধো ‘নিরোধো’তি ৰুচ্চতী’’তি. দসমং.

অনিচ্চৰগ্গো দুতিযো.

তস্সুদ্দানং –

অনিচ্চং দুক্খং অনত্তা, যদনিচ্চাপরে তযো;

হেতুনাপি তযো ৰুত্তা, আনন্দেন চ তে দসাতি.