১০. ততিযকোট্ঠিকসুত্তং

১৩৫. তঞ্ঞেৰ নিদানং. একমন্তং নিসিন্নো খো আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘অৰিজ্জা, অৰিজ্জা’তি, আৰুসো কোট্ঠিক, ৰুচ্চতি. কতমা নু খো, আৰুসো, অৰিজ্জা, কিত্তাৰতা চ অৰিজ্জাগতো হোতী’’তি?

‘‘ইধাৰুসো, অস্সুতৰা পুথুজ্জনো রূপং নপ্পজানাতি, রূপসমুদযং নপ্পজানাতি, রূপনিরোধং নপ্পজানাতি, রূপনিরোধগামিনিং পটিপদং নপ্পজানাতি. ৰেদনং নপ্পজানাতি…পে… সঞ্ঞং… সঙ্খারে… ৰিঞ্ঞাণং নপ্পজানাতি, ৰিঞ্ঞাণসমুদযং নপ্পজানাতি, ৰিঞ্ঞাণনিরোধং নপ্পজানাতি, ৰিঞ্ঞাণনিরোধগামিনিং পটিপদং নপ্পজানাতি. অযং ৰুচ্চতাৰুসো, অৰিজ্জা; এত্তাৰতা চ অৰিজ্জাগতো হোতী’’তি.

এৰং ৰুত্তে, আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘ৰিজ্জা, ৰিজ্জা’তি, আৰুসো কোট্ঠিক, ৰুচ্চতি. কতমা নু খো, আৰুসো, ৰিজ্জা, কিত্তাৰতা চ ৰিজ্জাগতো হোতী’’তি? ‘‘ইধাৰুসো, সুতৰা অরিযসাৰকো রূপং পজানাতি, রূপসমুদযং পজানাতি, রূপনিরোধং পজানাতি, রূপনিরোধগামিনিং পটিপদং পজানাতি. ৰেদনং… সঞ্ঞং… সঙ্খারে… ৰিঞ্ঞাণং পজানাতি, ৰিঞ্ঞাণসমুদযং পজানাতি, ৰিঞ্ঞাণনিরোধং পজানাতি, ৰিঞ্ঞাণনিরোধগামিনিং পটিপদং পজানাতি. অযং ৰুচ্চতাৰুসো, ৰিজ্জা; এত্তাৰতা চ ৰিজ্জাগতো হোতী’’তি. দসমং.

অৰিজ্জাৰগ্গো তেরসমো.

তস্সুদ্দানং –

সমুদযধম্মে তীণি, অস্সাদো অপরে দুৰে;

সমুদযে চ দ্ৰে ৰুত্তা, কোট্ঠিকে অপরে তযোতি.