১০. থেরনামকসুত্তং

২৪৪. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন অঞ্ঞতরো ভিক্খু থেরনামকো একৰিহারী চেৰ হোতি একৰিহারস্স চ ৰণ্ণৰাদী. সো একো গামং পিণ্ডায পৰিসতি একো পটিক্কমতি একো রহো নিসীদতি একো চঙ্কমং অধিট্ঠাতি. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, অঞ্ঞতরো ভিক্খু থেরনামকো একৰিহারী একৰিহারস্স চ ৰণ্ণৰাদী’’তি.

অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন থেরং ভিক্খুং আমন্তেহি – ‘সত্থা তং, আৰুসো থের, আমন্তেতী’’’তি. ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা থেরো তেনুপসঙ্কমি; উপসঙ্কমিত্ৰা আযস্মন্তং থেরং এতদৰোচ – ‘‘সত্থা তং, আৰুসো থের, আমন্তেতী’’তি. ‘‘এৰমাৰুসো’’তি খো আযস্মা থেরো তস্স ভিক্খুনো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং থেরং ভগৰা এতদৰোচ – ‘‘সচ্চং কির ত্ৰং, থের, একৰিহারী একৰিহারস্স চ ৰণ্ণৰাদী’’তি? ‘‘এৰং, ভন্তে’’. ‘‘যথা কথং পন ত্ৰং, থের, একৰিহারী একৰিহারস্স চ ৰণ্ণৰাদী’’তি? ‘‘ইধাহং, ভন্তে, একো গামং পিণ্ডায পৰিসামি একো পটিক্কমামি একো রহো নিসীদামি একো চঙ্কমং অধিট্ঠামি. এৰং খ্ৰাহং, ভন্তে, একৰিহারী একৰিহারস্স চ ৰণ্ণৰাদী’’তি.

‘‘অত্থেসো, থের, একৰিহারো নেসো নত্থীতি ৰদামি. অপি চ, থের, যথা একৰিহারো ৰিত্থারেন পরিপুণ্ণো হোতি তং সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো…পে…. ‘‘কথঞ্চ, থের, একৰিহারো ৰিত্থারেন পরিপুণ্ণো হোতি. ইধ, থের, যং অতীতং তং পহীনং, যং অনাগতং তং পটিনিস্সট্ঠং, পচ্চুপ্পন্নেসু চ অত্তভাৰপটিলাভেসু ছন্দরাগো সুপ্পটিৰিনীতো. এৰং খো, থের, একৰিহারো ৰিত্থারেন পরিপুণ্ণো হোতী’’তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘সব্বাভিভুং সব্বৰিদুং সুমেধং,

সব্বেসু ধম্মেসু অনূপলিত্তং;

সব্বঞ্জহং তণ্হাক্খযে ৰিমুত্তং,

তমহং নরং একৰিহারীতি ব্রূমী’’তি. দসমং;