১০. সুসিমসুত্তং

৭০. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন ভগৰা সক্কতো হোতি গরুকতো মানিতো পূজিতো অপচিতো লাভী চীৰর-পিণ্ডপাত-সেনাসন-গিলানপ্পচ্চয-ভেসজ্জপরিক্খারানং. ভিক্খুসঙ্ঘোপি সক্কতো হোতি গরুকতো মানিতো পূজিতো অপচিতো লাভী চীৰর-পিণ্ডপাত-সেনাসনগিলানপ্পচ্চয-ভেসজ্জপরিক্খারানং. অঞ্ঞতিত্থিযা পন পরিব্বাজকা অসক্কতা হোন্তি অগরুকতা অমানিতা অপূজিতা অনপচিতা, ন লাভিনো চীৰর-পিণ্ডপাত-সেনাসনগিলানপ্পচ্চয-ভেসজ্জপরিক্খারানং.

তেন খো পন সমযেন সুসিমো [সুসীমো (সী. ক.)] পরিব্বাজকো রাজগহে পটিৰসতি মহতিযা পরিব্বাজকপরিসায সদ্ধিং. অথ খো সুসিমস্স পরিব্বাজকস্স পরিসা সুসিমং পরিব্বাজকং এতদৰোচুং – ‘‘এহি ত্ৰং, আৰুসো সুসিম, সমণে গোতমে ব্রহ্মচরিযং চর. ত্ৰং ধম্মং পরিযাপুণিত্ৰা অম্হে ৰাচেয্যাসি [ৰাচেস্সসি (পী. ক.)]. তং মযং ধম্মং পরিযাপুণিত্ৰা গিহীনং ভাসিস্সাম. এৰং মযম্পি সক্কতা ভৰিস্সাম গরুকতা মানিতা পূজিতা অপচিতা লাভিনো চীৰর-পিণ্ডপাতসেনাসন-গিলানপ্পচ্চয-ভেসজ্জপরিক্খারান’’ন্তি. ‘‘এৰমাৰুসো’’তি খো সুসিমো পরিব্বাজকো সকায পরিসায পটিস্সুণিত্ৰা যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সুসিমো পরিব্বাজকো আযস্মন্তং আনন্দং এতদৰোচ – ‘‘ইচ্ছামহং, আৰুসো আনন্দ, ইমস্মিং ধম্মৰিনযে ব্রহ্মচরিযং চরিতু’’ন্তি.

অথ খো আযস্মা আনন্দো সুসিমং পরিব্বাজকং আদায যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘অযং, ভন্তে, সুসিমো পরিব্বাজকো এৰমাহ – ‘ইচ্ছামহং, আৰুসো আনন্দ, ইমস্মিং ধম্মৰিনযে ব্রহ্মচরিযং চরিতু’’ন্তি. ‘‘তেনহানন্দ, সুসিমং পব্বাজেথা’’তি. অলত্থ খো সুসিমো পরিব্বাজকো ভগৰতো সন্তিকে পব্বজ্জং, অলত্থ উপসম্পদং.

তেন খো পন সমযেন সম্বহুলেহি ভিক্খূহি ভগৰতো সন্তিকে অঞ্ঞা ব্যাকতা হোতি – ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামা’’তি. অস্সোসি খো আযস্মা সুসিমো – ‘‘সম্বহুলেহি কির ভিক্খূহি ভগৰতো সন্তিকে অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. অথ খো আযস্মা সুসিমো যেন তে ভিক্খূ তেনুপসঙ্কমি; উপসঙ্কমিত্ৰা তেহি ভিক্খূহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা সুসিমো তে ভিক্খূ এতদৰোচ – ‘‘সচ্চং কিরাযস্মন্তেহি ভগৰতো সন্তিকে অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি? ‘‘এৰমাৰুসো’’তি.

‘‘অপি পন [অপি নু (সী. স্যা. কং.) এৰমুপরিপি] তুম্হে আযস্মন্তো এৰং জানন্তা এৰং পস্সন্তা অনেকৰিহিতং ইদ্ধিৰিধং পচ্চনুভোথ – একোপি হুত্ৰা বহুধা হোথ, বহুধাপি হুত্ৰা একো হোথ; আৰিভাৰং, তিরোভাৰং, তিরোকুট্টং তিরোপাকারং তিরোপব্বতং অসজ্জমানা গচ্ছথ, সেয্যথাপি আকাসে; পথৰিযাপি উম্মুজ্জনিমুজ্জং করোথ, সেয্যথাপি উদকে; উদকেপি অভিজ্জমানে গচ্ছথ, সেয্যথাপি পথৰিযং; আকাসেপি পল্লঙ্কেন কমথ, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসথ পরিমজ্জথ, যাৰ ব্রহ্মলোকাপি কাযেন ৰসং ৰত্তেথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাথ দিব্বে চ মানুসে চ যে দূরে সন্তিকে চা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা পরসত্তানং পরপুগ্গলানং চেতসা চেতো পরিচ্চ পজানাথ – সরাগং ৰা চিত্তং সরাগং চিত্তন্তি পজানাথ; ৰীতরাগং ৰা চিত্তং ৰীতরাগং চিত্তন্তি পজানাথ; সদোসং ৰা চিত্তং সদোসং চিত্তন্তি পজানাথ; ৰীতদোসং ৰা চিত্তং ৰীতদোসং চিত্তন্তি পজানাথ; সমোহং ৰা চিত্তং সমোহং চিত্তন্তি পজানাথ; ৰীতমোহং ৰা চিত্তং ৰীতমোহং চিত্তন্তি পজানাথ; সংখিত্তং ৰা চিত্তং সংখিত্তং চিত্তন্তি পজানাথ; ৰিক্খিত্তং ৰা চিত্তং ৰিক্খিত্তং চিত্তন্তি পজানাথ; মহগ্গতং ৰা চিত্তং মহগ্গতং চিত্তন্তি পজানাথ; অমহগ্গতং ৰা চিত্তং অমহগ্গতং চিত্তন্তি পজানাথ; সউত্তরং ৰা চিত্তং সউত্তরং চিত্তন্তি পজানাথ; অনুত্তরং ৰা চিত্তং অনুত্তরং চিত্তন্তি পজানাথ; সমাহিতং ৰা চিত্তং সমাহিতং চিত্তন্তি পজানাথ; অসমাহিতং ৰা চিত্তং অসমাহিতং চিত্তন্তি পজানাথ; ৰিমুত্তং ৰা চিত্তং ৰিমুত্তং চিত্তন্তি পজানাথ; অৰিমুত্তং ৰা চিত্তং অৰিমুত্তং চিত্তন্তি পজানাথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা অনেকৰিহিতং পুব্বেনিৰাসং অনুস্সরথ, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তারীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি, অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সথ চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাথ – ‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা, অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না; ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা, অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা তে কাযস্স ভেদা পরং মরণা সুগতিং সগ্গং লোকং উপপন্না’তি, ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সথ চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা যে তে সন্তা ৰিমোক্খা অতিক্কম্ম রূপে আরুপ্পা, তে কাযেন ফুসিত্ৰা ৰিহরথা’’তি? ‘‘নো হেতং, আৰুসো’’.

‘‘এত্থ দানি আযস্মন্তো ইদঞ্চ ৰেয্যাকরণং ইমেসঞ্চ ধম্মানং অসমাপত্তি; ইদং নো, আৰুসো, কথ’’ন্তি? ‘‘পঞ্ঞাৰিমুত্তা খো মযং, আৰুসো সুসিমা’’তি.

‘‘ন খ্ৰাহং ইমস্স আযস্মন্তানং সংখিত্তেন ভাসিতস্স ৰিত্থারেন অত্থং আজানামি. সাধু মে আযস্মন্তো তথা ভাসন্তু যথাহং ইমস্স আযস্মন্তানং সংখিত্তেন ভাসিতস্স ৰিত্থারেন অত্থং আজানেয্য’’ন্তি. ‘‘আজানেয্যাসি ৰা ত্ৰং, আৰুসো সুসিম, ন ৰা ত্ৰং আজানেয্যাসি অথ খো পঞ্ঞাৰিমুত্তা ময’’ন্তি.

অথ খো আযস্মা সুসিমো উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সুসিমো যাৰতকো তেহি ভিক্খূহি সদ্ধিং অহোসি কথাসল্লাপো তং সব্বং ভগৰতো আরোচেসি. ‘‘পুব্বে খো, সুসিম, ধম্মট্ঠিতিঞাণং, পচ্ছা নিব্বানে ঞাণ’’ন্তি.

‘‘ন খ্ৰাহং, ভন্তে, ইমস্স ভগৰতা [ভগৰতো (পী.)] সংখিত্তেন ভাসিতস্স ৰিত্থারেন অত্থং আজানামি. সাধু মে, ভন্তে, ভগৰা তথা ভাসতু যথাহং ইমস্স ভগৰতা সংখিত্তেন ভাসিতস্স ৰিত্থারেন অত্থং আজানেয্য’’ন্তি. ‘‘আজানেয্যাসি ৰা ত্ৰং, সুসিম, ন ৰা ত্ৰং আজানেয্যাসি, অথ খো ধম্মট্ঠিতিঞাণং পুব্বে, পচ্ছা নিব্বানে ঞাণং’’.

‘‘তং কিং মঞ্ঞসি, সুসিম, রূপং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘ৰেদনা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’. ‘‘যং পনানিচ্চং, দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘সঞ্ঞা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সঙ্খারা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘ৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’.

‘‘তস্মাতিহ, সুসিম, যং কিঞ্চি রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং রূপং নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যা কাচি ৰেদনা অতীতানাগতপচ্চুপ্পন্না অজ্ঝত্তং ৰা বহিদ্ধা ৰা ওল়ারিকা ৰা সুখুমা ৰা হীনা ৰা পণীতা ৰা যা দূরে সন্তিকে ৰা, সব্বা ৰেদনা নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যা কাচি সঞ্ঞা…পে… যে কেচি সঙ্খারা অতীতানাগতপচ্চুপ্পন্না অজ্ঝত্তং ৰা বহিদ্ধা ৰা ওল়ারিকা ৰা সুখুমা ৰা হীনা ৰা পণীতা ৰা যে দূরে সন্তিকে ৰা, সব্বে সঙ্খারা নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যং কিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং ৰিঞ্ঞাণং নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং.

‘‘এৰং পস্সং, সুসিম, সুতৰা অরিযসাৰকো রূপস্মিম্পি নিব্বিন্দতি, ৰেদনাযপি নিব্বিন্দতি, সঞ্ঞাযপি নিব্বিন্দতি, সঙ্খারেসুপি নিব্বিন্দতি, ৰিঞ্ঞাণস্মিম্পি নিব্বিন্দতি. নিব্বিন্দং ৰিরজ্জতি, ৰিরাগা ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি.

‘‘‘জাতিপচ্চযা জরামরণ’ন্তি, সুসিম, পস্সসী’’তি? ‘‘এৰং, ভন্তে’’. ‘‘‘ভৰপচ্চযা জাতী’তি, সুসিম, পস্সসী’’তি? ‘‘এৰং, ভন্তে’’. ‘‘‘উপাদানপচ্চযা ভৰো’তি, সুসিম, পস্সসী’’তি? ‘‘এৰং, ভন্তে’’. ‘‘‘তণ্হাপচ্চযা উপাদান’ন্তি, সুসিম, পস্সসী’’তি? ‘‘এৰং, ভন্তে’’. ‘‘ৰেদনাপচ্চযা তণ্হাতি… ফস্সপচ্চযা ৰেদনাতি… সল়াযতনপচ্চযা ফস্সোতি… নামরূপপচ্চযা সল়াযতনন্তি… ৰিঞ্ঞাণপচ্চযা নামরূপন্তি… সঙ্খারপচ্চযা ৰিঞ্ঞাণন্তি… অৰিজ্জাপচ্চযা সঙ্খারাতি, সুসিম, পস্সসী’’তি? ‘‘এৰং, ভন্তে’’.

‘‘‘জাতিনিরোধা জরামরণনিরোধো’তি, সুসিম, পস্সসী’’তি? ‘‘এৰং, ভন্তে’’. ‘‘‘ভৰনিরোধা জাতিনিরোধো’তি সুসিম, পস্সসী’’তি? ‘‘এৰং, ভন্তে’’. ‘‘উপাদাননিরোধা ভৰনিরোধোতি… তণ্হানিরোধা উপাদাননিরোধোতি… ৰেদনানিরোধা তণ্হানিরোধোতি… ফস্সনিরোধা ৰেদনানিরোধোতি… সল়াযতননিরোধা ফস্সনিরোধোতি… নামরূপনিরোধা সল়াযতননিরোধোতি… ৰিঞ্ঞাণনিরোধা নামরূপনিরোধোতি… সঙ্খারনিরোধা ৰিঞ্ঞাণনিরোধোতি… অৰিজ্জানিরোধা সঙ্খারনিরোধোতি, সুসিম, পস্সসী’’তি? ‘‘এৰং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো অনেকৰিহিতং ইদ্ধিৰিধং পচ্চনুভোসি – একোপি হুত্ৰা বহুধা হোসি, বহুধাপি হুত্ৰা একো হোসি; আৰিভাৰং, তিরোভাৰং, তিরোকুট্টং তিরোপাকারং তিরোপব্বতং অসজ্জমানো গচ্ছসি, সেয্যথাপি আকাসে; পথৰিযাপি উম্মুজ্জনিমুজ্জং করোসি, সেয্যথাপি উদকে; উদকেপি অভিজ্জমানো গচ্ছসি, সেয্যথাপি পথৰিযং; আকাসেপি পল্লঙ্কেন কমসি, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসসি পরিমজ্জসি, যাৰ ব্রহ্মলোকাপি কাযেন ৰসং ৰত্তেসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণসি দিব্বে চ মানুসে চ যে দূরে সন্তিকে চা’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো পরসত্তানং পরপুগ্গলানং চেতসা চেতো পরিচ্চ পজানাসি – সরাগং ৰা চিত্তং সরাগং চিত্তন্তি পজানাসি…পে… ৰিমুত্তং ৰা চিত্তং ৰিমুত্তং চিত্তন্তি পজানাসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো অনেকৰিহিতং পুব্বেনিৰাসং অনুস্সরসি, সেয্যথিদং – একম্পি জাতিং…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সসি চৰমানে…পে… যথাকম্মূপগে সত্তে পজানাসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো যে তে সন্তা ৰিমোক্খা অতিক্কম্ম রূপে, আরুপ্পা তে কাযেন ফুসিত্ৰা ৰিহরসী’’তি? ‘‘নো হেতং, ভন্তে’’.

‘‘এত্থ দানি, সুসিম, ইদঞ্চ ৰেয্যাকরণং ইমেসঞ্চ ধম্মানং অসমাপত্তি, ইদং নো, সুসিম, কথ’’ন্তি?

অথ খো আযস্মা সুসিমো ভগৰতো পাদেসু সিরসা নিপতিত্ৰা ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, য্ৰাহং এৰং স্ৰাক্খাতে ধম্মৰিনযে ধম্মত্থেনকো পব্বজিতো. তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি.

‘‘তগ্ঘ ত্ৰং, সুসিম, অচ্চযো অচ্চগমা যথাবালং যথামূল়্হং যথাঅকুসলং, যো ত্ৰং এৰং স্ৰাক্খাতে ধম্মৰিনযে ধম্মত্থেনকো পব্বজিতো. সেয্যথাপি, সুসিম, চোরং আগুচারিং গহেত্ৰা রঞ্ঞো দস্সেয্যুং – ‘অযং তে, দেৰ, চোরো আগুচারী, ইমস্স যং ইচ্ছসি তং দণ্ডং পণেহী’তি. তমেনং রাজা এৰং ৰদেয্য – ‘গচ্ছথ, ভো, ইমং পুরিসং দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিযায রথিযং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দথা’তি. তমেনং রঞ্ঞো পুরিসা দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিযায রথিযং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দেয্যুং. তং কিং মঞ্ঞসি, সুসিম, অপি নু সো পুরিসো ততোনিদানং দুক্খং দোমনস্সং পটিসংৰেদিযেথা’’তি? ‘‘এৰং, ভন্তে’’.

‘‘যং খো সো, সুসিম, পুরিসো ততোনিদানং দুক্খং দোমনস্সং পটিসংৰেদিযেথ [পটিসংৰেদিযেথ ৰা, ন ৰা পটিসংৰেদিযেথ (ক.)]. যা এৰং স্ৰাক্খাতে ধম্মৰিনযে ধম্মত্থেনকস্স পব্বজ্জা, অযং ততো দুক্খৰিপাকতরা চ কটুকৰিপাকতরা চ, অপি চ ৰিনিপাতায সংৰত্ততি. যতো চ খো ত্ৰং, সুসিম, অচ্চযং অচ্চযতো দিস্ৰা যথাধম্মং পটিকরোসি তং তে মযং পটিগ্গণ্হাম. ৰুদ্ধি হেসা, সুসিম, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি, আযতিঞ্চ [আযতিং (স্যা. কং.)] সংৰরং আপজ্জতী’’তি. দসমং.

মহাৰগ্গো সত্তমো.

তস্সুদ্দানং –

দ্ৰে অস্সুতৰতা ৰুত্তা, পুত্তমংসেন চাপরং;

অত্থিরাগো চ নগরং, সম্মসং নল়কলাপিযং;

কোসম্বী উপযন্তি চ, দসমো সুসিমেন চাতি [দসমো ৰুত্তো সুসীমেনাতি (সী.)].