৬. দুতিযমহারুক্খসুত্তং

৫৬. সাৰত্থিযং ৰিহরতি…পে… ‘‘সেয্যথাপি, ভিক্খৰে, মহারুক্খো. তস্স যানি চেৰ মূলানি অধোগমানি, যানি চ তিরিযঙ্গমানি, সব্বানি তানি উদ্ধং ওজং অভিহরন্তি. এৰঞ্হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য. এৰমেৰ খো, ভিক্খৰে, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং …পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, মহারুক্খো. অথ পুরিসো আগচ্ছেয্য কুদ্দালপিটকং আদায. সো তং রুক্খং মূলে ছিন্দেয্য, মূলে ছেত্ৰা পলিখণেয্য, পলিখণিত্ৰা মূলানি উদ্ধরেয্য…পে… নদিযা ৰা সীঘসোতায পৰাহেয্য. এৰঞ্হি সো, ভিক্খৰে, মহারুক্খো উচ্ছিন্নমূলো অস্স তালাৰত্থুকতো অনভাৰঙ্কতো আযতিং অনুপ্পাদধম্মো. এৰমেৰ খো, ভিক্খৰে, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. ছট্ঠং.