৮. লোকাযতিকসুত্তং

৪৮. সাৰত্থিযং ৰিহরতি. অথ খো লোকাযতিকো ব্রাহ্মণো যেন ভগৰা…পে… একমন্তং নিসিন্নো খো লোকাযতিকো ব্রাহ্মণো ভগৰন্তং এতদৰোচ –

‘‘কিং নু খো, ভো গোতম, সব্বমত্থী’’তি? ‘‘‘সব্বমত্থী’তি খো, ব্রাহ্মণ, জেট্ঠমেতং লোকাযতং’’.

‘‘কিং পন, ভো গোতম, সব্বং নত্থী’’তি? ‘‘‘সব্বং নত্থী’তি খো, ব্রাহ্মণ, দুতিযমেতং লোকাযতং’’.

‘‘কিং নু খো, ভো গোতম, সব্বমেকত্ত’’ন্তি? ‘‘‘সব্বমেকত্ত’ন্তি খো, ব্রাহ্মণ, ততিযমেতং লোকাযতং’’.

‘‘কিং পন, ভো গোতম, সব্বং পুথুত্ত’’ন্তি? ‘‘‘সব্বং পুথুত্ত’ন্তি খো, ব্রাহ্মণ, চতুত্থমেতং লোকাযতং’’.

‘‘এতে তে, ব্রাহ্মণ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, লোকাযতিকো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে… অজ্জতগ্গে পাণুপেতং সরণং গত’’ন্তি. অট্ঠমং.