২. কল়ারসুত্তং

৩২. সাৰত্থিযং ৰিহরতি. অথ খো কল়ারখত্তিযো ভিক্খু যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো কল়ারখত্তিযো ভিক্খু আযস্মন্তং সারিপুত্তং এতদৰোচ – ‘‘মোল়িযফগ্গুনো, আৰুসো সারিপুত্ত, ভিক্খু সিক্খং পচ্চক্খায হীনাযাৰত্তোতি. ন হি নূন সো আযস্মা ইমস্মিং ধম্মৰিনযে অস্সাসমলত্থাতি. তেন হাযস্মা সারিপুত্তো ইমস্মিং ধম্মৰিনযে অস্সাসং পত্তো’’তি?

‘‘ন খ্ৰাহং, আৰুসো, কঙ্খামী’’তি. ‘‘আযতিং, পনাৰুসো’’তি?

‘‘ন খ্ৰাহং, আৰুসো, ৰিচিকিচ্ছামী’’তি.

অথ খো কল়ারখত্তিযো ভিক্খু উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো কল়ারখত্তিযো ভিক্খু ভগৰন্তং এতদৰোচ – ‘‘আযস্মতা, ভন্তে, সারিপুত্তেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি.

অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন সারিপুত্তং আমন্তেহি – ‘সত্থা তং, আৰুসো সারিপুত্ত, আমন্তেতী’’’তি. ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ – ‘‘সত্থা তং, আৰুসো সারিপুত্ত, আমন্তেতী’’তি. ‘‘এৰং, আৰুসো’’তি খো আযস্মা সারিপুত্তো তস্স ভিক্খুনো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘সচ্চং কির তযা, সারিপুত্ত, অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি? ‘‘ন খো, ভন্তে, এতেহি পদেহি এতেহি ব্যঞ্জনেহি অত্থো [অত্থো চ (স্যা. কং. ক.)] ৰুত্তো’’তি. ‘‘যেন কেনচিপি, সারিপুত্ত, পরিযাযেন কুলপুত্তো অঞ্ঞং ব্যাকরোতি, অথ খো ব্যাকতং ব্যাকততো দট্ঠব্ব’’ন্তি. ‘‘ননু অহম্পি, ভন্তে, এৰং ৰদামি – ‘ন খো, ভন্তে, এতেহি পদেহি এতেহি ব্যঞ্জনেহি অত্থো ৰুত্তো’’’তি.

‘‘সচে তং, সারিপুত্ত, এৰং পুচ্ছেয্যুং – ‘কথং জানতা পন তযা, আৰুসো সারিপুত্ত, কথং পস্সতা অঞ্ঞা ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি?

‘‘সচে মং, ভন্তে, এৰং পুচ্ছেয্যুং – ‘কথং জানতা পন তযা, আৰুসো সারিপুত্ত, কথং পস্সতা অঞ্ঞা ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি; এৰং পুট্ঠোহং [পুট্ঠো অহং (স্যা. কং.), পুট্ঠাহং (পী. ক.)], ভন্তে, এৰং ব্যাকরেয্যং – ‘যংনিদানা, আৰুসো, জাতি, তস্স নিদানস্স খযা খীণস্মিং খীণাম্হীতি ৰিদিতং. খীণাম্হীতি ৰিদিত্ৰা – খীণাজাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘জাতি পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠো তং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘জাতি পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠোহং, ভন্তে, এৰং ব্যাকরেয্যং – ‘জাতি খো, আৰুসো, ভৰনিদানা ভৰসমুদযা ভৰজাতিকা ভৰপ্পভৰা’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘ভৰো পনাৰুসো সারিপুত্ত, কিংনিদানো কিংসমুদযো কিংজাতিকো কিংপভৰো’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘ভৰো পনাৰুসো সারিপুত্ত, কিংনিদানো কিংসমুদযো কিংজাতিকো কিংপভৰো’তি? এৰং পুট্ঠোহং, ভন্তে, এৰং ব্যাকরেয্যং – ‘ভৰো খো, আৰুসো, উপাদাননিদানো উপাদানসমুদযো উপাদানজাতিকো উপাদানপ্পভৰো’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘উপাদানং পনাৰুসো…পে… সচে পন তং, সারিপুত্ত, এৰং পুচ্ছেয্যুং – তণ্হা পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – তণ্হা পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠোহং, ভন্তে, এৰং ব্যাকরেয্যং – ‘তণ্হা খো, আৰুসো, ৰেদনানিদানা ৰেদনাসমুদযা ৰেদনাজাতিকা ৰেদনাপভৰা’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘কথং জানতো পন তে, আৰুসো সারিপুত্ত, কথং পস্সতো যা ৰেদনাসু নন্দী সা ন উপট্ঠাসী’তি. এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘কথং জানতো পন তে, আৰুসো সারিপুত্ত, কথং পস্সতো যা ৰেদনাসু নন্দী সা ন উপট্ঠাসী’তি এৰং পুট্ঠোহং, ভন্তে, এৰং ব্যাকরেয্যং – ‘তিস্সো খো ইমা, আৰুসো, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. ইমা খো, আৰুসো, তিস্সো ৰেদনা অনিচ্চা. যদনিচ্চং তং দুক্খন্তি ৰিদিতং [ৰিদিতা (টীকা)], যা ৰেদনাসু নন্দী সা ন উপট্ঠাসী’তি. এৰং, পুট্ঠোহং, ভন্তে, এৰং ব্যাকরেয্য’’ন্তি.

‘‘সাধু সাধু, সারিপুত্ত. অযম্পি খো, সারিপুত্ত, পরিযাযো, এতস্সেৰ অত্থস্স সংখিত্তেন ৰেয্যাকরণায – ‘যং কিঞ্চি ৰেদযিতং তং দুক্খস্মি’’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘কথং ৰিমোক্খা পন তযা, আৰুসো সারিপুত্ত, অঞ্ঞা ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘কথং ৰিমোক্খা পন তযা, আৰুসো সারিপুত্ত, অঞ্ঞা ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠোহং, ভন্তে, এৰং ব্যাকরেয্যং – ‘অজ্ঝত্তং ৰিমোক্খা খ্ৰাহং, আৰুসো, সব্বুপাদানক্খযা তথা সতো ৰিহরামি যথা সতং ৰিহরন্তং আসৰা নানুস্সৰন্তি, অত্তানঞ্চ নাৰজানামী’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সাধু সাধু, সারিপুত্ত. অযম্পি খো সারিপুত্ত, পরিযাযো এতস্সেৰ অত্থস্স সংখিত্তেন ৰেয্যাকরণায – যে আসৰা সমণেন ৰুত্তা তেস্ৰাহং ন কঙ্খামি, তে মে পহীনাতি ন ৰিচিকিচ্ছামী’’তি. ইদমৰোচ ভগৰা. ইদং ৰত্ৰা সুগতো উট্ঠাযাসনা ৰিহারং পাৰিসি.

তত্র খো আযস্মা সারিপুত্তো অচিরপক্কন্তস্স ভগৰতো ভিক্খূ আমন্তেসি – ‘‘পুব্বে অপ্পটিসংৰিদিতং মং, আৰুসো, ভগৰা পঠমং পঞ্হং অপুচ্ছি, তস্স মে অহোসি দন্ধাযিতত্তং. যতো চ খো মে, আৰুসো, ভগৰা পঠমং পঞ্হং অনুমোদি, তস্স ময্হং, আৰুসো, এতদহোসি – দিৰসং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, রত্তিম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিন্দিৰং [রত্তিদিৰং (ক.)] চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, রত্তিন্দিৰম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. দ্ৰে রত্তিন্দিৰানি চেপি মং ভগৰা এতমত্থং পুচ্ছেয্য…পে… দ্ৰে রত্তিন্দিৰানিপাহং ভগৰতো এতমত্থং ব্যাকরেয্যং…পে… তীণি রত্তিন্দিৰানি চেপি মং ভগৰা এতমত্থং পুচ্ছেয্য…পে… তীণি রত্তিন্দিৰানিপাহং ভগৰতো এতমত্থং ব্যাকরেয্যং…পে… চত্তারি রত্তিন্দিৰানি চেপি মং ভগৰা এতমত্থং পুচ্ছেয্য…পে… চত্তারি রত্তিন্দিৰানিপাহং ভগৰতো এতমত্থং ব্যাকরেয্যং…পে… পঞ্চ রত্তিন্দিৰানি চেপি মং ভগৰা এতমত্থং পুচ্ছেয্য…পে… পঞ্চ রত্তিন্দিৰানিপাহং ভগৰতো এতমত্থং ব্যাকরেয্যং…পে… ছ রত্তিন্দিৰানি চেপি মং ভগৰা এতমত্থং পুচ্ছেয্য…পে… ছ রত্তিন্দিৰানিপাহং ভগৰতো এতমত্থং ব্যাকরেয্যং…পে… সত্ত রত্তিন্দিৰানি চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি.

অথ খো কল়ারখত্তিযো ভিক্খু উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো কল়ারখত্তিযো ভিক্খু ভগৰন্তং এতদৰোচ – ‘‘আযস্মতা, ভন্তে, সারিপুত্তেন সীহনাদো নদিতো – পুব্বে অপ্পটিসংৰিদিতং মং, আৰুসো, ভগৰা পঠমং পঞ্হং অপুচ্ছি, তস্স মে অহোসি দন্ধাযিতত্তং. যতো চ খো মে, আৰুসো, ভগৰা পঠমং পঞ্হং অনুমোদি, তস্স ময্হং, আৰুসো, এতদহোসি – দিৰসং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি; রত্তিং চেপি…পে… রত্তিন্দিৰং চেপি মং ভগৰা…পে… দ্ৰে রত্তিন্দিৰানি চেপি মং ভগৰা…পে… তীণি… চত্তারি… পঞ্চ… ছ… সত্ত রত্তিন্দিৰানি চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি.

‘‘সা হি, ভিক্খু, সারিপুত্তস্স ধম্মধাতু সুপ্পটিৰিদ্ধা, যস্সা ধম্মধাতুযা সুপ্পটিৰিদ্ধত্তা দিৰসং চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পি মে সারিপুত্তো এতমত্থং ব্যাকরেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিং চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, রত্তিম্পি মে সারিপুত্তো এতমত্থং ব্যাকরেয্য…পে… রত্তিন্দিৰং চেপাহং সারিপুত্তং এতমত্থং পুচ্ছেয্যং, রত্তিন্দিৰম্পি মে সারিপুত্তো এতমত্থং ব্যাকরেয্য… দ্ৰে রত্তিন্দিৰানি চেপাহং সারিপুত্তং এতমত্থং পুচ্ছেয্যং, দ্ৰে রত্তিন্দিৰানিপি মে সারিপুত্তো এতমত্থং ব্যাকরেয্য… তীণি রত্তিন্দিৰানি চেপাহং সারিপুত্তং এতমত্থং পুচ্ছেয্যং, তীণি রত্তিন্দিৰানিপি মে সারিপুত্তো এতমত্থং ব্যাকরেয্য… চত্তারি রত্তিন্দিৰানি চেপাহং সারিপুত্তং এতমত্থং পুচ্ছেয্যং, চত্তারি রত্তিন্দিৰানিপি মে সারিপুত্তো এতমত্থং ব্যাকরেয্য… পঞ্চ রত্তিন্দিৰানি চেপাহং সারিপুত্তং এতমত্থং পুচ্ছেয্যং, পঞ্চ রত্তিন্দিৰানিপি মে সারিপুত্তো এতমত্থং ব্যাকরেয্য… ছ রত্তিন্দিৰানি চেপাহং সারিপুত্তং এতমত্থং পুচ্ছেয্যং, ছ রত্তিন্দিৰানিপি মে সারিপুত্তো এতমত্থং ব্যাকরেয্য… সত্ত রত্তিন্দিৰানি চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপি মে সারিপুত্তো এতমত্থং ব্যাকরেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি. দুতিযং.