৭. পচ্চযসুত্তং

২৭. সাৰত্থিযং ৰিহরতি…পে… ‘‘অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘কতমঞ্চ, ভিক্খৰে, জরামরণং? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ইন্দ্রিযানং পরিপাকো – অযং ৰুচ্চতি জরা. যা তেসং তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালকিরিযা খন্ধানং ভেদো কল়েৰরস্স নিক্খেপো; ইদং ৰুচ্চতি মরণং. ইতি অযঞ্চ জরা ইদঞ্চ মরণং. ইদং ৰুচ্চতি, ভিক্খৰে, জরামরণং. জাতিসমুদযা জরামরণসমুদযো; জাতিনিরোধা জরামরণনিরোধো. অযমেৰ অরিযো অট্ঠঙ্গিকো মগ্গো জরামরণনিরোধগামিনী পটিপদা. সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি.

‘‘কতমা চ, ভিক্খৰে, জাতি…পে… কতমো চ, ভিক্খৰে, ভৰো… কতমঞ্চ, ভিক্খৰে, উপাদানং… কতমা চ, ভিক্খৰে, তণ্হা… কতমা চ, ভিক্খৰে, ৰেদনা… কতমো চ, ভিক্খৰে, ফস্সো… কতমঞ্চ, ভিক্খৰে, সল়াযতনং… কতমঞ্চ, ভিক্খৰে, নামরূপং… কতমঞ্চ, ভিক্খৰে, ৰিঞ্ঞাণং…?

‘‘কতমে চ, ভিক্খৰে, সঙ্খারা? তযোমে, ভিক্খৰে, সঙ্খারা – কাযসঙ্খারো, ৰচীসঙ্খারো, চিত্তসঙ্খারো. ইমে ৰুচ্চন্তি, ভিক্খৰে, সঙ্খারা. অৰিজ্জাসমুদযা সঙ্খারসমুদযো; অৰিজ্জানিরোধা সঙ্খারনিরোধো. অযমেৰ অরিযো অট্ঠঙ্গিকো মগ্গো সঙ্খারনিরোধগামিনী পটিপদা. সেয্যথিদং – সম্মাদিট্ঠি…পে… সম্মাসমাধি.

‘‘যতো খো, ভিক্খৰে, অরিযসাৰকো এৰং পচ্চযং পজানাতি, এৰং পচ্চযসমুদযং পজানাতি, এৰং পচ্চযনিরোধং পজানাতি, এৰং পচ্চযনিরোধগামিনিং পটিপদং পজানাতি. অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি, সেক্খায ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপী’’তি. সত্তমং.