৮. পরোসহস্সসুত্তং

২১৬. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহি. তেন খো পন সমযেন ভগৰা ভিক্খূ নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. তে চ ভিক্খূ অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা ওহিতসোতা ধম্মং সুণন্তি. অথ খো আযস্মতো ৰঙ্গীসস্স এতদহোসি – ‘‘অযং খো ভগৰা ভিক্খূ নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. তে চ ভিক্খূ অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা ওহিতসোতা ধম্মং সুণন্তি. যংনূনাহং ভগৰন্তং সম্মুখা সারুপ্পাহি গাথাহি অভিত্থৰেয্য’’ন্তি.

অথ খো আযস্মা ৰঙ্গীসো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘পটিভাতি মং ভগৰা, পটিভাতি মং সুগতা’’তি. ‘‘পটিভাতু তং, ৰঙ্গীসা’’তি ভগৰা অৰোচ. অথ খো আযস্মা ৰঙ্গীসো ভগৰন্তং সম্মুখা সারুপ্পাহি গাথাহি অভিত্থৰি –

‘‘পরোসহস্সং ভিক্খূনং, সুগতং পযিরুপাসতি;

দেসেন্তং ৰিরজং ধম্মং, নিব্বানং অকুতোভযং.

‘‘সুণন্তি ধম্মং ৰিমলং, সম্মাসম্বুদ্ধদেসিতং;

সোভতি ৰত সম্বুদ্ধো, ভিক্খুসঙ্ঘপুরক্খতো.

‘‘নাগনামোসি ভগৰা, ইসীনং ইসিসত্তমো;

মহামেঘোৰ হুত্ৰান, সাৰকে অভিৰস্সতি.

‘‘দিৰাৰিহারা নিক্খম্ম, সত্থুদস্সনকম্যতা [সত্থুদস্সনকামতা (সী. স্যা. কং.)];

সাৰকো তে মহাৰীর, পাদে ৰন্দতি ৰঙ্গীসো’’তি.

‘‘কিং নু তে, ৰঙ্গীস, ইমা গাথাযো পুব্বে পরিৰিতক্কিতা, উদাহু ঠানসোৰ তং পটিভন্তী’’তি? ‘ন খো মে, ভন্তে, ইমা গাথাযো পুব্বে পরিৰিতক্কিতা, অথ খো ঠানসোৰ মং পটিভন্তী’তি. ‘তেন হি তং, ৰঙ্গীস, ভিয্যোসোমত্তায পুব্বে অপরিৰিতক্কিতা গাথাযো পটিভন্তূ’তি. ‘এৰং, ভন্তে’তি খো আযস্মা ৰঙ্গীসো ভগৰতো পটিস্সুত্ৰা ভিয্যোসোমত্তায ভগৰন্তং পুব্বে অপরিৰিতক্কিতাহি গাথাহি অভিত্থৰি –

‘‘উম্মগ্গপথং [উম্মগ্গসতং (স্যা. কং. ক.)] মারস্স অভিভুয্য, চরতি পভিজ্জ খিলানি;

তং পস্সথ বন্ধপমুঞ্চকরং, অসিতং ভাগসো পৰিভজং.

‘‘ওঘস্স নিত্থরণত্থং, অনেকৰিহিতং মগ্গং অক্খাসি;

তস্মিঞ্চে অমতে অক্খাতে, ধম্মদ্দসা ঠিতা অসংহীরা.

‘‘পজ্জোতকরো অতিৰিজ্ঝ [অতিৰিজ্ঝ ধম্মং (সী. স্যা. কং.)], সব্বট্ঠিতীনং অতিক্কমমদ্দস;

ঞত্ৰা চ সচ্ছিকত্ৰা চ, অগ্গং সো দেসযি দসদ্ধানং.

‘‘এৰং সুদেসিতে ধম্মে,

কো পমাদো ৰিজানতং ধম্মং [কো পমাদো ৰিজানতং (সী. স্যা. কং.)];

তস্মা হি তস্স ভগৰতো সাসনে;

অপ্পমত্তো সদা নমস্সমনুসিক্খে’’তি.