২. কিন্নুসীহসুত্তং

১৪৮. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভগৰা মহতিযা পরিসায পরিৰুতো ধম্মং দেসেতি.

অথ খো মারস্স পাপিমতো এতদহোসি – ‘‘অযং খো সমণো গোতমো মহতিযা পরিসায পরিৰুতো ধম্মং দেসেতি. যংনূনাহং যেন সমণো গোতমো তেনুপসঙ্কমেয্যং ৰিচক্খুকম্মাযা’’তি. অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –

‘‘কিন্নু সীহোৰ নদসি, পরিসাযং ৰিসারদো;

পটিমল্লো হি তে অত্থি, ৰিজিতাৰী নু মঞ্ঞসী’’তি.

‘‘নদন্তি ৰে মহাৰীরা, পরিসাসু ৰিসারদা;

তথাগতা বলপ্পত্তা, তিণ্ণা লোকে ৰিসত্তিক’’ন্তি.

অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি.