২. দুতিযৰগ্গো

১. সত্তজটিলসুত্তং

১২২. একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে. তেন খো পন সমযেন ভগৰা সাযন্হসমযং পটিসল্লানা ৰুট্ঠিতো বহিদ্ৰারকোট্ঠকে নিসিন্নো হোতি. অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি.

তেন খো পন সমযেন সত্ত চ জটিলা সত্ত চ নিগণ্ঠা সত্ত চ অচেলকা সত্ত চ একসাটকা সত্ত চ পরিব্বাজকা পরূল়্হকচ্ছনখলোমা খারিৰিৰিধমাদায [খারিৰিধং আদায (পী.) দী. নি. ১.২৮০ তদট্ঠকথাপি ওলোকেতব্বা] ভগৰতো অৰিদূরে অতিক্কমন্তি. অথ খো রাজা পসেনদি কোসলো উট্ঠাযাসনা একংসং উত্তরাসঙ্গং করিত্ৰা দক্খিণজাণুমণ্ডলং পথৰিযং নিহন্ত্ৰা যেন তে সত্ত চ জটিলা সত্ত চ নিগণ্ঠা সত্ত চ অচেলকা সত্ত চ একসাটকা সত্ত চ পরিব্বাজকা তেনঞ্জলিং পণামেত্ৰা তিক্খত্তুং নামং সাৰেসি – ‘‘রাজাহং, ভন্তে, পসেনদি কোসলো…পে… রাজাহং, ভন্তে, পসেনদি কোসলো’’তি.

অথ খো রাজা পসেনদি কোসলো অচিরপক্কন্তেসু তেসু সত্তসু চ জটিলেসু সত্তসু চ নিগণ্ঠেসু সত্তসু চ অচেলকেসু সত্তসু চ একসাটকেসু সত্তসু চ পরিব্বাজকেসু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘যে তে, ভন্তে, লোকে অরহন্তো ৰা অরহত্তমগ্গং ৰা সমাপন্না এতে তেসং অঞ্ঞতরা’’তি.

‘‘দুজ্জানং খো এতং, মহারাজ, তযা গিহিনা কামভোগিনা পুত্তসম্বাধসযনং অজ্ঝাৰসন্তেন কাসিকচন্দনং পচ্চনুভোন্তেন মালাগন্ধৰিলেপনং ধারযন্তেন জাতরূপরজতং সাদিযন্তেন – ‘ইমে ৰা অরহন্তো, ইমে ৰা অরহত্তমগ্গং সমাপন্না’’’তি.

‘‘সংৰাসেন খো, মহারাজ, সীলং ৰেদিতব্বং. তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. সংৰোহারেন খো, মহারাজ, সোচেয্যং ৰেদিতব্বং. তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. আপদাসু খো, মহারাজ, থামো ৰেদিতব্বো. সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. সাকচ্ছায, খো, মহারাজ, পঞ্ঞা ৰেদিতব্বা. সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’’তি.

‘‘অচ্ছরিযং, ভন্তে, অব্ভুতং ভন্তে! যাৰ সুভাসিতমিদং, ভন্তে, ভগৰতা – ‘দুজ্জানং খো এতং, মহারাজ, তযা গিহিনা কামভোগিনা পুত্তসম্বাধসযনং অজ্ঝাৰসন্তেন কাসিকচন্দনং পচ্চনুভোন্তেন মালাগন্ধৰিলেপনং ধারযন্তেন জাতরূপরজতং সাদিযন্তেন – ইমে ৰা অরহন্তো, ইমে ৰা অরহত্তমগ্গং সমাপন্না’তি. সংৰাসেন খো, মহারাজ, সীলং ৰেদিতব্বং. তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. সংৰোহারেন খো মহারাজ, সোচেয্যং ৰেদিতব্বং. তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. আপদাসু খো, মহারাজ, থামো ৰেদিতব্বো. সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন. সাকচ্ছায খো, মহারাজ, পঞ্ঞা ৰেদিতব্বা. সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’’তি.

‘‘এতে, ভন্তে, মম পুরিসা চরা ওচরকা জনপদং ওচরিত্ৰা আগচ্ছন্তি. তেহি পঠমং ওচিণ্ণং অহং পচ্ছা ওসাপযিস্সামি [ওযাযিস্সামি (সী.), ওহযিস্সামি (স্যা. কং.)]. ইদানি তে, ভন্তে, তং রজোজল্লং পৰাহেত্ৰা সুন্হাতা সুৰিলিত্তা কপ্পিতকেসমস্সূ ওদাতৰত্থা [ওদাতৰত্থৰসনা (সী.)] পঞ্চহি কামগুণেহি সমপ্পিতা সমঙ্গীভূতা পরিচারেস্সন্তী’’তি.

অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –

‘‘ন ৰণ্ণরূপেন নরো সুজানো,

ন ৰিস্সসে ইত্তরদস্সনেন;

সুসঞ্ঞতানঞ্হি ৰিযঞ্জনেন,

অসঞ্ঞতা লোকমিমং চরন্তি.

‘‘পতিরূপকো মত্তিকাকুণ্ডলোৰ,

লোহড্ঢমাসোৰ সুৰণ্ণছন্নো;

চরন্তি লোকে [একে (সী. পী.)] পরিৰারছন্না,

অন্তো অসুদ্ধা বহি সোভমানা’’তি.

২. পঞ্চরাজসুত্তং

১২৩. সাৰত্থিনিদানং. তেন খো পন সমযেন পঞ্চন্নং রাজূনং পসেনদিপমুখানং পঞ্চহি কামগুণেহি সমপ্পিতানং সমঙ্গীভূতানং পরিচারযমানানং অযমন্তরাকথা উদপাদি – ‘‘কিং নু খো কামানং অগ্গ’’ন্তি? তত্রেকচ্চে [তত্রেকে (সী. পী.)] এৰমাহংসু – ‘‘রূপা কামানং অগ্গ’’ন্তি. একচ্চে এৰমাহংসু – ‘‘সদ্দা কামানং অগ্গ’’ন্তি. একচ্চে এৰমাহংসু – ‘‘গন্ধা কামানং অগ্গ’’ন্তি. একচ্চে এৰমাহংসু – ‘‘রসা কামানং অগ্গ’’ন্তি. একচ্চে এৰমাহংসু – ‘‘ফোট্ঠব্বা কামানং অগ্গ’’ন্তি. যতো খো তে রাজানো নাসক্খিংসু অঞ্ঞমঞ্ঞং সঞ্ঞাপেতুং.

অথ খো রাজা পসেনদি কোসলো তে রাজানো এতদৰোচ – ‘‘আযাম, মারিসা, যেন ভগৰা তেনুপসঙ্কমিস্সাম; উপসঙ্কমিত্ৰা ভগৰন্তং এতমত্থং পটিপুচ্ছিস্সাম. যথা নো ভগৰা ব্যাকরিস্সতি তথা নং ধারেস্সামা’’তি [ধারেয্যামাতি (সী. স্যা. কং. পী.)]. ‘‘এৰং, মারিসা’’তি খো তে রাজানো রঞ্ঞো পসেনদিস্স কোসলস্স পচ্চস্সোসুং.

অথ খো তে পঞ্চ রাজানো পসেনদিপমুখা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ, ভন্তে, অম্হাকং পঞ্চন্নং রাজূনং পঞ্চহি কামগুণেহি সমপ্পিতানং সমঙ্গীভূতানং পরিচারযমানানং অযমন্তরাকথা উদপাদি – ‘কিং নু খো কামানং অগ্গ’ন্তি? একচ্চে এৰমাহংসু – ‘রূপা কামানং অগ্গ’ন্তি. একচ্চে এৰমাহংসু – ‘সদ্দা কামানং অগ্গ’ন্তি. একচ্চে এৰমাহংসু – ‘গন্ধা কামানং অগ্গ’ন্তি. একচ্চে এৰমাহংসু – ‘রসা কামানং অগ্গ’ন্তি. একচ্চে এৰমাহংসু – ‘ফোট্ঠব্বা কামানং অগ্গ’ন্তি. কিং নু খো, ভন্তে, কামানং অগ্গ’’ন্তি?

‘‘মনাপপরিযন্তং খ্ৰাহং, মহারাজ, পঞ্চসু কামগুণেসু অগ্গন্তি ৰদামি. তেৰ [তে চ (সী. পী. ক.), যে চ (স্যা. কং.)], মহারাজ, রূপা একচ্চস্স মনাপা হোন্তি, তেৰ [তে চ (সী. পী. ক.)] রূপা একচ্চস্স অমনাপা হোন্তি. যেহি চ যো রূপেহি অত্তমনো হোতি পরিপুণ্ণসঙ্কপ্পো, সো তেহি রূপেহি অঞ্ঞং রূপং উত্তরিতরং ৰা পণীততরং ৰা ন পত্থেতি. তে তস্স রূপা পরমা হোন্তি. তে তস্স রূপা অনুত্তরা হোন্তি.

‘‘তেৰ, মহারাজ, সদ্দা একচ্চস্স মনাপা হোন্তি, তেৰ সদ্দা একচ্চস্স অমনাপা হোন্তি. যেহি চ যো সদ্দেহি অত্তমনো হোতি পরিপুণ্ণসঙ্কপ্পো, সো তেহি সদ্দেহি অঞ্ঞং সদ্দং উত্তরিতরং ৰা পণীততরং ৰা ন পত্থেতি. তে তস্স সদ্দা পরমা হোন্তি. তে তস্স সদ্দা অনুত্তরা হোন্তি.

‘‘তেৰ, মহারাজ, গন্ধা একচ্চস্স মনাপা হোন্তি, তেৰ গন্ধা একচ্চস্স অমনাপা হোন্তি. যেহি চ যো গন্ধেহি অত্তমনো হোতি পরিপুণ্ণসঙ্কপ্পো, সো তেহি গন্ধেহি অঞ্ঞং গন্ধং উত্তরিতরং ৰা পণীততরং ৰা ন পত্থেতি. তে তস্স গন্ধা পরমা হোন্তি. তে তস্স গন্ধা অনুত্তরা হোন্তি.

‘‘তেৰ, মহারাজ, রসা একচ্চস্স মনাপা হোন্তি, তেৰ রসা একচ্চস্স অমনাপা হোন্তি. যেহি চ যো রসেহি অত্তমনো হোতি পরিপুণ্ণসঙ্কপ্পো, সো তেহি রসেহি অঞ্ঞং রসং উত্তরিতরং ৰা পণীততরং ৰা ন পত্থেতি. তে তস্স রসা পরমা হোন্তি. তে তস্স রসা অনুত্তরা হোন্তি.

‘‘তেৰ, মহারাজ, ফোট্ঠব্বা একচ্চস্স মনাপা হোন্তি, তেৰ ফোট্ঠব্বা একচ্চস্স অমনাপা হোন্তি. যেহি চ যো ফোট্ঠব্বেহি অত্তমনো হোতি পরিপুণ্ণসঙ্কপ্পো, সো তেহি ফোট্ঠব্বেহি অঞ্ঞং ফোট্ঠব্বং উত্তরিতরং ৰা পণীততরং ৰা ন পত্থেতি. তে তস্স ফোট্ঠব্বা পরমা হোন্তি. তে তস্স ফোট্ঠব্বা অনুত্তরা হোন্তী’’তি.

তেন খো পন সমযেন চন্দনঙ্গলিকো উপাসকো তস্সং পরিসাযং নিসিন্নো হোতি. অথ খো চন্দনঙ্গলিকো উপাসকো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘পটিভাতি মং ভগৰা, পটিভাতি মং সুগতা’’তি. ‘‘পটিভাতু তং চন্দনঙ্গলিকা’’তি ভগৰা অৰোচ.

অথ খো চন্দনঙ্গলিকো উপাসকো ভগৰতো সম্মুখা তদনুরূপায গাথায অভিত্থৰি –

‘‘পদুমং যথা কোকনদং সুগন্ধং,

পাতো সিযা ফুল্লমৰীতগন্ধং;

অঙ্গীরসং পস্স ৰিরোচমানং,

তপন্তমাদিচ্চমিৰন্তলিক্খে’’তি.

অথ খো তে পঞ্চ রাজানো চন্দনঙ্গলিকং উপাসকং পঞ্চহি উত্তরাসঙ্গেহি অচ্ছাদেসুং. অথ খো চন্দনঙ্গলিকো উপাসকো তেহি পঞ্চহি উত্তরাসঙ্গেহি ভগৰন্তং অচ্ছাদেসীতি.

৩. দোণপাকসুত্তং

১২৪. সাৰত্থিনিদানং. তেন খো পন সমযেন রাজা পসেনদি কোসলো দোণপাককুরং [দোণপাকসুদং (সী.), দোণপাকং সুদং (পী.)] ভুঞ্জতি. অথ খো রাজা পসেনদি কোসলো ভুত্তাৰী মহস্সাসী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি.

অথ খো ভগৰা রাজানং পসেনদিং কোসলং ভুত্তাৰিং মহস্সাসিং ৰিদিত্ৰা তাযং ৰেলাযং ইমং গাথং অভাসি –

‘‘মনুজস্স সদা সতীমতো,

মত্তং জানতো লদ্ধভোজনে;

তনুকস্স [তনু তস্স (সী. পী.)] ভৰন্তি ৰেদনা,

সণিকং জীরতি আযুপালয’’ন্তি.

তেন খো পন সমযেন সুদস্সনো মাণৰো রঞ্ঞো পসেনদিস্স কোসলস্স পিট্ঠিতো ঠিতো হোতি. অথ খো রাজা পসেনদি কোসলো সুদস্সনং মাণৰং আমন্তেসি – ‘‘এহি ত্ৰং, তাত সুদস্সন, ভগৰতো সন্তিকে ইমং গাথং পরিযাপুণিত্ৰা মম ভত্তাভিহারে (ভত্তাভিহারে) [( ) সী. স্যা. কং. পী. পোত্থকেসু নত্থি] ভাস. অহঞ্চ তে দেৰসিকং কহাপণসতং (কহাপণসতং) [( ) সী. স্যা. কং. পোত্থকেসু নত্থি] নিচ্চং ভিক্খং পৰত্তযিস্সামী’’তি. ‘‘এৰং দেৰা’’তি খো সুদস্সনো মাণৰো রঞ্ঞো পসেনদিস্স কোসলস্স পটিস্সুত্ৰা ভগৰতো সন্তিকে ইমং গাথং পরিযাপুণিত্ৰা রঞ্ঞো পসেনদিস্স কোসলস্স ভত্তাভিহারে সুদং ভাসতি –

‘‘মনুজস্স সদা সতীমতো,

মত্তং জানতো লদ্ধভোজনে;

তনুকস্স ভৰন্তি ৰেদনা,

সণিকং জীরতি আযুপালয’’ন্তি.

অথ খো রাজা পসেনদি কোসলো অনুপুব্বেন নাল়িকোদনপরমতায [নাল়িকোদনমত্তায (ক.)] সণ্ঠাসি. অথ খো রাজা পসেনদি কোসলো অপরেন সমযেন সুসল্লিখিতগত্তো পাণিনা গত্তানি অনুমজ্জন্তো তাযং ৰেলাযং ইমং উদানং উদানেসি – ‘‘উভযেন ৰত মং সো ভগৰা অত্থেন অনুকম্পি – দিট্ঠধম্মিকেন চেৰ অত্থেন সম্পরাযিকেন চা’’তি.

৪. পঠমসঙ্গামসুত্তং

১২৫. সাৰত্থিনিদানং. অথ খো রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি. অস্সোসি খো রাজা পসেনদি কোসলো – ‘‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’’তি. অথ খো রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি. অথ খো রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং. তস্মিং খো পন সঙ্গামে রাজা মাগধো অজাতসত্তু ৰেদেহিপুত্তো রাজানং পসেনদিং কোসলং পরাজেসি. পরাজিতো চ রাজা পসেনদি কোসলো সকমেৰ [সঙ্গামা (ক.)] রাজধানিং সাৰত্থিং পচ্চুয্যাসি [পাযাসি (সী. পী.)].

অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিংসু. সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –

‘‘রাজা, ভিক্খৰে, মাগধো অজাতসত্তু ৰেদেহিপুত্তো পাপমিত্তো পাপসহাযো পাপসম্পৰঙ্কো; রাজা চ খো, ভিক্খৰে, পসেনদি কোসলো কল্যাণমিত্তো কল্যাণসহাযো কল্যাণসম্পৰঙ্কো. অজ্জেৰ [অজ্জতঞ্চ (সী. পী.), অজ্জেৰং (স্যা. কং.)], ভিক্খৰে, রাজা পসেনদি কোসলো ইমং রত্তিং দুক্খং সেতি পরাজিতো’’তি. ইদমৰোচ…পে…

‘‘জযং ৰেরং পসৰতি, দুক্খং সেতি পরাজিতো;

উপসন্তো সুখং সেতি, হিত্ৰা জযপরাজয’’ন্তি.

৫. দুতিযসঙ্গামসুত্তং

১২৬. [এত্থ ‘‘অথ খো রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং অব্ভুয্যাসী’’তি আদিনা পাঠেন ভৰিতব্বং. অট্ঠকথাযং হি ‘‘অব্ভুয্যাসীতি পরাজযে গরহপ্পত্তো…পে… ৰুত্তজযকারণং সুত্ৰা অভিউয্যাসী’’তি ৰুত্তং] অথ খো রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি. অস্সোসি খো রাজা পসেনদি কোসলো – ‘‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’’তি. অথ খো রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি. অথ খো রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং. তস্মিং খো পন সঙ্গামে রাজা পসেনদি কোসলো রাজানং মাগধং অজাতসত্তুং ৰেদেহিপুত্তং পরাজেসি, জীৰগ্গাহঞ্চ নং অগ্গহেসি. অথ খো রঞ্ঞো পসেনদিস্স কোসলস্স এতদহোসি – ‘‘কিঞ্চাপি খো ম্যাযং রাজা মাগধো অজাতসত্তু ৰেদেহিপুত্তো অদুব্ভন্তস্স দুব্ভতি, অথ চ পন মে ভাগিনেয্যো হোতি. যংনূনাহং রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জেয্য’’ন্তি [ওস্সজ্জেয্যন্তি (সী. স্যা. কং. পী.)].

অথ খো রাজা পসেনদি কোসলো রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জি [ওস্সজি (সী.), ওস্সজ্জি (স্যা. কং. পী.)].

‘‘ইধ, ভন্তে, রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি. অস্সোসি খো, ভন্তে, রাজা পসেনদি কোসলো – ‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’তি. অথ খো, ভন্তে, রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি. অথ খো, ভন্তে, রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং. তস্মিং খো পন, ভন্তে, সঙ্গামে রাজা পসেনদি কোসলো রাজানং মাগধং অজাতসত্তুং ৰেদেহিপুত্তং পরাজেসি, জীৰগ্গাহঞ্চ নং অগ্গহেসি. অথ খো, ভন্তে, রঞ্ঞো পসেনদিস্স কোসলস্স এতদহোসি – ‘কিঞ্চাপি খো ম্যাযং রাজা মাগধো অজাতসত্তু ৰেদেহিপুত্তো অদুব্ভন্তস্স দুব্ভতি, অথ চ পন মে ভাগিনেয্যো হোতি. যংনূনাহং রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং সব্বং রথকাযং সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জেয্য’’’ন্তি.

‘‘অথ খো, ভন্তে, রাজা পসেনদি কোসলো রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জী’’তি. অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –

‘‘ৰিলুম্পতেৰ পুরিসো, যাৰস্স উপকপ্পতি;

যদা চঞ্ঞে ৰিলুম্পন্তি, সো ৰিলুত্তো ৰিলুপ্পতি [ৰিলুম্পতি (সী. পী. ক.)].

‘‘ঠানঞ্হি মঞ্ঞতি বালো, যাৰ পাপং ন পচ্চতি;

যদা চ পচ্চতি পাপং, অথ দুক্খং নিগচ্ছতি.

‘‘হন্তা লভতি [লভতি হন্তা (সী. স্যা. কং.)] হন্তারং, জেতারং লভতে জযং;

অক্কোসকো চ অক্কোসং, রোসেতারঞ্চ রোসকো;

অথ কম্মৰিৰট্টেন, সো ৰিলুত্তো ৰিলুপ্পতী’’তি.

৬. মল্লিকাসুত্তং

১২৭. সাৰত্থিনিদানং. অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. অথ খো অঞ্ঞতরো পুরিসো যেন রাজা পসেনদি কোসলো তেনুপসঙ্কমি; উপসঙ্কমিত্ৰা রঞ্ঞো পসেনদিস্স কোসলস্স উপকণ্ণকে আরোচেসি – ‘‘মল্লিকা, দেৰ, দেৰী ধীতরং ৰিজাতা’’তি. এৰং ৰুত্তে, রাজা পসেনদি কোসলো অনত্তমনো অহোসি.

অথ খো ভগৰা রাজানং পসেনদিং কোসলং অনত্তমনতং ৰিদিত্ৰা তাযং ৰেলাযং ইমা গাথাযো অভাসি –

‘‘ইত্থীপি হি একচ্চিযা, সেয্যা পোস জনাধিপ;

মেধাৰিনী সীলৰতী, সস্সুদেৰা পতিব্বতা.

‘‘তস্সা যো জাযতি পোসো, সূরো হোতি দিসম্পতি;

তাদিসা সুভগিযা [সুভরিযাপুত্তো (ক.)] পুত্তো, রজ্জম্পি অনুসাসতী’’তি.

৭. অপ্পমাদসুত্তং

১২৮. সাৰত্থিনিদানং. একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘অত্থি নু খো, ভন্তে, একো ধম্মো যো উভো অত্থে সমধিগ্গয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চা’’তি?

‘‘অত্থি খো, মহারাজ, একো ধম্মো যো উভো অত্থে সমধিগ্গয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চা’’তি.

‘‘কতমো পন, ভন্তে, একো ধম্মো, যো উভো অত্থে সমধিগ্গয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চা’’তি?

‘‘অপ্পমাদো খো, মহারাজ, একো ধম্মো, যো উভো অত্থে সমধিগ্গয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চাতি. সেয্যথাপি, মহারাজ, যানি কানিচি জঙ্গলানং [জঙ্গমানং (সী. পী.)] পাণানং পদজাতানি, সব্বানি তানি হত্থিপদে সমোধানং গচ্ছন্তি, হত্থিপদং তেসং অগ্গমক্খাযতি – যদিদং মহন্তত্তেন; এৰমেৰ খো, মহারাজ, অপ্পমাদো একো ধম্মো, যো উভো অত্থে সমধিগ্গয্হ তিট্ঠতি – দিট্ঠধম্মিকঞ্চেৰ অত্থং সম্পরাযিকঞ্চা’’তি. ইদমৰোচ…পে…

‘‘আযুং অরোগিযং ৰণ্ণং, সগ্গং উচ্চাকুলীনতং;

রতিযো পত্থযন্তেন, উল়ারা অপরাপরা.

‘‘অপ্পমাদং পসংসন্তি, পুঞ্ঞকিরিযাসু পণ্ডিতা;

অপ্পমত্তো উভো অত্থে, অধিগ্গণ্হাতি পণ্ডিতো.

‘‘দিট্ঠে ধম্মে চ যো অত্থো, যো চত্থো সম্পরাযিকো;

অত্থাভিসমযা ধীরো, পণ্ডিতোতি পৰুচ্চতী’’তি.

৮. কল্যাণমিত্তসুত্তং

১২৯. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘স্ৰাক্খাতো ভগৰতা ধম্মো, সো চ খো কল্যাণমিত্তস্স কল্যাণসহাযস্স কল্যাণসম্পৰঙ্কস্স, নো পাপমিত্তস্স নো পাপসহাযস্স নো পাপসম্পৰঙ্কস্সা’’’তি.

‘‘এৰমেতং, মহারাজ, এৰমেতং, মহারাজ! স্ৰাক্খাতো, মহারাজ, মযা ধম্মো. সো চ খো কল্যাণমিত্তস্স কল্যাণসহাযস্স কল্যাণসম্পৰঙ্কস্স, নো পাপমিত্তস্স নো পাপসহাযস্স নো পাপসম্পৰঙ্কস্সাতি.

‘‘একমিদাহং, মহারাজ, সমযং সক্কেসু ৰিহরামি নগরকং নাম সক্যানং নিগমো. অথ খো, মহারাজ, আনন্দো ভিক্খু যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং নিসীদি. একমন্তং নিসিন্নো খো, মহারাজ, আনন্দো ভিক্খু মং এতদৰোচ – ‘উপড্ঢমিদং, ভন্তে, ব্রহ্মচরিযস্স – যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’’তি.

‘‘এৰং ৰুত্তাহং, মহারাজ, আনন্দং ভিক্খুং এতদৰোচং – ‘মা হেৰং, আনন্দ, মা হেৰং, আনন্দ! সকলমেৰ হিদং, আনন্দ, ব্রহ্মচরিযং – যদিদং কল্যাণমিত্ততা কল্যাণসহাযতা কল্যাণসম্পৰঙ্কতা. কল্যাণমিত্তস্সেতং, আনন্দ, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স অরিযং অট্ঠঙ্গিকং মগ্গং ভাৰেস্সতি অরিযং অট্ঠঙ্গিকং মগ্গং বহুলীকরিস্সতি’’’.

‘‘কথঞ্চ, আনন্দ, ভিক্খু কল্যাণমিত্তো কল্যাণসহাযো কল্যাণসম্পৰঙ্কো অরিযং অট্ঠঙ্গিকং মগ্গং ভাৰেতি, অরিযং অট্ঠঙ্গিকং মগ্গং বহুলীকরোতি? ইধানন্দ, ভিক্খু সম্মাদিট্ঠিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং, সম্মাসঙ্কপ্পং ভাৰেতি…পে… সম্মাৰাচং ভাৰেতি…পে… সম্মাকম্মন্তং ভাৰেতি…পে… সম্মাআজীৰং ভাৰেতি…পে… সম্মাৰাযামং ভাৰেতি…পে… সম্মাসতিং ভাৰেতি…পে… সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. এৰং খো, আনন্দ, ভিক্খু কল্যাণমিত্তো কল্যাণসহাযো কল্যাণসম্পৰঙ্কো অরিযং অট্ঠঙ্গিকং মগ্গং ভাৰেতি, অরিযং অট্ঠঙ্গিকং মগ্গং বহুলীকরোতি. তদমিনাপেতং, আনন্দ, পরিযাযেন ৰেদিতব্বং যথা সকলমেৰিদং ব্রহ্মচরিযং – যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’তি.

‘‘মমঞ্হি, আনন্দ, কল্যাণমিত্তং আগম্ম জাতিধম্মা সত্তা জাতিযা পরিমুচ্চন্তি, জরাধম্মা সত্তা জরায পরিমুচ্চন্তি, ব্যাধিধম্মা সত্তা ব্যাধিতো পরিমুচ্চন্তি, মরণধম্মা সত্তা মরণেন পরিমুচ্চন্তি, সোকপরিদেৰদুক্খদোমনস্সুপাযাসধম্মা সত্তা সোকপরিদেৰদুক্খদোমনস্সুপাযাসেহি পরিমুচ্চন্তি. ইমিনা খো এতং, আনন্দ, পরিযাযেন ৰেদিতব্বং যথা সকলমেৰিদং ব্রহ্মচরিযং – যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’তি.

‘‘তস্মাতিহ তে, মহারাজ, এৰং সিক্খিতব্বং – ‘কল্যাণমিত্তো ভৰিস্সামি কল্যাণসহাযো কল্যাণসম্পৰঙ্কো’তি. এৰঞ্হি তে, মহারাজ, সিক্খিতব্বং.

‘‘কল্যাণমিত্তস্স তে, মহারাজ, কল্যাণসহাযস্স কল্যাণসম্পৰঙ্কস্স অযং একো ধম্মো উপনিস্সায ৰিহাতব্বো – অপ্পমাদো কুসলেসু ধম্মেসু.

‘‘অপ্পমত্তস্স তে, মহারাজ, ৰিহরতো অপ্পমাদং উপনিস্সায, ইত্থাগারস্স অনুযন্তস্স এৰং ভৰিস্সতি – ‘রাজা খো অপ্পমত্তো ৰিহরতি, অপ্পমাদং উপনিস্সায. হন্দ, মযম্পি অপ্পমত্তা ৰিহরাম, অপ্পমাদং উপনিস্সাযা’’’তি.

‘‘অপ্পমত্তস্স তে, মহারাজ, ৰিহরতো অপ্পমাদং উপনিস্সায, খত্তিযানম্পি অনুযন্তানং এৰং ভৰিস্সতি – ‘রাজা খো অপ্পমত্তো ৰিহরতি অপ্পমাদং উপনিস্সায. হন্দ, মযম্পি অপ্পমত্তা ৰিহরাম, অপ্পমাদং উপনিস্সাযা’’’তি.

‘‘অপ্পমত্তস্স তে, মহারাজ, ৰিহরতো অপ্পমাদং উপনিস্সায, বলকাযস্সপি এৰং ভৰিস্সতি – ‘রাজা খো অপ্পমত্তো ৰিহরতি অপ্পমাদং উপনিস্সায. হন্দ, মযম্পি অপ্পমত্তা ৰিহরাম, অপ্পমাদং উপনিস্সাযা’’’তি.

‘‘অপ্পমত্তস্স তে, মহারাজ, ৰিহরতো অপ্পমাদং উপনিস্সায, নেগমজানপদস্সপি এৰং ভৰিস্সতি – ‘রাজা খো অপ্পমত্তো ৰিহরতি, অপ্পমাদং উপনিস্সায. হন্দ, মযম্পি অপ্পমত্তা ৰিহরাম, অপ্পমাদং উপনিস্সাযা’’’তি?

‘‘অপ্পমত্তস্স তে, মহারাজ, ৰিহরতো অপ্পমাদং উপনিস্সায, অত্তাপি গুত্তো রক্খিতো ভৰিস্সতি – ইত্থাগারম্পি গুত্তং রক্খিতং ভৰিস্সতি, কোসকোট্ঠাগারম্পি গুত্তং রক্খিতং ভৰিস্সতী’’তি. ইদমৰোচ…পে…

‘‘ভোগে পত্থযমানেন, উল়ারে অপরাপরে;

অপ্পমাদং পসংসন্তি, পুঞ্ঞকিরিযাসু পণ্ডিতা.

‘‘অপ্পমত্তো উভো অত্থে, অধিগ্গণ্হাতি পণ্ডিতো;

দিট্ঠে ধম্মে চ যো অত্থো, যো চত্থো সম্পরাযিকো;

অত্থাভিসমযা ধীরো, পণ্ডিতোতি পৰুচ্চতী’’তি.

৯. পঠমঅপুত্তকসুত্তং

১৩০. সাৰত্থিনিদানং. অথ খো রাজা পসেনদি কোসলো দিৰা দিৰস্স যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰা দিৰস্সা’’তি?

‘‘ইধ, ভন্তে, সাৰত্থিযং সেট্ঠি গহপতি কালঙ্কতো. তমহং অপুত্তকং সাপতেয্যং রাজন্তেপুরং অতিহরিত্ৰা আগচ্ছামি. অসীতি, ভন্তে, সতসহস্সানি হিরঞ্ঞস্সেৰ, কো পন ৰাদো রূপিযস্স! তস্স খো পন, ভন্তে, সেট্ঠিস্স গহপতিস্স এৰরূপো ভত্তভোগো অহোসি – কণাজকং ভুঞ্জতি বিলঙ্গদুতিযং. এৰরূপো ৰত্থভোগো অহোসি – সাণং ধারেতি তিপক্খৰসনং. এৰরূপো যানভোগো অহোসি – জজ্জররথকেন যাতি পণ্ণছত্তকেন ধারিযমানেনা’’তি.

‘‘এৰমেতং, মহারাজ, এৰমেতং, মহারাজ! অসপ্পুরিসো খো, মহারাজ, উল়ারে ভোগে লভিত্ৰা নেৰত্তানং সুখেতি পীণেতি, ন মাতাপিতরো সুখেতি পীণেতি, ন পুত্তদারং সুখেতি পীণেতি, ন দাসকম্মকরপোরিসে সুখেতি পীণেতি, ন মিত্তামচ্চে সুখেতি পীণেতি, ন সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. তস্স তে ভোগে এৰং সম্মা অপরিভুঞ্জিযমানে [অপরিভুঞ্জমানো (সব্বত্থ)] রাজানো ৰা হরন্তি চোরা ৰা হরন্তি অগ্গি ৰা ডহতি উদকং ৰা ৰহতি অপ্পিযা ৰা দাযাদা হরন্তি. এৰংস তে [এৰং সন্তে (সী. পী.)], মহারাজ, ভোগা সম্মা অপরিভুঞ্জিযমানা পরিক্খযং গচ্ছন্তি, নো পরিভোগং.

‘‘সেয্যথাপি, মহারাজ, অমনুস্সট্ঠানে পোক্খরণী অচ্ছোদকা সীতোদকা সাতোদকা সেতোদকা সুপতিত্থা রমণীযা. তং জনো নেৰ হরেয্য ন পিৰেয্য ন নহাযেয্য ন যথাপচ্চযং ৰা করেয্য. এৰঞ্হি তং, মহারাজ, উদকং সম্মা অপরিভুঞ্জিযমানং [অপরিভুঞ্জমানং (স্যা. কং.)] পরিক্খযং গচ্ছেয্য, নো পরিভোগং. এৰমেৰ খো, মহারাজ, অসপ্পুরিসো উল়ারে ভোগে লভিত্ৰা নেৰত্তানং সুখেতি পীণেতি, ন মাতাপিতরো সুখেতি পীণেতি, ন পুত্তদারং সুখেতি পীণেতি, ন দাসকম্মকরপোরিসে সুখেতি পীণেতি, ন মিত্তামচ্চে সুখেতি পীণেতি, ন সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. তস্স তে ভোগে এৰং সম্মা অপরিভুঞ্জিযমানে রাজানো ৰা হরন্তি চোরা ৰা হরন্তি অগ্গি ৰা ডহতি উদকং ৰা ৰহতি অপ্পিযা ৰা দাযাদা হরন্তি. এৰংস তে [এৰং সন্তে (সী. পী.)], মহারাজ, ভোগা সম্মা অপরিভুঞ্জিযমানা পরিক্খযং গচ্ছন্তি, নো পরিভোগং.

‘‘সপ্পুরিসো চ খো, মহারাজ, উল়ারে ভোগে লভিত্ৰা অত্তানং সুখেতি পীণেতি, মাতাপিতরো সুখেতি পীণেতি, পুত্তদারং সুখেতি পীণেতি, দাসকম্মকরপোরিসে সুখেতি পীণেতি, মিত্তামচ্চে সুখেতি পীণেতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. তস্স তে ভোগে এৰং সম্মা পরিভুঞ্জিযমানে নেৰ রাজানো হরন্তি, ন চোরা হরন্তি, ন অগ্গি ডহতি, ন উদকং ৰহতি, ন অপ্পিযা দাযাদা হরন্তি. এৰংস তে, মহারাজ, ভোগা সম্মা পরিভুঞ্জিযমানা পরিভোগং গচ্ছন্তি, নো পরিক্খযং.

‘‘সেয্যথাপি, মহারাজ, গামস্স ৰা নিগমস্স ৰা অৰিদূরে পোক্খরণী অচ্ছোদকা সীতোদকা সাতোদকা সেতোদকা সুপতিত্থা রমণীযা. তঞ্চ উদকং জনো হরেয্যপি পিৰেয্যপি নহাযেয্যপি যথাপচ্চযম্পি করেয্য. এৰঞ্হি তং, মহারাজ, উদকং সম্মা পরিভুঞ্জিযমানং পরিভোগং গচ্ছেয্য, নো পরিক্খযং. এৰমেৰ খো, মহারাজ, সপ্পুরিসো উল়ারে ভোগে লভিত্ৰা অত্তানং সুখেতি পীণেতি, মাতাপিতরো সুখেতি পীণেতি, পুত্তদারং সুখেতি পীণেতি, দাসকম্মকরপোরিসে সুখেতি পীণেতি, মিত্তামচ্চে সুখেতি পীণেতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং. তস্স তে ভোগে এৰং সম্মা পরিভুঞ্জিযমানে নেৰ রাজানো হরন্তি, ন চোরা হরন্তি, ন অগ্গি ডহতি, ন উদকং ৰহতি, ন অপ্পিযা দাযাদা হরন্তি. এৰংস তে, মহারাজ, ভোগা সম্মা পরিভুঞ্জিযমানা পরিভোগং গচ্ছন্তি, নো পরিক্খয’’ন্তি.

‘‘অমনুস্সট্ঠানে উদকংৰ সীতং,

তদপেয্যমানং পরিসোসমেতি;

এৰং ধনং কাপুরিসো লভিত্ৰা,

নেৰত্তনা ভুঞ্জতি নো দদাতি.

ধীরো চ ৰিঞ্ঞূ অধিগম্ম ভোগে,

সো ভুঞ্জতি কিচ্চকরো চ হোতি;

সো ঞাতিসঙ্ঘং নিসভো ভরিত্ৰা,

অনিন্দিতো সগ্গমুপেতি ঠান’’ন্তি.

১০. দুতিযঅপুত্তকসুত্তং

১৩১. অথ খো রাজা পসেনদি কোসলো দিৰা দিৰস্স যেন ভগৰা তেনুপসঙ্কমি; উপসঙ্কমিত্ৰা একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰা দিৰস্সা’’তি?

‘‘ইধ, ভন্তে, সাৰত্থিযং সেট্ঠি গহপতি কালঙ্কতো. তমহং অপুত্তকং সাপতেয্যং রাজন্তেপুরং অতিহরিত্ৰা আগচ্ছামি. সতং, ভন্তে, সতসহস্সানি হিরঞ্ঞস্সেৰ, কো পন ৰাদো রূপিযস্স! তস্স খো পন, ভন্তে, সেট্ঠিস্স গহপতিস্স এৰরূপো ভত্তভোগো অহোসি – কণাজকং ভুঞ্জতি বিলঙ্গদুতিযং. এৰরূপো ৰত্থভোগো অহোসি – সাণং ধারেতি তিপক্খৰসনং. এৰরূপো যানভোগো অহোসি – জজ্জররথকেন যাতি পণ্ণছত্তকেন ধারিযমানেনা’’তি.

‘‘এৰমেতং, মহারাজ, এৰমেতং, মহারাজ! ভূতপুব্বং সো, মহারাজ, সেট্ঠি গহপতি তগ্গরসিখিং নাম পচ্চেকসম্বুদ্ধং পিণ্ডপাতেন পটিপাদেসি. ‘দেথ সমণস্স পিণ্ড’ন্তি ৰত্ৰা উট্ঠাযাসনা পক্কামি. দত্ৰা চ পন পচ্ছা ৰিপ্পটিসারী অহোসি – ‘ৰরমেতং পিণ্ডপাতং দাসা ৰা কম্মকরা ৰা ভুঞ্জেয্যু’ন্তি. ভাতু চ পন একপুত্তকং সাপতেয্যস্স কারণা জীৰিতা ৰোরোপেসি.

‘‘যং খো সো, মহারাজ, সেট্ঠি গহপতি তগ্গরসিখিং পচ্চেকসম্বুদ্ধং পিণ্ডপাতেন পটিপাদেসি, তস্স কম্মস্স ৰিপাকেন সত্তক্খত্তুং সুগতিং সগ্গং লোকং উপপজ্জি. তস্সেৰ কম্মস্স ৰিপাকাৰসেসেন ইমিস্সাযেৰ সাৰত্থিযা সত্তক্খত্তুং সেট্ঠিত্তং কারেসি. যং খো সো, মহারাজ, সেট্ঠি গহপতি দত্ৰা পচ্ছা ৰিপ্পটিসারী অহোসি – ‘ৰরমেতং পিণ্ডপাতং দাসা ৰা কম্মকরা ৰা ভুঞ্জেয্যু’ন্তি, তস্স কম্মস্স ৰিপাকেন নাস্সুল়ারায ভত্তভোগায চিত্তং নমতি, নাস্সুল়ারায ৰত্থভোগায চিত্তং নমতি, নাস্সুল়ারায যানভোগায চিত্তং নমতি, নাস্সুল়ারানং পঞ্চন্নং কামগুণানং ভোগায চিত্তং নমতি. যং খো সো, মহারাজ, সেট্ঠি গহপতি ভাতু চ পন একপুত্তকং সাপতেয্যস্স কারণা জীৰিতা ৰোরোপেসি, তস্স কম্মস্স ৰিপাকেন বহূনি ৰস্সানি বহূনি ৰস্সসতানি বহূনি ৰস্সসহস্সানি বহূনি ৰস্সসতসহস্সানি নিরযে পচ্চিত্থ. তস্সেৰ কম্মস্স ৰিপাকাৰসেসেন ইদং সত্তমং অপুত্তকং সাপতেয্যং রাজকোসং পৰেসেতি. তস্স খো, মহারাজ, সেট্ঠিস্স গহপতিস্স পুরাণঞ্চ পুঞ্ঞং পরিক্খীণং, নৰঞ্চ পুঞ্ঞং অনুপচিতং. অজ্জ পন, মহারাজ, সেট্ঠি গহপতি মহারোরুৰে নিরযে পচ্চতী’’তি. ‘‘এৰং, ভন্তে, সেট্ঠি গহপতি মহারোরুৰং নিরযং উপপন্নো’’তি. ‘‘এৰং, মহারাজ, সেট্ঠি গহপতি মহারোরুৰং নিরযং উপপন্নো’’তি. ইদমৰোচ…পে….

‘‘ধঞ্ঞং ধনং রজতং জাতরূপং, পরিগ্গহং ৰাপি যদত্থি কিঞ্চি;

দাসা কম্মকরা পেস্সা, যে চস্স অনুজীৰিনো.

‘‘সব্বং নাদায গন্তব্বং, সব্বং নিক্খিপ্পগামিনং [নিক্খীপগামিনং (স্যা. কং. ক.)];

যঞ্চ করোতি কাযেন, ৰাচায উদ চেতসা.

‘‘তঞ্হি তস্স সকং হোতি, তঞ্চ আদায গচ্ছতি;

তঞ্চস্স অনুগং হোতি, ছাযাৰ অনপাযিনী.

‘‘তস্মা করেয্য কল্যাণং, নিচযং সম্পরাযিকং;

পুঞ্ঞানি পরলোকস্মিং, পতিট্ঠা হোন্তি পাণিন’’ন্তি.

দুতিযো ৰগ্গো.

তস্সুদ্দানং –

জটিলা পঞ্চ রাজানো, দোণপাককুরেন চ;

সঙ্গামেন দ্ৰে ৰুত্তানি, মল্লিকা [ধীতরা (বহূসু)] দ্ৰে অপ্পমাদেন চ;

অপুত্তকেন দ্ৰে ৰুত্তা, ৰগ্গো তেন পৰুচ্চতীতি.