৩. ততিযৰগ্গো

১. পুগ্গলসুত্তং

১৩২. সাৰত্থিনিদানং. অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘চত্তারোমে, মহারাজ, পুগ্গলা সন্তো সংৰিজ্জমানা লোকস্মিং. কতমে চত্তারো? তমোতমপরাযনো, তমোজোতিপরাযনো, জোতিতমপরাযনো, জোতিজোতিপরাযনো’’.

‘‘কথঞ্চ, মহারাজ পুগ্গলো তমোতমপরাযনো হোতি? ইধ, মহারাজ, একচ্চো পুগ্গলো নীচে কুলে পচ্চাজাতো হোতি, চণ্ডালকুলে ৰা ৰেনকুলে [ৰেণকুলে (সী. স্যা. কং. পী.)] ৰা নেসাদকুলে ৰা রথকারকুলে ৰা পুক্কুসকুলে ৰা দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বৰ্হাবাধো [বহ্ৰাবাধো (ক.)] কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি.

‘‘সেয্যথাপি, মহারাজ, পুরিসো অন্ধকারা ৰা অন্ধকারং গচ্ছেয্য, তমা ৰা তমং গচ্ছেয্য, লোহিতমলা ৰা লোহিতমলং গচ্ছেয্য. তথূপমাহং, মহারাজ, ইমং পুগ্গলং ৰদামি. এৰং খো, মহারাজ, পুগ্গলো তমোতমপরাযনো হোতি.

‘‘কথঞ্চ, মহারাজ, পুগ্গলো তমোজোতিপরাযনো হোতি? ইধ, মহারাজ, একচ্চো পুগ্গলো নীচে কুলে পচ্চাজাতো হোতি, চণ্ডালকুলে ৰা ৰেনকুলে ৰা নেসাদকুলে ৰা রথকারকুলে ৰা পুক্কুসকুলে ৰা দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ খো হোতি দুব্বণ্ণো দুদ্দসিকো ওকোটিমকো বৰ্হাবাধো, কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা, কাযস্স ভেদা পরং মরণা সুগতিং সগ্গং লোকং উপপজ্জতি.

‘‘সেয্যথাপি, মহারাজ, পুরিসো পথৰিযা ৰা পল্লঙ্কং আরোহেয্য, পল্লঙ্কা ৰা অস্সপিট্ঠিং আরোহেয্য, অস্সপিট্ঠিযা ৰা হত্থিক্খন্ধং আরোহেয্য, হত্থিক্খন্ধা ৰা পাসাদং আরোহেয্য. তথূপমাহং, মহারাজ, ইমং পুগ্গলং ৰদামি. এৰং খো, মহারাজ, পুগ্গলো তমোজোতিপরাযনো হোতি.

‘‘কথঞ্চ, মহারাজ, পুগ্গলো জোতিতমপরাযনো হোতি? ইধ, মহারাজ, একচ্চো পুগ্গলো উচ্চে কুলে পচ্চাজাতো হোতি, খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা, অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো, পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি.

‘‘সেয্যথাপি, মহারাজ, পুরিসো পাসাদা ৰা হত্থিক্খন্ধং ওরোহেয্য, হত্থিক্খন্ধা ৰা অস্সপিট্ঠিং ওরোহেয্য, অস্সপিট্ঠিযা ৰা পল্লঙ্কং ওরোহেয্য, পল্লঙ্কা ৰা পথৰিং ওরোহেয্য, পথৰিযা ৰা অন্ধকারং পৰিসেয্য. তথূপমাহং, মহারাজ, ইমং পুগ্গলং ৰদামি. এৰং খো, মহারাজ, পুগ্গলো জোতিতমপরাযনো হোতি.

‘‘কথঞ্চ, মহারাজ, পুগ্গলো জোতিজোতিপরাযনো হোতি? ইধ, মহারাজ, একচ্চো পুগ্গলো উচ্চে কুলে পচ্চাজাতো হোতি, খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা, অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো, পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা, কাযস্স ভেদা পরং মরণা সুগতিং সগ্গং লোকং উপপজ্জতি.

‘‘সেয্যথাপি, মহারাজ, পুরিসো পল্লঙ্কা ৰা পল্লঙ্কং সঙ্কমেয্য, অস্সপিট্ঠিযা ৰা অস্সপিট্ঠিং সঙ্কমেয্য, হত্থিক্খন্ধা ৰা হত্থিক্খন্ধং সঙ্কমেয্য, পাসাদা ৰা পাসাদং সঙ্কমেয্য. তথূপমাহং, মহারাজ, ইমং পুগ্গলং ৰদামি. এৰং খো, মহারাজ, পুগ্গলো জোতিজোতিপরাযনো হোতি. ইমে খো, মহারাজ, চত্তারো পুগ্গলা সন্তো সংৰিজ্জমানা লোকস্মি’’ন্তি. ইদমৰোচ…পে…

‘‘দলিদ্দো পুরিসো রাজ, অস্সদ্ধো হোতি মচ্ছরী;

কদরিযো পাপসঙ্কপ্পো, মিচ্ছাদিট্ঠি অনাদরো.

‘‘সমণে ব্রাহ্মণে ৰাপি, অঞ্ঞে ৰাপি ৰনিব্বকে;

অক্কোসতি পরিভাসতি, নত্থিকো হোতি রোসকো.

‘‘দদমানং নিৰারেতি, যাচমানান ভোজনং;

তাদিসো পুরিসো রাজ, মীযমানো জনাধিপ;

উপেতি নিরযং ঘোরং, তমোতমপরাযনো.

‘‘দলিদ্দো পুরিসো রাজ, সদ্ধো হোতি অমচ্ছরী;

দদাতি সেট্ঠসঙ্কপ্পো, অব্যগ্গমনসো নরো.

‘‘সমণে ব্রাহ্মণে ৰাপি, অঞ্ঞে ৰাপি ৰনিব্বকে;

উট্ঠায অভিৰাদেতি, সমচরিযায সিক্খতি.

‘‘দদমানং ন ৰারেতি [ন নিৰারেতি (সী.)], যাচমানান ভোজনং;

তাদিসো পুরিসো রাজ, মীযমানো জনাধিপ;

উপেতি তিদিৰং ঠানং, তমোজোতিপরাযনো.

‘‘অড্ঢো চে [অড্ঢো ৰে (পী. ক.)] পুরিসো রাজ, অস্সদ্ধো হোতি মচ্ছরী;

কদরিযো পাপসঙ্কপ্পো, মিচ্ছাদিট্ঠি অনাদরো.

‘‘সমণে ব্রাহ্মণে ৰাপি, অঞ্ঞে ৰাপি ৰনিব্বকে;

অক্কোসতি পরিভাসতি, নত্থিকো হোতি রোসকো.

‘‘দদমানং নিৰারেতি, যাচমানান ভোজনং;

তাদিসো পুরিসো রাজ, মীযমানো জনাধিপ;

উপেতি নিরযং ঘোরং, জোতিতমপরাযনো.

‘‘অড্ঢো চে পুরিসো রাজ, সদ্ধো হোতি অমচ্ছরী;

দদাতি সেট্ঠসঙ্কপ্পো, অব্যগ্গমনসো নরো.

‘‘সমণে ব্রাহ্মণে ৰাপি, অঞ্ঞে ৰাপি ৰনিব্বকে;

উট্ঠায অভিৰাদেতি, সমচরিযায সিক্খতি.

‘‘দদমানং ন ৰারেতি, যাচমানান ভোজনং;

তাদিসো পুরিসো রাজ, মীযমানো জনাধিপ;

উপেতি তিদিৰং ঠানং, জোতিজোতিপরাযনো’’তি.

২. অয্যিকাসুত্তং

১৩৩. সাৰত্থিনিদানং. একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰাদিৰস্সা’’তি?

‘‘অয্যিকা মে, ভন্তে, কালঙ্কতা জিণ্ণা ৰুড্ঢা মহল্লিকা অদ্ধগতা ৰযোঅনুপ্পত্তা ৰীসৰস্সসতিকা জাতিযা. অয্যিকা খো পন মে, ভন্তে, পিযা হোতি মনাপা. হত্থিরতনেন চেপাহং, ভন্তে, লভেয্যং ‘মা মে অয্যিকা কালমকাসী’তি, হত্থিরতনম্পাহং দদেয্যং – ‘মা মে অয্যিকা কালমকাসী’তি. অস্সরতনেন চেপাহং, ভন্তে, লভেয্যং ‘মা মে অয্যিকা কালমকাসী’তি, অস্সরতনম্পাহং দদেয্যং – ‘মা মে অয্যিকা কালমকাসী’তি. গামৰরেন চেপাহং ভন্তে, লভেয্যং ‘মা মে অয্যিকা কালমকাসী’তি, গামৰরম্পাহং দদেয্যং – ‘মা মে অয্যিকা কালমকাসী’তি. জনপদপদেসেন [জনপদেন (সী. স্যা. পী.)] চেপাহং, ভন্তে, লভেয্যং ‘মা মে অয্যিকা কালমকাসী’তি, জনপদপদেসম্পাহং দদেয্যং – ‘মা মে অয্যিকা কালমকাসী’তি. ‘সব্বে সত্তা, মহারাজ, মরণধম্মা মরণপরিযোসানা মরণং অনতীতা’তি. ‘অচ্ছরিযং, ভন্তে, অব্ভুতং, ভন্তে! যাৰসুভাসিতমিদং, ভন্তে, ভগৰতা – সব্বে সত্তা মরণধম্মা মরণপরিযোসানা মরণং অনতীতা’’’তি.

‘‘এৰমেতং, মহারাজ, এৰমেতং, মহারাজ! সব্বে সত্তা মরণধম্মা মরণপরিযোসানা মরণং অনতীতা. সেয্যথাপি, মহারাজ, যানি কানিচি কুম্ভকারভাজনানি আমকানি চেৰ পক্কানি চ সব্বানি তানি ভেদনধম্মানি ভেদনপরিযোসানানি ভেদনং অনতীতানি; এৰমেৰ খো, মহারাজ, সব্বে সত্তা মরণধম্মা মরণপরিযোসানা মরণং অনতীতা’’তি. ইদমৰোচ…পে…

‘‘সব্বে সত্তা মরিস্সন্তি, মরণন্তঞ্হি জীৰিতং;

যথাকম্মং গমিস্সন্তি, পুঞ্ঞপাপফলূপগা;

নিরযং পাপকম্মন্তা, পুঞ্ঞকম্মা চ সুগ্গতিং.

‘‘তস্মা করেয্য কল্যাণং, নিচযং সম্পরাযিকং;

পুঞ্ঞানি পরলোকস্মিং, পতিট্ঠা হোন্তি পাণিন’’ন্তি.

৩. লোকসুত্তং

১৩৪. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘কতি নু খো, ভন্তে, লোকস্স ধম্মা উপ্পজ্জমানা উপ্পজ্জন্তি অহিতায দুক্খায অফাসুৰিহারাযা’’তি? ‘‘তযো খো, মহারাজ, লোকস্স ধম্মা উপ্পজ্জমানা উপ্পজ্জন্তি অহিতায দুক্খায অফাসুৰিহারায. কতমে তযো? লোভো খো, মহারাজ, লোকস্স ধম্মো, উপ্পজ্জমানো উপ্পজ্জতি অহিতায দুক্খায অফাসুৰিহারায. দোসো খো, মহারাজ, লোকস্স ধম্মো, উপ্পজ্জমানো উপ্পজ্জতি অহিতায দুক্খায অফাসুৰিহারায. মোহো খো, মহারাজ, লোকস্স ধম্মো, উপ্পজ্জমানো উপ্পজ্জতি অহিতায দুক্খায অফাসুৰিহারায. ইমে খো, মহারাজ, তযো লোকস্স ধম্মা উপ্পজ্জমানা উপ্পজ্জন্তি অহিতায দুক্খায অফাসুৰিহারাযা’’তি. ইদমৰোচ…পে…

‘‘লোভো দোসো চ মোহো চ, পুরিসং পাপচেতসং;

হিংসন্তি অত্তসম্ভূতা, তচসারংৰ সম্ফল’’ন্তি.

৪. ইস্সত্তসুত্তং

১৩৫. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘কত্থ নু খো, ভন্তে, দানং দাতব্ব’’ন্তি? ‘‘যত্থ খো, মহারাজ, চিত্তং পসীদতী’’তি. ‘‘কত্থ পন, ভন্তে, দিন্নং মহপ্ফল’’ন্তি? ‘‘অঞ্ঞং খো এতং, মহারাজ, কত্থ দানং দাতব্বং, অঞ্ঞং পনেতং কত্থ দিন্নং মহপ্ফলন্তি? সীলৰতো খো, মহারাজ, দিন্নং মহপ্ফলং, নো তথা দুস্সীলে. তেন হি, মহারাজ, তঞ্ঞেৰেত্থ পটিপুচ্ছিস্সামি. যথা, তে খমেয্য, তথা নং ব্যাকরেয্যাসি. তং কিং মঞ্ঞসি, মহারাজ, ইধ ত্যস্স যুদ্ধং পচ্চুপট্ঠিতং সঙ্গামো সমুপব্যূল়্হো [সমূপব্বূল়্হো (সী.), সমুপব্বুল়্হো (পী.)]. অথ আগচ্ছেয্য খত্তিযকুমারো অসিক্খিতো অকতহত্থো অকতযোগ্গো অকতূপাসনো ভীরু ছম্ভী উত্রাসী পলাযী. ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘নাহং, ভন্তে, ভরেয্যং তং পুরিসং, ন চ মে অত্থো তাদিসেন পুরিসেনা’’তি. ‘‘অথ আগচ্ছেয্য ব্রাহ্মণকুমারো অসিক্খিতো…পে… অথ আগচ্ছেয্য ৰেস্সকুমারো অসিক্খিতো…পে… অথ আগচ্ছেয্য সুদ্দকুমারো অসিক্খিতো…পে… ন চ মে অত্থো তাদিসেন পুরিসেনা’’তি.

‘‘তং কিং মঞ্ঞসি, মহারাজ, ইধ ত্যস্স যুদ্ধং পচ্চুপট্ঠিতং সঙ্গামো সমুপব্যূল়্হো. অথ আগচ্ছেয্য খত্তিযকুমারো সুসিক্খিতো কতহত্থো কতযোগ্গো কতূপাসনো অভীরু অচ্ছম্ভী অনুত্রাসী অপলাযী. ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘ভরেয্যাহং, ভন্তে, তং পুরিসং, অত্থো চ মে তাদিসেন পুরিসেনা’’তি. ‘‘অথ আগচ্ছেয্য ব্রাহ্মণকুমারো…পে… অথ আগচ্ছেয্য ৰেস্সকুমারো…পে… অথ আগচ্ছেয্য সুদ্দকুমারো সুসিক্খিতো কতহত্থো কতযোগ্গো কতূপাসনো অভীরু অচ্ছম্ভী অনুত্রাসী অপলাযী. ভরেয্যাসি তং পুরিসং, অত্থো চ তে তাদিসেন পুরিসেনা’’তি? ‘‘ভরেয্যাহং, ভন্তে, তং পুরিসং, অত্থো চ মে তাদিসেন পুরিসেনা’’তি.

‘‘এৰমেৰ খো, মহারাজ, যস্মা কস্মা চেপি [যস্মা চেপি (সী. স্যা. কং. ক.)] কুলা অগারস্মা অনগারিযং পব্বজিতো হোতি, সো চ হোতি পঞ্চঙ্গৰিপ্পহীনো পঞ্চঙ্গসমন্নাগতো, তস্মিং দিন্নং মহপ্ফলং হোতি. কতমানি পঞ্চঙ্গানি পহীনানি হোন্তি? কামচ্ছন্দো পহীনো হোতি, ব্যাপাদো পহীনো হোতি, থিনমিদ্ধং পহীনং হোতি, উদ্ধচ্চকুক্কুচ্চং পহীনং হোতি, ৰিচিকিচ্ছা পহীনা হোতি. ইমানি পঞ্চঙ্গানি পহীনানি হোন্তি. কতমেহি পঞ্চহঙ্গেহি সমন্নাগতো হোতি? অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন সমন্নাগতো হোতি, অসেক্খেন পঞ্ঞাক্খন্ধেন সমন্নাগতো হোতি, অসেক্খেন ৰিমুত্তিক্খন্ধেন সমন্নাগতো হোতি, অসেক্খেন ৰিমুত্তিঞাণদস্সনক্খন্ধেন সমন্নাগতো হোতি. ইমেহি পঞ্চহঙ্গেহি সমন্নাগতো হোতি. ইতি পঞ্চঙ্গৰিপ্পহীনে পঞ্চঙ্গসমন্নাগতে দিন্নং মহপ্ফল’’ন্তি. ইদমৰোচ ভগৰা…পে… সত্থা –

‘‘ইস্সত্তং [ইস্সত্থং (সী. স্যা. কং.)] বলৰীরিযঞ্চ [বলৰিরিযঞ্চ (সী. স্যা. কং. পী.)], যস্মিং ৰিজ্জেথ মাণৰে;

তং যুদ্ধত্থো ভরে রাজা, নাসূরং জাতিপচ্চযা.

‘‘তথেৰ খন্তিসোরচ্চং, ধম্মা যস্মিং পতিট্ঠিতা;

অরিযৰুত্তিং মেধাৰিং, হীনজচ্চম্পি পূজযে.

‘‘কারযে অস্সমে রম্মে, ৰাসযেত্থ বহুস্সুতে;

পপঞ্চ ৰিৰনে কযিরা, দুগ্গে সঙ্কমনানি চ.

‘‘অন্নং পানং খাদনীযং, ৰত্থসেনাসনানি চ;

দদেয্য উজুভূতেসু, ৰিপ্পসন্নেন চেতসা.

‘‘যথা হি মেঘো থনযং, ৰিজ্জুমালী সতক্ককু;

থলং নিন্নঞ্চ পূরেতি, অভিৰস্সং ৰসুন্ধরং.

‘‘তথেৰ সদ্ধো সুতৰা, অভিসঙ্খচ্চ ভোজনং;

ৰনিব্বকে তপ্পযতি, অন্নপানেন পণ্ডিতো.

‘‘আমোদমানো পকিরেতি, দেথ দেথাতি ভাসতি;

তং হিস্স গজ্জিতং হোতি, দেৰস্সেৰ পৰস্সতো;

সা পুঞ্ঞধারা ৰিপুলা, দাতারং অভিৰস্সতী’’তি.

৫. পব্বতূপমসুত্তং

১৩৬. সাৰত্থিনিদানং. একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰা দিৰস্সা’’তি? ‘‘যানি তানি, ভন্তে, রঞ্ঞং খত্তিযানং মুদ্ধাৰসিত্তানং ইস্সরিযমদমত্তানং কামগেধপরিযুট্ঠিতানং জনপদত্থাৰরিযপ্পত্তানং মহন্তং পথৰিমণ্ডলং অভিৰিজিয অজ্ঝাৰসন্তানং রাজকরণীযানি ভৰন্তি, তেসু খ্ৰাহং, এতরহি উস্সুক্কমাপন্নো’’তি.

‘‘তং কিং মঞ্ঞসি, মহারাজ, ইধ তে পুরিসো আগচ্ছেয্য পুরত্থিমায দিসায সদ্ধাযিকো পচ্চযিকো. সো তং উপসঙ্কমিত্ৰা এৰং ৰদেয্য – ‘যগ্ঘে, মহারাজ, জানেয্যাসি, অহং আগচ্ছামি পুরত্থিমায দিসায. তত্থদ্দসং মহন্তং পব্বতং অব্ভসমং সব্বে পাণে নিপ্পোথেন্তো আগচ্ছতি. যং তে, মহারাজ, করণীযং, তং করোহী’তি. অথ দুতিযো পুরিসো আগচ্ছেয্য পচ্ছিমায দিসায…পে… অথ ততিযো পুরিসো আগচ্ছেয্য উত্তরায দিসায…পে… অথ চতুত্থো পুরিসো আগচ্ছেয্য দক্খিণায দিসায সদ্ধাযিকো পচ্চযিকো. সো তং উপসঙ্কমিত্ৰা এৰং ৰদেয্য – ‘যগ্ঘে মহারাজ, জানেয্যাসি, অহং আগচ্ছামি দক্খিণায দিসায. তত্থদ্দসং মহন্তং পব্বতং অব্ভসমং সব্বে পাণে নিপ্পোথেন্তো আগচ্ছতি. যং তে, মহারাজ, করণীযং তং করোহী’তি. এৰরূপে তে, মহারাজ, মহতি মহব্ভযে সমুপ্পন্নে দারুণে মনুস্সক্খযে [মনুস্সকাযে (ক.)] দুল্লভে মনুস্সত্তে কিমস্স করণীয’’ন্তি?

‘‘এৰরূপে মে, ভন্তে, মহতি মহব্ভযে সমুপ্পন্নে দারুণে মনুস্সক্খযে দুল্লভে মনুস্সত্তে কিমস্স করণীযং অঞ্ঞত্র ধম্মচরিযায অঞ্ঞত্র সমচরিযায অঞ্ঞত্র কুসলকিরিযায অঞ্ঞত্র পুঞ্ঞকিরিযাযা’’তি?

‘‘আরোচেমি খো তে, মহারাজ, পটিৰেদেমি খো তে, মহারাজ, অধিৰত্ততি খো তং, মহারাজ, জরামরণং. অধিৰত্তমানে চে তে, মহারাজ, জরামরণে কিমস্স করণীয’’ন্তি? ‘‘অধিৰত্তমানে চ মে, ভন্তে, জরামরণে কিমস্স করণীযং অঞ্ঞত্র ধম্মচরিযায সমচরিযায কুসলকিরিযায পুঞ্ঞকিরিযায? যানি তানি, ভন্তে, রঞ্ঞং খত্তিযানং মুদ্ধাৰসিত্তানং ইস্সরিযমদমত্তানং কামগেধপরিযুট্ঠিতানং জনপদত্থাৰরিযপ্পত্তানং মহন্তং পথৰিমণ্ডলং অভিৰিজিয অজ্ঝাৰসন্তানং হত্থিযুদ্ধানি ভৰন্তি; তেসম্পি, ভন্তে, হত্থিযুদ্ধানং নত্থি গতি নত্থি ৰিসযো অধিৰত্তমানে জরামরণে. যানিপি তানি, ভন্তে, রঞ্ঞং খত্তিযানং মুদ্ধাৰসিত্তানং…পে… অজ্ঝাৰসন্তানং অস্সযুদ্ধানি ভৰন্তি…পে… রথযুদ্ধানি ভৰন্তি …পে… পত্তিযুদ্ধানি ভৰন্তি; তেসম্পি, ভন্তে, পত্তিযুদ্ধানং নত্থি গতি নত্থি ৰিসযো অধিৰত্তমানে জরামরণে. সন্তি খো পন, ভন্তে, ইমস্মিং রাজকুলে মন্তিনো মহামত্তা, যে পহোন্তি [যেসং হোন্তি (ক.)] আগতে পচ্চত্থিকে মন্তেহি ভেদযিতুং. তেসম্পি, ভন্তে, মন্তযুদ্ধানং নত্থি গতি নত্থি ৰিসযো অধিৰত্তমানে জরামরণে. সংৰিজ্জতি খো পন, ভন্তে, ইমস্মিং রাজকুলে পহূতং হিরঞ্ঞসুৰণ্ণং ভূমিগতঞ্চেৰ ৰেহাসট্ঠঞ্চ, যেন মযং পহোম আগতে পচ্চত্থিকে ধনেন উপলাপেতুং. তেসম্পি, ভন্তে, ধনযুদ্ধানং নত্থি গতি নত্থি ৰিসযো অধিৰত্তমানে জরামরণে. অধিৰত্তমানে চ মে, ভন্তে, জরামরণে কিমস্স করণীযং অঞ্ঞত্র ধম্মচরিযায সমচরিযায কুসলকিরিযায পুঞ্ঞকিরিযাযা’’তি?

‘‘এৰমেতং, মহারাজ, এৰমেতং, মহারাজ! অধিৰত্তমানে জরামরণে কিমস্স করণীযং অঞ্ঞত্র ধম্মচরিযায সমচরিযায কুসলকিরিযায পুঞ্ঞকিরিযাযা’’তি? ইদমৰোচ ভগৰা…পে… সত্থা –

‘‘যথাপি সেলা ৰিপুলা, নভং আহচ্চ পব্বতা;

সমন্তানুপরিযাযেয্যুং, নিপ্পোথেন্তো চতুদ্দিসা.

‘‘এৰং জরা চ মচ্চু চ, অধিৰত্তন্তি পাণিনে [পাণিনো (সী. স্যা. কং. পী.)];

খত্তিযে ব্রাহ্মণে ৰেস্সে, সুদ্দে চণ্ডালপুক্কুসে;

ন কিঞ্চি [ন কঞ্চি (?)] পরিৰজ্জেতি, সব্বমেৰাভিমদ্দতি.

‘‘ন তত্থ হত্থীনং ভূমি, ন রথানং ন পত্তিযা;

ন চাপি মন্তযুদ্ধেন, সক্কা জেতুং ধনেন ৰা.

‘‘তস্মা হি পণ্ডিতো পোসো, সম্পস্সং অত্থমত্তনো;

বুদ্ধে ধম্মে চ সঙ্ঘে চ, ধীরো সদ্ধং নিৰেসযে.

‘‘যো ধম্মং চরি [ধম্মচারী (সী. স্যা. কং. পী.)] কাযেন, ৰাচায উদ চেতসা;

ইধেৰ নং পসংসন্তি, পেচ্চ সগ্গে পমোদতী’’তি.

ততিযো ৰগ্গো.

তস্সুদ্দানং –

পুগ্গলো অয্যিকা লোকো, ইস্সত্তং [ইস্সত্থং (সী. স্যা. কং.)] পব্বতূপমা;

দেসিতং বুদ্ধসেট্ঠেন, ইমং কোসলপঞ্চকন্তি.

কোসলসংযুত্তং সমত্তং.