১. পঠমৰগ্গো

১. দহরসুত্তং

১১২. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ভৰম্পি নো গোতমো অনুত্তরং সম্মাসম্বোধিং অভিসম্বুদ্ধোতি পটিজানাতী’’তি? ‘‘যঞ্হি তং, মহারাজ, সম্মা ৰদমানো ৰদেয্য ‘অনুত্তরং সম্মাসম্বোধিং অভিসম্বুদ্ধো’তি, মমেৰ [মমং (সব্বত্থ)] তং সম্মা ৰদমানো ৰদেয্য. অহঞ্হি, মহারাজ, অনুত্তরং সম্মাসম্বোধিং অভিসম্বুদ্ধো’’তি.

‘‘যেপি তে, ভো গোতম, সমণব্রাহ্মণা সঙ্ঘিনো গণিনো গণাচরিযা ঞাতা যসস্সিনো তিত্থকরা সাধুসম্মতা বহুজনস্স, সেয্যথিদং – পূরণো কস্সপো, মক্খলি গোসালো, নিগণ্ঠো নাটপুত্তো, সঞ্চযো বেলট্ঠপুত্তো, পকুধো কচ্চাযনো, অজিতো কেসকম্বলো; তেপি মযা ‘অনুত্তরং সম্মাসম্বোধিং অভিসম্বুদ্ধোতি পটিজানাথা’তি পুট্ঠা সমানা অনুত্তরং সম্মাসম্বোধিং অভিসম্বুদ্ধোতি ন পটিজানন্তি. কিং পন ভৰং গোতমো দহরো চেৰ জাতিযা নৰো চ পব্বজ্জাযা’’তি?

‘‘চত্তারো খো মে, মহারাজ, দহরাতি ন উঞ্ঞাতব্বা, দহরাতি ন পরিভোতব্বা. কতমে চত্তারো? খত্তিযো খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো. উরগো খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো. অগ্গি খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো. ভিক্খু, খো, মহারাজ, দহরোতি ন উঞ্ঞাতব্বো, দহরোতি ন পরিভোতব্বো. ইমে খো, মহারাজ, চত্তারো দহরাতি ন উঞ্ঞাতব্বা, দহরাতি ন পরিভোতব্বা’’তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘খত্তিযং জাতিসম্পন্নং, অভিজাতং যসস্সিনং;

দহরোতি নাৰজানেয্য, ন নং পরিভৰে নরো.

‘‘ঠানঞ্হি সো মনুজিন্দো, রজ্জং লদ্ধান খত্তিযো;

সো কুদ্ধো রাজদণ্ডেন, তস্মিং পক্কমতে ভুসং;

তস্মা তং পরিৰজ্জেয্য, রক্খং জীৰিতমত্তনো.

‘‘গামে ৰা যদি ৰা রঞ্ঞে, যত্থ পস্সে ভুজঙ্গমং;

দহরোতি নাৰজানেয্য, ন নং পরিভৰে নরো.

‘‘উচ্চাৰচেহি ৰণ্ণেহি, উরগো চরতি তেজসী [তেজসা (সী. ক.), তেজসি (পী. ক.)];

সো আসজ্জ ডংসে বালং, নরং নারিঞ্চ একদা;

তস্মা তং পরিৰজ্জেয্য, রক্খং জীৰিতমত্তনো.

‘‘পহূতভক্খং জালিনং, পাৰকং কণ্হৰত্তনিং;

দহরোতি নাৰজানেয্য, ন নং পরিভৰে নরো.

‘‘লদ্ধা হি সো উপাদানং, মহা হুত্ৰান পাৰকো;

সো আসজ্জ ডহে [দহে] বালং, নরং নারিঞ্চ একদা;

তস্মা তং পরিৰজ্জেয্য, রক্খং জীৰিতমত্তনো.

‘‘ৰনং যদগ্গি ডহতি [দহতি (ক.)], পাৰকো কণ্হৰত্তনী;

জাযন্তি তত্থ পারোহা, অহোরত্তানমচ্চযে.

‘‘যঞ্চ খো সীলসম্পন্নো, ভিক্খু ডহতি তেজসা;

ন তস্স পুত্তা পসৰো, দাযাদা ৰিন্দরে ধনং;

অনপচ্চা অদাযাদা, তালাৰত্থূ ভৰন্তি তে.

‘‘তস্মা হি পণ্ডিতো পোসো, সম্পস্সং অত্থমত্তনো;

ভুজঙ্গমং পাৰকঞ্চ, খত্তিযঞ্চ যসস্সিনং;

ভিক্খুঞ্চ সীলসম্পন্নং, সম্মদেৰ সমাচরে’’তি.

এৰং ৰুত্তে, রাজা পসেনদি কোসলো ভগৰন্তং এতদৰোচ – ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি ভন্তে, নিক্কুজ্জিতং [নিকুজ্জিতং (?)] ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং ভগৰতা অনেকপরিযাযেন ধম্মো পকাসিতো. এসাহং, ভন্তে, ভগৰন্তং সরণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং, ভন্তে, ভগৰা ধারেতু অজ্জতগ্গে পাণুপেতং সরণং গত’’ন্তি.

২. পুরিসসুত্তং

১১৩. সাৰত্থিনিদানং. অথ খো রাজা পসেনদি কোসলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘কতি নু খো, ভন্তে, পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারাযা’’তি?

‘‘তযো খো, মহারাজ, পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারায. কতমে তযো? লোভো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায. দোসো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায. মোহো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায. ইমে খো, মহারাজ, তযো পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারাযা’’তি. ইদমৰোচ…পে…

‘‘লোভো দোসো চ মোহো চ, পুরিসং পাপচেতসং;

হিংসন্তি অত্তসম্ভূতা, তচসারংৰ সম্ফল’’ন্তি [সপ্ফলন্তি (স্যা. কং.)].

৩. জরামরণসুত্তং

১১৪. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘অত্থি নু খো, ভন্তে, জাতস্স অঞ্ঞত্র জরামরণা’’তি? ‘‘নত্থি খো, মহারাজ, জাতস্স অঞ্ঞত্র জরামরণা. যেপি তে, মহারাজ, খত্তিযমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা, তেসম্পি জাতানং নত্থি অঞ্ঞত্র জরামরণা. যেপি তে, মহারাজ, ব্রাহ্মণমহাসালা…পে… গহপতিমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা, তেসম্পি জাতানং নত্থি অঞ্ঞত্র জরামরণা. যেপি তে, মহারাজ, ভিক্খূ অরহন্তো খীণাসৰা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসংযোজনা সম্মদঞ্ঞাৰিমুত্তা, তেসং পাযং কাযো ভেদনধম্মো নিক্খেপনধম্মো’’তি. ইদমৰোচ…পে…

‘‘জীরন্তি ৰে রাজরথা সুচিত্তা,

অথো সরীরম্পি জরং উপেতি;

সতঞ্চ ধম্মো ন জরং উপেতি,

সন্তো হৰে সব্ভি পৰেদযন্তী’’তি.

৪. পিযসুত্তং

১১৫. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘কেসং নু খো পিযো অত্তা, কেসং অপ্পিযো অত্তা’তি? তস্স ময্হং, ভন্তে, এতদহোসি – ‘যে চ খো কেচি কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অপ্পিযো অত্তা’. কিঞ্চাপি তে এৰং ৰদেয্যুং – ‘পিযো নো অত্তা’তি, অথ খো তেসং অপ্পিযো অত্তা. তং কিস্স হেতু? যঞ্হি অপ্পিযো অপ্পিযস্স করেয্য, তং তে অত্তনাৰ অত্তনো করোন্তি; তস্মা তেসং অপ্পিযো অত্তা. যে চ খো কেচি কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং পিযো অত্তা. কিঞ্চাপি তে এৰং ৰদেয্যুং – ‘অপ্পিযো নো অত্তা’তি; অথ খো তেসং পিযো অত্তা. তং কিস্স হেতু? যঞ্হি পিযো পিযস্স করেয্য, তং তে অত্তনাৰ অত্তনো করোন্তি; তস্মা তেসং পিযো অত্তা’’তি.

‘‘এৰমেতং, মহারাজ, এৰমেতং, মহারাজ! যে হি কেচি, মহারাজ, কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অপ্পিযো অত্তা. কিঞ্চাপি তে এৰং ৰদেয্যুং – ‘পিযো নো অত্তা’তি, অথ খো তেসং অপ্পিযো অত্তা. তং কিস্স হেতু? যঞ্হি, মহারাজ, অপ্পিযো অপ্পিযস্স করেয্য, তং তে অত্তনাৰ অত্তনো করোন্তি; তস্মা তেসং অপ্পিযো অত্তা. যে চ খো কেচি, মহারাজ, কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং পিযো অত্তা. কিঞ্চাপি তে এৰং ৰদেয্যুং – ‘অপ্পিযো নো অত্তা’তি; অথ খো তেসং পিযো অত্তা. তং কিস্স হেতু? যঞ্হি মহারাজ, পিযো পিযস্স করেয্য, তং তে অত্তনাৰ অত্তনো করোন্তি; তস্মা তেসং পিযো অত্তা’’তি. ইদমৰোচ…পে…

‘‘অত্তানঞ্চে পিযং জঞ্ঞা, ন নং পাপেন সংযুজে;

ন হি তং সুলভং হোতি, সুখং দুক্কটকারিনা.

‘‘অন্তকেনাধিপন্নস্স, জহতো মানুসং ভৰং;

কিঞ্হি তস্স সকং হোতি, কিঞ্চ আদায গচ্ছতি;

কিঞ্চস্স অনুগং হোতি, ছাযাৰ অনপাযিনী [অনুপাযিনী (স্যা. কং. ক.)].

‘‘উভো পুঞ্ঞঞ্চ পাপঞ্চ, যং মচ্চো কুরুতে ইধ;

তঞ্হি তস্স সকং হোতি, তঞ্চ [তংৰ (?)] আদায গচ্ছতি;

তঞ্চস্স [তংৰস্স (?)] অনুগং হোতি, ছাযাৰ অনপাযিনী.

‘‘তস্মা করেয্য কল্যাণং, নিচযং সম্পরাযিকং;

পুঞ্ঞানি পরলোকস্মিং, পতিট্ঠা হোন্তি পাণিন’’ন্তি.

৫. অত্তরক্খিতসুত্তং

১১৬. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘কেসং নু খো রক্খিতো অত্তা, কেসং অরক্খিতো অত্তা’তি? তস্স ময্হং, ভন্তে, এতদহোসি – ‘যে খো কেচি কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অরক্খিতো অত্তা. কিঞ্চাপি তে হত্থিকাযো ৰা রক্খেয্য, অস্সকাযো ৰা রক্খেয্য, রথকাযো ৰা রক্খেয্য, পত্তিকাযো ৰা রক্খেয্য; অথ খো তেসং অরক্খিতো অত্তা. তং কিস্স হেতু? বাহিরা হেসা রক্খা, নেসা রক্খা অজ্ঝত্তিকা; তস্মা তেসং অরক্খিতো অত্তা. যে চ খো কেচি কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং রক্খিতো অত্তা. কিঞ্চাপি তে নেৰ হত্থিকাযো রক্খেয্য, ন অস্সকাযো রক্খেয্য, ন রথকাযো রক্খেয্য, ন পত্তিকাযো রক্খেয্য; অথ খো তেসং রক্খিতো অত্তা. তং কিস্স হেতু? অজ্ঝত্তিকা হেসা রক্খা, নেসা রক্খা বাহিরা; তস্মা তেসং রক্খিতো অত্তা’’’তি.

‘‘এৰমেতং, মহারাজ, এৰমেতং, মহারাজ! যে হি কেচি, মহারাজ, কাযেন দুচ্চরিতং চরন্তি…পে… তেসং অরক্খিতো অত্তা. তং কিস্স হেতু? বাহিরা হেসা, মহারাজ, রক্খা, নেসা রক্খা অজ্ঝত্তিকা; তস্মা তেসং অরক্খিতো অত্তা. যে চ খো কেচি, মহারাজ, কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং রক্খিতো অত্তা. কিঞ্চাপি তে নেৰ হত্থিকাযো রক্খেয্য, ন অস্সকাযো রক্খেয্য, ন রথকাযো রক্খেয্য, ন পত্তিকাযো রক্খেয্য; অথ খো তেসং রক্খিতো অত্তা. তং কিস্স হেতু? অজ্ঝত্তিকা হেসা, মহারাজ, রক্খা, নেসা রক্খা বাহিরা; তস্মা তেসং রক্খিতো অত্তা’’তি. ইদমৰোচ…পে…

‘‘কাযেন সংৰরো সাধু, সাধু ৰাচায সংৰরো;

মনসা সংৰরো সাধু, সাধু সব্বত্থ সংৰরো;

সব্বত্থ সংৰুতো লজ্জী, রক্খিতোতি পৰুচ্চতী’’তি.

৬. অপ্পকসুত্তং

১১৭. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘অপ্পকা তে সত্তা লোকস্মিং যে উল়ারে উল়ারে ভোগে লভিত্ৰা ন চেৰ মজ্জন্তি, ন চ পমজ্জন্তি, ন চ কামেসু গেধং আপজ্জন্তি, ন চ সত্তেসু ৰিপ্পটিপজ্জন্তি. অথ খো এতেৰ বহুতরা সত্তা লোকস্মিং যে উল়ারে উল়ারে ভোগে লভিত্ৰা মজ্জন্তি চেৰ পমজ্জন্তি, চ কামেসু চ গেধং আপজ্জন্তি, সত্তেসু চ ৰিপ্পটিপজ্জন্তী’’’তি.

‘‘এৰমেতং, মহারাজ, এৰমেতং, মহারাজ! অপ্পকা তে, মহারাজ, সত্তা লোকস্মিং, যে উল়ারে উল়ারে ভোগে লভিত্ৰা ন চেৰ মজ্জন্তি, ন চ পমজ্জন্তি, ন চ কামেসু গেধং আপজ্জন্তি, ন চ সত্তেসু ৰিপ্পটিপজ্জন্তি. অথ খো এতেৰ বহুতরা সত্তা লোকস্মিং, যে উল়ারে উল়ারে ভোগে লভিত্ৰা মজ্জন্তি চেৰ পমজ্জন্তি চ কামেসু চ গেধং আপজ্জন্তি, সত্তেসু চ ৰিপ্পটিপজ্জন্তী’’তি. ইদমৰোচ…পে…

‘‘সারত্তা কামভোগেসু, গিদ্ধা কামেসু মুচ্ছিতা;

অতিসারং ন বুজ্ঝন্তি, মিগা কূটংৰ ওড্ডিতং;

পচ্ছাসং কটুকং হোতি, ৰিপাকো হিস্স পাপকো’’তি.

৭. অড্ডকরণসুত্তং

১১৮. সাৰত্থিনিদানং. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধাহং, ভন্তে, অড্ডকরণে [অত্থকরণে (সী. স্যা. কং. পী.)] নিসিন্নো পস্সামি খত্তিযমহাসালেপি ব্রাহ্মণমহাসালেপি গহপতিমহাসালেপি অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে কামহেতু কামনিদানং কামাধিকরণং সম্পজানমুসা ভাসন্তে. তস্স ময্হং, ভন্তে, এতদহোসি – ‘অলং দানি মে অড্ডকরণেন, ভদ্রমুখো দানি অড্ডকরণেন পঞ্ঞাযিস্সতী’’’তি.

‘‘(এৰমেতং, মহারাজ, এৰমেতং মহারাজ!) [( ) সী. পী. পোত্থকেসু নত্থি] যেপি তে, মহারাজ, খত্তিযমহাসালা ব্রাহ্মণমহাসালা গহপতিমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা কামহেতু কামনিদানং কামাধিকরণং সম্পজানমুসা ভাসন্তি; তেসং তং ভৰিস্সতি দীঘরত্তং অহিতায দুক্খাযা’’তি. ইদমৰোচ…পে…

‘‘সারত্তা কামভোগেসু, গিদ্ধা কামেসু মুচ্ছিতা;

অতিসারং ন বুজ্ঝন্তি, মচ্ছা খিপ্পংৰ ওড্ডিতং;

পচ্ছাসং কটুকং হোতি, ৰিপাকো হিস্স পাপকো’’তি.

৮. মল্লিকাসুত্তং

১১৯. সাৰত্থিনিদানং. তেন খো পন সমযেন রাজা পসেনদি কোসলো মল্লিকায দেৰিযা সদ্ধিং উপরিপাসাদৰরগতো হোতি. অথ খো রাজা পসেনদি কোসলো মল্লিকং দেৰিং এতদৰোচ – ‘‘অত্থি নু খো তে, মল্লিকে, কোচঞ্ঞো অত্তনা পিযতরো’’তি? ‘‘নত্থি খো মে, মহারাজ, কোচঞ্ঞো অত্তনা পিযতরো. তুয্হং পন, মহারাজ, অত্থঞ্ঞো কোচি অত্তনা পিযতরো’’তি? ‘‘ময্হম্পি খো, মল্লিকে, নত্থঞ্ঞো কোচি অত্তনা পিযতরো’’তি.

অথ খো রাজা পসেনদি কোসলো পাসাদা ওরোহিত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধাহং, ভন্তে, মল্লিকায দেৰিযা সদ্ধিং উপরিপাসাদৰরগতো মল্লিকং দেৰিং এতদৰোচং – ‘অত্থি নু খো তে, মল্লিকে, কোচঞ্ঞো অত্তনা পিযতরো’তি? এৰং ৰুত্তে, ভন্তে, মল্লিকা দেৰী মং এতদৰোচ – ‘নত্থি খো মে, মহারাজ, কোচঞ্ঞো অত্তনা পিযতরো. তুয্হং পন, মহারাজ, অত্থঞ্ঞো কোচি অত্তনা পিযতরো’তি? এৰং ৰুত্তাহং, ভন্তে, মল্লিকং দেৰিং এতদৰোচং – ‘ময্হম্পি খো, মল্লিকে, নত্থঞ্ঞো কোচি অত্তনা পিযতরো’’তি.

অথ খো ভগৰা এতমত্থং ৰিদিত্ৰা তাযং ৰেলাযং ইমং গাথং অভাসি –

‘‘সব্বা দিসা অনুপরিগম্ম চেতসা,

নেৰজ্ঝগা পিযতরমত্তনা ক্ৰচি;

এৰং পিযো পুথু অত্তা পরেসং,

তস্মা ন হিংসে পরমত্তকামো’’তি.

৯. যঞ্ঞসুত্তং

১২০. সাৰত্থিনিদানং. তেন খো পন সমযেন রঞ্ঞো পসেনদিস্স কোসলস্স মহাযঞ্ঞো পচ্চুপট্ঠিতো হোতি, পঞ্চ চ উসভসতানি পঞ্চ চ ৰচ্ছতরসতানি পঞ্চ চ ৰচ্ছতরিসতানি পঞ্চ চ অজসতানি পঞ্চ চ উরব্ভসতানি থূণূপনীতানি হোন্তি যঞ্ঞত্থায. যেপিস্স তে হোন্তি দাসাতি ৰা পেস্সাতি ৰা কম্মকরাতি ৰা, তেপি দণ্ডতজ্জিতা ভযতজ্জিতা অস্সুমুখা রুদমানা পরিকম্মানি করোন্তি.

অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিংসু. সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নো খো তে ভিক্খূ ভগৰন্তং এতদৰোচুং – ‘‘ইধ, ভন্তে, রঞ্ঞো পসেনদিস্স কোসলস্স মহাযঞ্ঞো পচ্চুপট্ঠিতো হোতি, পঞ্চ চ উসভসতানি পঞ্চ চ ৰচ্ছতরসতানি পঞ্চ চ ৰচ্ছতরিসতানি পঞ্চ চ অজসতানি পঞ্চ চ উরব্ভসতানি থূণূপনীতানি হোন্তি যঞ্ঞত্থায. যেপিস্স তে হোন্তি দাসাতি ৰা পেস্সাতি ৰা কম্মকরাতি ৰা, তেপি দণ্ডতজ্জিতা ভযতজ্জিতা অস্সুমুখা রুদমানা পরিকম্মানি করোন্তী’’তি.

অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –

‘‘অস্সমেধং পুরিসমেধং, সম্মাপাসং ৰাজপেয্যং নিরগ্গল়্হং;

মহাযঞ্ঞা মহারম্ভা [ৰাজপেয্যুং; নিরগ্গল়ং মহারম্ভা (ক.)], ন তে হোন্তি মহপ্ফলা.

‘‘অজেল়কা চ গাৰো চ, ৰিৰিধা যত্থ হঞ্ঞরে;

ন তং সম্মগ্গতা যঞ্ঞং, উপযন্তি মহেসিনো.

‘‘যে চ যঞ্ঞা নিরারম্ভা, যজন্তি অনুকুলং সদা;

অজেল়কা চ গাৰো চ, ৰিৰিধা নেত্থ হঞ্ঞরে;

এতং সম্মগ্গতা যঞ্ঞং, উপযন্তি মহেসিনো.

‘‘এতং যজেথ মেধাৰী, এসো যঞ্ঞো মহপ্ফলো;

এতঞ্হি যজমানস্স, সেয্যো হোতি ন পাপিযো;

যঞ্ঞো চ ৰিপুলো হোতি, পসীদন্তি চ দেৰতা’’তি.

১০. বন্ধনসুত্তং

১২১. তেন খো পন সমযেন রঞ্ঞা পসেনদিনা কোসলেন মহাজনকাযো বন্ধাপিতো হোতি, অপ্পেকচ্চে রজ্জূহি অপ্পেকচ্চে অন্দূহি অপ্পেকচ্চে সঙ্খলিকাহি.

অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –

‘‘ন তং দল়্হং বন্ধনমাহু ধীরা,

যদাযসং দারুজং পব্বজঞ্চ;

সারত্তরত্তা মণিকুণ্ডলেসু,

পুত্তেসু দারেসু চ যা অপেক্খা.

‘‘এতং দল়্হং বন্ধনমাহু ধীরা,

ওহারিনং সিথিলং দুপ্পমুঞ্চং;

এতম্পি ছেত্ৰান পরিব্বজন্তি,

অনপেক্খিনো কামসুখং পহাযা’’তি.

পঠমো ৰগ্গো.

তস্সুদ্দানং –

দহরো পুরিসো জরা, পিযং অত্তানরক্খিতো;

অপ্পকা অড্ডকরণং, মল্লিকা যঞ্ঞবন্ধনন্তি.