৩. সম্বরিমাযাসুত্তং

২৬৯. সাৰত্থিযং…পে… ভগৰা এতদৰোচ – ‘‘ভূতপুব্বং, ভিক্খৰে, ৰেপচিত্তি অসুরিন্দো আবাধিকো অহোসি দুক্খিতো বাল়্হগিলানো. অথ খো ভিক্খৰে, সক্কো দেৰানমিন্দো যেন ৰেপচিত্তি অসুরিন্দো তেনুপসঙ্কমি গিলানপুচ্ছকো. অদ্দসা খো, ভিক্খৰে, ৰেপচিত্তি অসুরিন্দো সক্কং দেৰানমিন্দং দূরতোৰ আগচ্ছন্তং. দিস্ৰান সক্কং দেৰানমিন্দং এতদৰোচ – ‘তিকিচ্ছ মং দেৰানমিন্দা’তি. ‘ৰাচেহি মং, ৰেপচিত্তি, সম্বরিমায’ন্তি. ‘ন তাৰাহং ৰাচেমি, যাৰাহং, মারিস, অসুরে পটিপুচ্ছামী’’’তি. ‘‘অথ খো, ভিক্খৰে, ৰেপচিত্তি অসুরিন্দো অসুরে পটিপুচ্ছি – ‘ৰাচেমহং, মারিসা, সক্কং দেৰানমিন্দং সম্বরিমায’ন্তি? ‘মা খো ত্ৰং, মারিস, ৰাচেসি সক্কং দেৰানমিন্দং সম্বরিমায’’’ন্তি. অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং গাথায অজ্ঝভাসি –

‘‘মাযাৰী মঘৰা সক্ক, দেৰরাজ সুজম্পতি;

উপেতি নিরযং ঘোরং, সম্বরোৰ সতং সম’’ন্তি.