১. ৰতপদসুত্তং

২৫৭. সাৰত্থিযং. ‘‘সক্কস্স, ভিক্খৰে, দেৰানমিন্দস্স পুব্বে মনুস্সভূতস্স সত্ত ৰতপদানি [ৰত্তপদানি (ক.)] সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৰতপদানি? যাৰজীৰং মাতাপেত্তিভরো অস্সং, যাৰজীৰং কুলে জেট্ঠাপচাযী অস্সং, যাৰজীৰং সণ্হৰাচো অস্সং, যাৰজীৰং অপিসুণৰাচো অস্সং, যাৰজীৰং ৰিগতমলমচ্ছেরেন চেতসা অগারং অজ্ঝাৰসেয্যং মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো, যাৰজীৰং সচ্চৰাচো অস্সং, যাৰজীৰং অক্কোধনো অস্সং – সচেপি মে কোধো উপ্পজ্জেয্য, খিপ্পমেৰ নং পটিৰিনেয্য’’ন্তি. ‘‘সক্কস্স, ভিক্খৰে, দেৰানমিন্দস্স পুব্বে মনুস্সভূতস্স ইমানি সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভরং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেরৰিনযে যুত্তং, সচ্চং কোধাভিভুং নরং;

তং ৰে দেৰা তাৰতিংসা, আহু সপ্পুরিসো ইতী’’তি.