৮. সকলিকসুত্তং

৩৮. এৰং মে সুতং – একং সমযং ভগৰা রাজগহে ৰিহরতি মদ্দকুচ্ছিস্মিং মিগদাযে. তেন খো পন সমযেন ভগৰতো পাদো সকলিকায [সক্খলিকায (ক.)] খতো হোতি. ভুসা সুদং ভগৰতো ৰেদনা ৰত্তন্তি সারীরিকা ৰেদনা দুক্খা তিব্বা [তিপ্পা (সী. স্যা. কং. পী.)] খরা কটুকা অসাতা অমনাপা; তা সুদং ভগৰা সতো সম্পজানো অধিৰাসেতি অৰিহঞ্ঞমানো. অথ খো ভগৰা চতুগ্গুণং সঙ্ঘাটিং পঞ্ঞাপেত্ৰা দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো.

অথ খো সত্তসতা সতুল্লপকাযিকা দেৰতাযো অভিক্কন্তায রত্তিযা অভিক্কন্তৰণ্ণা কেৰলকপ্পং মদ্দকুচ্ছিং ওভাসেত্ৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠংসু. একমন্তং ঠিতা খো একা দেৰতা ভগৰতো সন্তিকে ইমং উদানং উদানেসি – ‘‘নাগো ৰত, ভো, সমণো গোতমো; নাগৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘সীহো ৰত, ভো, সমণো গোতমো; সীহৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘আজানীযো ৰত, ভো, সমণো গোতমো; আজানীযৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘নিসভো ৰত, ভো, সমণো গোতমো; নিসভৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘ধোরয্হো ৰত, ভো, সমণো গোতমো; ধোরয্হৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘দন্তো ৰত, ভো, সমণো গোতমো; দন্তৰতা চ সমুপ্পন্না সারীরিকা ৰেদনা দুক্খা তিব্বা খরা কটুকা অসাতা অমনাপা সতো সম্পজানো অধিৰাসেতি অৰিহঞ্ঞমানো’’তি.

অথ খো অপরা দেৰতা ভগৰতো সন্তিকে ইমং উদানং উদানেসি – ‘‘পস্স সমাধিং সুভাৰিতং চিত্তঞ্চ সুৰিমুত্তং, ন চাভিনতং ন চাপনতং ন চ সসঙ্খারনিগ্গয্হৰারিতগতং [সসঙ্খারনিগ্গয্হৰারিতৰতং (সী. স্যা. কং. পী.), সসঙ্খারনিগ্গয্হৰারিৰাৰতং (ক.)]. যো এৰরূপং পুরিসনাগং পুরিসসীহং পুরিসআজানীযং পুরিসনিসভং পুরিসধোরয্হং পুরিসদন্তং অতিক্কমিতব্বং মঞ্ঞেয্য কিমঞ্ঞত্র অদস্সনা’’তি.

‘‘পঞ্চৰেদা সতং সমং, তপস্সী ব্রাহ্মণা চরং;

চিত্তঞ্চ নেসং ন সম্মা ৰিমুত্তং, হীনত্থরূপা ন পারঙ্গমা তে.

‘‘তণ্হাধিপন্না ৰতসীলবদ্ধা, লূখং তপং ৰস্সসতং চরন্তা;

চিত্তঞ্চ নেসং ন সম্মা ৰিমুত্তং, হীনত্থরূপা ন পারঙ্গমা তে.

‘‘ন মানকামস্স দমো ইধত্থি, ন মোনমত্থি অসমাহিতস্স;

একো অরঞ্ঞে ৰিহরং পমত্তো, ন মচ্চুধেয্যস্স তরেয্য পার’’ন্তি.

‘‘মানং পহায সুসমাহিতত্তো, সুচেতসো সব্বধি ৰিপ্পমুত্তো;

একো অরঞ্ঞে ৰিহরমপ্পমত্তো, স মচ্চুধেয্যস্স তরেয্য পার’’ন্তি.