৫. অরহন্তসুত্তং

২৫. ‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

অহং ৰদামীতিপি সো ৰদেয্য,

মমং ৰদন্তীতিপি সো ৰদেয্যা’’তি.

‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

অহং ৰদামীতিপি সো ৰদেয্য,

মমং ৰদন্তীতিপি সো ৰদেয্য;

লোকে সমঞ্ঞং কুসলো ৰিদিত্ৰা,

ৰোহারমত্তেন সো [স (?)] ৰোহরেয্যা’’তি.

‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

মানং নু খো সো উপগম্ম ভিক্খু,

অহং ৰদামীতিপি সো ৰদেয্য;

মমং ৰদন্তীতিপি সো ৰদেয্যা’’তি.

‘‘পহীনমানস্স ন সন্তি গন্থা,

ৰিধূপিতা মানগন্থস্স সব্বে;

স ৰীতিৰত্তো মঞ্ঞতং [মাননং (সী.), মঞ্ঞীতং (?)] সুমেধো,

অহং ৰদামীতিপি সো ৰদেয্য.

‘‘মমং ৰদন্তীতিপি সো ৰদেয্য;

লোকে সমঞ্ঞং কুসলো ৰিদিত্ৰা;

ৰোহারমত্তেন সো ৰোহরেয্যা’’তি.