৩. সত্তিৰগ্গো

১. সত্তিসুত্তং

২১. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘সত্তিযা ৰিয ওমট্ঠো, ডয্হমানোৰ [ডয্হমানেৰ (সব্বত্থ)] মত্থকে;

কামরাগপ্পহানায, সতো ভিক্খু পরিব্বজে’’তি.

‘‘সত্তিযা ৰিয ওমট্ঠো, ডয্হমানোৰ মত্থকে;

সক্কাযদিট্ঠিপ্পহানায, সতো ভিক্খু পরিব্বজে’’তি.

২. ফুসতিসুত্তং

২২. ‘‘নাফুসন্তং ফুসতি চ, ফুসন্তঞ্চ ততো ফুসে;

তস্মা ফুসন্তং ফুসতি, অপ্পদুট্ঠপদোসিন’’ন্তি.

‘‘যো অপ্পদুট্ঠস্স নরস্স দুস্সতি,

সুদ্ধস্স পোসস্স অনঙ্গণস্স;

তমেৰ বালং পচ্চেতি পাপং,

সুখুমো রজো পটিৰাতংৰ খিত্তো’’তি.

৩. জটাসুত্তং

২৩. ‘‘অন্তো জটা বহি জটা, জটায জটিতা পজা;

তং তং গোতম পুচ্ছামি, কো ইমং ৰিজটযে জট’’ন্তি.

‘‘সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰযং;

আতাপী নিপকো ভিক্খু, সো ইমং ৰিজটযে জটং.

‘‘যেসং রাগো চ দোসো চ, অৰিজ্জা চ ৰিরাজিতা;

খীণাসৰা অরহন্তো, তেসং ৰিজটিতা জটা.

‘‘যত্থ নামঞ্চ রূপঞ্চ, অসেসং উপরুজ্ঝতি;

পটিঘং রূপসঞ্ঞা চ, এত্থেসা ছিজ্জতে [ৰিজটে (ক.)] জটা’’তি.

৪. মনোনিৰারণসুত্তং

২৪. ‘‘যতো যতো মনো নিৰারযে,

ন দুক্খমেতি নং ততো ততো;

স সব্বতো মনো নিৰারযে,

স সব্বতো দুক্খা পমুচ্চতি’’.

‘‘ন সব্বতো মনো নিৰারযে,

ন মনো সংযতত্তমাগতং;

যতো যতো চ পাপকং,

ততো ততো মনো নিৰারযে’’তি.

৫. অরহন্তসুত্তং

২৫. ‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

অহং ৰদামীতিপি সো ৰদেয্য,

মমং ৰদন্তীতিপি সো ৰদেয্যা’’তি.

‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

অহং ৰদামীতিপি সো ৰদেয্য,

মমং ৰদন্তীতিপি সো ৰদেয্য;

লোকে সমঞ্ঞং কুসলো ৰিদিত্ৰা,

ৰোহারমত্তেন সো [স (?)] ৰোহরেয্যা’’তি.

‘‘যো হোতি ভিক্খু অরহং কতাৰী,

খীণাসৰো অন্তিমদেহধারী;

মানং নু খো সো উপগম্ম ভিক্খু,

অহং ৰদামীতিপি সো ৰদেয্য;

মমং ৰদন্তীতিপি সো ৰদেয্যা’’তি.

‘‘পহীনমানস্স ন সন্তি গন্থা,

ৰিধূপিতা মানগন্থস্স সব্বে;

স ৰীতিৰত্তো মঞ্ঞতং [মাননং (সী.), মঞ্ঞীতং (?)] সুমেধো,

অহং ৰদামীতিপি সো ৰদেয্য.

‘‘মমং ৰদন্তীতিপি সো ৰদেয্য;

লোকে সমঞ্ঞং কুসলো ৰিদিত্ৰা;

ৰোহারমত্তেন সো ৰোহরেয্যা’’তি.

৬. পজ্জোতসুত্তং

২৬. ‘‘কতি লোকস্মিং পজ্জোতা, যেহি লোকো পকাসতি [পভাসতি (ক. সী.)];

ভগৰন্তং [ভৰন্তং (ক.)] পুট্ঠুমাগম্ম, কথং জানেমু তং ময’’ন্তি.

‘‘চত্তারো লোকে পজ্জোতা, পঞ্চমেত্থ ন ৰিজ্জতি;

দিৰা তপতি আদিচ্চো, রত্তিমাভাতি চন্দিমা.

‘‘অথ অগ্গি দিৰারত্তিং, তত্থ তত্থ পকাসতি;

সম্বুদ্ধো তপতং সেট্ঠো, এসা আভা অনুত্তরা’’তি.

৭. সরসুত্তং

২৭. ‘‘কুতো সরা নিৰত্তন্তি, কত্থ ৰট্টং ন ৰত্ততি;

কত্থ নামঞ্চ রূপঞ্চ, অসেসং উপরুজ্ঝতী’’তি.

‘‘যত্থ আপো চ পথৰী, তেজো ৰাযো ন গাধতি;

অতো সরা নিৰত্তন্তি, এত্থ ৰট্টং ন ৰত্ততি;

এত্থ নামঞ্চ রূপঞ্চ, অসেসং উপরুজ্ঝতী’’তি.

৮. মহদ্ধনসুত্তং

২৮. ‘‘মহদ্ধনা মহাভোগা, রট্ঠৰন্তোপি খত্তিযা;

অঞ্ঞমঞ্ঞাভিগিজ্ঝন্তি, কামেসু অনলঙ্কতা.

‘‘তেসু উস্সুক্কজাতেসু, ভৰসোতানুসারিসু;

কেধ তণ্হং [রোধতণ্হং (স্যা. কং.), গেধতণ্হং (ক.)] পজহিংসু [পৰাহিংসু (স্যা. কং. ক.)], কে লোকস্মিং অনুস্সুকা’’তি.

‘‘হিত্ৰা অগারং পব্বজিতা, হিত্ৰা পুত্তং পসুং ৰিযং;

হিত্ৰা রাগঞ্চ দোসঞ্চ, অৰিজ্জঞ্চ ৰিরাজিয;

খীণাসৰা অরহন্তো, তে লোকস্মিং অনুস্সুকা’’তি.

৯. চতুচক্কসুত্তং

২৯. ‘‘চতুচক্কং নৰদ্ৰারং, পুণ্ণং লোভেন সংযুতং;

পঙ্কজাতং মহাৰীর, কথং যাত্রা ভৰিস্সতী’’তি.

‘‘ছেত্ৰা নদ্ধিং ৰরত্তঞ্চ, ইচ্ছা লোভঞ্চ পাপকং;

সমূলং তণ্হমব্বুয্হ, এৰং যাত্রা ভৰিস্সতী’’তি.

১০. এণিজঙ্ঘসুত্তং

৩০. ‘‘এণিজঙ্ঘং কিসং ৰীরং, অপ্পাহারং অলোলুপং;

সীহং ৰেকচরং নাগং, কামেসু অনপেক্খিনং;

উপসঙ্কম্ম পুচ্ছাম, কথং দুক্খা পমুচ্চতী’’তি.

‘‘পঞ্চ কামগুণা লোকে, মনোছট্ঠা পৰেদিতা;

এত্থ ছন্দং ৰিরাজেত্ৰা, এৰং দুক্খা পমুচ্চতী’’তি.

সত্তিৰগ্গো ততিযো.

তস্সুদ্দানং –

সত্তিযা ফুসতি চেৰ, জটা মনোনিৰারণা;

অরহন্তেন পজ্জোতো, সরা মহদ্ধনেন চ;

চতুচক্কেন নৰমং, এণিজঙ্ঘেন তে দসাতি.