৯. পিণ্ডপাতপারিসুদ্ধিসুত্তং

৪৩৮. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ –

‘‘ৰিপ্পসন্নানি খো তে, সারিপুত্ত, ইন্দ্রিযানি, পরিসুদ্ধো ছৰিৰণ্ণো পরিযোদাতো. কতমেন খো ত্ৰং, সারিপুত্ত, ৰিহারেন এতরহি বহুলং ৰিহরসী’’তি? ‘‘সুঞ্ঞতাৰিহারেন খো অহং, ভন্তে, এতরহি বহুলং ৰিহরামী’’তি. ‘‘সাধু, সাধু, সারিপুত্ত! মহাপুরিসৰিহারেন কির ত্ৰং, সারিপুত্ত, এতরহি বহুলং ৰিহরসি. মহাপুরিসৰিহারো এসো [হেস (সী. স্যা. কং. পী.)], সারিপুত্ত, যদিদং – সুঞ্ঞতা. তস্মাতিহ, সারিপুত্ত, ভিক্খু সচে আকঙ্খেয্য – ‘সুঞ্ঞতাৰিহারেন বহুলং [এতরহি বহুলং (সী. পী.)] ৰিহরেয্য’ন্তি, তেন, সারিপুত্ত, ভিক্খুনা ইতি পটিসঞ্চিক্খিতব্বং – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, অত্থি নু খো মে তত্থ চক্খুৰিঞ্ঞেয্যেসু রূপেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, অত্থি মে তত্থ চক্খুৰিঞ্ঞেয্যেসু রূপেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি, তেন, সারিপুত্ত, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, নত্থি মে তত্থ চক্খুৰিঞ্ঞেয্যেসু রূপেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৩৯. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, অত্থি নু খো মে তত্থ সোতৰিঞ্ঞেয্যেসু সদ্দেসু…পে… ঘানৰিঞ্ঞেয্যেসু গন্ধেসু… জিৰ্হাৰিঞ্ঞেয্যেসু রসেসু … কাযৰিঞ্ঞেয্যেসু ফোট্ঠব্বেসু… মনোৰিঞ্ঞেয্যেসু ধম্মেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, অত্থি মে তত্থ মনোৰিঞ্ঞেয্যেসু ধম্মেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি, তেন, সারিপুত্ত, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘যেন চাহং মগ্গেন গামং পিণ্ডায পাৰিসিং, যস্মিঞ্চ পদেসে পিণ্ডায অচরিং, যেন চ মগ্গেন গামতো পিণ্ডায পটিক্কমিং, নত্থি মে তত্থ মনোৰিঞ্ঞেয্যেসু ধম্মেসু ছন্দো ৰা রাগো ৰা দোসো ৰা মোহো ৰা পটিঘং ৰাপি চেতসো’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪০. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘পহীনা নু খো মে পঞ্চ কামগুণা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অপ্পহীনা খো মে পঞ্চ কামগুণা’তি, তেন, সারিপুত্ত, ভিক্খুনা পঞ্চন্নং কামগুণানং পহানায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘পহীনা খো মে পঞ্চ কামগুণা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪১. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘পহীনা নু খো মে পঞ্চ নীৰরণা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অপ্পহীনা খো মে পঞ্চ নীৰরণা’তি, তেন, সারিপুত্ত, ভিক্খুনা পঞ্চন্নং নীৰরণানং পহানায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘পহীনা খো মে পঞ্চ নীৰরণা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪২. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘পরিঞ্ঞাতা নু খো মে পঞ্চুপাদানক্খন্ধা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অপরিঞ্ঞাতা খো মে পঞ্চুপাদানক্খন্ধা’তি, তেন, সারিপুত্ত, ভিক্খুনা পঞ্চন্নং উপাদানক্খন্ধানং পরিঞ্ঞায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘পরিঞ্ঞাতা খো মে পঞ্চুপাদানক্খন্ধা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৩. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতা নু খো মে চত্তারো সতিপট্ঠানা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতা খো মে চত্তারো সতিপট্ঠানা’তি, তেন, সারিপুত্ত, ভিক্খুনা চতুন্নং সতিপট্ঠানানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতা খো মে চত্তারো সতিপট্ঠানা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৪. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতা নু খো মে চত্তারো সম্মপ্পধানা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতা খো মে চত্তারো সম্মপ্পধানা’তি, তেন, সারিপুত্ত, ভিক্খুনা চতুন্নং সম্মপ্পধানানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতা খো মে চত্তারো সম্মপ্পধানা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৫. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতা নু খো মে চত্তারো ইদ্ধিপাদা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতা খো মে চত্তারো ইদ্ধিপাদা’তি, তেন, সারিপুত্ত, ভিক্খুনা চতুন্নং ইদ্ধিপাদানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতা খো মে চত্তারো ইদ্ধিপাদা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৬. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতানি নু খো মে পঞ্চিন্দ্রিযানী’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতানি খো মে পঞ্চিন্দ্রিযানী’তি, তেন, সারিপুত্ত, ভিক্খুনা পঞ্চন্নং ইন্দ্রিযানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতানি খো মে পঞ্চিন্দ্রিযানী’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৭. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতানি নু খো মে পঞ্চ বলানী’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতানি খো মে পঞ্চ বলানী’তি, তেন, সারিপুত্ত, ভিক্খুনা পঞ্চন্নং বলানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতানি খো মে পঞ্চ বলানী’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৮. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতা নু খো মে সত্ত বোজ্ঝঙ্গা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতা খো মে সত্ত বোজ্ঝঙ্গা’তি, তেন, সারিপুত্ত, ভিক্খুনা সত্তন্নং বোজ্ঝঙ্গানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতা খো মে সত্ত বোজ্ঝঙ্গা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৪৯. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতো নু খো মে অরিযো অট্ঠঙ্গিকো মগ্গো’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতো খো মে অরিযো অট্ঠঙ্গিকো মগ্গো’তি, তেন, সারিপুত্ত, ভিক্খুনা অরিযস্স অট্ঠঙ্গিকস্স মগ্গস্স ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতো খো মে অরিযো অট্ঠঙ্গিকো মগ্গো’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৫০. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘ভাৰিতা নু খো মে সমথো চ ৰিপস্সনা চা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অভাৰিতা খো মে সমথো চ ৰিপস্সনা চা’তি, তেন, সারিপুত্ত, ভিক্খুনা সমথৰিপস্সনানং ভাৰনায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘ভাৰিতা খো মে সমথো চ ৰিপস্সনা চা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৫১. ‘‘পুন চপরং, সারিপুত্ত, ভিক্খুনা ইতি পটিসঞ্চিক্খিতব্বং – ‘সচ্ছিকতা নু খো মে ৰিজ্জা চ ৰিমুত্তি চা’তি? সচে, সারিপুত্ত, ভিক্খু পচ্চৰেক্খমানো এৰং জানাতি – ‘অসচ্ছিকতা খো মে ৰিজ্জা চ ৰিমুত্তি চা’তি, তেন, সারিপুত্ত, ভিক্খুনা ৰিজ্জায ৰিমুত্তিযা সচ্ছিকিরিযায ৰাযমিতব্বং. সচে পন, সারিপুত্ত, ভিক্খু পচ্চৰেক্খমানো এৰং জানাতি – ‘সচ্ছিকতা খো মে ৰিজ্জা চ ৰিমুত্তি চা’তি, তেন, সারিপুত্ত, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

৪৫২. ‘‘যে হি কেচি, সারিপুত্ত, অতীতমদ্ধানং সমণা ৰা ব্রাহ্মণা ৰা পিণ্ডপাতং পরিসোধেসুং, সব্বে তে এৰমেৰ পচ্চৰেক্খিত্ৰা পচ্চৰেক্খিত্ৰা পিণ্ডপাতং পরিসোধেসুং. যেপি হি কেচি, সারিপুত্ত, অনাগতমদ্ধানং সমণা ৰা ব্রাহ্মণা ৰা পিণ্ডপাতং পরিসোধেস্সন্তি, সব্বে তে এৰমেৰ পচ্চৰেক্খিত্ৰা পচ্চৰেক্খিত্ৰা পিণ্ডপাতং পরিসোধেস্সন্তি. যেপি হি কেচি, সারিপুত্ত, এতরহি সমণা ৰা ব্রাহ্মণা ৰা পিণ্ডপাতং পরিসোধেন্তি, সব্বে তে এৰমেৰ পচ্চৰেক্খিত্ৰা পচ্চৰেক্খিত্ৰা পিণ্ডপাতং পরিসোধেন্তি. তস্মাতিহ, সারিপুত্ত [ৰো সারিপুত্ত এৰং সিক্খিতব্বং (সী. পী.)], ‘পচ্চৰেক্খিত্ৰা পচ্চৰেক্খিত্ৰা পিণ্ডপাতং পরিসোধেস্সামা’তি – এৰঞ্হি ৰো, সারিপুত্ত, সিক্খিতব্ব’’ন্তি.

ইদমৰোচ ভগৰা. অত্তমনো আযস্মা সারিপুত্তো ভগৰতো ভাসিতং অভিনন্দীতি.

পিণ্ডপাতপারিসুদ্ধিসুত্তং নিট্ঠিতং নৰমং.