১০. ইন্দ্রিযভাৰনাসুত্তং

৪৫৩. এৰং মে সুতং – একং সমযং ভগৰা গজঙ্গলাযং [কজঙ্গলাযং (সী. পী.), কজ্জঙ্গলাযং (স্যা. কং.)] ৰিহরতি সুৰেল়ুৰনে [ৰেল়ুৰনে (স্যা. কং.), মুখেলুৰনে (সী. পী.)]. অথ খো উত্তরো মাণৰো পারাসিৰিযন্তেৰাসী [পারাসরিযন্তেৰাসী (সী. পী.), পারাসিরিযন্তেৰাসী (স্যা. কং.)] যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো উত্তরং মাণৰং পারাসিৰিযন্তেৰাসিং ভগৰা এতদৰোচ – ‘‘দেসেতি, উত্তর, পারাসিৰিযো ব্রাহ্মণো সাৰকানং ইন্দ্রিযভাৰন’’ন্তি? ‘‘দেসেতি, ভো গোতম, পারাসিৰিযো ব্রাহ্মণো সাৰকানং ইন্দ্রিযভাৰন’’ন্তি. ‘‘যথা কথং পন, উত্তর, দেসেতি পারাসিৰিযো ব্রাহ্মণো সাৰকানং ইন্দ্রিযভাৰন’’ন্তি? ‘‘ইধ, ভো গোতম, চক্খুনা রূপং ন পস্সতি, সোতেন সদ্দং ন সুণাতি – এৰং খো, ভো গোতম, দেসেতি পারাসিৰিযো ব্রাহ্মণো সাৰকানং ইন্দ্রিযভাৰন’’ন্তি. ‘‘এৰং সন্তে খো, উত্তর, অন্ধো ভাৰিতিন্দ্রিযো ভৰিস্সতি, বধিরো ভাৰিতিন্দ্রিযো ভৰিস্সতি; যথা পারাসিৰিযস্স ব্রাহ্মণস্স ৰচনং. অন্ধো হি, উত্তর, চক্খুনা রূপং ন পস্সতি, বধিরো সোতেন সদ্দং ন সুণাতী’’তি. এৰং ৰুত্তে, উত্তরো মাণৰো পারাসিৰিযন্তেৰাসী তুণ্হীভূতো মঙ্কুভূতো পত্তক্খন্ধো অধোমুখো পজ্ঝাযন্তো অপ্পটিভানো নিসীদি.

অথ খো ভগৰা উত্তরং মাণৰং পারাসিৰিযন্তেৰাসিং তুণ্হীভূতং মঙ্কুভূতং পত্তক্খন্ধং অধোমুখং পজ্ঝাযন্তং অপ্পটিভানং ৰিদিত্ৰা আযস্মন্তং আনন্দং আমন্তেসি – ‘‘অঞ্ঞথা খো, আনন্দ, দেসেতি পারাসিৰিযো ব্রাহ্মণো সাৰকানং ইন্দ্রিযভাৰনং, অঞ্ঞথা চ পনানন্দ, অরিযস্স ৰিনযে অনুত্তরা ইন্দ্রিযভাৰনা হোতী’’তি. ‘‘এতস্স, ভগৰা, কালো; এতস্স, সুগত, কালো যং ভগৰা অরিযস্স ৰিনযে অনুত্তরং ইন্দ্রিযভাৰনং দেসেয্য. ভগৰতো সুত্ৰা ভিক্খূ ধারেস্সন্তী’’তি. ‘‘তেনহানন্দ, সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো আযস্মা আনন্দো ভগৰতো পচ্চস্সোসি. ভগৰা এতদৰোচ –

৪৫৪. ‘‘কথঞ্চানন্দ, অরিযস্স ৰিনযে অনুত্তরা ইন্দ্রিযভাৰনা হোতি? ইধানন্দ, ভিক্খুনো চক্খুনা রূপং দিস্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, চক্খুমা পুরিসো উম্মীলেত্ৰা ৰা নিমীলেয্য, নিমীলেত্ৰা ৰা উম্মীলেয্য; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা চক্খুৰিঞ্ঞেয্যেসু রূপেসু.

৪৫৫. ‘‘পুন চপরং, আনন্দ, ভিক্খুনো সোতেন সদ্দং সুত্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, বলৰা পুরিসো অপ্পকসিরেনেৰ অচ্ছরং [অচ্ছরিকং (স্যা. কং. পী. ক.)] পহরেয্য; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা সোতৰিঞ্ঞেয্যেসু সদ্দেসু.

৪৫৬. ‘‘পুন চপরং, আনন্দ, ভিক্খুনো ঘানেন গন্ধং ঘাযিত্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, ঈসকংপোণে [ঈসকপোণে (সী. স্যা. কং. পী.), ঈসকফণে (সী. অট্ঠ.), ‘‘মজ্ঝে উচ্চং হুত্ৰা’’তি টীকায সংসন্দিতব্বা] পদুমপলাসে [পদুমিনিপত্তে (সী. স্যা. কং. পী.)] উদকফুসিতানি পৰত্তন্তি, ন সণ্ঠন্তি; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা ঘানৰিঞ্ঞেয্যেসু গন্ধেসু.

৪৫৭. ‘‘পুন চপরং, আনন্দ, ভিক্খুনো জিৰ্হায রসং সাযিত্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, বলৰা পুরিসো জিৰ্হগ্গে খেল়পিণ্ডং সংযূহিত্ৰা অপ্পকসিরেন ৰমেয্য [সন্ধমেয্য (ক.)]; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা জিৰ্হাৰিঞ্ঞেয্যেসু রসেসু.

৪৫৮. ‘‘পুন চপরং, আনন্দ, ভিক্খুনো কাযেন ফোট্ঠব্বং ফুসিত্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা কাযৰিঞ্ঞেয্যেসু ফোট্ঠব্বেসু.

৪৫৯. ‘‘পুন চপরং, আনন্দ, ভিক্খুনো মনসা ধম্মং ৰিঞ্ঞায উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো এৰং পজানাতি – ‘উপ্পন্নং খো মে ইদং মনাপং, উপ্পন্নং অমনাপং, উপ্পন্নং মনাপামনাপং. তঞ্চ খো সঙ্খতং ওল়ারিকং পটিচ্চসমুপ্পন্নং. এতং সন্তং এতং পণীতং যদিদং – উপেক্খা’তি. তস্স তং উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি; উপেক্খা সণ্ঠাতি. সেয্যথাপি, আনন্দ, বলৰা পুরিসো দিৰসংসন্তত্তে [দিৰসসন্তেত্তে (সী.)] অযোকটাহে দ্ৰে ৰা তীণি ৰা উদকফুসিতানি নিপাতেয্য. দন্ধো, আনন্দ, উদকফুসিতানং নিপাতো, অথ খো নং খিপ্পমেৰ পরিক্খযং পরিযাদানং গচ্ছেয্য; এৰমেৰ খো, আনন্দ, যস্স কস্সচি এৰংসীঘং এৰংতুৰটং এৰংঅপ্পকসিরেন উপ্পন্নং মনাপং উপ্পন্নং অমনাপং উপ্পন্নং মনাপামনাপং নিরুজ্ঝতি, উপেক্খা সণ্ঠাতি – অযং ৰুচ্চতানন্দ, অরিযস্স ৰিনযে অনুত্তরা ইন্দ্রিযভাৰনা মনোৰিঞ্ঞেয্যেসু ধম্মেসু. এৰং খো, আনন্দ, অরিযস্স ৰিনযে অনুত্তরা ইন্দ্রিযভাৰনা হোতি.

৪৬০. ‘‘কথঞ্চানন্দ, সেখো হোতি পাটিপদো? ইধানন্দ, ভিক্খুনো চক্খুনা রূপং দিস্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো তেন উপ্পন্নেন মনাপেন উপ্পন্নেন অমনাপেন উপ্পন্নেন মনাপামনাপেন অট্টীযতি হরাযতি জিগুচ্ছতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা…, জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো তেন উপ্পন্নেন মনাপেন উপ্পন্নেন অমনাপেন উপ্পন্নেন মনাপামনাপেন অট্টীযতি হরাযতি জিগুচ্ছতি. এৰং খো, আনন্দ, সেখো হোতি পাটিপদো.

৪৬১. ‘‘কথঞ্চানন্দ, অরিযো হোতি ভাৰিতিন্দ্রিযো? ইধানন্দ, ভিক্খুনো চক্খুনা রূপং দিস্ৰা উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো সচে আকঙ্খতি – ‘পটিকূলে [পটিক্কূলে (সব্বত্থ)] অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি – ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি – ‘পটিকূলে চ অপ্পটিকূলে চ অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি – ‘অপ্পটিকূলে চ পটিকূলে চ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি – ‘পটিকূলঞ্চ অপ্পটিকূলঞ্চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো.

৪৬২. ‘‘পুন চপরং, আনন্দ, ভিক্খুনো সোতেন সদ্দং সুত্ৰা…পে… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায উপ্পজ্জতি মনাপং, উপ্পজ্জতি অমনাপং, উপ্পজ্জতি মনাপামনাপং. সো সচে আকঙ্খতি – ‘পটিকূলে অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি – ‘অপ্পটিকূলে পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি – ‘পটিকূলে চ অপ্পটিকূলে চ অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি. সচে আকঙ্খতি – ‘অপ্পটিকূলে চ পটিকূলে চ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি. সচে আকঙ্খতি – ‘পটিকূলঞ্চ অপ্পটিকূলঞ্চ তদুভযম্পি অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো. এৰং খো, আনন্দ, অরিযো হোতি ভাৰিতিন্দ্রিযো.

৪৬৩. ‘‘ইতি খো, আনন্দ, দেসিতা মযা অরিযস্স ৰিনযে অনুত্তরা ইন্দ্রিযভাৰনা, দেসিতো সেখো পাটিপদো, দেসিতো অরিযো ভাৰিতিন্দ্রিযো. যং খো, আনন্দ, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, আনন্দ, রুক্খমূলানি, এতানি সুঞ্ঞাগারানি, ঝাযথানন্দ, মা পমাদত্থ, মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি.

ইদমৰোচ ভগৰা. অত্তমনো আযস্মা আনন্দো ভগৰতো ভাসিতং অভিনন্দীতি.

ইন্দ্রিযভাৰনাসুত্তং নিট্ঠিতং দসমং.

সল়াযতনৰগ্গো নিট্ঠিতো পঞ্চমো.